༡༣. ཀུ་ས་ནཱ་ལི༹་ཝ་གྒོ

༡༢༡. ཀ་རེ ས་རི་ཀྑོ ཨ་ཐ ཝཱ་པི སེ་ཊྛོ, ནི་ཧཱི་ན་ཀོ ཝཱ་པི ཀ་རེ་ཡྻ ཨེ་ཀོ;

ཀ་རེ་ཡྻུ་མེ་ཏེ [ཀ་རེ་ཡྻུཾ ཏེ (སཱི. པཱི.)] བྱ་ས་ནེ ཨུ་ཏྟ་མ་ཏྠཾ, ཡ་ཐཱ ཨ་ཧཾ ཀུ་ས་ནཱ་ལི༹ རུ་ཙཱ་ཡ་ནྟི.

ཀུ་ས་ནཱ་ལི༹་ཛཱ་ཏ་ཀཾ པ་ཋ་མཾ.

༡༢༢. ཡ་སཾ ལ་དྡྷཱ་ན དུ་མྨེ་དྷོ, ཨ་ན་ཏྠཾ ཙ་ར་ཏི ཨ་ཏྟ་ནོ;

ཨ་ཏྟ་ནོ ཙ པ་རེ་ས་ཉྩ, ཧིཾ་སཱ་ཡ པ་ཊི་པ་ཛྫ་ཏཱི་ཏི.

དུ་མྨེ་དྷ་ཛཱ་ཏ་ཀཾ དུ་ཏི་ཡཾ.

༡༢༣. ཨ་ས་བྦ་ཏྠ་གཱ་མིཾ ཝཱ་ཙཾ, བཱ་ལོ ས་བྦ་ཏྠ བྷཱ་ས་ཏི;

ནཱ་ཡཾ ད་དྷིཾ ཝེ་དི ན [ན ཝེ་དི (ཀ.)] ན་ངྒ་ལཱི་སཾ, ད་དྷི་པྤ་ཡཾ [ད་དྷི་མྤ་ཡཾ (སཱི. པཱི.)] མ་ཉྙ་ཏི ན་ངྒ་ལཱི་ས་ནྟི.

ན་ངྒ་ལཱི་ས་ཛཱ་ཏ་ཀཾ ཏ་ཏི་ཡཾ.

༡༢༤. ཝཱ་ཡ་མེ་ཐེ་ཝ པུ་རི་སོ, ན ནི་བྦི་ནྡེ་ཡྻ པ་ཎྜི་ཏོ;

ཝཱ་ཡཱ་མ་སྶ ཕ་ལཾ པ་སྶ, བྷུ་ཏྟཱ ཨ་མྦཱ ཨ་ནཱི་ཏི་ཧ་ནྟི.

ཨ་མྦ་ཛཱ་ཏ་ཀཾ ཙ་ཏུ་ཏྠཾ.

༡༢༥. བ་ཧུ་མྤི སོ ཝི་ཀ་ཏྠེ་ཡྻ, ཨ་ཉྙཾ ཛ་ན་པ་དཾ ག་ཏོ;

ཨ་ནྭཱ་ག་ནྟྭཱ་ན དཱུ་སེ་ཡྻ, བྷུ་ཉྫ བྷོ་གེ ཀ་ཊཱ་ཧ་ཀཱ་ཏི.

ཀ་ཊཱ་ཧ་ཀ་ཛཱ་ཏ་ཀཾ པ་ཉྩ་མཾ.

༡༢༦. ཏ་དེ་ཝེ་ཀ་སྶ [ཏ་ཐེ་ཝེ་ཀ་སྶ (སཱི. སྱཱ. པཱི. ཨ་ཊྛ. མཱུ་ལ་པཱ་ཋོ)] ཀ་ལྱཱ་ཎཾ, ཏ་དེ་ཝེ་ཀ་སྶ པཱ་པ་ཀཾ;

ཏ་སྨཱ ས་བྦཾ ན ཀ་ལྱཱ་ཎཾ, ས་བྦཾ ཝཱ་པི ན པཱ་པ་ཀ་ནྟི.

ཨ་སི་ལ་ཀྑ་ཎ་ཛཱ་ཏ་ཀཾ ཚ་ཊྛཾ.

༡༢༧. ཏེ དེ་སཱ ཏཱ་ནི ཝ་ཏྠཱུ་ནི, ཨ་ཧ་ཉྩ ཝ་ན་གོ་ཙ་རོ;

ཨ་ནུ་ཝི་ཙྩ ཁོ ཏཾ ག་ཎྷེ་ཡྻུཾ, པི་ཝ [པི་པ (སཱི. པཱི.)] ཁཱི་རཾ ཀ་ལ་ཎྜུ་ཀཱ་ཏི.

ཀ་ལ་ཎྜུ་ཀ་ཛཱ་ཏ་ཀཾ ས་ཏྟ་མཾ.

༡༢༨. ཡོ ཝེ དྷ་མྨཾ དྷ་ཛཾ [དྷ་མྨ་དྷ་ཛཾ (སྱཱ. པཱི. ཀ.)] ཀ་ཏྭཱ, ནི་གཱུ་ལ༹ྷོ པཱ་པ་མཱ་ཙ་རེ;

ཝི་སྶཱ་ས་ཡི་ཏྭཱ བྷཱུ་ཏཱ་ནི, བི་ལཱ༹་རཾ ནཱ་མ ཏཾ ཝ་ཏ་ནྟི.

བི་ལཱ༹་ར་ཝ་ཏ་ཛཱ་ཏ་ཀཾ ཨ་ཊྛ་མཾ.

༡༢༩. ནཱ་ཡཾ སི་ཁཱ པུ་ཉྙ་ཧེ་ཏུ, གྷཱ་ས་ཧེ་ཏུ ཨ་ཡཾ སི་ཁཱ;

ནཱ་ངྒུ་ཊྛ་ག་ཎ་ནཾ ཡཱ་ཏི, ཨ་ལཾ ཏེ ཧོ་ཏུ ཨ་གྒི་ཀཱ་ཏི.

ཨ་གྒི་ཀ་བྷཱ་ར་དྭཱ་ཛ་ཛཱ་ཏ་ཀཾ ན་ཝ་མཾ.

༡༣༠. ཡ་ཐཱ ཝཱ་ཙཱ ཙ བྷུ་ཉྫ་སྶུ, ཡ་ཐཱ བྷུ་ཏྟ་ཉྩ བྱཱ་ཧ་ར;

ཨུ་བྷ་ཡཾ ཏེ ན ས་མེ་ཏི, ཝཱ་ཙཱ བྷུ་ཏྟ་ཉྩ ཀོ་སི་ཡེ་ཏི.

ཀོ་སི་ཡ་ཛཱ་ཏ་ཀཾ ད་ས་མཾ.

ཀུ་ས་ནཱ་ལི༹་ཝ་གྒོ [ས་རི་ཀྑ་ཝ་གྒོ (ཀ.)] ཏེ་ར་ས་མོ.

ཏ་སྶུ་དྡཱ་ནཾ –

ཀུ་ས་ནཱ་ལི༹་སི་རི་ཝ྄ཧ་ཡ་ནོ ཙ ཡ་སཾ, ད་དྷི མ་མྦ ཀ་ཊཱ་ཧ་ཀ་པ་ཉྩ་མ་ཀོ;

ཨ་ཐ པཱ་པ་ཀ ཁཱི་ར བི་ལཱ༹་ར་ཝ་ཏཾ, སི་ཁི ཀོ་སི་ཡ་ས་ཝ྄ཧ་ཡ་ནེ་ན ད་སཱ་ཏི.