༡. ཝི་ཏ་ཀྐ་སུ་ཏྟཾ

༨༠. ཝུ་ཏྟ་ཉྷེ་ཏཾ བྷ་ག་ཝ་ཏཱ, ཝུ་ཏྟ་མ་ར་ཧ་ཏཱ་ཏི མེ སུ་ཏཾ –

‘‘ཏ་ཡོ་མེ, བྷི་ཀྑ་ཝེ, ཨ་ཀུ་ས་ལ་ཝི་ཏ་ཀྐཱ. ཀ་ཏ་མེ ཏ་ཡོ? ཨ་ན་ཝ་ཉྙ་ཏྟི་པ་ཊི་སཾ་ཡུ་ཏྟོ ཝི་ཏ་ཀྐོ, ལཱ་བྷ་ས་ཀྐཱ་ར་སི་ལོ་ཀ་པ་ཊི་སཾ་ཡུ་ཏྟོ ཝི་ཏ་ཀྐོ, པ་རཱ་ནུ་དྡ་ཡ་ཏཱ་པ་ཊི་སཾ་ཡུ་ཏྟོ ཝི་ཏ་ཀྐོ. ཨི་མེ ཁོ, བྷི་ཀྑ་ཝེ, ཏ་ཡོ ཨ་ཀུ་ས་ལ་ཝི་ཏ་ཀྐཱ’’ཏི. ཨེ་ཏ་མ་ཏྠཾ བྷ་ག་ཝཱ ཨ་ཝོ་ཙ. ཏ་ཏྠེ་ཏཾ ཨི་ཏི ཝུ་ཙྩ་ཏི –

‘‘ཨ་ན་ཝ་ཉྙ་ཏྟི་སཾ་ཡུ་ཏྟོ, ལཱ་བྷ་ས་ཀྐཱ་ར་གཱ་ར་ཝོ;

ས་ཧ་ན་ནྡཱི ཨ་མ་ཙྩེ་ཧི, ཨཱ་རཱ སཾ་ཡོ་ཛ་ན་ཀྑ་ཡཱ.

‘‘ཡོ ཙ པུ་ཏྟ་པ་སུཾ ཧི་ཏྭཱ, ཝི་ཝཱ་ཧེ སཾ་ཧ་རཱ་ནི [ས་ངྒ་ཧཱ་ནི (ཀ. སཱི. སྱཱ. པཱི.)] ཙ;

བྷ་བྦོ སོ ཏཱ་དི་སོ བྷི་ཀྑུ, ཕུ་ཊྛུཾ ས་མྦོ་དྷི་མུ་ཏྟ་མ’’ནྟི.

ཨ་ཡ་མྤི ཨ་ཏྠོ ཝུ་ཏྟོ བྷ་ག་ཝ་ཏཱ, ཨི་ཏི མེ སུ་ཏ་ནྟི. པ་ཋ་མཾ.