༩. པཱ་པ་ཝ་གྒོ
༡༡༦. ཨ་བྷི་ཏྠ་རེ་ཐ ཀ་ལྱཱ་ཎེ, པཱ་པཱ ཙི་ཏྟཾ ནི་ཝཱ་ར་ཡེ;
ད་ནྡྷ་ཉྷི ཀ་རོ་ཏོ པུ་ཉྙཾ, པཱ་པ་སྨིཾ ར་མ་ཏཱི མ་ནོ.
༡༡༧. པཱ་པ་ཉྩེ པུ་རི་སོ ཀ་ཡི་རཱ, ན ནཾ [ན ཏཾ (སཱི. པཱི.)] ཀ་ཡི་རཱ པུ་ན་པྤུ་ནཾ;
ན ཏ་མྷི ཚ་ནྡཾ ཀ་ཡི་རཱ་ཐ, དུ་ཀྑོ པཱ་པ་སྶ ཨུ་ཙྩ་ཡོ.
༡༡༨. པུ་ཉྙ་ཉྩེ པུ་རི་སོ ཀ་ཡི་རཱ, ཀ་ཡི་རཱ ནཾ [ཀ་ཡི་རཱ་ཐེ་ཏཾ (སཱི. སྱཱ.), ཀ་ཡི་རཱ་ཐེ་ནཾ (པཱི.)] པུ་ན་པྤུ་ནཾ;
ཏ་མྷི ཚ་ནྡཾ ཀ་ཡི་རཱ་ཐ, སུ་ཁོ པུ་ཉྙ་སྶ ཨུ་ཙྩ་ཡོ.
༡༡༩. པཱ་པོ་པི པ་སྶ་ཏི བྷ་དྲཾ, ཡཱ་ཝ པཱ་པཾ ན པ་ཙྩ་ཏི;
ཡ་དཱ ཙ པ་ཙྩ་ཏི པཱ་པཾ, ཨ་ཐ པཱ་པོ པཱ་པཱ་ནི [ཨ་ཐ པཱ་པཱ་ནི (?)] པ་སྶ་ཏི.
༡༢༠. བྷ་དྲོ་པི པ་སྶ་ཏི པཱ་པཾ, ཡཱ་ཝ བྷ་དྲཾ ན པ་ཙྩ་ཏི;
ཡ་དཱ ཙ པ་ཙྩ་ཏི བྷ་དྲཾ, ཨ་ཐ བྷ་དྲོ བྷ་དྲཱ་ནི [ཨ་ཐ བྷ་དྲཱ་ནི (?)] པ་སྶ་ཏི.
༡༢༡. མཱ་ཝ་མ་ཉྙེ་ཐ [མཱ་པྤ་མ་ཉྙེ་ཐ (སཱི. སྱཱ. པཱི.)] པཱ་པ་སྶ, ན མ་ནྟཾ [ན མཾ ཏཾ (སཱི. པཱི.), ན མ་ཏྟཾ (སྱཱ.)] ཨཱ་ག་མི་སྶ་ཏི;
ཨུ་ད་བི་ནྡུ་ནི་པཱ་ཏེ་ན, ཨུ་ད་ཀུ་མྦྷོ་པི པཱུ་ར་ཏི;
བཱ་ལོ པཱུ་ར་ཏི [པཱུ་ར་ཏི བཱ་ལོ (སཱི. ཀ.), ཨཱ་པཱུ་ར་ཏི བཱ་ལོ (སྱཱ.)] པཱ་པ་སྶ, ཐོ་ཀཾ ཐོ་ཀ་མྤི [ཐོ་ཀ ཐོ་ཀ་མྤི (སཱི. པཱི.)] ཨཱ་ཙི་ནཾ.
༡༢༢. མཱ་ཝ་མ་ཉྙེ་ཐ པུ་ཉྙ་སྶ, ན མ་ནྟཾ ཨཱ་ག་མི་སྶ་ཏི;
ཨུ་ད་བི་ནྡུ་ནི་པཱ་ཏེ་ན, ཨུ་ད་ཀུ་མྦྷོ་པི པཱུ་ར་ཏི;
དྷཱི་རོ པཱུ་ར་ཏི པུ་ཉྙ་སྶ, ཐོ་ཀཾ ཐོ་ཀ་མྤི ཨཱ་ཙི་ནཾ.
༡༢༣. ཝཱ་ཎི་ཛོ་ཝ བྷ་ཡཾ མ་གྒཾ, ཨ་པྤ་ས་ཏྠོ མ་ཧ་དྡྷ་ནོ;
ཝི་སཾ ཛཱི་ཝི་ཏུ་ཀཱ་མོ་ཝ, པཱ་པཱ་ནི པ་རི་ཝ་ཛྫ་ཡེ.
༡༢༤. པཱ་ཎི་མྷི ཙེ ཝ་ཎོ ནཱ་སྶ, ཧ་རེ་ཡྻ པཱ་ཎི་ནཱ ཝི་སཾ;
ནཱ་བྦ་ཎཾ ཝི་ས་མ་ནྭེ་ཏི, ན་ཏྠི པཱ་པཾ ཨ་ཀུ་བྦ་ཏོ.
༡༢༥. ཡོ ཨ་པྤ་དུ་ཊྛ་སྶ ན་ར་སྶ དུ་སྶ་ཏི, སུ་དྡྷ་སྶ པོ་ས་སྶ ཨ་ན་ངྒ་ཎ་སྶ;
ཏ་མེ་ཝ བཱ་ལཾ པ་ཙྩེ་ཏི པཱ་པཾ, སུ་ཁུ་མོ ར་ཛོ པ་ཊི་ཝཱ་ཏཾ་ཝ ཁི་ཏྟོ.
༡༢༦. ག་བྦྷ་མེ་ཀེ ཨུ་པྤ་ཛྫ་ནྟི, ནི་ར་ཡཾ པཱ་པ་ཀ་མྨི་ནོ;
ས་གྒཾ སུ་ག་ཏི་ནོ ཡ་ནྟི, པ་རི་ནི་བྦ་ནྟི ཨ་ནཱ་ས་ཝཱ.
༡༢༧. ན ཨ་ནྟ་ལི་ཀྑེ ན ས་མུ་དྡ་མ་ཛ྄ཛྷེ, ན པ་བྦ་ཏཱ་ནཾ ཝི་ཝ་རཾ པ་ཝི་སྶ [པ་ཝི་སཾ (སྱཱ.)];
ན ཝི་ཛྫ་ཏཱི [ན ཝི་ཛྫ་ཏི (ཀ. སཱི. པཱི. ཀ.)] སོ ཛ་ག་ཏི་པྤ་དེ་སོ, ཡ་ཏྠ་ཊྛི་ཏོ [ཡ་ཏྲ་ཊྛི་ཏོ (སྱཱ.)] མུ་ཙྩེ་ཡྻ པཱ་པ་ཀ་མྨཱ.
༡༢༨. ན ཨ་ནྟ་ལི་ཀྑེ ན ས་མུ་དྡ་མ་ཛ྄ཛྷེ, ན པ་བྦ་ཏཱ་ནཾ ཝི་ཝ་རཾ པ་ཝི་སྶ;
ན ཝི་ཛྫ་ཏཱི སོ ཛ་ག་ཏི་པྤ་དེ་སོ, ཡ་ཏྠ་ཊྛི་ཏཾ [ཡ་ཏྲ་ཊྛི་ཏཾ (སྱཱ.)] ན་པྤ་ས་ཧེ་ཡྻ མ་ཙྩུ.
པཱ་པ་ཝ་གྒོ ན་ཝ་མོ ནི་ཊྛི་ཏོ.