ན་མོ ཏ་སྶ བྷ་ག་ཝ་ཏོ ཨ་ར་ཧ་ཏོ ས་མྨཱ་ས་མྦུ་དྡྷ་སྶ
ཁུ་དྡ་ཀ་ནི་ཀཱ་ཡེ
དྷ་མྨ་པ་ད་པཱ་ལི༹
༡. ཡ་མ་ཀ་ཝ་གྒོ
༡. མ་ནོ་པུ་བྦ་ངྒ་མཱ དྷ་མྨཱ, མ་ནོ་སེ་ཊྛཱ མ་ནོ་མ་ཡཱ;
མ་ན་སཱ ཙེ པ་དུ་ཊྛེ་ན, བྷཱ་ས་ཏི ཝཱ ཀ་རོ་ཏི ཝཱ;
ཏ་ཏོ ནཾ དུ་ཀྑ་མ་ནྭེ་ཏི, ཙ་ཀྐཾ་ཝ ཝ་ཧ་ཏོ པ་དཾ.
༢. མ་ནོ་པུ་བྦ་ངྒ་མཱ དྷ་མྨཱ, མ་ནོ་སེ་ཊྛཱ མ་ནོ་མ་ཡཱ;
མ་ན་སཱ ཙེ པ་ས་ནྣེ་ན, བྷཱ་ས་ཏི ཝཱ ཀ་རོ་ཏི ཝཱ;
ཏ་ཏོ ནཾ སུ་ཁ་མ་ནྭེ་ཏི, ཚཱ་ཡཱ་ཝ ཨ་ན་པཱ་ཡི་ནཱི [ཨ་ནུ་པཱ་ཡི་ནཱི (ཀ.)].
༣. ཨ་ཀྐོ་ཙྪི མཾ ཨ་ཝ་དྷི མཾ, ཨ་ཛི་ནི [ཨ་ཛི་ནཱི (?)] མཾ ཨ་ཧཱ་སི མེ;
ཡེ ཙ ཏཾ ཨུ་པ་ན་ཡ྄ཧ་ནྟི, ཝེ་རཾ ཏེ་སཾ ན ས་མྨ་ཏི.
༤. ཨ་ཀྐོ་ཙྪི མཾ ཨ་ཝ་དྷི མཾ, ཨ་ཛི་ནི མཾ ཨ་ཧཱ་སི མེ;
ཡེ ཙ ཏཾ ནུ་པ་ན་ཡ྄ཧ་ནྟི, ཝེ་རཾ ཏེ་སཱུ་པ་ས་མྨ་ཏི.
༥. ན ཧི ཝེ་རེ་ན ཝེ་རཱ་ནི, ས་མྨ་ནྟཱི་དྷ ཀུ་དཱ་ཙ་ནཾ;
ཨ་ཝེ་རེ་ན ཙ ས་མྨ་ནྟི, ཨེ་ས དྷ་མྨོ ས་ན་ནྟ་ནོ.
༦. པ་རེ ཙ ན ཝི་ཛཱ་ན་ནྟི, མ་ཡ་མེ་ཏྠ ཡ་མཱ་མ་སེ;
ཡེ ཙ ཏ་ཏྠ ཝི་ཛཱ་ན་ནྟི, ཏ་ཏོ ས་མྨ་ནྟི མེ་དྷ་གཱ.
༧. སུ་བྷཱ་ནུ་པ་སྶིཾ ཝི་ཧ་ར་ནྟཾ, ཨི་ནྡྲི་ཡེ་སུ ཨ་སཾ་ཝུ་ཏཾ;
བྷོ་ཛ་ན་མྷི ཙཱ་མ་ཏྟ་ཉྙུཾ, ཀུ་སཱི་ཏཾ ཧཱི་ན་ཝཱི་རི་ཡཾ;
ཏཾ ཝེ པ་ས་ཧ་ཏི མཱ་རོ, ཝཱ་ཏོ རུ་ཀྑཾ་ཝ དུ་བྦ་ལཾ.
༨. ཨ་སུ་བྷཱ་ནུ་པ་སྶིཾ ཝི་ཧ་ར་ནྟཾ, ཨི་ནྡྲི་ཡེ་སུ སུ་སཾ་ཝུ་ཏཾ;
བྷོ་ཛ་ན་མྷི ཙ མ་ཏྟ་ཉྙུཾ, ས་དྡྷཾ ཨཱ་ར་དྡྷ་ཝཱི་རི་ཡཾ;
ཏཾ ཝེ ན་པྤ་ས་ཧ་ཏི མཱ་རོ, ཝཱ་ཏོ སེ་ལཾ་ཝ པ་བྦ་ཏཾ.
༩. ཨ་ནི་ཀྐ་སཱ་ཝོ ཀཱ་སཱ་ཝཾ, ཡོ ཝ་ཏྠཾ པ་རི་ད་ཧི་སྶ་ཏི;
ཨ་པེ་ཏོ ད་མ་ས་ཙྩེ་ན, ན སོ ཀཱ་སཱ་ཝ་མ་ར་ཧ་ཏི.
༡༠. ཡོ ཙ ཝ་ནྟ་ཀ་སཱ་ཝ་སྶ, སཱི་ལེ་སུ སུ་ས་མཱ་ཧི་ཏོ;
ཨུ་པེ་ཏོ ད་མ་ས་ཙྩེ་ན, ས ཝེ ཀཱ་སཱ་ཝ་མ་ར་ཧ་ཏི.
༡༡. ཨ་སཱ་རེ སཱ་ར་མ་ཏི་ནོ, སཱ་རེ ཙཱ་སཱ་ར་ད་སྶི་ནོ;
ཏེ སཱ་རཾ ནཱ་དྷི་ག་ཙྪ་ནྟི, མི་ཙྪཱ་ས་ངྐ་པྤ་གོ་ཙ་རཱ.
༡༢. སཱ་ར་ཉྩ སཱ་ར་ཏོ ཉ་ཏྭཱ, ཨ་སཱ་ར་ཉྩ ཨ་སཱ་ར་ཏོ;
ཏེ སཱ་རཾ ཨ་དྷི་ག་ཙྪ་ནྟི, ས་མྨཱ་ས་ངྐ་པྤ་གོ་ཙ་རཱ.
༡༣. ཡ་ཐཱ ཨ་གཱ་རཾ དུ་ཙྪ་ནྣཾ, ཝུ་ཊྛཱི ས་མ་ཏི་ཝི་ཛ྄ཛྷ་ཏི;
ཨེ་ཝཾ ཨ་བྷཱ་ཝི་ཏཾ ཙི་ཏྟཾ, རཱ་གོ ས་མ་ཏི་ཝི་ཛ྄ཛྷ་ཏི.
༡༤. ཡ་ཐཱ ཨ་གཱ་རཾ སུ་ཚ་ནྣཾ, ཝུ་ཊྛཱི ན ས་མ་ཏི་ཝི་ཛ྄ཛྷ་ཏི;
ཨེ་ཝཾ སུ་བྷཱ་ཝི་ཏཾ ཙི་ཏྟཾ, རཱ་གོ ན ས་མ་ཏི་ཝི་ཛ྄ཛྷ་ཏི.
༡༥. ཨི་དྷ སོ་ཙ་ཏི པེ་ཙྩ སོ་ཙ་ཏི, པཱ་པ་ཀཱ་རཱི ཨུ་བྷ་ཡ་ཏྠ སོ་ཙ་ཏི;
སོ སོ་ཙ་ཏི སོ ཝི་ཧ་ཉྙ་ཏི, དི་སྭཱ ཀ་མྨ་ཀི་ལི་ཊྛ་མ་ཏྟ་ནོ.
༡༦. ཨི་དྷ མོ་ད་ཏི པེ་ཙྩ མོ་ད་ཏི, ཀ་ཏ་པུ་ཉྙོ ཨུ་བྷ་ཡ་ཏྠ མོ་ད་ཏི;
སོ མོ་ད་ཏི སོ པ་མོ་ད་ཏི, དི་སྭཱ ཀ་མྨ་ཝི་སུ་དྡྷི་མ་ཏྟ་ནོ.
༡༧. ཨི་དྷ ཏ་པྤ་ཏི པེ་ཙྩ ཏ་པྤ་ཏི, པཱ་པ་ཀཱ་རཱི [པཱ་པ་ཀཱ་རི (?)] ཨུ་བྷ་ཡ་ཏྠ ཏ་པྤ་ཏི;
‘‘པཱ་པཾ མེ ཀ་ཏ’’ནྟི ཏ་པྤ་ཏི, བྷི་ཡྻོ [བྷཱི་ཡོ (སཱི.)] ཏ་པྤ་ཏི དུ་གྒ་ཏིཾ ག་ཏོ.
༡༨. ཨི་དྷ ན་ནྡ་ཏི པེ་ཙྩ ན་ནྡ་ཏི, ཀ་ཏ་པུ་ཉྙོ ཨུ་བྷ་ཡ་ཏྠ ན་ནྡ་ཏི;
‘‘པུ་ཉྙཾ མེ ཀ་ཏ’’ནྟི ན་ནྡ་ཏི, བྷི་ཡྻོ ན་ནྡ་ཏི སུ་གྒ་ཏིཾ ག་ཏོ.
༡༩. བ་ཧུ་མྤི ཙེ སཾ་ཧི་ཏ [ས་ཧི་ཏཾ (སཱི. སྱཱ. ཀཾ. པཱི.)] བྷཱ་ས་མཱ་ནོ, ན ཏ་ཀྐ་རོ ཧོ་ཏི ན་རོ པ་མ་ཏྟོ;
གོ་པོ་ཝ གཱ་ཝོ ག་ཎ་ཡཾ པ་རེ་སཾ, ན བྷཱ་ག་ཝཱ སཱ་མ་ཉྙ་སྶ ཧོ་ཏི.
༢༠. ཨ་པྤ་མྤི ཙེ སཾ་ཧི་ཏ བྷཱ་ས་མཱ་ནོ, དྷ་མྨ་སྶ ཧོ་ཏི [ཧོ་ཏཱི (སཱི. པཱི.)] ཨ་ནུ་དྷ་མྨ་ཙཱ་རཱི;
རཱ་ག་ཉྩ དོ་ས་ཉྩ པ་ཧཱ་ཡ མོ་ཧཾ, ས་མྨ་པྤ་ཛཱ་ནོ སུ་ཝི་མུ་ཏྟ་ཙི་ཏྟོ;
ཨ་ནུ་པཱ་དི་ཡཱ་ནོ ཨི་དྷ ཝཱ ཧུ་རཾ ཝཱ, ས བྷཱ་ག་ཝཱ སཱ་མ་ཉྙ་སྶ ཧོ་ཏི.
ཡ་མ་ཀ་ཝ་གྒོ པ་ཋ་མོ ནི་ཊྛི་ཏོ.
༢. ཨ་པྤ་མཱ་ད་ཝ་གྒོ
༢༡. ཨ་པྤ་མཱ་དོ ཨ་མ་ཏ་པ་དཾ [ཨ་མ་ཏཾ པ་དཾ (ཀ.)], པ་མཱ་དོ མ་ཙྩུ་ནོ པ་དཾ;
ཨ་པྤ་མ་ཏྟཱ ན མཱི་ཡ་ནྟི, ཡེ པ་མ་ཏྟཱ ཡ་ཐཱ མ་ཏཱ.
༢༢. ཨེ་ཝཾ [ཨེ་ཏཾ (སཱི. སྱཱ. ཀཾ. པཱི.)] ཝི་སེ་ས་ཏོ ཉ་ཏྭཱ, ཨ་པྤ་མཱ་ད་མྷི པ་ཎྜི་ཏཱ;
ཨ་པྤ་མཱ་དེ པ་མོ་ད་ནྟི, ཨ་རི་ཡཱ་ནཾ གོ་ཙ་རེ ར་ཏཱ.
༢༣. ཏེ ཛྷཱ་ཡི་ནོ སཱ་ཏ་ཏི་ཀཱ, ནི་ཙྩཾ ད་ལ༹ྷ་པ་ར་ཀྐ་མཱ;
ཕུ་ས་ནྟི དྷཱི་རཱ ནི་བྦཱ་ནཾ, ཡོ་ག་ཀྑེ་མཾ ཨ་ནུ་ཏྟ་རཾ.
༢༤. ཨུ་ཊྛཱ་ན་ཝ་ཏོ ས་ཏཱི་མ་ཏོ [ས་ཏི་མ་ཏོ (སཱི. སྱཱ. ཀ.)], སུ་ཙི་ཀ་མྨ་སྶ ནི་ས་མྨ་ཀཱ་རི་ནོ;
ས་ཉྙ་ཏ་སྶ དྷ་མྨ་ཛཱི་ཝི་ནོ, ཨ་པྤ་མ་ཏྟ་སྶ [ཨ་པ་མ་ཏྟ་སྶ (?)] ཡ་སོ་བྷི་ཝ་ཌྜྷ་ཏི.
༢༥. ཨུ་ཊྛཱ་ནེ་ན་པྤ་མཱ་དེ་ན, སཾ་ཡ་མེ་ན ད་མེ་ན ཙ;
དཱི་པཾ ཀ་ཡི་རཱ་ཐ མེ་དྷཱ་ཝཱི, ཡཾ ཨོ་གྷོ ནཱ་བྷི་ཀཱི་ར་ཏི.
༢༦. པ་མཱ་ད་མ་ནུ་ཡུ་ཉྫ་ནྟི, བཱ་ལཱ དུ་མྨེ་དྷི་ནོ ཛ་ནཱ;
ཨ་པྤ་མཱ་ད་ཉྩ མེ་དྷཱ་ཝཱི, དྷ་ནཾ སེ་ཊྛཾ་ཝ ར་ཀྑ་ཏི.
༢༧. མཱ པ་མཱ་ད་མ་ནུ་ཡུ་ཉྫེ་ཐ, མཱ ཀཱ་མ་ར་ཏི་ས་ནྠ་ཝཾ [ས་ནྡྷ་ཝཾ (ཀ)];
ཨ་པྤ་མ་ཏྟོ ཧི ཛྷཱ་ཡ་ནྟོ, པ་པྤོ་ཏི ཝི་པུ་ལཾ སུ་ཁཾ.
༢༨. པ་མཱ་དཾ ཨ་པྤ་མཱ་དེ་ན, ཡ་དཱ ནུ་ད་ཏི པ་ཎྜི་ཏོ;
པ་ཉྙཱ་པཱ་སཱ་ད་མཱ་རུ་ཡ྄ཧ, ཨ་སོ་ཀོ སོ་ཀི་ནིཾ པ་ཛཾ;
པ་བྦ་ཏ་ཊྛོ་ཝ བྷཱུ་མ་ཊྛེ [བྷུ་མྨ་ཊྛེ (སཱི. སྱཱ.)], དྷཱི་རོ བཱ་ལེ ཨ་ཝེ་ཀྑ་ཏི.
༢༩. ཨ་པྤ་མ་ཏྟོ པ་མ་ཏྟེ་སུ, སུ་ཏྟེ་སུ བ་ཧུ་ཛཱ་ག་རོ;
ཨ་བ་ལ་སྶཾ་ཝ སཱི་གྷ་སྶོ, ཧི་ཏྭཱ ཡཱ་ཏི སུ་མེ་དྷ་སོ.
༣༠. ཨ་པྤ་མཱ་དེ་ན མ་གྷ་ཝཱ, དེ་ཝཱ་ནཾ སེ་ཊྛ་ཏཾ ག་ཏོ;
ཨ་པྤ་མཱ་དཾ པ་སཾ་ས་ནྟི, པ་མཱ་དོ ག་ར་ཧི་ཏོ ས་དཱ.
༣༡. ཨ་པྤ་མཱ་ད་ར་ཏོ བྷི་ཀྑུ, པ་མཱ་དེ བྷ་ཡ་ད་སྶི ཝཱ;
སཾ་ཡོ་ཛ་ནཾ ཨ་ཎུཾ ཐཱུ་ལཾ, ཌ་ཧཾ ཨ་གྒཱི་ཝ ག་ཙྪ་ཏི.
༣༢. ཨ་པྤ་མཱ་ད་ར་ཏོ བྷི་ཀྑུ, པ་མཱ་དེ བྷ་ཡ་ད་སྶི ཝཱ;
ཨ་བྷ་བྦོ པ་རི་ཧཱ་ནཱ་ཡ, ནི་བྦཱ་ན་སྶེ་ཝ ས་ནྟི་ཀེ.
ཨ་པྤ་མཱ་ད་ཝ་གྒོ དུ་ཏི་ཡོ ནི་ཊྛི་ཏོ.
༣. ཙི་ཏྟ་ཝ་གྒོ
༣༣. ཕ་ནྡ་ནཾ ཙ་པ་ལཾ ཙི་ཏྟཾ, དཱུ་ར་ཀྑཾ [དུ་ར་ཀྑཾ (ས་བྦ་ཏྠ)] དུ་ནྣི་ཝཱ་ར་ཡཾ;
ཨུ་ཛུཾ ཀ་རོ་ཏི མེ་དྷཱ་ཝཱི, ཨུ་སུ་ཀཱ་རོ་ཝ ཏེ་ཛ་ནཾ.
༣༤. ཝཱ་རི་ཛོ་ཝ ཐ་ལེ ཁི་ཏྟོ, ཨོ་ཀ་མོ་ཀ་ཏ་ཨུ་བྦྷ་ཏོ;
པ་རི་ཕ་ནྡ་ཏི་དཾ ཙི་ཏྟཾ, མཱ་ར་དྷེ་ཡྻཾ པ་ཧཱ་ཏ་ཝེ.
༣༥. དུ་ནྣི་གྒ་ཧ་སྶ ལ་ཧུ་ནོ, ཡ་ཏྠ་ཀཱ་མ་ནི་པཱ་ཏི་ནོ;
ཙི་ཏྟ་སྶ ད་མ་ཐོ སཱ་དྷུ, ཙི་ཏྟཾ ད་ནྟཾ སུ་ཁཱ་ཝ་ཧཾ.
༣༦. སུ་དུ་དྡ་སཾ སུ་ནི་པུ་ཎཾ, ཡ་ཏྠ་ཀཱ་མ་ནི་པཱ་ཏི་ནཾ;
ཙི་ཏྟཾ ར་ཀྑེ་ཐ མེ་དྷཱ་ཝཱི, ཙི་ཏྟཾ གུ་ཏྟཾ སུ་ཁཱ་ཝ་ཧཾ.
༣༧. དཱུ་ར་ངྒ་མཾ ཨེ་ཀ་ཙ་རཾ [ཨེ་ཀ་ཙཱ་རཾ (ཀ.)], ཨ་ས་རཱི་རཾ གུ་ཧཱ་ས་ཡཾ;
ཡེ ཙི་ཏྟཾ སཾ་ཡ་མེ་སྶ་ནྟི, མོ་ཀྑ་ནྟི མཱ་ར་བ་ནྡྷ་ནཱ.
༣༨. ཨ་ན་ཝ་ཊྛི་ཏ་ཙི་ཏྟ་སྶ, ས་དྡྷ་མྨཾ ཨ་ཝི་ཛཱ་ན་ཏོ;
པ་རི་པླ་ཝ་པ་སཱ་ད་སྶ, པ་ཉྙཱ ན པ་རི་པཱུ་ར་ཏི.
༣༩. ཨ་ན་ཝ་སྶུ་ཏ་ཙི་ཏྟ་སྶ, ཨ་ན་ནྭཱ་ཧ་ཏ་ཙེ་ཏ་སོ;
པུ་ཉྙ་པཱ་པ་པ་ཧཱི་ན་སྶ, ན་ཏྠི ཛཱ་ག་ར་ཏོ བྷ་ཡཾ.
༤༠. ཀུ་མྦྷཱུ་པ་མཾ ཀཱ་ཡ་མི་མཾ ཝི་དི་ཏྭཱ, ན་ག་རཱུ་པ་མཾ ཙི་ཏྟ་མི་དཾ ཋ་པེ་ཏྭཱ;
ཡོ་དྷེ་ཐ མཱ་རཾ པ་ཉྙཱ་ཝུ་དྷེ་ན, ཛི་ཏ་ཉྩ ར་ཀྑེ ཨ་ནི་ཝེ་ས་ནོ སི་ཡཱ.
༤༡. ཨ་ཙི་རཾ ཝ་ཏ་ཡཾ ཀཱ་ཡོ, པ་ཐ་ཝིཾ ཨ་དྷི་སེ་སྶ་ཏི;
ཚུ་དྡྷོ ཨ་པེ་ཏ་ཝི་ཉྙཱ་ཎོ, ནི་ར་ཏྠཾ་ཝ ཀ་ལི་ངྒ་རཾ.
༤༢. དི་སོ དི་སཾ ཡཾ ཏཾ ཀ་ཡི་རཱ, ཝེ་རཱི ཝཱ པ་ན ཝེ་རི་ནཾ;
མི་ཙྪཱ་པ་ཎི་ཧི་ཏཾ ཙི་ཏྟཾ, པཱ་པི་ཡོ [པཱ་པི་ཡཾ (?)] ནཾ ཏ་ཏོ ཀ་རེ.
༤༣. ན ཏཾ མཱ་ཏཱ པི་ཏཱ ཀ་ཡི་རཱ, ཨ་ཉྙེ ཝཱ་པི ཙ ཉཱ་ཏ་ཀཱ;
ས་མྨཱ་པ་ཎི་ཧི་ཏཾ ཙི་ཏྟཾ, སེ་ཡྻ་སོ ནཾ ཏ་ཏོ ཀ་རེ.
ཙི་ཏྟ་ཝ་གྒོ ཏ་ཏི་ཡོ ནི་ཊྛི་ཏོ.
༤. པུ་པྥ་ཝ་གྒོ
༤༤. ཀོ ཨི་མཾ [ཀོ་མཾ (ཀ.)] པ་ཐ་ཝིཾ ཝི་ཙེ་སྶ་ཏི [ཝི་ཛེ་སྶ་ཏི (སཱི. སྱཱ. པཱི.)], ཡ་མ་ལོ་ཀ་ཉྩ ཨི་མཾ ས་དེ་ཝ་ཀཾ;
ཀོ དྷ་མྨ་པ་དཾ སུ་དེ་སི་ཏཾ, ཀུ་ས་ལོ པུ་པྥ་མི་ཝ པ་ཙེ་སྶ་ཏི [པུ་པྥ་མི་ཝ་པྤ་ཙེ་སྶ་ཏི (ཀ.)].
༤༥. སེ་ཁོ པ་ཐ་ཝིཾ ཝི་ཙེ་སྶ་ཏི, ཡ་མ་ལོ་ཀ་ཉྩ ཨི་མཾ ས་དེ་ཝ་ཀཾ;
སེ་ཁོ དྷ་མྨ་པ་དཾ སུ་དེ་སི་ཏཾ, ཀུ་ས་ལོ པུ་པྥ་མི་ཝ པ་ཙེ་སྶ་ཏི.
༤༦. ཕེ་ཎཱུ་པ་མཾ ཀཱ་ཡ་མི་མཾ ཝི་དི་ཏྭཱ, མ་རཱི་ཙི་དྷ་མྨཾ ཨ་བྷི་ས་མྦུ་དྷཱ་ནོ;
ཚེ་ཏྭཱ་ན མཱ་ར་སྶ པ་པུ་པྥ་ཀཱ་ནི [ས་པུ་པྥ་ཀཱ་ནི (ཊཱི་ཀཱ)], ཨ་ད་སྶ་ནཾ མ་ཙྩུ་རཱ་ཛ་སྶ ག་ཙྪེ.
༤༧. པུ་པྥཱ་ནི ཧེ་ཝ པ་ཙི་ན་ནྟཾ, བྱཱ་ས་ཏྟ་མ་ན་སཾ [བྱཱ་ས་ཏྟ་མཱ་ན་སཾ (ཀ.)] ན་རཾ;
སུ་ཏྟཾ གཱ་མཾ མ་ཧོ་གྷོ་ཝ, མ་ཙྩུ ཨཱ་དཱ་ཡ ག་ཙྪ་ཏི.
༤༨. པུ་པྥཱ་ནི ཧེ་ཝ པ་ཙི་ན་ནྟཾ, བྱཱ་ས་ཏྟ་མ་ན་སཾ ན་རཾ;
ཨ་ཏི་ཏྟ་ཉྙེ་ཝ ཀཱ་མེ་སུ, ཨ་ནྟ་ཀོ ཀུ་རུ་ཏེ ཝ་སཾ.
༤༩. ཡ་ཐཱ་པི བྷ་མ་རོ པུ་པྥཾ, ཝ་ཎྞ་ག་ནྡྷ་མ་ཧེ་ཋ་ཡཾ [ཝ་ཎྞ་ག་ནྡྷ་མ་པོ་ཋ་ཡཾ (ཀ.)];
པ་ལེ་ཏི ར་ས་མཱ་དཱ་ཡ, ཨེ་ཝཾ གཱ་མེ མུ་ནཱི ཙ་རེ.
༥༠. ན པ་རེ་སཾ ཝི་ལོ་མཱ་ནི, ན པ་རེ་སཾ ཀ་ཏཱ་ཀ་ཏཾ;
ཨ་ཏྟ་ནོ་ཝ ཨ་ཝེ་ཀྑེ་ཡྻ, ཀ་ཏཱ་ནི ཨ་ཀ་ཏཱ་ནི ཙ.
༥༡. ཡ་ཐཱ་པི རུ་ཙི་རཾ པུ་པྥཾ, ཝ་ཎྞ་ཝ་ནྟཾ ཨ་ག་ནྡྷ་ཀཾ;
ཨེ་ཝཾ སུ་བྷཱ་སི་ཏཱ ཝཱ་ཙཱ, ཨ་ཕ་ལཱ ཧོ་ཏི ཨ་ཀུ་བྦ་ཏོ.
༥༢. ཡ་ཐཱ་པི རུ་ཙི་རཾ པུ་པྥཾ, ཝ་ཎྞ་ཝ་ནྟཾ སུ་ག་ནྡྷ་ཀཾ [ས་ག་ནྡྷ་ཀཾ (སཱི. སྱཱ. ཀཾ. པཱི.)];
ཨེ་ཝཾ སུ་བྷཱ་སི་ཏཱ ཝཱ་ཙཱ, ས་ཕ་ལཱ ཧོ་ཏི ཀུ་བྦ་ཏོ [ས་ཀུ་བྦ་ཏོ (སཱི. པཱི.), པ་ཀུ་བྦ་ཏོ (སཱི. ཨ་ཊྛ.), སུ་ཀུ་བྦ་ཏོ (སྱཱ. ཀཾ.)].
༥༣. ཡ་ཐཱ་པི པུ་པྥ་རཱ་སི་མྷཱ, ཀ་ཡི་རཱ མཱ་ལཱ་གུ་ཎེ བ་ཧཱུ;
ཨེ་ཝཾ ཛཱ་ཏེ་ན མ་ཙྩེ་ན, ཀ་ཏྟ་བྦཾ ཀུ་ས་ལཾ བ་ཧུཾ.
༥༤. ན པུ་པྥ་ག་ནྡྷོ པ་ཊི་ཝཱ་ཏ་མེ་ཏི, ན ཙ་ནྡ་ནཾ ཏ་ག་ར་མ་ལླི་ཀཱ [ཏ་ག་ར་མ་ལླི་ཀཱ (སཱི. སྱཱ. ཀཾ. པཱི.)];
ས་ཏ་ཉྩ ག་ནྡྷོ པ་ཊི་ཝཱ་ཏ་མེ་ཏི, ས་བྦཱ དི་སཱ ས་པྤུ་རི་སོ པ་ཝཱ་ཡ་ཏི.
༥༥. ཙ་ནྡ་ནཾ ཏ་ག་རཾ ཝཱ་པི, ཨུ་པྤ་ལཾ ཨ་ཐ ཝ་སྶི་ཀཱི;
ཨེ་ཏེ་སཾ ག་ནྡྷ་ཛཱ་ཏཱ་ནཾ, སཱི་ལ་ག་ནྡྷོ ཨ་ནུ་ཏྟ་རོ.
༥༦. ཨ་པྤ་མ་ཏྟོ ཨ་ཡཾ ག་ནྡྷོ, ཡྭཱ་ཡཾ ཏ་ག་ར་ཙ་ནྡ་ནཾ [ཡཱ་ཡཾ ཏ་ག་ར་ཙ་ནྡ་ནཱི (སཱི. སྱཱ. ཀཾ. པཱི.)];
ཡོ ཙ སཱི་ལ་ཝ་ཏཾ ག་ནྡྷོ, ཝཱ་ཏི དེ་ཝེ་སུ ཨུ་ཏྟ་མོ.
༥༧. ཏེ་སཾ ས་མྤ་ནྣ་སཱི་ལཱ་ནཾ, ཨ་པྤ་མཱ་ད་ཝི་ཧཱ་རི་ནཾ;
ས་མྨ་ད་ཉྙཱ ཝི་མུ་ཏྟཱ་ནཾ, མཱ་རོ མ་གྒཾ ན ཝི་ནྡ་ཏི.
༥༨. ཡ་ཐཱ ས་ངྐཱ་ར་ཋཱ་ན་སྨིཾ [ས་ངྐཱ་ར་དྷཱ་ན་སྨིཾ (སཱི. སྱཱ. ཀཾ. པཱི.)], ཨུ་ཛ྄ཛྷི་ཏ་སྨིཾ མ་ཧཱ་པ་ཐེ;
པ་དུ་མཾ ཏ་ཏྠ ཛཱ་ཡེ་ཐ, སུ་ཙི་ག་ནྡྷཾ མ་ནོ་ར་མཾ.
༥༩. ཨེ་ཝཾ ས་ངྐཱ་ར་བྷཱུ་ཏེ་སུ, ཨ་ནྡྷ་བྷཱུ་ཏེ [ཨ་ནྡྷཱི་བྷཱུ་ཏེ (ཀ.)] པུ་ཐུ་ཛྫ་ནེ;
ཨ་ཏི་རོ་ཙ་ཏི པ་ཉྙཱ་ཡ, ས་མྨཱ་ས་མྦུ་དྡྷ་སཱ་ཝ་ཀོ.
པུ་པྥ་ཝ་གྒོ ཙ་ཏུ་ཏྠོ ནི་ཊྛི་ཏོ.
༥. བཱ་ལ་ཝ་གྒོ
༦༠. དཱི་གྷཱ ཛཱ་ག་ར་ཏོ ར་ཏྟི, དཱི་གྷཾ ས་ནྟ་སྶ ཡོ་ཛ་ནཾ;
དཱི་གྷོ བཱ་ལཱ་ནཾ སཾ་སཱ་རོ, ས་དྡྷ་མྨཾ ཨ་ཝི་ཛཱ་ན་ཏཾ.
༦༡. ཙ་ར་ཉྩེ ནཱ་དྷི་ག་ཙྪེ་ཡྻ, སེ་ཡྻཾ ས་དི་ས་མ་ཏྟ་ནོ;
ཨེ་ཀ་ཙ་རི་ཡཾ [ཨེ་ཀ་ཙ་རི་ཡཾ (ཀ.)] ད་ལ༹ྷཾ ཀ་ཡི་རཱ, ན་ཏྠི བཱ་ལེ ས་ཧཱ་ཡ་ཏཱ.
༦༢. པུ་ཏྟཱ མ་ཏྠི དྷ་ན་མྨ་ཏྠི [པུ་ཏྟ་མ་ཏྠི དྷ་ན་མ་ཏྠི (ཀ.)], ཨི་ཏི བཱ་ལོ ཝི་ཧ་ཉྙ་ཏི;
ཨ་ཏྟཱ ཧི [ཨ་ཏྟཱ་པི (?)] ཨ་ཏྟ་ནོ ན་ཏྠི, ཀུ་ཏོ པུ་ཏྟཱ ཀུ་ཏོ དྷ་ནཾ.
༦༣. ཡོ བཱ་ལོ མ་ཉྙ་ཏི བཱ་ལྱཾ, པ་ཎྜི་ཏོ ཝཱ་པི ཏེ་ན སོ;
བཱ་ལོ ཙ པ་ཎྜི་ཏ་མཱ་ནཱི, ས ཝེ ‘‘བཱ་ལོ’’ཏི ཝུ་ཙྩ་ཏི.
༦༤. ཡཱ་ཝ་ཛཱི་ཝ་མྤི ཙེ བཱ་ལོ, པ་ཎྜི་ཏཾ པ་ཡི་རུ་པཱ་ས་ཏི;
ན སོ དྷ་མྨཾ ཝི་ཛཱ་ནཱ་ཏི, ད་བྦཱི སཱུ་པ་ར་སཾ ཡ་ཐཱ.
༦༥. མུ་ཧུ་ཏྟ་མ་པི ཙེ ཝི་ཉྙཱུ, པ་ཎྜི་ཏཾ པ་ཡི་རུ་པཱ་ས་ཏི;
ཁི་པྤཾ དྷ་མྨཾ ཝི་ཛཱ་ནཱ་ཏི, ཛི་ཝ྄ཧཱ སཱུ་པ་ར་སཾ ཡ་ཐཱ.
༦༦. ཙ་ར་ནྟི བཱ་ལཱ དུ་མྨེ་དྷཱ, ཨ་མི་ཏྟེ་ནེ་ཝ ཨ་ཏྟ་ནཱ;
ཀ་རོ་ནྟཱ པཱ་པ་ཀཾ ཀ་མྨཾ, ཡཾ ཧོ་ཏི ཀ་ཊུ་ཀ་པྥ་ལཾ.