༡༠. ད་ཎྜ་ཝ་གྒོ
༡༢༩. ས་བྦེ ཏ་ས་ནྟི ད་ཎྜ་སྶ, ས་བྦེ བྷཱ་ཡ་ནྟི མ་ཙྩུ་ནོ;
ཨ་ཏྟཱ་ནཾ ཨུ་པ་མཾ ཀ་ཏྭཱ, ན ཧ་ནེ་ཡྻ ན གྷཱ་ཏ་ཡེ.
༡༣༠. ས་བྦེ ཏ་ས་ནྟི ད་ཎྜ་སྶ, ས་བྦེ་སཾ ཛཱི་ཝི་ཏཾ པི་ཡཾ;
ཨ་ཏྟཱ་ནཾ ཨུ་པ་མཾ ཀ་ཏྭཱ, ན ཧ་ནེ་ཡྻ ན གྷཱ་ཏ་ཡེ.
༡༣༡. སུ་ཁ་ཀཱ་མཱ་ནི བྷཱུ་ཏཱ་ནི, ཡོ ད་ཎྜེ་ན ཝི་ཧིཾ་ས་ཏི;
ཨ་ཏྟ་ནོ སུ་ཁ་མེ་སཱ་ནོ, པེ་ཙྩ སོ ན ལ་བྷ་ཏེ སུ་ཁཾ.
༡༣༢. སུ་ཁ་ཀཱ་མཱ་ནི བྷཱུ་ཏཱ་ནི, ཡོ ད་ཎྜེ་ན ན ཧིཾ་ས་ཏི;
ཨ་ཏྟ་ནོ སུ་ཁ་མེ་སཱ་ནོ, པེ་ཙྩ སོ ལ་བྷ་ཏེ སུ་ཁཾ.
༡༣༣. མཱ་ཝོ་ཙ ཕ་རུ་སཾ ཀ་ཉྩི, ཝུ་ཏྟཱ པ་ཊི་ཝ་དེ་ཡྻུ ཏཾ [པ་ཊི་ཝ་དེ་ཡྻུཾ ཏཾ (ཀ.)];
དུ་ཀྑཱ ཧི སཱ་ར་མྦྷ་ཀ་ཐཱ, པ་ཊི་ད་ཎྜཱ ཕུ་སེ་ཡྻུ ཏཾ [ཕུ་སེ་ཡྻུཾ ཏཾ (ཀ.)].
༡༣༤. ས་ཙེ ནེ་རེ་སི ཨ་ཏྟཱ་ནཾ, ཀཾ་སོ ཨུ་པ་ཧ་ཏོ ཡ་ཐཱ;
ཨེ་ས པ་ཏྟོ་སི ནི་བྦཱ་ནཾ, སཱ་ར་མྦྷོ ཏེ ན ཝི་ཛྫ་ཏི.
༡༣༥. ཡ་ཐཱ ད་ཎྜེ་ན གོ་པཱ་ལོ, གཱ་ཝོ པཱ་ཛེ་ཏི གོ་ཙ་རཾ;
ཨེ་ཝཾ ཛ་རཱ ཙ མ་ཙྩུ ཙ, ཨཱ་ཡུཾ པཱ་ཛེ་ནྟི པཱ་ཎི་ནཾ.
༡༣༦. ཨ་ཐ པཱ་པཱ་ནི ཀ་མྨཱ་ནི, ཀ་རཾ བཱ་ལོ ན བུ་ཛ྄ཛྷ་ཏི;
སེ་ཧི ཀ་མྨེ་ཧི དུ་མྨེ་དྷོ, ཨ་གྒི་ད་ཌྜྷོ་ཝ ཏ་པྤ་ཏི.
༡༣༧. ཡོ ད་ཎྜེ་ན ཨ་ད་ཎྜེ་སུ, ཨ་པྤ་དུ་ཊྛེ་སུ དུ་སྶ་ཏི;
ད་ས་ནྣ་མ་ཉྙ་ཏ་རཾ ཋཱ་ནཾ, ཁི་པྤ་མེ་ཝ ནི་ག་ཙྪ་ཏི.
༡༣༨. ཝེ་ད་ནཾ ཕ་རུ་སཾ ཛཱ་ནིཾ, ས་རཱི་ར་སྶ ཙ བྷེ་ད་ནཾ [ས་རཱི་ར་སྶ པ་བྷེ་ད་ནཾ (སྱཱ.)];
ག་རུ་ཀཾ ཝཱ་པི ཨཱ་བཱ་དྷཾ, ཙི་ཏྟ་ཀྑེ་པ་ཉྩ [ཙི་ཏྟ་ཀྑེ་པཾ ཝ (སཱི. སྱཱ. པཱི.)] པཱ་པུ་ཎེ.
༡༣༩. རཱ་ཛ་ཏོ ཝཱ ཨུ་པ་ས་གྒཾ [ཨུ་པ་སྶ་གྒཾ (སཱི. པཱི.)], ཨ་བྦྷ་ཀྑཱ་ན་ཉྩ [ཨ་བྦྷ་ཀྑཱ་ནཾ ཝ (སཱི. པཱི.)] དཱ་རུ་ཎཾ;
པ་རི་ཀྑ་ཡ་ཉྩ [པ་རི་ཀྑ་ཡཾ ཝ (སཱི. སྱཱ. པཱི.)] ཉཱ་ཏཱི་ནཾ, བྷོ་གཱ་ན་ཉྩ [བྷོ་གཱ་ནཾ ཝ (སཱི. སྱཱ. པཱི.)] པ་བྷ་ངྒུ་རཾ [པ་བྷ་ངྒུ་ནཾ (ཀ.)].
༡༤༠. ཨ་ཐ ཝཱ་སྶ ཨ་གཱ་རཱ་ནི, ཨ་གྒི ཌ་ཧ་ཏི [ཌ་ཡ྄ཧ་ཏི (ཀ.)] པཱ་ཝ་ཀོ;
ཀཱ་ཡ་སྶ བྷེ་དཱ དུ་པྤ་ཉྙོ, ནི་ར་ཡཾ སོ་པ་པ་ཛྫ་ཏི [སོ ཨུ་པ་པ་ཛྫ་ཏི (སཱི. སྱཱ.)].
༡༤༡. ན ན་གྒ་ཙ་རི་ཡཱ ན ཛ་ཊཱ ན པ་ངྐཱ, ནཱ་ནཱ་ས་ཀཱ ཐ་ཎྜི་ལ་སཱ་ཡི་ཀཱ ཝཱ;
ར་ཛོ་ཛ་ལླཾ ཨུ་ཀྐུ་ཊི་ཀ་པྤ་དྷཱ་ནཾ, སོ་དྷེ་ནྟི མ་ཙྩཾ ཨ་ཝི་ཏི་ཎྞ་ཀ་ངྑཾ.
༡༤༢. ཨ་ལ་ངྐ་ཏོ ཙེ་པི ས་མཾ ཙ་རེ་ཡྻ, ས་ནྟོ ད་ནྟོ ནི་ཡ་ཏོ བྲ་ཧྨ་ཙཱ་རཱི;
ས་བྦེ་སུ བྷཱུ་ཏེ་སུ ནི་དྷཱ་ཡ ད་ཎྜཾ, སོ བྲཱ་ཧྨ་ཎོ སོ ས་མ་ཎོ ས བྷི་ཀྑུ.
༡༤༣. ཧི་རཱི་ནི་སེ་དྷོ པུ་རི་སོ, ཀོ་ཙི ལོ་ཀ་སྨི ཝི་ཛྫ་ཏི;
ཡོ ནི་དྡཾ [ནི་ནྡཾ (སཱི. པཱི.) སཾ. ནི. ༡.༡༨] ཨ་པ་བོ་དྷེ་ཏི [ཨ་པ་བོ་དྷ་ཏི (སཱི. སྱཱ. པཱི.)], ཨ་སྶོ བྷ་དྲོ ཀ་སཱ་མི་ཝ.
༡༤༤. ཨ་སྶོ ཡ་ཐཱ བྷ་དྲོ ཀ་སཱ་ནི་ཝི་ཊྛོ, ཨཱ་ཏཱ་པི་ནོ སཾ་ཝེ་གི་ནོ བྷ་ཝཱ་ཐ;
ས་དྡྷཱ་ཡ སཱི་ལེ་ན ཙ ཝཱི་རི་ཡེ་ན ཙ, ས་མཱ་དྷི་ནཱ དྷ་མྨ་ཝི་ནི་ཙྪ་ཡེ་ན ཙ;
ས་མྤ་ནྣ་ཝི་ཛྫཱ་ཙ་ར་ཎཱ པ་ཏི་སྶ་ཏཱ, ཛ་ཧི་སྶ་ཐ [པ་ཧ་སྶ་ཐ (སཱི. སྱཱ. པཱི.)] དུ་ཀྑ་མི་དཾ ཨ་ན་པྤ་ཀཾ.
༡༤༥. ཨུ་ད་ཀ་ཉྷི ན་ཡ་ནྟི ནེ་ཏྟི་ཀཱ, ཨུ་སུ་ཀཱ་རཱ ན་མ་ཡ་ནྟི ཏེ་ཛ་ནཾ;
དཱ་རུཾ ན་མ་ཡ་ནྟི ཏ་ཙྪ་ཀཱ, ཨ་ཏྟཱ་ནཾ ད་མ་ཡ་ནྟི སུ་བྦ་ཏཱ.
ད་ཎྜ་ཝ་གྒོ ད་ས་མོ ནི་ཊྛི་ཏོ.