༨. ས་ཧ་སྶ་ཝ་གྒོ
༡༠༠. ས་ཧ་སྶ་མ་པི ཙེ ཝཱ་ཙཱ, ཨ་ན་ཏྠ་པ་ད་སཾ་ཧི་ཏཱ;
ཨེ་ཀཾ ཨ་ཏྠ་པ་དཾ སེ་ཡྻོ, ཡཾ སུ་ཏྭཱ ཨུ་པ་ས་མྨ་ཏི.
༡༠༡. ས་ཧ་སྶ་མ་པི ཙེ གཱ་ཐཱ, ཨ་ན་ཏྠ་པ་ད་སཾ་ཧི་ཏཱ;
ཨེ་ཀཾ གཱ་ཐཱ་པ་དཾ སེ་ཡྻོ, ཡཾ སུ་ཏྭཱ ཨུ་པ་ས་མྨ་ཏི.
༡༠༢. ཡོ ཙ གཱ་ཐཱ ས་ཏཾ བྷཱ་སེ, ཨ་ན་ཏྠ་པ་ད་སཾ་ཧི་ཏཱ [ཨ་ན་ཏྠ་པ་ད་ས་ཉྷི་ཏཾ (ཀ.) ཝི་སེ་ས་ནཾ ཧེ་ཏཾ གཱ་ཐཱ་ཏི་པ་ད་སྶ];
ཨེ་ཀཾ དྷ་མྨ་པ་དཾ སེ་ཡྻོ, ཡཾ སུ་ཏྭཱ ཨུ་པ་ས་མྨ་ཏི.
༡༠༣. ཡོ ས་ཧ་སྶཾ ས་ཧ་སྶེ་ན, ས་ངྒཱ་མེ མཱ་ནུ་སེ ཛི་ནེ;
ཨེ་ཀ་ཉྩ ཛེ་ཡྻ་མ་ཏྟཱ་ནཾ [ཨ་ཏྟཱ་ནཾ (སཱི. པཱི.)], ས ཝེ ས་ངྒཱ་མ་ཛུ་ཏྟ་མོ.
༡༠༤. ཨ་ཏྟཱ ཧ་ཝེ ཛི་ཏཾ སེ་ཡྻོ, ཡཱ ཙཱ་ཡཾ ཨི་ཏ་རཱ པ་ཛཱ;
ཨ་ཏྟ་ད་ནྟ་སྶ པོ་ས་སྶ, ནི་ཙྩཾ ས་ཉྙ་ཏ་ཙཱ་རི་ནོ.
༡༠༥. ནེ་ཝ དེ་ཝོ ན ག་ནྡྷ་བྦོ, ན མཱ་རོ ས་ཧ བྲ་ཧྨུ་ནཱ;
ཛི་ཏཾ ཨ་པ་ཛི་ཏཾ ཀ་ཡི་རཱ, ཏ་ཐཱ་རཱུ་པ་སྶ ཛ་ནྟུ་ནོ.
༡༠༦. མཱ་སེ མཱ་སེ ས་ཧ་སྶེ་ན, ཡོ ཡ་ཛེ་ཐ ས་ཏཾ ས་མཾ;
ཨེ་ཀ་ཉྩ བྷཱ་ཝི་ཏ་ཏྟཱ་ནཾ, མུ་ཧུ་ཏྟ་མ་པི པཱུ་ཛ་ཡེ;
སཱ་ཡེ་ཝ པཱུ་ཛ་ནཱ སེ་ཡྻོ, ཡ་ཉྩེ ཝ་སྶ་ས་ཏཾ ཧུ་ཏཾ.
༡༠༧. ཡོ ཙ ཝ་སྶ་ས་ཏཾ ཛ་ནྟུ, ཨ་གྒིཾ པ་རི་ཙ་རེ ཝ་ནེ;
ཨེ་ཀ་ཉྩ བྷཱ་ཝི་ཏ་ཏྟཱ་ནཾ, མུ་ཧུ་ཏྟ་མ་པི པཱུ་ཛ་ཡེ;
སཱ་ཡེ་ཝ པཱུ་ཛ་ནཱ སེ་ཡྻོ, ཡ་ཉྩེ ཝ་སྶ་ས་ཏཾ ཧུ་ཏཾ.
༡༠༨. ཡཾ ཀི་ཉྩི ཡི་ཊྛཾ ཝ ཧུ་ཏཾ ཝ [ཡི་ཊྛ་ཉྩ ཧུ་ཏ་ཉྩ (ཀ.)] ལོ་ཀེ, སཾ་ཝ་ཙྪ་རཾ ཡ་ཛེ་ཐ པུ་ཉྙ་པེ་ཀྑོ;
ས་བྦ་མྤི ཏཾ ན ཙ་ཏུ་བྷཱ་ག་མེ་ཏི, ཨ་བྷི་ཝཱ་ད་ནཱ ཨུ་ཛྫུ་ག་ཏེ་སུ སེ་ཡྻོ.
༡༠༩. ཨ་བྷི་ཝཱ་ད་ན་སཱི་ལི་སྶ, ནི་ཙྩཾ ཝུ་ཌྜྷཱ་པ་ཙཱ་ཡི་ནོ [ཝ་དྡྷཱ་པ་ཙཱ་ཡི་ནོ (སཱི. པཱི.)];
ཙ་ཏྟཱ་རོ དྷ་མྨཱ ཝ་ཌྜྷ་ནྟི, ཨཱ་ཡུ ཝ་ཎྞོ སུ་ཁཾ བ་ལཾ.
༡༡༠. ཡོ ཙ ཝ་སྶ་ས་ཏཾ ཛཱི་ཝེ, དུ་སྶཱི་ལོ ཨ་ས་མཱ་ཧི་ཏོ;
ཨེ་ཀཱ་ཧཾ ཛཱི་ཝི་ཏཾ སེ་ཡྻོ, སཱི་ལ་ཝ་ནྟ་སྶ ཛྷཱ་ཡི་ནོ.
༡༡༡. ཡོ ཙ ཝ་སྶ་ས་ཏཾ ཛཱི་ཝེ, དུ་པྤ་ཉྙོ ཨ་ས་མཱ་ཧི་ཏོ;
ཨེ་ཀཱ་ཧཾ ཛཱི་ཝི་ཏཾ སེ་ཡྻོ, པ་ཉྙ་ཝ་ནྟ་སྶ ཛྷཱ་ཡི་ནོ.
༡༡༢. ཡོ ཙ ཝ་སྶ་ས་ཏཾ ཛཱི་ཝེ, ཀུ་སཱི་ཏོ ཧཱི་ན་ཝཱི་རི་ཡོ;
ཨེ་ཀཱ་ཧཾ ཛཱི་ཝི་ཏཾ སེ་ཡྻོ, ཝཱི་རི་ཡ་མཱ་ར་བྷ་ཏོ ད་ལ༹ྷཾ.
༡༡༣. ཡོ ཙ ཝ་སྶ་ས་ཏཾ ཛཱི་ཝེ, ཨ་པ་སྶཾ ཨུ་ད་ཡ་བྦ་ཡཾ;
ཨེ་ཀཱ་ཧཾ ཛཱི་ཝི་ཏཾ སེ་ཡྻོ, པ་སྶ་ཏོ ཨུ་ད་ཡ་བྦ་ཡཾ.
༡༡༤. ཡོ ཙ ཝ་སྶ་ས་ཏཾ ཛཱི་ཝེ, ཨ་པ་སྶཾ ཨ་མ་ཏཾ པ་དཾ;
ཨེ་ཀཱ་ཧཾ ཛཱི་ཝི་ཏཾ སེ་ཡྻོ, པ་སྶ་ཏོ ཨ་མ་ཏཾ པ་དཾ.
༡༡༥. ཡོ ཙ ཝ་སྶ་ས་ཏཾ ཛཱི་ཝེ, ཨ་པ་སྶཾ དྷ་མྨ་མུ་ཏྟ་མཾ;
ཨེ་ཀཱ་ཧཾ ཛཱི་ཝི་ཏཾ སེ་ཡྻོ, པ་སྶ་ཏོ དྷ་མྨ་མུ་ཏྟ་མཾ.
ས་ཧ་སྶ་ཝ་གྒོ ཨ་ཊྛ་མོ ནི་ཊྛི་ཏོ.