༢༥. བྷི་ཀྑུ་ཝ་གྒོ
༣༦༠. ཙ་ཀྑུ་ནཱ སཾ་ཝ་རོ སཱ་དྷུ, སཱ་དྷུ སོ་ཏེ་ན སཾ་ཝ་རོ;
གྷཱ་ནེ་ན སཾ་ཝ་རོ སཱ་དྷུ, སཱ་དྷུ ཛི་ཝ྄ཧཱ་ཡ སཾ་ཝ་རོ.
༣༦༡. ཀཱ་ཡེ་ན སཾ་ཝ་རོ སཱ་དྷུ, སཱ་དྷུ ཝཱ་ཙཱ་ཡ སཾ་ཝ་རོ;
མ་ན་སཱ སཾ་ཝ་རོ སཱ་དྷུ, སཱ་དྷུ ས་བྦ་ཏྠ སཾ་ཝ་རོ;
ས་བྦ་ཏྠ སཾ་ཝུ་ཏོ བྷི་ཀྑུ, ས་བྦ་དུ་ཀྑཱ པ་མུ་ཙྩ་ཏི.
༣༦༢. ཧ་ཏྠ་སཾ་ཡ་ཏོ པཱ་ད་སཾ་ཡ་ཏོ, ཝཱ་ཙཱ་སཾ་ཡ་ཏོ སཾ་ཡ་ཏུ་ཏྟ་མོ;
ཨ་ཛ྄ཛྷ་ཏྟ་ར་ཏོ ས་མཱ་ཧི་ཏོ, ཨེ་ཀོ ས་ནྟུ་སི་ཏོ ཏ་མཱ་ཧུ བྷི་ཀྑུཾ.
༣༦༣. ཡོ མུ་ཁ་སཾ་ཡ་ཏོ བྷི་ཀྑུ, མ་ནྟ་བྷཱ་ཎཱི ཨ་ནུ་དྡྷ་ཏོ;
ཨ་ཏྠཾ དྷ་མྨ་ཉྩ དཱི་པེ་ཏི, མ་དྷུ་རཾ ཏ་སྶ བྷཱ་སི་ཏཾ.
༣༦༤. དྷ་མྨཱ་རཱ་མོ དྷ་མྨ་ར་ཏོ, དྷ་མྨཾ ཨ་ནུ་ཝི་ཙི་ནྟ་ཡཾ;
དྷ་མྨཾ ཨ་ནུ་སྶ་རཾ བྷི་ཀྑུ, ས་དྡྷ་མྨཱ ན པ་རི་ཧཱ་ཡ་ཏི.
༣༦༥. ས་ལཱ་བྷཾ ནཱ་ཏི་མ་ཉྙེ་ཡྻ, ནཱ་ཉྙེ་སཾ པི་ཧ་ཡཾ ཙ་རེ;
ཨ་ཉྙེ་སཾ པི་ཧ་ཡཾ བྷི་ཀྑུ, ས་མཱ་དྷིཾ ནཱ་དྷི་ག་ཙྪ་ཏི.
༣༦༦. ཨ་པྤ་ལཱ་བྷོ་པི ཙེ བྷི་ཀྑུ, ས་ལཱ་བྷཾ ནཱ་ཏི་མ་ཉྙ་ཏི;
ཏཾ ཝེ དེ་ཝཱ པ་སཾ་ས་ནྟི, སུ་དྡྷཱ་ཛཱི་ཝིཾ ཨ་ཏ་ནྡི་ཏཾ.
༣༦༧. ས་བྦ་སོ ནཱ་མ་རཱུ་པ་སྨིཾ, ཡ་སྶ ན་ཏྠི མ་མཱ་ཡི་ཏཾ;
ཨ་ས་ཏཱ ཙ ན སོ་ཙ་ཏི, ས ཝེ ‘‘བྷི་ཀྑཱུ’’ཏི ཝུ་ཙྩ་ཏི.
༣༦༨. མེ་ཏྟཱ་ཝི་ཧཱ་རཱི ཡོ བྷི་ཀྑུ, པ་ས་ནྣོ བུ་དྡྷ་སཱ་ས་ནེ;
ཨ་དྷི་ག་ཙྪེ པ་དཾ ས་ནྟཾ, ས་ངྑཱ་རཱུ་པ་ས་མཾ སུ་ཁཾ.
༣༦༩. སི་ཉྩ བྷི་ཀྑུ ཨི་མཾ ནཱ་ཝཾ, སི་ཏྟཱ ཏེ ལ་ཧུ་མེ་སྶ་ཏི;
ཚེ་ཏྭཱ རཱ་ག་ཉྩ དོ་ས་ཉྩ, ཏ་ཏོ ནི་བྦཱ་ན་མེ་ཧི་སི.
༣༧༠. པ་ཉྩ ཚི་ནྡེ པ་ཉྩ ཛ་ཧེ, པ་ཉྩ ཙུ་ཏྟ་རི བྷཱ་ཝ་ཡེ;
པ་ཉྩ ས་ངྒཱ་ཏི་གོ བྷི་ཀྑུ, ‘‘ཨོ་གྷ་ཏི་ཎྞོ’’ཏི ཝུ་ཙྩ་ཏི.
༣༧༡. ཛྷཱ་ཡ བྷི་ཀྑུ [ཛྷཱ་ཡ ཏུ་ཝཾ བྷི་ཀྑུ (?)] མཱ པ་མཱ་དོ [མཱ ཙ པ་མཱ་དོ (སཱི. སྱཱ. པཱི.)], མཱ ཏེ ཀཱ་མ་གུ་ཎེ ར་མེ་སྶུ [བྷ་མ་སྶུ (སཱི. པཱི.), བྷ་ཝ་སྶུ (སྱཱ.), ར་མ་སྶུ (ཀ.)] ཙི་ཏྟཾ;
མཱ ལོ་ཧ་གུ་ལ༹ཾ གི་ལཱི པ་མ་ཏྟོ, མཱ ཀ་ནྡི ‘‘དུ་ཀྑ་མི་ད’’ནྟི ཌ་ཡ྄ཧ་མཱ་ནོ.
༣༧༢. ན་ཏྠི ཛྷཱ་ནཾ ཨ་པ་ཉྙ་སྶ, པ་ཉྙཱ ན་ཏྠི ཨ་ཛྷཱ་ཡ་ཏོ [ཨ་ཛ྄ཛྷཱ་ཡི་ནོ (ཀ.)];
ཡ་མྷི ཛྷཱ་ན་ཉྩ པ་ཉྙཱ ཙ, ས ཝེ ནི་བྦཱ་ན་ས་ནྟི་ཀེ.
༣༧༣. སུ་ཉྙཱ་གཱ་རཾ པ་ཝི་ཊྛ་སྶ, ས་ནྟ་ཙི་ཏྟ་སྶ བྷི་ཀྑུ་ནོ;
ཨ་མཱ་ནུ་སཱི ར་ཏི ཧོ་ཏི, ས་མྨཱ དྷ་མྨཾ ཝི་པ་སྶ་ཏོ.
༣༧༤. ཡ་ཏོ ཡ་ཏོ ས་མྨ་ས་ཏི, ཁ་ནྡྷཱ་ནཾ ཨུ་ད་ཡ་བྦ་ཡཾ;
ལ་བྷ་ཏཱི [ལ་བྷ་ཏི (པཱི.), ལ་བྷ་ཏེ (ཀ.)] པཱི་ཏི་པཱ་མོ་ཛྫཾ, ཨ་མ་ཏཾ ཏཾ ཝི་ཛཱ་ན་ཏཾ.
༣༧༥. ཏ་ཏྲཱ་ཡ་མཱ་དི བྷ་ཝ་ཏི, ཨི་དྷ པ་ཉྙ་སྶ བྷི་ཀྑུ་ནོ;
ཨི་ནྡྲི་ཡ་གུ་ཏྟི ས་ནྟུ་ཊྛི, པཱ་ཏི་མོ་ཀྑེ ཙ སཾ་ཝ་རོ.
༣༧༦. མི་ཏྟེ བྷ་ཛ་སྶུ ཀ་ལྱཱ་ཎེ, སུ་དྡྷཱ་ཛཱི་ཝེ ཨ་ཏ་ནྡི་ཏེ;
པ་ཊི་ས་ནྠཱ་ར་ཝུ་ཏྱ་སྶ [པ་ཊི་ས་ནྡྷཱ་ར་ཝུ་ཏྱ་སྶ (ཀ.)], ཨཱ་ཙཱ་ར་ཀུ་ས་ལོ སི་ཡཱ;
ཏ་ཏོ པཱ་མོ་ཛྫ་བ་ཧུ་ལོ, དུ་ཀྑ་སྶ་ནྟཾ ཀ་རི་སྶ་ཏི.
༣༧༧. ཝ་སྶི་ཀཱ ཝི་ཡ པུ་པྥཱ་ནི, མ་དྡ་ཝཱ་ནི [མ་ཛྫ་ཝཱ་ནི (ཀ. ཊཱི་ཀཱ) པ་ཙྩ་ཝཱ་ནི (ཀ. ཨ་ཊྛ.)] པ་མུ་ཉྩ་ཏི;
ཨེ་ཝཾ རཱ་ག་ཉྩ དོ་ས་ཉྩ, ཝི་པྤ་མུ་ཉྩེ་ཐ བྷི་ཀྑ་ཝོ.
༣༧༨. ས་ནྟ་ཀཱ་ཡོ ས་ནྟ་ཝཱ་ཙོ, ས་ནྟ་ཝཱ སུ་ས་མཱ་ཧི་ཏོ [ས་ནྟ་མ་ནོ སུ་ས་མཱ་ཧི་ཏོ (སྱཱ. པཱི.), ས་ནྟ་མ་ནོ ས་མཱ་ཧི་ཏོ (ཀ.)];
ཝ་ནྟ་ལོ་ཀཱ་མི་སོ བྷི་ཀྑུ, ‘‘ཨུ་པ་ས་ནྟོ’’ཏི ཝུ་ཙྩ་ཏི.
༣༧༩. ཨ་ཏྟ་ནཱ ཙོ་ད་ཡ་ཏྟཱ་ནཾ, པ་ཊི་མཾ་སེ་ཐ ཨ་ཏྟ་ནཱ [པ་ཊི་མཱ་སེ ཨ་ཏྟ་མ་ཏྟ་ནཱ (སཱི. པཱི.), པ་ཊི་མཾ་སེ ཏ་མ་ཏྟ་ནཱ (སྱཱ.)];
སོ ཨ་ཏྟ་གུ་ཏྟོ ས་ཏི་མཱ, སུ་ཁཾ བྷི་ཀྑུ ཝི་ཧཱ་ཧི་སི.
༣༨༠. ཨ་ཏྟཱ ཧི ཨ་ཏྟ་ནོ ནཱ་ཐོ, (ཀོ ཧི ནཱ་ཐོ པ་རོ སི་ཡཱ) [( ) ཝི་དེ་ས་པོ་ཏྠ་ཀེ་སུ ན་ཏྠི]
ཨ་ཏྟཱ ཧི ཨ་ཏྟ་ནོ ག་ཏི;
ཏ་སྨཱ སཾ་ཡ་མ་མ་ཏྟཱ་ནཾ [སཾ་ཡ་མ་ཡ’ཏྟཱ་ནཾ (སཱི. པཱི.)], ཨ་སྶཾ བྷ་དྲཾ་ཝ ཝཱ་ཎི་ཛོ.
༣༨༡. པཱ་མོ་ཛྫ་བ་ཧུ་ལོ བྷི་ཀྑུ, པ་ས་ནྣོ བུ་དྡྷ་སཱ་ས་ནེ;
ཨ་དྷི་ག་ཙྪེ པ་དཾ ས་ནྟཾ, ས་ངྑཱ་རཱུ་པ་ས་མཾ སུ་ཁཾ.
༣༨༢. ཡོ ཧ་ཝེ ད་ཧ་རོ བྷི་ཀྑུ, ཡུ་ཉྫ་ཏི བུ་དྡྷ་སཱ་ས་ནེ;
སོ་མཾ [སོ ཨི་མཾ (སཱི. སྱཱ. ཀཾ. པཱི.)] ལོ་ཀཾ པ་བྷཱ་སེ་ཏི, ཨ་བྦྷཱ མུ་ཏྟོ་ཝ ཙ་ནྡི་མཱ.
བྷི་ཀྑུ་ཝ་གྒོ པ་ཉྩ་ཝཱི་ས་ཏི་མོ ནི་ཊྛི་ཏོ.