༢༤. ཏ་ཎྷཱ་ཝ་གྒོ
༣༣༤. མ་ནུ་ཛ་སྶ པ་མ་ཏྟ་ཙཱ་རི་ནོ, ཏ་ཎྷཱ ཝ་ཌྜྷ་ཏི མཱ་ལུ་ཝཱ ཝི་ཡ;
སོ པླ་ཝ་ཏཱི [པླ་ཝ་ཏི (སཱི. པཱི.), པ་ལ་ཝེ་ཏཱི (ཀ.), ཨུ་པླ་ཝ་ཏི (?)] ཧུ་རཱ ཧུ་རཾ, ཕ་ལ་མི་ཙྪཾ་ཝ ཝ་ན་སྨི ཝཱ་ན་རོ.
༣༣༥. ཡཾ ཨེ་སཱ ས་ཧ་ཏེ ཛ་མྨཱི, ཏ་ཎྷཱ ལོ་ཀེ ཝི་ས་ཏྟི་ཀཱ;
སོ་ཀཱ ཏ་སྶ པ་ཝ་ཌྜྷ་ནྟི, ཨ་བྷི་ཝ་ཊྛཾ་ཝ [ཨ་བྷི་ཝ་ཌྜྷཾ་ཝ (སྱཱ.), ཨ་བྷི་ཝ་ཊྚཾ་ཝ (པཱི.), ཨ་བྷི་ཝུ་ཌྜྷཾ་ཝ (ཀ.)] བཱི་ར་ཎཾ.
༣༣༦. ཡོ ཙེ་ཏཾ ས་ཧ་ཏེ ཛ་མྨིཾ, ཏ་ཎྷཾ ལོ་ཀེ དུ་ར་ཙྩ་ཡཾ;
སོ་ཀཱ ཏ་མྷཱ པ་པ་ཏ་ནྟི, ཨུ་ད་བི་ནྡུ་ཝ པོ་ཀྑ་རཱ.
༣༣༧. ཏཾ ཝོ ཝ་དཱ་མི བྷ་དྡཾ ཝོ, ཡཱ་ཝ་ནྟེ་ཏྠ ས་མཱ་ག་ཏཱ;
ཏ་ཎྷཱ་ཡ མཱུ་ལཾ ཁ་ཎ་ཐ, ཨུ་སཱི་ར་ཏྠོ་ཝ བཱི་ར་ཎཾ;
མཱ ཝོ ན་ལ༹ཾ་ཝ སོ་ཏོ་ཝ, མཱ་རོ བྷ་ཉྫི པུ་ན་པྤུ་ནཾ.
༣༣༨. ཡ་ཐཱ་པི མཱུ་ལེ ཨ་ནུ་པ་དྡ་ཝེ ད་ལ༹ྷེ, ཚི་ནྣོ་པི རུ་ཀྑོ པུ་ན་རེ་ཝ རཱུ་ཧ་ཏི;
ཨེ་ཝ་མྤི ཏ་ཎྷཱ་ནུ་ས་ཡེ ཨ་ནཱུ་ཧ་ཏེ, ནི་བྦ་ཏྟ་ཏཱི དུ་ཀྑ་མི་དཾ པུ་ན་པྤུ་ནཾ.
༣༣༩. ཡ་སྶ ཚ་ཏྟིཾ་ས་ཏི སོ་ཏཱ, མ་ནཱ་པ་ས་ཝ་ནཱ བྷུ་སཱ;
མཱ་ཧཱ [ཝཱ་ཧཱ (སཱི. སྱཱ. པཱི.)] ཝ་ཧ་ནྟི དུ་དྡི་ཊྛིཾ, ས་ངྐ་པྤཱ རཱ་ག་ནི་སྶི་ཏཱ.
༣༤༠. ས་ཝ་ནྟི ས་བྦ་དྷི སོ་ཏཱ, ལ་ཏཱ ཨུ་པྤ་ཛྫ [ཨུ་བྦྷི་ཛྫ (སཱི. སྱཱ. ཀཾ. པཱི.)] ཏི་ཊྛ་ཏི;
ཏ་ཉྩ དི་སྭཱ ལ་ཏཾ ཛཱ་ཏཾ, མཱུ་ལཾ པ་ཉྙཱ་ཡ ཚི་ནྡ་ཐ.
༣༤༡. ས་རི་ཏཱ་ནི སི་ནེ་ཧི་ཏཱ་ནི ཙ, སོ་མ་ན་སྶཱ་ནི བྷ་ཝ་ནྟི ཛ་ནྟུ་ནོ;
ཏེ སཱ་ཏ་སི་ཏཱ སུ་ཁེ་སི་ནོ, ཏེ ཝེ ཛཱ་ཏི་ཛ་རཱུ་པ་གཱ ན་རཱ.
༣༤༢. ཏ་སི་ཎཱ་ཡ པུ་ར་ཀྑ་ཏཱ པ་ཛཱ, པ་རི་ས་པྤ་ནྟི ས་སོ་ཝ བ་ནྡྷི་ཏོ [བཱ་དྷི་ཏོ (བ་ཧཱུ་སུ)];
སཾ་ཡོ་ཛ་ན་ས་ངྒ་ས་ཏྟ་ཀཱ, དུ་ཀྑ་མུ་པེ་ནྟི པུ་ན་པྤུ་ནཾ ཙི་རཱ་ཡ.
༣༤༣. ཏ་སི་ཎཱ་ཡ པུ་ར་ཀྑ་ཏཱ པ་ཛཱ, པ་རི་ས་པྤ་ནྟི ས་སོ་ཝ བ་ནྡྷི་ཏོ;
ཏ་སྨཱ ཏ་སི་ཎཾ ཝི་ནོ་ད་ཡེ, ཨཱ་ཀ་ངྑ་ནྟ [བྷི་ཀྑཱུ ཨཱ་ཀ་ངྑཱི (སཱི.), བྷི་ཀྑུ ཨཱ་ཀ་ངྑཾ (སྱཱ.)] ཝི་རཱ་ག་མ་ཏྟ་ནོ.
༣༤༤. ཡོ ནི་བྦ་ན་ཐོ ཝ་ནཱ་དྷི་མུ་ཏྟོ, ཝ་ན་མུ་ཏྟོ ཝ་ན་མེ་ཝ དྷཱ་ཝ་ཏི;
ཏཾ པུ་གྒ་ལ་མེ་ཐ པ་སྶ་ཐ, མུ་ཏྟོ བ་ནྡྷ་ན་མེ་ཝ དྷཱ་ཝ་ཏི.
༣༤༥. ན ཏཾ ད་ལ༹ྷཾ བ་ནྡྷ་ན་མཱ་ཧུ དྷཱི་རཱ, ཡ་དཱ་ཡ་སཾ དཱ་རུ་ཛ་པ་བྦ་ཛ་ཉྩ [དཱ་རཱུ་ཛཾ བ་བྦ་ཛ་ཉྩ (སཱི. པཱི.)];
སཱ་ར་ཏྟ་ར་ཏྟཱ མ་ཎི་ཀུ་ཎྜ་ལེ་སུ, པུ་ཏྟེ་སུ དཱ་རེ་སུ ཙ ཡཱ ཨ་པེ་ཀྑཱ.
༣༤༦. ཨེ་ཏཾ ད་ལ༹ྷཾ བ་ནྡྷ་ན་མཱ་ཧུ དྷཱི་རཱ, ཨོ་ཧཱ་རི་ནཾ སི་ཐི་ལཾ དུ་པྤ་མུ་ཉྩཾ;
ཨེ་ཏ་མྤི ཚེ་ཏྭཱ་ན པ་རི་བྦ་ཛ་ནྟི, ཨ་ན་པེ་ཀྑི་ནོ ཀཱ་མ་སུ་ཁཾ པ་ཧཱ་ཡ.
༣༤༧. ཡེ རཱ་ག་ར་ཏྟཱ་ནུ་པ་ཏ་ནྟི སོ་ཏཾ, ས་ཡཾ་ཀ་ཏཾ མ་ཀྐ་ཊ་ཀོ་ཝ ཛཱ་ལཾ;
ཨེ་ཏ་མྤི ཚེ་ཏྭཱ་ན ཝ་ཛ་ནྟི དྷཱི་རཱ, ཨ་ན་པེ་ཀྑི་ནོ ས་བྦ་དུ་ཀྑཾ པ་ཧཱ་ཡ.
༣༤༨. མུ་ཉྩ པུ་རེ མུ་ཉྩ པ་ཙྪ་ཏོ, མ་ཛ྄ཛྷེ མུ་ཉྩ བྷ་ཝ་སྶ པཱ་ར་གཱུ;
ས་བྦ་ཏྠ ཝི་མུ་ཏྟ་མཱ་ན་སོ, ན པུ་ནཾ ཛཱ་ཏི་ཛ་རཾ ཨུ་པེ་ཧི་སི.
༣༤༩. ཝི་ཏ་ཀྐ་མ་ཐི་ཏ་སྶ ཛ་ནྟུ་ནོ, ཏི་བྦ་རཱ་ག་སྶ སུ་བྷཱ་ནུ་པ་སྶི་ནོ;
བྷི་ཡྻོ ཏ་ཎྷཱ པ་ཝ་ཌྜྷ་ཏི, ཨེ་ས ཁོ ད་ལ༹ྷཾ [ཨེ་ས གཱ་ལ༹ྷཾ (ཀ.)] ཀ་རོ་ཏི བ་ནྡྷ་ནཾ.
༣༥༠. ཝི་ཏ་ཀྐཱུ་པ་ས་མེ ཙ [ཝི་ཏ་ཀྐཱུ་པ་ས་མེ་ཝ (ཀ.)] ཡོ ར་ཏོ, ཨ་སུ་བྷཾ བྷཱ་ཝ་ཡ་ཏེ ས་དཱ ས་ཏོ;
ཨེ་ས [ཨེ་སོ (?)] ཁོ བྱ་ནྟི ཀཱ་ཧི་ཏི, ཨེ་ས [ཨེ་སོ (?)] ཚེ་ཙྪ་ཏི མཱ་ར་བ་ནྡྷ་ནཾ.
༣༥༡. ནི་ཊྛ་ངྒ་ཏོ ཨ་ས་ནྟཱ་སཱི, ཝཱི་ཏ་ཏ་ཎྷོ ཨ་ན་ངྒ་ཎོ;
ཨ་ཙྪི་ནྡི བྷ་ཝ་ས་ལླཱ་ནི, ཨ་ནྟི་མོ་ཡཾ ས་མུ་སྶ་ཡོ.
༣༥༢. ཝཱི་ཏ་ཏ་ཎྷོ ཨ་ནཱ་དཱ་ནོ, ནི་རུ་ཏྟི་པ་ད་ཀོ་ཝི་དོ;
ཨ་ཀྑ་རཱ་ནཾ ས་ནྣི་པཱ་ཏཾ, ཛ་ཉྙཱ པུ་བྦཱ་པ་རཱ་ནི ཙ;
ས ཝེ ‘‘ཨ་ནྟི་མ་སཱ་རཱི་རོ, མ་ཧཱ་པ་ཉྙོ མ་ཧཱ་པུ་རི་སོ’’ཏི ཝུ་ཙྩ་ཏི.
༣༥༣. ས་བྦཱ་བྷི་བྷཱུ ས་བྦ་ཝི་དཱུ་ཧ་མ་སྨི, ས་བྦེ་སུ དྷ་མྨེ་སུ ཨ་ནཱུ་པ་ལི་ཏྟོ;
ས་བྦ་ཉྫ་ཧོ ཏ་ཎྷ་ཀྑ་ཡེ ཝི་མུ་ཏྟོ, ས་ཡཾ ཨ་བྷི་ཉྙཱ་ཡ ཀ་མུ་དྡི་སེ་ཡྻཾ.
༣༥༤. ས་བྦ་དཱ་ནཾ དྷ་མྨ་དཱ་ནཾ ཛི་ནཱ་ཏི, ས་བྦ་ར་སཾ དྷ་མྨ་ར་སོ ཛི་ནཱ་ཏི;
ས་བྦ་ར་ཏིཾ དྷ་མྨ་ར་ཏི ཛི་ནཱ་ཏི, ཏ་ཎྷ་ཀྑ་ཡོ ས་བྦ་དུ་ཀྑཾ ཛི་ནཱ་ཏི.
༣༥༥. ཧ་ན་ནྟི བྷོ་གཱ དུ་མྨེ་དྷཾ, ནོ ཙ པཱ་ར་ག་ཝེ་སི་ནོ;
བྷོ་ག་ཏ་ཎྷཱ་ཡ དུ་མྨེ་དྷོ, ཧ་ནྟི ཨ་ཉྙེ་ཝ ཨ་ཏྟ་ནཾ.
༣༥༦. ཏི་ཎ་དོ་སཱ་ནི ཁེ་ཏྟཱ་ནི, རཱ་ག་དོ་སཱ ཨ་ཡཾ པ་ཛཱ;
ཏ་སྨཱ ཧི ཝཱི་ཏ་རཱ་གེ་སུ, དི་ནྣཾ ཧོ་ཏི མ་ཧ་པྥ་ལཾ.
༣༥༧. ཏི་ཎ་དོ་སཱ་ནི ཁེ་ཏྟཱ་ནི, དོ་ས་དོ་སཱ ཨ་ཡཾ པ་ཛཱ;
ཏ་སྨཱ ཧི ཝཱི་ཏ་དོ་སེ་སུ, དི་ནྣཾ ཧོ་ཏི མ་ཧ་པྥ་ལཾ.
༣༥༨. ཏི་ཎ་དོ་སཱ་ནི ཁེ་ཏྟཱ་ནི, མོ་ཧ་དོ་སཱ ཨ་ཡཾ པ་ཛཱ;
ཏ་སྨཱ ཧི ཝཱི་ཏ་མོ་ཧེ་སུ, དི་ནྣཾ ཧོ་ཏི མ་ཧ་པྥ་ལཾ.
༣༥༩. (ཏི་ཎ་དོ་སཱ་ནི ཁེ་ཏྟཱ་ནི, ཨི་ཙྪཱ་དོ་སཱ ཨ་ཡཾ པ་ཛཱ;
ཏ་སྨཱ ཧི ཝི་ག་ཏི་ཙྪེ་སུ, དི་ནྣཾ ཧོ་ཏི མ་ཧ་པྥ་ལཾ.) [( ) ཝི་དེ་ས་པོ་ཏྠ་ཀེ་སུ ན་ཏྠི, ཨ་ཊྛ་ཀ་ཐཱ་ཡ་མྤི ན དི་སྶ་ཏི]
ཏི་ཎ་དོ་སཱ་ནི ཁེ་ཏྟཱ་ནི, ཏ་ཎྷཱ་དོ་སཱ ཨ་ཡཾ པ་ཛཱ;
ཏ་སྨཱ ཧི ཝཱི་ཏ་ཏ་ཎྷེ་སུ, དི་ནྣཾ ཧོ་ཏི མ་ཧ་པྥ་ལཾ.
ཏ་ཎྷཱ་ཝ་གྒོ ཙ་ཏུ་ཝཱི་ས་ཏི་མོ ནི་ཊྛི་ཏོ.