༢༣. ནཱ་ག་ཝ་གྒོ
༣༢༠. ཨ་ཧཾ ནཱ་གོ་ཝ ས་ངྒཱ་མེ, ཙཱ་པ་ཏོ པ་ཏི་ཏཾ ས་རཾ;
ཨ་ཏི་ཝཱ་ཀྱཾ ཏི་ཏི་ཀྑི་སྶཾ, དུ་སྶཱི་ལོ ཧི བ་ཧུ་ཛྫ་ནོ.
༣༢༡. ད་ནྟཾ ན་ཡ་ནྟི ས་མི་ཏིཾ, ད་ནྟཾ རཱ་ཛཱ་བྷི་རཱུ་ཧ་ཏི;
ད་ནྟོ སེ་ཊྛོ མ་ནུ་སྶེ་སུ, ཡོ་ཏི་ཝཱ་ཀྱཾ ཏི་ཏི་ཀྑ་ཏི.
༣༢༢. ཝ་ར་མ་སྶ་ཏ་རཱ ད་ནྟཱ, ཨཱ་ཛཱ་ནཱི་ཡཱ ཙ [ཨཱ་ཛཱ་ནཱི་ཡཱ་ཝ (སྱཱ.)] སི་ནྡྷ་ཝཱ;
ཀུ་ཉྫ་རཱ ཙ [ཀུ་ཉྫ་རཱ་ཝ (སྱཱ.)] མ་ཧཱ་ནཱ་གཱ, ཨ་ཏྟ་ད་ནྟོ ཏ་ཏོ ཝ་རཾ.
༣༢༣. ན ཧི ཨེ་ཏེ་ཧི ཡཱ་ནེ་ཧི, ག་ཙྪེ་ཡྻ ཨ་ག་ཏཾ དི་སཾ;
ཡ་ཐཱ་ཏྟ་ནཱ སུ་ད་ནྟེ་ན, ད་ནྟོ ད་ནྟེ་ན ག་ཙྪ་ཏི.
༣༢༤. དྷ་ན་པཱ་ལོ [དྷ་ན་པཱ་ལ་ཀོ (སཱི. སྱཱ. ཀཾ. པཱི.)] ནཱ་མ ཀུ་ཉྫ་རོ, ཀ་ཊུ་ཀ་བྷེ་ད་ནོ [ཀ་ཊུ་ཀ་པྤ་བྷེ་ད་ནོ (སཱི. སྱཱ. པཱི.)] དུ་ནྣི་ཝཱ་ར་ཡོ;
བ་དྡྷོ ཀ་བ་ལ༹ཾ ན བྷུ་ཉྫ་ཏི, སུ་མ་ར་ཏི [སུ་ས་ར་ཏི (ཀ.)] ནཱ་ག་ཝ་ན་སྶ ཀུ་ཉྫ་རོ.
༣༢༥. མི་དྡྷཱི ཡ་དཱ ཧོ་ཏི མ་ཧ་གྒྷ་སོ ཙ, ནི་དྡཱ་ཡི་ཏཱ ས་མྤ་རི་ཝ་ཏྟ་སཱ་ཡཱི;
མ་ཧཱ་ཝ་རཱ་ཧོ་ཝ ནི་ཝཱ་པ་པུ་ཊྛོ, པུ་ན་པྤུ་ནཾ ག་བྦྷ་མུ་པེ་ཏི མ་ནྡོ.
༣༢༦. ཨི་དཾ པུ་རེ ཙི་ཏྟ་མ་ཙཱ་རི ཙཱ་རི་ཀཾ, ཡེ་ནི་ཙྪ་ཀཾ ཡ་ཏྠ་ཀཱ་མཾ ཡ་ཐཱ་སུ་ཁཾ;
ཏ་ད་ཛྫ་ཧཾ ནི་གྒ་ཧེ་སྶཱ་མི ཡོ་ནི་སོ, ཧ་ཏྠི་པྤ་བྷི་ནྣཾ ཝི་ཡ ཨ་ངྐུ་ས་གྒ་ཧོ.
༣༢༧. ཨ་པྤ་མཱ་ད་ར་ཏཱ ཧོ་ཐ, ས་ཙི་ཏྟ་མ་ནུ་ར་ཀྑ་ཐ;
དུ་གྒཱ ཨུ་དྡྷ་ར་ཐ་ཏྟཱ་ནཾ, པ་ངྐེ ས་ནྣོ་ཝ [ས་ཏྟོ་ཝ (སཱི. པཱི.)] ཀུ་ཉྫ་རོ.
༣༢༨. ས་ཙེ ལ་བྷེ་ཐ ནི་པ་ཀཾ ས་ཧཱ་ཡཾ, ས་དྡྷིཾ ཙ་རཾ སཱ་དྷུ་ཝི་ཧཱ་རི་དྷཱི་རཾ;
ཨ་བྷི་བྷུ་ཡྻ ས་བྦཱ་ནི པ་རི་སྶ་ཡཱ་ནི, ཙ་རེ་ཡྻ ཏེ་ན་ཏྟ་མ་ནོ ས་ཏཱི་མཱ.
༣༢༩. ནོ ཙེ ལ་བྷེ་ཐ ནི་པ་ཀཾ ས་ཧཱ་ཡཾ, ས་དྡྷིཾ ཙ་རཾ སཱ་དྷུ་ཝི་ཧཱ་རི་དྷཱི་རཾ;
རཱ་ཛཱ་ཝ ར་ཊྛཾ ཝི་ཛི་ཏཾ པ་ཧཱ་ཡ, ཨེ་ཀོ ཙ་རེ མཱ་ཏ་ངྒ་ར་ཉྙེ་ཝ ནཱ་གོ.
༣༣༠. ཨེ་ཀ་སྶ ཙ་རི་ཏཾ སེ་ཡྻོ, ན་ཏྠི བཱ་ལེ ས་ཧཱ་ཡ་ཏཱ;
ཨེ་ཀོ ཙ་རེ ན ཙ པཱ་པཱ་ནི ཀ་ཡི་རཱ, ཨ་པྤོ་སྶུ་ཀྐོ མཱ་ཏ་ངྒ་ར་ཉྙེ་ཝ ནཱ་གོ.
༣༣༡. ཨ་ཏྠ་མྷི ཛཱ་ཏ་མྷི སུ་ཁཱ ས་ཧཱ་ཡཱ, ཏུ་ཊྛཱི སུ་ཁཱ ཡཱ ཨི་ཏ་རཱི་ཏ་རེ་ན;
པུ་ཉྙཾ སུ་ཁཾ ཛཱི་ཝི་ཏ་ས་ངྑ་ཡ་མྷི, ས་བྦ་སྶ དུ་ཀྑ་སྶ སུ་ཁཾ པ་ཧཱ་ནཾ.
༣༣༢. སུ་ཁཱ མ་ཏྟེ་ཡྻ་ཏཱ ལོ་ཀེ, ཨ་ཐོ པེ་ཏྟེ་ཡྻ་ཏཱ སུ་ཁཱ;
སུ་ཁཱ སཱ་མ་ཉྙ་ཏཱ ལོ་ཀེ, ཨ་ཐོ བྲ་ཧྨ་ཉྙ་ཏཱ སུ་ཁཱ.
༣༣༣. སུ་ཁཾ ཡཱ་ཝ ཛ་རཱ སཱི་ལཾ, སུ་ཁཱ ས་དྡྷཱ པ་ཏི་ཊྛི་ཏཱ;
སུ་ཁོ པ་ཉྙཱ་ཡ པ་ཊི་ལཱ་བྷོ, པཱ་པཱ་ནཾ ཨ་ཀ་ར་ཎཾ སུ་ཁཾ.
ནཱ་ག་ཝ་གྒོ ཏེ་ཝཱི་ས་ཏི་མོ ནི་ཊྛི་ཏོ.