༢༢. ནི་ར་ཡ་ཝ་གྒོ
༣༠༦. ཨ་བྷཱུ་ཏ་ཝཱ་དཱི ནི་ར་ཡཾ ཨུ་པེ་ཏི, ཡོ ཝཱ་པི [ཡོ ཙཱ་པི (སཱི. པཱི. ཀ.)] ཀ་ཏྭཱ ན ཀ་རོ་མི ཙཱ་ཧ [ན ཀ་རོ་མཱི་ཏི ཙཱ་ཧ (སྱཱ.)];
ཨུ་བྷོ་པི ཏེ པེ་ཙྩ ས་མཱ བྷ་ཝ་ནྟི, ནི་ཧཱི་ན་ཀ་མྨཱ མ་ནུ་ཛཱ པ་ར་ཏྠ.
༣༠༧. ཀཱ་སཱ་ཝ་ཀ་ཎྛཱ བ་ཧ་ཝོ, པཱ་པ་དྷ་མྨཱ ཨ་ས་ཉྙ་ཏཱ;
པཱ་པཱ པཱ་པེ་ཧི ཀ་མྨེ་ཧི, ནི་ར་ཡཾ ཏེ ཨུ་པ་པ་ཛྫ་རེ.
༣༠༨. སེ་ཡྻོ ཨ་ཡོ་གུ་ལོ༹ བྷུ་ཏྟོ, ཏ་ཏྟོ ཨ་གྒི་སི་ཁཱུ་པ་མོ;
ཡ་ཉྩེ བྷུ་ཉྫེ་ཡྻ དུ་སྶཱི་ལོ, ར་ཊྛ་པི་ཎྜ་མ་ས་ཉྙ་ཏོ.
༣༠༩. ཙ་ཏྟཱ་རི ཋཱ་ནཱ་ནི ན་རོ པ་མ་ཏྟོ, ཨཱ་པ་ཛྫ་ཏི པ་ར་དཱ་རཱུ་པ་སེ་ཝཱི;
ཨ་པུ་ཉྙ་ལཱ་བྷཾ ན ནི་ཀཱ་མ་སེ་ཡྻཾ, ནི་ནྡཾ ཏ་ཏཱི་ཡཾ ནི་ར་ཡཾ ཙ་ཏུ་ཏྠཾ.
༣༡༠. ཨ་པུ་ཉྙ་ལཱ་བྷོ ཙ ག་ཏཱི ཙ པཱ་པི་ཀཱ, བྷཱི་ཏ་སྶ བྷཱི་ཏཱ་ཡ ར་ཏཱི ཙ ཐོ་ཀི་ཀཱ;
རཱ་ཛཱ ཙ ད་ཎྜཾ ག་རུ་ཀཾ པ་ཎེ་ཏི, ཏ་སྨཱ ན་རོ པ་ར་དཱ་རཾ ན སེ་ཝེ.
༣༡༡. ཀུ་སོ ཡ་ཐཱ དུ་གྒ་ཧི་ཏོ, ཧ་ཏྠ་མེ་ཝཱ་ནུ་ཀ་ནྟ་ཏི;
སཱ་མ་ཉྙཾ དུ་པྤ་རཱ་མ་ཊྛཾ, ནི་ར་ཡཱ་ཡུ་པ་ཀ་ཌྜྷ་ཏི.
༣༡༢. ཡཾ ཀི་ཉྩི སི་ཐི་ལཾ ཀ་མྨཾ, སཾ་ཀི་ལི་ཊྛ་ཉྩ ཡཾ ཝ་ཏཾ;
ས་ངྐ་སྶ་རཾ བྲ་ཧྨ་ཙ་རི་ཡཾ, ན ཏཾ ཧོ་ཏི མ་ཧ་པྥ་ལཾ.
༣༡༣. ཀ་ཡི་རཱ ཙེ ཀ་ཡི་རཱ་ཐེ་ནཾ [ཀ་ཡི་རཱ ནཾ (ཀ.)], ད་ལ༹ྷ་མེ་ནཾ པ་ར་ཀྐ་མེ;
སི་ཐི་ལོ ཧི པ་རི་བྦཱ་ཛོ, བྷི་ཡྻོ ཨཱ་ཀི་ར་ཏེ ར་ཛཾ.
༣༡༤. ཨ་ཀ་ཏཾ དུ་ཀྐ་ཊཾ སེ་ཡྻོ, པ་ཙྪཱ ཏ་པྤ་ཏི དུ་ཀྐ་ཊཾ;
ཀ་ཏ་ཉྩ སུ་ཀ་ཏཾ སེ་ཡྻོ, ཡཾ ཀ་ཏྭཱ ནཱ་ནུ་ཏ་པྤ་ཏི.
༣༡༥. ན་ག་རཾ ཡ་ཐཱ པ་ཙྩ་ནྟཾ, གུ་ཏྟཾ ས་ནྟ་ར་བཱ་ཧི་རཾ;
ཨེ་ཝཾ གོ་པེ་ཐ ཨ་ཏྟཱ་ནཾ, ཁ་ཎོ ཝོ [ཁ་ཎོ ཝེ (སཱི. པཱི. ཀ.)] མཱ ཨུ་པ་ཙྩ་གཱ;
ཁ་ཎཱ་ཏཱི་ཏཱ ཧི སོ་ཙ་ནྟི, ནི་ར་ཡ་མྷི ས་མ་པྤི་ཏཱ.
༣༡༦. ཨ་ལ་ཛྫི་ཏཱ་ཡེ ལ་ཛྫ་ནྟི, ལ་ཛྫི་ཏཱ་ཡེ ན ལ་ཛྫ་རེ;
མི་ཙྪཱ་དི་ཊྛི་ས་མཱ་དཱ་ནཱ, ས་ཏྟཱ ག་ཙྪ་ནྟི དུ་གྒ་ཏིཾ.
༣༡༧. ཨ་བྷ་ཡེ བྷ་ཡ་ད་སྶི་ནོ, བྷ་ཡེ ཙཱ་བྷ་ཡ་ད་སྶི་ནོ;
མི་ཙྪཱ་དི་ཊྛི་ས་མཱ་དཱ་ནཱ, ས་ཏྟཱ ག་ཙྪ་ནྟི དུ་གྒ་ཏིཾ.
༣༡༨. ཨ་ཝ་ཛྫེ ཝ་ཛྫ་མ་ཏི་ནོ, ཝ་ཛྫེ ཙཱ་ཝ་ཛྫ་ད་སྶི་ནོ;
མི་ཙྪཱ་དི་ཊྛི་ས་མཱ་དཱ་ནཱ, ས་ཏྟཱ ག་ཙྪ་ནྟི དུ་གྒ་ཏིཾ.
༣༡༩. ཝ་ཛྫ་ཉྩ ཝ་ཛྫ་ཏོ ཉ་ཏྭཱ, ཨ་ཝ་ཛྫ་ཉྩ ཨ་ཝ་ཛྫ་ཏོ;
ས་མྨཱ་དི་ཊྛི་ས་མཱ་དཱ་ནཱ, ས་ཏྟཱ ག་ཙྪ་ནྟི སུ་གྒ་ཏིཾ.
ནི་ར་ཡ་ཝ་གྒོ དྭཱ་ཝཱི་ས་ཏི་མོ ནི་ཊྛི་ཏོ.