༢༡. པ་ཀི་ཎྞ་ཀ་ཝ་གྒོ
༢༩༠. མ་ཏྟཱ་སུ་ཁ་པ་རི་ཙྩཱ་གཱ, པ་སྶེ ཙེ ཝི་པུ་ལཾ སུ་ཁཾ;
ཙ་ཛེ མ་ཏྟཱ་སུ་ཁཾ དྷཱི་རོ, ས་མྤ་སྶཾ ཝི་པུ་ལཾ སུ་ཁཾ.
༢༩༡. པ་ར་དུ་ཀྑཱུ་པ་དྷཱ་ནེ་ན, ཨ་ཏྟ་ནོ [ཡོ ཨ་ཏྟ་ནོ (སྱཱ. པཱི. ཀ.)] སུ་ཁ་མི་ཙྪ་ཏི;
ཝེ་ར་སཾ་ས་གྒ་སཾ་ས་ཊྛོ, ཝེ་རཱ སོ ན པ་རི་མུ་ཙྩ་ཏི.
༢༩༢. ཡ་ཉྷི ཀི་ཙྩཾ ཨ་པ་ཝི་དྡྷཾ [ཏ་ད་པ་ཝི་དྡྷཾ (སཱི. སྱཱ.)], ཨ་ཀི་ཙྩཾ པ་ན ཀ་ཡི་ར་ཏི;
ཨུ་ནྣ་ལཱ༹་ནཾ པ་མ་ཏྟཱ་ནཾ, ཏེ་སཾ ཝ་ཌྜྷ་ནྟི ཨཱ་ས་ཝཱ.
༢༩༣. ཡེ་ས་ཉྩ སུ་ས་མཱ་ར་དྡྷཱ, ནི་ཙྩཾ ཀཱ་ཡ་ག་ཏཱ ས་ཏི;
ཨ་ཀི་ཙྩཾ ཏེ ན སེ་ཝ་ནྟི, ཀི་ཙྩེ སཱ་ཏ་ཙྩ་ཀཱ་རི་ནོ;
ས་ཏཱ་ནཾ ས་མྤ་ཛཱ་ནཱ་ནཾ, ཨ་ཏྠཾ ག་ཙྪ་ནྟི ཨཱ་ས་ཝཱ.
༢༩༤. མཱ་ཏ་རཾ པི་ཏ་རཾ ཧ་ནྟྭཱ, རཱ་ཛཱ་ནོ དྭེ ཙ ཁ་ཏྟི་ཡེ;
ར་ཊྛཾ སཱ་ནུ་ཙ་རཾ ཧ་ནྟྭཱ, ཨ་ནཱི་གྷོ ཡཱ་ཏི བྲཱ་ཧྨ་ཎོ.
༢༩༥. མཱ་ཏ་རཾ པི་ཏ་རཾ ཧ་ནྟྭཱ, རཱ་ཛཱ་ནོ དྭེ ཙ སོ་ཏྠི་ཡེ;
ཝེ་ཡ་གྒྷ་པ་ཉྩ་མཾ ཧ་ནྟྭཱ, ཨ་ནཱི་གྷོ ཡཱ་ཏི བྲཱ་ཧྨ་ཎོ.
༢༩༦. སུ་པྤ་བུ་དྡྷཾ པ་བུ་ཛ྄ཛྷ་ནྟི, ས་དཱ གོ་ཏ་མ་སཱ་ཝ་ཀཱ;
ཡེ་སཾ དི་ཝཱ ཙ ར་ཏྟོ ཙ, ནི་ཙྩཾ བུ་དྡྷ་ག་ཏཱ ས་ཏི.
༢༩༧. སུ་པྤ་བུ་དྡྷཾ པ་བུ་ཛ྄ཛྷ་ནྟི, ས་དཱ གོ་ཏ་མ་སཱ་ཝ་ཀཱ;
ཡེ་སཾ དི་ཝཱ ཙ ར་ཏྟོ ཙ, ནི་ཙྩཾ དྷ་མྨ་ག་ཏཱ ས་ཏི.
༢༩༨. སུ་པྤ་བུ་དྡྷཾ པ་བུ་ཛ྄ཛྷ་ནྟི, ས་དཱ གོ་ཏ་མ་སཱ་ཝ་ཀཱ;
ཡེ་སཾ དི་ཝཱ ཙ ར་ཏྟོ ཙ, ནི་ཙྩཾ ས་ངྒྷ་ག་ཏཱ ས་ཏི.
༢༩༩. སུ་པྤ་བུ་དྡྷཾ པ་བུ་ཛ྄ཛྷ་ནྟི, ས་དཱ གོ་ཏ་མ་སཱ་ཝ་ཀཱ;
ཡེ་སཾ དི་ཝཱ ཙ ར་ཏྟོ ཙ, ནི་ཙྩཾ ཀཱ་ཡ་ག་ཏཱ ས་ཏི.
༣༠༠. སུ་པྤ་བུ་དྡྷཾ པ་བུ་ཛ྄ཛྷ་ནྟི, ས་དཱ གོ་ཏ་མ་སཱ་ཝ་ཀཱ;
ཡེ་སཾ དི་ཝཱ ཙ ར་ཏྟོ ཙ, ཨ་ཧིཾ་སཱ་ཡ ར་ཏོ མ་ནོ.
༣༠༡. སུ་པྤ་བུ་དྡྷཾ པ་བུ་ཛ྄ཛྷ་ནྟི, ས་དཱ གོ་ཏ་མ་སཱ་ཝ་ཀཱ;
ཡེ་སཾ དི་ཝཱ ཙ ར་ཏྟོ ཙ, བྷཱ་ཝ་ནཱ་ཡ ར་ཏོ མ་ནོ.
༣༠༢. དུ་པྤ་བྦ་ཛྫཾ དུ་ར་བྷི་ར་མཾ, དུ་རཱ་ཝཱ་སཱ གྷ་རཱ དུ་ཁཱ;
དུ་ཀྑོ་ས་མཱ་ན་སཾ་ཝཱ་སོ, དུ་ཀྑཱ་ནུ་པ་ཏི་ཏ་དྡྷ་གཱུ;
ཏ་སྨཱ ན ཙ་དྡྷ་གཱུ སི་ཡཱ, ན ཙ [ཏ་སྨཱ ན ཙ་དྡྷ་གཱུ ན ཙ (ཀ.)] དུ་ཀྑཱ་ནུ་པ་ཏི་ཏོ སི་ཡཱ [དུ་ཀྑཱ་ནུ་པཱ་ཏི་ཏོ (?)].
༣༠༣. ས་དྡྷོ སཱི་ལེ་ན ས་མྤ་ནྣོ, ཡ་སོ་བྷོ་ག་ས་མ་པྤི་ཏོ;
ཡཾ ཡཾ པ་དེ་སཾ བྷ་ཛ་ཏི, ཏ་ཏྠ ཏ་ཏྠེ་ཝ པཱུ་ཛི་ཏོ.
༣༠༤. དཱུ་རེ ས་ནྟོ པ་ཀཱ་སེ་ནྟི, ཧི་མ་ཝ་ནྟོ་ཝ པ་བྦ་ཏོ;
ཨ་ས་ནྟེ་ཏྠ ན དི་སྶ་ནྟི, ར་ཏྟིཾ ཁི་ཏྟཱ ཡ་ཐཱ ས་རཱ.
༣༠༥. ཨེ་ཀཱ་ས་ནཾ ཨེ་ཀ་སེ་ཡྻཾ, ཨེ་ཀོ ཙ་ར་མ་ཏ་ནྡི་ཏོ;
ཨེ་ཀོ ད་མ་ཡ་མ་ཏྟཱ་ནཾ, ཝ་ན་ནྟེ ར་མི་ཏོ སི་ཡཱ.
པ་ཀི་ཎྞ་ཀ་ཝ་གྒོ ཨེ་ཀ་ཝཱི་ས་ཏི་མོ ནི་ཊྛི་ཏོ.