༢༠. མ་གྒ་ཝ་གྒོ
༢༧༣. མ་གྒཱ་ན་ཊྛ་ངྒི་ཀོ སེ་ཊྛོ, ས་ཙྩཱ་ནཾ ཙ་ཏུ་རོ པ་དཱ;
ཝི་རཱ་གོ སེ་ཊྛོ དྷ་མྨཱ་ནཾ, དྭི་པ་དཱ་ན་ཉྩ ཙ་ཀྑུ་མཱ.
༢༧༤. ཨེ་སེ་ཝ [ཨེ་སོ་ཝ (སཱི. པཱི.)] མ་གྒོ ན་ཏྠ་ཉྙོ, ད་སྶ་ན་སྶ ཝི་སུ་དྡྷི་ཡཱ;
ཨེ་ཏ་ཉྷི ཏུ་མྷེ པ་ཊི་པ་ཛྫ་ཐ, མཱ་ར་སྶེ་ཏཾ པ་མོ་ཧ་ནཾ.
༢༧༥. ཨེ་ཏ་ཉྷི ཏུ་མྷེ པ་ཊི་པ་ནྣཱ, དུ་ཀྑ་སྶ་ནྟཾ ཀ་རི་སྶ་ཐ;
ཨ་ཀྑཱ་ཏོ ཝོ [ཨ་ཀྑཱ་ཏོ ཝེ (སཱི. པཱི.)] མ་ཡཱ མ་གྒོ, ཨ་ཉྙཱ་ཡ ས་ལླ་ཀ་ནྟ་ནཾ [ས་ལླ་ས་ནྠ་ནཾ (སཱི. པཱི.), ས་ལླ་ས་ཏྠ་ནཾ (སྱཱ.)].
༢༧༦. ཏུ་མྷེ་ཧི ཀི་ཙྩ་མཱ་ཏ་པྤཾ, ཨ་ཀྑཱ་ཏཱ་རོ ཏ་ཐཱ་ག་ཏཱ;
པ་ཊི་པ་ནྣཱ པ་མོ་ཀྑ་ནྟི, ཛྷཱ་ཡི་ནོ མཱ་ར་བ་ནྡྷ་ནཱ.
༢༧༧. ‘‘ས་བྦེ ས་ངྑཱ་རཱ ཨ་ནི་ཙྩཱ’’ཏི, ཡ་དཱ པ་ཉྙཱ་ཡ པ་སྶ་ཏི;
ཨ་ཐ ནི་བྦི་ནྡ་ཏི དུ་ཀྑེ, ཨེ་ས མ་གྒོ ཝི་སུ་དྡྷི་ཡཱ.
༢༧༨. ‘‘ས་བྦེ ས་ངྑཱ་རཱ དུ་ཀྑཱ’’ཏི, ཡ་དཱ པ་ཉྙཱ་ཡ པ་སྶ་ཏི;
ཨ་ཐ ནི་བྦི་ནྡ་ཏི དུ་ཀྑེ, ཨེ་ས མ་གྒོ ཝི་སུ་དྡྷི་ཡཱ.
༢༧༩. ‘‘ས་བྦེ དྷ་མྨཱ ཨ་ན་ཏྟཱ’’ཏི, ཡ་དཱ པ་ཉྙཱ་ཡ པ་སྶ་ཏི;
ཨ་ཐ ནི་བྦི་ནྡ་ཏི དུ་ཀྑེ, ཨེ་ས མ་གྒོ ཝི་སུ་དྡྷི་ཡཱ.
༢༨༠. ཨུ་ཊྛཱ་ན་ཀཱ་ལ་མྷི ཨ་ནུ་ཊྛ་ཧཱ་ནོ, ཡུ་ཝཱ བ་ལཱི ཨཱ་ལ་སི་ཡཾ ཨུ་པེ་ཏོ;
སཾ་ས་ནྣ་ས་ངྐ་པྤ་མ་ནོ [ཨ་ས་མྤ་ནྣ་ས་ངྐ་པྤ་མ་ནོ (ཀ.)] ཀུ་སཱི་ཏོ, པ་ཉྙཱ་ཡ མ་གྒཾ ཨ་ལ་སོ ན ཝི་ནྡ་ཏི.
༢༨༡. ཝཱ་ཙཱ་ནུ་ར་ཀྑཱི མ་ན་སཱ སུ་སཾ་ཝུ་ཏོ, ཀཱ་ཡེ་ན ཙ ནཱ་ཀུ་ས་ལཾ ཀ་ཡི་རཱ [ཨ་ཀུ་ས་ལཾ ན ཀ་ཡི་རཱ (སཱི. སྱཱ. ཀཾ. པཱི.)];
ཨེ་ཏེ ཏ་ཡོ ཀ་མྨ་པ་ཐེ ཝི་སོ་དྷ་ཡེ, ཨཱ་རཱ་དྷ་ཡེ མ་གྒ་མི་སི་པྤ་ཝེ་དི་ཏཾ.
༢༨༢. ཡོ་གཱ ཝེ ཛཱ་ཡ་ཏཱི [ཛཱ་ཡ་ཏེ (ཀ་ཏྠ་ཙི)] བྷཱུ་རི, ཨ་ཡོ་གཱ བྷཱུ་རི་ས་ངྑ་ཡོ;
ཨེ་ཏཾ དྭེ་དྷཱ་པ་ཐཾ ཉ་ཏྭཱ, བྷ་ཝཱ་ཡ ཝི་བྷ་ཝཱ་ཡ ཙ;
ཏ་ཐཱ་ཏྟཱ་ནཾ ནི་ཝེ་སེ་ཡྻ, ཡ་ཐཱ བྷཱུ་རི པ་ཝ་ཌྜྷ་ཏི.
༢༨༣. ཝ་ནཾ ཚི་ནྡ་ཐ མཱ རུ་ཀྑཾ, ཝ་ན་ཏོ ཛཱ་ཡ་ཏེ བྷ་ཡཾ;
ཚེ་ཏྭཱ ཝ་ན་ཉྩ ཝ་ན་ཐ་ཉྩ, ནི་བྦ་ནཱ ཧོ་ཐ བྷི་ཀྑ་ཝོ.
༢༨༤. ཡཱ་ཝ ཧི ཝ་ན་ཐོ ན ཚི་ཛྫ་ཏི, ཨ་ཎུ་མ་ཏྟོ་པི ན་ར་སྶ ནཱ་རི་སུ;
པ་ཊི་བ་དྡྷ་མ་ནོ་ཝ [པ་ཊི་བ་ནྡྷ་མ་ནོ་ཝ (ཀ.)] ཏཱ་ཝ སོ, ཝ་ཙྪོ ཁཱི་ར་པ་ཀོ་ཝ [ཁཱི་ར་པཱ་ནོ་ཝ (པཱི.)] མཱ་ཏ་རི.
༢༨༥. ཨུ་ཙྪི་ནྡ སི་ནེ་ཧ་མ་ཏྟ་ནོ ཀུ་མུ་དཾ སཱ་ར་དི་ཀཾ་ཝ [པཱ་ཎི་ནཱ];
ས་ནྟི་མ་གྒ་མེ་ཝ བྲཱུ་ཧ་ཡ, ནི་བྦཱ་ནཾ སུ་ག་ཏེ་ན དེ་སི་ཏཾ.
༢༨༦. ཨི་དྷ ཝ་སྶཾ ཝ་སི་སྶཱ་མི, ཨི་དྷ ཧེ་མ་ནྟ་གི་མྷི་སུ;
ཨི་ཏི བཱ་ལོ ཝི་ཙི་ནྟེ་ཏི, ཨ་ནྟ་རཱ་ཡཾ ན བུ་ཛ྄ཛྷ་ཏི.
༢༨༧. ཏཾ པུ་ཏྟ་པ་སུ་ས་མྨ་ཏྟཾ, བྱཱ་ས་ཏྟ་མ་ན་སཾ ན་རཾ;
སུ་ཏྟཾ གཱ་མཾ མ་ཧོ་གྷོ་ཝ, མ་ཙྩུ ཨཱ་དཱ་ཡ ག་ཙྪ་ཏི.
༢༨༨. ན ས་ནྟི པུ་ཏྟཱ ཏཱ་ཎཱ་ཡ, ན པི་ཏཱ ནཱ་པི བ་ནྡྷ་ཝཱ;
ཨ་ནྟ་ཀེ་ནཱ་དྷི་པ་ནྣ་སྶ, ན་ཏྠི ཉཱ་ཏཱི་སུ ཏཱ་ཎ་ཏཱ.
༢༨༩. ཨེ་ཏ་མ་ཏྠ་ཝ་སཾ ཉ་ཏྭཱ, པ་ཎྜི་ཏོ སཱི་ལ་སཾ་ཝུ་ཏོ;
ནི་བྦཱ་ན་ག་མ་ནཾ མ་གྒཾ, ཁི་པྤ་མེ་ཝ ཝི་སོ་དྷ་ཡེ.
མ་གྒ་ཝ་གྒོ ཝཱི་ས་ཏི་མོ ནི་ཊྛི་ཏོ.