༡༩. དྷ་མྨ་ཊྛ་ཝ་གྒོ
༢༥༦. ན ཏེ་ན ཧོ་ཏི དྷ་མྨ་ཊྛོ, ཡེ་ན་ཏྠཾ སཱ་ཧ་སཱ [ས་ཧ་སཱ (སཱི. སྱཱ. ཀ.)] ན་ཡེ;
ཡོ ཙ ཨ་ཏྠཾ ཨ་ན་ཏྠ་ཉྩ, ཨུ་བྷོ ནི་ཙྪེ་ཡྻ པ་ཎྜི་ཏོ.
༢༥༧. ཨ་སཱ་ཧ་སེ་ན དྷ་མྨེ་ན, ས་མེ་ན ན་ཡ་ཏཱི པ་རེ;
དྷ་མྨ་སྶ གུ་ཏྟོ མེ་དྷཱ་ཝཱི, ‘‘དྷ་མྨ་ཊྛོ’’ཏི པ་ཝུ་ཙྩ་ཏི.
༢༥༨. ན ཏེ་ན པ་ཎྜི་ཏོ ཧོ་ཏི, ཡཱ་ཝ་ཏཱ བ་ཧུ བྷཱ་ས་ཏི;
ཁེ་མཱི ཨ་ཝེ་རཱི ཨ་བྷ་ཡོ, ‘‘པ་ཎྜི་ཏོ’’ཏི པ་ཝུ་ཙྩ་ཏི.
༢༥༩. ན ཏཱ་ཝ་ཏཱ དྷ་མྨ་དྷ་རོ, ཡཱ་ཝ་ཏཱ བ་ཧུ བྷཱ་ས་ཏི;
ཡོ ཙ ཨ་པྤ་མྤི སུ་ཏྭཱ་ན, དྷ་མྨཾ ཀཱ་ཡེ་ན པ་སྶ་ཏི;
ས ཝེ དྷ་མྨ་དྷ་རོ ཧོ་ཏི, ཡོ དྷ་མྨཾ ན་པྤ་མ་ཛྫ་ཏི.
༢༦༠. ན ཏེ་ན ཐེ་རོ སོ ཧོ་ཏི [ཐེ་རོ ཧོ་ཏི (སཱི. སྱཱ.)], ཡེ་ན་སྶ པ་ལི་ཏཾ སི་རོ;
པ་རི་པ་ཀྐོ ཝ་ཡོ ཏ་སྶ, ‘‘མོ་གྷ་ཛི་ཎྞོ’’ཏི ཝུ་ཙྩ་ཏི.
༢༦༡. ཡ་མྷི ས་ཙྩ་ཉྩ དྷ་མྨོ ཙ, ཨ་ཧིཾ་སཱ སཾ་ཡ་མོ ད་མོ;
ས ཝེ ཝ་ནྟ་མ་ལོ དྷཱི་རོ, ‘‘ཐེ་རོ’’ ཨི་ཏི [སོ ཐེ་རོ་ཏི (སྱཱ. ཀ.)] པ་ཝུ་ཙྩ་ཏི.
༢༦༢. ན ཝཱ་ཀྐ་ར་ཎ་མ་ཏྟེ་ན, ཝ་ཎྞ་པོ་ཀྑ་ར་ཏཱ་ཡ ཝཱ;
སཱ་དྷུ་རཱུ་པོ ན་རོ ཧོ་ཏི, ཨི་སྶུ་ཀཱི མ་ཙྪ་རཱི ས་ཋོ.
༢༦༣. ཡ་སྶ ཙེ་ཏཾ ས་མུ་ཙྪི་ནྣཾ, མཱུ་ལ་གྷ་ཙྩཾ ས་མཱུ་ཧ་ཏཾ;
ས ཝ་ནྟ་དོ་སོ མེ་དྷཱ་ཝཱི, ‘‘སཱ་དྷུ་རཱུ་པོ’’ཏི ཝུ་ཙྩ་ཏི.
༢༦༤. ན མུ་ཎྜ་ཀེ་ན ས་མ་ཎོ, ཨ་བྦ་ཏོ ཨ་ལི་ཀཾ བྷ་ཎཾ;
ཨི་ཙྪཱ་ལོ་བྷ་ས་མཱ་པ་ནྣོ, ས་མ་ཎོ ཀིཾ བྷ་ཝི་སྶ་ཏི.
༢༦༥. ཡོ ཙ ས་མེ་ཏི པཱ་པཱ་ནི, ཨ་ཎུཾ ཐཱུ་ལཱ་ནི ས་བྦ་སོ;
ས་མི་ཏ་ཏྟཱ ཧི པཱ་པཱ་ནཾ, ‘‘ས་མ་ཎོ’’ཏི པ་ཝུ་ཙྩ་ཏི.
༢༦༦. ན ཏེ་ན བྷི་ཀྑུ སོ ཧོ་ཏི, ཡཱ་ཝ་ཏཱ བྷི་ཀྑ་ཏེ པ་རེ;
ཝི་སྶཾ དྷ་མྨཾ ས་མཱ་དཱ་ཡ, བྷི་ཀྑུ ཧོ་ཏི ན ཏཱ་ཝ་ཏཱ.
༢༦༧. ཡོ་དྷ པུ་ཉྙ་ཉྩ པཱ་པ་ཉྩ, བཱ་ཧེ་ཏྭཱ བྲ་ཧྨ་ཙ་རི་ཡ་ཝཱ [བྲ་ཧྨ་ཙ་རི་ཡཾ (ཀ.)];
ས་ངྑཱ་ཡ ལོ་ཀེ ཙ་ར་ཏི, ས ཝེ ‘‘བྷི་ཀྑཱུ’’ཏི ཝུ་ཙྩ་ཏི.
༢༦༨. ན མོ་ནེ་ན མུ་ནཱི ཧོ་ཏི, མཱུ་ལ༹ྷ་རཱུ་པོ ཨ་ཝི་དྡ་སུ;
ཡོ ཙ ཏུ་ལཾ་ཝ པ་གྒ་ཡ྄ཧ, ཝ་ར་མཱ་དཱ་ཡ པ་ཎྜི་ཏོ.
༢༦༩. པཱ་པཱ་ནི པ་རི་ཝ་ཛྫེ་ཏི, ས མུ་ནཱི ཏེ་ན སོ མུ་ནི;
ཡོ མུ་ནཱ་ཏི ཨུ་བྷོ ལོ་ཀེ, ‘‘མུ་ནི’’ ཏེ་ན པ་ཝུ་ཙྩ་ཏི.
༢༧༠. ན ཏེ་ན ཨ་རི་ཡོ ཧོ་ཏི, ཡེ་ན པཱ་ཎཱ་ནི ཧིཾ་ས་ཏི;
ཨ་ཧིཾ་སཱ ས་བྦ་པཱ་ཎཱ་ནཾ, ‘‘ཨ་རི་ཡོ’’ཏི པ་ཝུ་ཙྩ་ཏི.
༢༧༡. ན སཱི་ལ་བྦ་ཏ་མ་ཏྟེ་ན, བཱ་ཧུ་ས་ཙྩེ་ན ཝཱ པ་ན;
ཨ་ཐ ཝཱ ས་མཱ་དྷི་ལཱ་བྷེ་ན, ཝི་ཝི་ཏྟ་ས་ཡ་ནེ་ན ཝཱ.
༢༧༢. ཕུ་སཱ་མི ནེ་ཀྑ་མྨ་སུ་ཁཾ, ཨ་པུ་ཐུ་ཛྫ་ན་སེ་ཝི་ཏཾ;
བྷི་ཀྑུ ཝི་སྶཱ་ས་མཱ་པཱ་དི, ཨ་པྤ་ཏྟོ ཨཱ་ས་ཝ་ཀྑ་ཡཾ.
དྷ་མྨ་ཊྛ་ཝ་གྒོ ཨེ་ཀཱུ་ན་ཝཱི་ས་ཏི་མོ ནི་ཊྛི་ཏོ.