༡༨. མ་ལ་ཝ་གྒོ
༢༣༥. པ་ཎྜུ་པ་ལཱ་སོ་ཝ དཱ་ནི་སི, ཡ་མ་པུ་རི་སཱ་པི ཙ ཏེ [ཏཾ (སཱི. སྱཱ. ཀཾ. པཱི.)] ཨུ་པ་ཊྛི་ཏཱ;
ཨུ་ཡྻོ་ག་མུ་ཁེ ཙ ཏི་ཊྛ་སི, པཱ་ཐེ་ཡྻ་མྤི ཙ ཏེ ན ཝི་ཛྫ་ཏི.
༢༣༦. སོ ཀ་རོ་ཧི དཱི་པ་མ་ཏྟ་ནོ, ཁི་པྤཾ ཝཱ་ཡ་མ པ་ཎྜི་ཏོ བྷ་ཝ;
ནི་དྡྷ་ནྟ་མ་ལོ ཨ་ན་ངྒ་ཎོ, དི་བྦཾ ཨ་རི་ཡ་བྷཱུ་མིཾ ཨུ་པེ་ཧི་སི [དི་བྦཾ ཨ་རི་ཡ་བྷཱུ་མི་མེ་ཧི་སི (སཱི. སྱཱ. པཱི.), དི་བྦ་མ་རི་ཡ་བྷཱུ་མིཾ ཨུ་པེ་ཧི་སི (?)].
༢༣༧. ཨུ་པ་ནཱི་ཏ་ཝ་ཡོ ཙ དཱ་ནི་སི, ས་མྤ་ཡཱ་ཏོ་སི ཡ་མ་སྶ ས་ནྟི་ཀེ;
ཝཱ་སོ [ཝཱ་སོ་པི ཙ (བ་ཧཱུ་སུ)] ཏེ ན་ཏྠི ཨ་ནྟ་རཱ, པཱ་ཐེ་ཡྻ་མྤི ཙ ཏེ ན ཝི་ཛྫ་ཏི.
༢༣༨. སོ ཀ་རོ་ཧི དཱི་པ་མ་ཏྟ་ནོ, ཁི་པྤཾ ཝཱ་ཡ་མ པ་ཎྜི་ཏོ བྷ་ཝ;
ནི་དྡྷ་ནྟ་མ་ལོ ཨ་ན་ངྒ་ཎོ, ན པུ་ནཾ ཛཱ་ཏི་ཛ་རཾ [ན པུ་ན ཛཱ་ཏི་ཛ་རཾ (སཱི. སྱཱ.), ན པུ་ན ཛཱ་ཏི་ཛྫ་རཾ (ཀ.)] ཨུ་པེ་ཧི་སི.
༢༣༩. ཨ་ནུ་པུ་བྦེ་ན མེ་དྷཱ་ཝཱི, ཐོ་ཀཾ ཐོ་ཀཾ ཁ་ཎེ ཁ་ཎེ;
ཀ་མྨཱ་རོ ར་ཛ་ཏ་སྶེ་ཝ, ནི་དྡྷ་མེ མ་ལ་མ་ཏྟ་ནོ.
༢༤༠. ཨ་ཡ་སཱ་ཝ མ་ལཾ ས་མུ་ཊྛི་ཏཾ [ས་མུ་ཊྛཱ་ཡ (ཀ.)], ཏ་ཏུ་ཊྛཱ་ཡ [ཏ་དུ་ཊྛཱ་ཡ (སཱི. སྱཱ. པཱི.)] ཏ་མེ་ཝ ཁཱ་ད་ཏི;
ཨེ་ཝཾ ཨ་ཏི་དྷོ་ན་ཙཱ་རི་ནཾ, སཱ་ནི ཀ་མྨཱ་ནི [ས་ཀ་ཀ་མྨཱ་ནི (སཱི. པཱི.)] ན་ཡ་ནྟི དུ་གྒ་ཏིཾ.
༢༤༡. ཨ་ས་ཛ྄ཛྷཱ་ཡ་མ་ལཱ མ་ནྟཱ, ཨ་ནུ་ཊྛཱ་ན་མ་ལཱ གྷ་རཱ;
མ་ལཾ ཝ་ཎྞ་སྶ ཀོ་ས་ཛྫཾ, པ་མཱ་དོ ར་ཀྑ་ཏོ མ་ལཾ.
༢༤༢. མ་ལི་ཏྠི་ཡཱ དུ་ཙྩ་རི་ཏཾ, མ་ཙྪེ་རཾ ད་ད་ཏོ མ་ལཾ;
མ་ལཱ ཝེ པཱ་པ་ཀཱ དྷ་མྨཱ, ཨ་སྨིཾ ལོ་ཀེ པ་ར་མྷི ཙ.
༢༤༣. ཏ་ཏོ མ་ལཱ མ་ལ་ཏ་རཾ, ཨ་ཝི་ཛྫཱ པ་ར་མཾ མ་ལཾ;
ཨེ་ཏཾ མ་ལཾ པ་ཧ་ནྟྭཱ་ན, ནི་མྨ་ལཱ ཧོ་ཐ བྷི་ཀྑ་ཝོ.
༢༤༤. སུ་ཛཱི་ཝཾ ཨ་ཧི་རི་ཀེ་ན, ཀཱ་ཀ་སཱུ་རེ་ན དྷཾ་སི་ནཱ;
པ་ཀྑ་ནྡི་ནཱ པ་ག་བྦྷེ་ན, སཾ་ཀི་ལི་ཊྛེ་ན ཛཱི་ཝི་ཏཾ.
༢༤༥. ཧི་རཱི་མ་ཏཱ ཙ དུ་ཛྫཱི་ཝཾ, ནི་ཙྩཾ སུ་ཙི་ག་ཝེ་སི་ནཱ;
ཨ་ལཱི་ནེ་ནཱ་པྤ་ག་བྦྷེ་ན, སུ་དྡྷཱ་ཛཱི་ཝེ་ན པ་སྶ་ཏཱ.
༢༤༦. ཡོ པཱ་ཎ་མ་ཏི་པཱ་ཏེ་ཏི, མུ་སཱ་ཝཱ་ད་ཉྩ བྷཱ་ས་ཏི;
ལོ་ཀེ ཨ་དི་ནྣ་མཱ་དི་ཡ་ཏི, པ་ར་དཱ་ར་ཉྩ ག་ཙྪ་ཏི.
༢༤༧. སུ་རཱ་མེ་ར་ཡ་པཱ་ན་ཉྩ, ཡོ ན་རོ ཨ་ནུ་ཡུ་ཉྫ་ཏི;
ཨི་དྷེ་ཝ་མེ་སོ ལོ་ཀ་སྨིཾ, མཱུ་ལཾ ཁ་ཎ་ཏི ཨ་ཏྟ་ནོ.
༢༤༨. ཨེ་ཝཾ བྷོ པུ་རི་ས ཛཱ་ནཱ་ཧི, པཱ་པ་དྷ་མྨཱ ཨ་ས་ཉྙ་ཏཱ;
མཱ ཏཾ ལོ་བྷོ ཨ་དྷ་མྨོ ཙ, ཙི་རཾ དུ་ཀྑཱ་ཡ ར་ནྡྷ་ཡུཾ.
༢༤༩. ད་དཱ་ཏི ཝེ ཡ་ཐཱ་ས་དྡྷཾ, ཡ་ཐཱ་པ་སཱ་ད་ནཾ [ཡ་ཏྠ པ་སཱ་ད་ནཾ (ཀ་ཏྠ་ཙི)] ཛ་ནོ;
ཏ་ཏྠ ཡོ མ་ངྐུ བྷ་ཝ་ཏི [ཏ་ཏྠ ཙེ མཾ་ཀུ ཡོ ཧོ་ཏི (སཱི.), ཏ་ཏྠ ཡོ མ་ངྐུ་ཏོ ཧོ་ཏི (སྱཱ.)], པ་རེ་སཾ པཱ་ན་བྷོ་ཛ་ནེ;
ན སོ དི་ཝཱ ཝཱ ར་ཏྟིཾ ཝཱ, ས་མཱ་དྷི་མ་དྷི་ག་ཙྪ་ཏི.
༢༥༠. ཡ་སྶ ཙེ་ཏཾ ས་མུ་ཙྪི་ནྣཾ, མཱུ་ལ་གྷ་ཙྩཾ [མཱུ་ལ་གྷ་ཙྪཾ (ཀ.)] ས་མཱུ་ཧ་ཏཾ;
ས ཝེ དི་ཝཱ ཝཱ ར་ཏྟིཾ ཝཱ, ས་མཱ་དྷི་མ་དྷི་ག་ཙྪ་ཏི.
༢༥༡. ན་ཏྠི རཱ་ག་ས་མོ ཨ་གྒི, ན་ཏྠི དོ་ས་ས་མོ ག་ཧོ;
ན་ཏྠི མོ་ཧ་ས་མཾ ཛཱ་ལཾ, ན་ཏྠི ཏ་ཎྷཱ་ས་མཱ ན་དཱི.
༢༥༢. སུ་ད་སྶཾ ཝ་ཛྫ་མ་ཉྙེ་སཾ, ཨ་ཏྟ་ནོ པ་ན དུ་དྡ་སཾ;
པ་རེ་སཾ ཧི སོ ཝ་ཛྫཱ་ནི, ཨོ་པུ་ནཱ་ཏི [ཨོ་ཕུ་ནཱ་ཏི (ཀ.)] ཡ་ཐཱ བྷུ་སཾ;
ཨ་ཏྟ་ནོ པ་ན ཚཱ་དེ་ཏི, ཀ་ལིཾ་ཝ ཀི་ཏ་ཝཱ ས་ཋོ.
༢༥༣. པ་ར་ཝ་ཛྫཱ་ནུ་པ་སྶི་སྶ, ནི་ཙྩཾ ཨུ་ཛ྄ཛྷཱ་ན་ས་ཉྙི་ནོ;
ཨཱ་ས་ཝཱ ཏ་སྶ ཝ་ཌྜྷ་ནྟི, ཨཱ་རཱ སོ ཨཱ་ས་ཝ་ཀྑ་ཡཱ.
༢༥༤. ཨཱ་ཀཱ་སེ་ཝ པ་དཾ ན་ཏྠི, ས་མ་ཎོ ན་ཏྠི བཱ་ཧི་རེ;
པ་པ་ཉྩཱ་བྷི་ར་ཏཱ པ་ཛཱ, ནི་པྤ་པ་ཉྩཱ ཏ་ཐཱ་ག་ཏཱ.
༢༥༥. ཨཱ་ཀཱ་སེ་ཝ པ་དཾ ན་ཏྠི, ས་མ་ཎོ ན་ཏྠི བཱ་ཧི་རེ;
ས་ངྑཱ་རཱ ས་སྶ་ཏཱ ན་ཏྠི, ན་ཏྠི བུ་དྡྷཱ་ན་མི་ཉྫི་ཏཾ.
མ་ལ་ཝ་གྒོ ཨ་ཊྛཱ་ར་ས་མོ ནི་ཊྛི་ཏོ.