༡༦. པི་ཡ་ཝ་གྒོ
༢༠༩. ཨ་ཡོ་གེ ཡུ་ཉྫ་མ་ཏྟཱ་ནཾ, ཡོ་ག་སྨི་ཉྩ ཨ་ཡོ་ཛ་ཡཾ;
ཨ་ཏྠཾ ཧི་ཏྭཱ པི་ཡ་གྒཱ་ཧཱི, པི་ཧེ་ཏ་ཏྟཱ་ནུ་ཡོ་གི་ནཾ.
༢༡༠. མཱ པི་ཡེ་ཧི ས་མཱ་ག་ཉྪི, ཨ་པྤི་ཡེ་ཧི ཀུ་དཱ་ཙ་ནཾ;
པི་ཡཱ་ནཾ ཨ་ད་སྶ་ནཾ དུ་ཀྑཾ, ཨ་པྤི་ཡཱ་ན་ཉྩ ད་སྶ་ནཾ.
༢༡༡. ཏ་སྨཱ པི་ཡཾ ན ཀ་ཡི་རཱ་ཐ, པི་ཡཱ་པཱ་ཡོ ཧི པཱ་པ་ཀོ;
ག་ནྠཱ ཏེ་སཾ ན ཝི་ཛྫ་ནྟི, ཡེ་སཾ ན་ཏྠི པི་ཡཱ་པྤི་ཡཾ.
༢༡༢. པི་ཡ་ཏོ ཛཱ་ཡ་ཏཱི སོ་ཀོ, པི་ཡ་ཏོ ཛཱ་ཡ་ཏཱི [ཛཱ་ཡ་ཏེ (ཀ.)] བྷ་ཡཾ;
པི་ཡ་ཏོ ཝི་པྤ་མུ་ཏྟ་སྶ, ན་ཏྠི སོ་ཀོ ཀུ་ཏོ བྷ་ཡཾ.
༢༡༣. པེ་མ་ཏོ ཛཱ་ཡ་ཏཱི སོ་ཀོ, པེ་མ་ཏོ ཛཱ་ཡ་ཏཱི བྷ་ཡཾ;
པེ་མ་ཏོ ཝི་པྤ་མུ་ཏྟ་སྶ, ན་ཏྠི སོ་ཀོ ཀུ་ཏོ བྷ་ཡཾ.
༢༡༤. ར་ཏི་ཡཱ ཛཱ་ཡ་ཏཱི སོ་ཀོ, ར་ཏི་ཡཱ ཛཱ་ཡ་ཏཱི བྷ་ཡཾ;
ར་ཏི་ཡཱ ཝི་པྤ་མུ་ཏྟ་སྶ, ན་ཏྠི སོ་ཀོ ཀུ་ཏོ བྷ་ཡཾ.
༢༡༥. ཀཱ་མ་ཏོ ཛཱ་ཡ་ཏཱི སོ་ཀོ, ཀཱ་མ་ཏོ ཛཱ་ཡ་ཏཱི བྷ་ཡཾ;
ཀཱ་མ་ཏོ ཝི་པྤ་མུ་ཏྟ་སྶ, ན་ཏྠི སོ་ཀོ ཀུ་ཏོ བྷ་ཡཾ.
༢༡༦. ཏ་ཎྷཱ་ཡ ཛཱ་ཡ་ཏཱི [ཛཱ་ཡ་ཏེ (ཀ.)] སོ་ཀོ, ཏ་ཎྷཱ་ཡ ཛཱ་ཡ་ཏཱི བྷ་ཡཾ;
ཏ་ཎྷཱ་ཡ ཝི་པྤ་མུ་ཏྟ་སྶ, ན་ཏྠི སོ་ཀོ ཀུ་ཏོ བྷ་ཡཾ.
༢༡༧. སཱི་ལ་ད་སྶ་ན་ས་མྤ་ནྣཾ, དྷ་མྨ་ཊྛཾ ས་ཙྩ་ཝེ་དི་ནཾ;
ཨ་ཏྟ་ནོ ཀ་མྨ ཀུ་བྦཱ་ནཾ, ཏཾ ཛ་ནོ ཀུ་རུ་ཏེ པི་ཡཾ.
༢༡༨. ཚ་ནྡ་ཛཱ་ཏོ ཨ་ན་ཀྑཱ་ཏེ, མ་ན་སཱ ཙ ཕུ་ཊོ སི་ཡཱ;
ཀཱ་མེ་སུ ཙ ཨ་པྤ་ཊི་བ་དྡྷ་ཙི་ཏྟོ [ཨ་པྤ་ཊི་བ་ནྡྷ་ཙི་ཏྟོ (ཀ.)], ཨུ་དྡྷཾ་སོ་ཏོ་ཏི ཝུ་ཙྩ་ཏི.
༢༡༩. ཙི་ར་པྤ་ཝཱ་སིཾ པུ་རི་སཾ, དཱུ་ར་ཏོ སོ་ཏྠི་མཱ་ག་ཏཾ;
ཉཱ་ཏི་མི་ཏྟཱ སུ་ཧ་ཛྫཱ ཙ, ཨ་བྷི་ན་ནྡ་ནྟི ཨཱ་ག་ཏཾ.
༢༢༠. ཏ་ཐེ་ཝ ཀ་ཏ་པུ་ཉྙ་མྤི, ཨ་སྨཱ ལོ་ཀཱ པ་རཾ ག་ཏཾ;
པུ་ཉྙཱ་ནི པ་ཊི་ག་ཎྷ་ནྟི, པི་ཡཾ ཉཱ་ཏཱི་ཝ ཨཱ་ག་ཏཾ.
པི་ཡ་ཝ་གྒོ སོ་ལ༹་ས་མོ ནི་ཊྛི་ཏོ.