༡༤. བུ་དྡྷ་ཝ་གྒོ
༡༧༩. ཡ་སྶ ཛི་ཏཾ ནཱ་ཝ་ཛཱི་ཡ་ཏི, ཛི་ཏཾ ཡ་སྶ [ཛི་ཏ་མ་སྶ (སཱི. སྱཱ. པཱི.), ཛི་ཏཾ མ་སྶ (ཀ.)] ནོ ཡཱ་ཏི ཀོ་ཙི ལོ་ཀེ;
ཏཾ བུ་དྡྷ་མ་ན་ནྟ་གོ་ཙ་རཾ, ཨ་པ་དཾ ཀེ་ན པ་དེ་ན ནེ་སྶ་ཐ.
༡༨༠. ཡ་སྶ ཛཱ་ལི་ནཱི ཝི་ས་ཏྟི་ཀཱ, ཏ་ཎྷཱ ན་ཏྠི ཀུ་ཧི་ཉྩི ནེ་ཏ་ཝེ;
ཏཾ བུ་དྡྷ་མ་ན་ནྟ་གོ་ཙ་རཾ, ཨ་པ་དཾ ཀེ་ན པ་དེ་ན ནེ་སྶ་ཐ.
༡༨༡. ཡེ ཛྷཱ་ན་པ་སུ་ཏཱ དྷཱི་རཱ, ནེ་ཀྑ་མྨཱུ་པ་ས་མེ ར་ཏཱ;
དེ་ཝཱ་པི ཏེ་སཾ པི་ཧ་ཡ་ནྟི, ས་མྦུ་དྡྷཱ་ནཾ ས་ཏཱི་མ་ཏཾ.
༡༨༢. ཀི་ཙྪོ མ་ནུ་སྶ་པ་ཊི་ལཱ་བྷོ, ཀི་ཙྪཾ མ་ཙྩཱ་ན ཛཱི་ཝི་ཏཾ;
ཀི་ཙྪཾ ས་དྡྷ་མྨ་སྶ་ཝ་ནཾ, ཀི་ཙྪོ བུ་དྡྷཱ་ན་མུ་པྤཱ་དོ.
༡༨༣. ས་བྦ་པཱ་པ་སྶ ཨ་ཀ་ར་ཎཾ, ཀུ་ས་ལ་སྶ ཨུ་པ་ས་མྤ་དཱ [ཀུ་ས་ལ་སྶཱུ་པ་ས་མྤ་དཱ (སྱཱ.)];
ས་ཙི་ཏྟ་པ་རི་ཡོ་ད་པ་ནཾ [ས་ཙི་ཏྟ་པ་རི་ཡོ་དཱ་པ་ནཾ (?)], ཨེ་ཏཾ བུ་དྡྷཱ་ན སཱ་ས་ནཾ.
༡༨༤. ཁ་ནྟཱི པ་ར་མཾ ཏ་པོ ཏི་ཏི་ཀྑཱ, ནི་བྦཱ་ནཾ [ནི་བྦཱ་ཎཾ (ཀ. སཱི. པཱི.)] པ་ར་མཾ ཝ་ད་ནྟི བུ་དྡྷཱ;
ན ཧི པ་བྦ་ཛི་ཏོ པ་རཱུ་པ་གྷཱ་ཏཱི, ན [ཨ་ཡཾ ན་ཀཱ་རོ སཱི. སྱཱ. པཱི. པཱ་ཏྠ་ཀེ་སུ ན དི་སྶ་ཏི] ས་མ་ཎོ ཧོ་ཏི པ་རཾ ཝི་ཧེ་ཋ་ཡ་ནྟོ.
༡༨༥. ཨ་ནཱུ་པ་ཝཱ་དོ ཨ་ནཱུ་པ་གྷཱ་ཏོ [ཨ་ནུ་པ་ཝཱ་དོ ཨ་ནུ་པ་གྷཱ་ཏོ (སྱཱ. ཀ.)], པཱ་ཏི་མོ་ཀྑེ ཙ སཾ་ཝ་རོ;
མ་ཏྟ་ཉྙུ་ཏཱ ཙ བྷ་ཏྟ་སྨིཾ, པ་ནྟ་ཉྩ ས་ཡ་ནཱ་ས་ནཾ;
ཨ་དྷི་ཙི་ཏྟེ ཙ ཨཱ་ཡོ་གོ, ཨེ་ཏཾ བུ་དྡྷཱ་ན སཱ་ས་ནཾ.
༡༨༦. ན ཀ་ཧཱ་པ་ཎ་ཝ་སྶེ་ན, ཏི་ཏྟི ཀཱ་མེ་སུ ཝི་ཛྫ་ཏི;
ཨ་པྤ་སྶཱ་དཱ དུ་ཁཱ ཀཱ་མཱ, ཨི་ཏི ཝི་ཉྙཱ་ཡ པ་ཎྜི་ཏོ.
༡༨༧. ཨ་པི དི་བྦེ་སུ ཀཱ་མེ་སུ, ར་ཏིཾ སོ ནཱ་དྷི་ག་ཙྪ་ཏི;
ཏ་ཎྷ་ཀྑ་ཡ་ར་ཏོ ཧོ་ཏི, ས་མྨཱ་ས་མྦུ་དྡྷ་སཱ་ཝ་ཀོ.
༡༨༨. བ་ཧུཾ ཝེ ས་ར་ཎཾ ཡ་ནྟི, པ་བྦ་ཏཱ་ནི ཝ་ནཱ་ནི ཙ;
ཨཱ་རཱ་མ་རུ་ཀྑ་ཙེ་ཏྱཱ་ནི, མ་ནུ་སྶཱ བྷ་ཡ་ཏ་ཛྫི་ཏཱ.
༡༨༩. ནེ་ཏཾ ཁོ ས་ར་ཎཾ ཁེ་མཾ, ནེ་ཏཾ ས་ར་ཎ་མུ་ཏྟ་མཾ;
ནེ་ཏཾ ས་ར་ཎ་མཱ་ག་མྨ, ས་བྦ་དུ་ཀྑཱ པ་མུ་ཙྩ་ཏི.
༡༩༠. ཡོ ཙ བུ་དྡྷ་ཉྩ དྷ་མྨ་ཉྩ, ས་ངྒྷ་ཉྩ ས་ར་ཎཾ ག་ཏོ;
ཙ་ཏྟཱ་རི ཨ་རི་ཡ་ས་ཙྩཱ་ནི, ས་མྨ་པྤ་ཉྙཱ་ཡ པ་སྶ་ཏི.
༡༩༡. དུ་ཀྑཾ དུ་ཀྑ་ས་མུ་པྤཱ་དཾ, དུ་ཀྑ་སྶ ཙ ཨ་ཏི་ཀྐ་མཾ;
ཨ་རི་ཡཾ ཙ་ཊྛ་ངྒི་ཀཾ མ་གྒཾ, དུ་ཀྑཱུ་པ་ས་མ་གཱ་མི་ནཾ.
༡༩༢. ཨེ་ཏཾ ཁོ ས་ར་ཎཾ ཁེ་མཾ, ཨེ་ཏཾ ས་ར་ཎ་མུ་ཏྟ་མཾ;
ཨེ་ཏཾ ས་ར་ཎ་མཱ་ག་མྨ, ས་བྦ་དུ་ཀྑཱ པ་མུ་ཙྩ་ཏི.
༡༩༣. དུ་ལླ་བྷོ པུ་རི་སཱ་ཛ་ཉྙོ, ན སོ ས་བྦ་ཏྠ ཛཱ་ཡ་ཏི;
ཡ་ཏྠ སོ ཛཱ་ཡ་ཏི དྷཱི་རོ, ཏཾ ཀུ་ལཾ སུ་ཁ་མེ་དྷ་ཏི.
༡༩༤. སུ་ཁོ བུ་དྡྷཱ་ན་མུ་པྤཱ་དོ, སུ་ཁཱ ས་དྡྷ་མྨ་དེ་ས་ནཱ;
སུ་ཁཱ ས་ངྒྷ་སྶ སཱ་མ་གྒཱི, ས་མ་གྒཱ་ནཾ ཏ་པོ སུ་ཁོ.
༡༩༥. པཱུ་ཛཱ་ར་ཧེ པཱུ་ཛ་ཡ་ཏོ, བུ་དྡྷེ ཡ་དི ཝ སཱ་ཝ་ཀེ;
པ་པ་ཉྩ་ས་མ་ཏི་ཀྐ་ནྟེ, ཏི་ཎྞ་སོ་ཀ་པ་རི་དྡ་ཝེ.
༡༩༦. ཏེ ཏཱ་དི་སེ པཱུ་ཛ་ཡ་ཏོ, ནི་བྦུ་ཏེ ཨ་ཀུ་ཏོ་བྷ་ཡེ;
ན ས་ཀྐཱ པུ་ཉྙཾ ས་ངྑཱ་ཏུཾ, ཨི་མེ་ཏྟ་མ་པི ཀེ་ན་ཙི.
བུ་དྡྷ་ཝ་གྒོ ཙུ་དྡ་ས་མོ ནི་ཊྛི་ཏོ.