༡༣. ལོ་ཀ་ཝ་གྒོ
༡༦༧. ཧཱི་ནཾ དྷ་མྨཾ ན སེ་ཝེ་ཡྻ, པ་མཱ་དེ་ན ན སཾ་ཝ་སེ;
མི་ཙྪཱ་དི་ཊྛིཾ ན སེ་ཝེ་ཡྻ, ན སི་ཡཱ ལོ་ཀ་ཝ་ཌྜྷ་ནོ.
༡༦༨. ཨུ་ཏྟི་ཊྛེ ན་པྤ་མ་ཛྫེ་ཡྻ, དྷ་མྨཾ སུ་ཙ་རི་ཏཾ ཙ་རེ;
དྷ་མྨ་ཙཱ་རཱི སུ་ཁཾ སེ་ཏི, ཨ་སྨིཾ ལོ་ཀེ པ་ར་མྷི ཙ.
༡༦༩. དྷ་མྨཾ ཙ་རེ སུ་ཙ་རི་ཏཾ, ན ནཾ དུ་ཙྩ་རི་ཏཾ ཙ་རེ;
དྷ་མྨ་ཙཱ་རཱི སུ་ཁཾ སེ་ཏི, ཨ་སྨིཾ ལོ་ཀེ པ་ར་མྷི ཙ.
༡༧༠. ཡ་ཐཱ པུ་བྦུ་ལ༹་ཀཾ [པུ་བྦུ་ལ༹་ཀཾ (སཱི. པཱི.)] པ་སྶེ, ཡ་ཐཱ པ་སྶེ མ་རཱི་ཙི་ཀཾ;
ཨེ་ཝཾ ལོ་ཀཾ ཨ་ཝེ་ཀྑ་ནྟཾ, མ་ཙྩུ་རཱ་ཛཱ ན པ་སྶ་ཏི.
༡༧༡. ཨེ་ཐ པ་སྶ་ཐི་མཾ ལོ་ཀཾ, ཙི་ཏྟཾ རཱ་ཛ་ར་ཐཱུ་པ་མཾ;
ཡ་ཏྠ བཱ་ལཱ ཝི་སཱི་ད་ནྟི, ན་ཏྠི ས་ངྒོ ཝི་ཛཱ་ན་ཏཾ.
༡༧༢. ཡོ ཙ པུ་བྦེ པ་མ་ཛྫི་ཏྭཱ, པ་ཙྪཱ སོ ན་པྤ་མ་ཛྫ་ཏི;
སོ་མཾ ལོ་ཀཾ པ་བྷཱ་སེ་ཏི, ཨ་བྦྷཱ མུ་ཏྟོ་ཝ ཙ་ནྡི་མཱ.
༡༧༣. ཡ་སྶ པཱ་པཾ ཀ་ཏཾ ཀ་མྨཾ, ཀུ་ས་ལེ་ན པི་དྷཱི་ཡ་ཏི [པི་ཏཱི་ཡ་ཏི (སཱི. སྱཱ. པཱི.)];
སོ་མཾ ལོ་ཀཾ པ་བྷཱ་སེ་ཏི, ཨ་བྦྷཱ མུ་ཏྟོ་ཝ ཙ་ནྡི་མཱ.
༡༧༤. ཨ་ནྡྷ་བྷཱུ་ཏོ [ཨ་ནྡྷཱི་བྷཱུ་ཏོ (ཀ.)] ཨ་ཡཾ ལོ་ཀོ, ཏ་ནུ་ཀེ་ཏྠ ཝི་པ་སྶ་ཏི;
ས་ཀུ་ཎོ ཛཱ་ལ་མུ་ཏྟོ་ཝ, ཨ་པྤོ ས་གྒཱ་ཡ ག་ཙྪ་ཏི.
༡༧༥. ཧཾ་སཱ་དི་ཙྩ་པ་ཐེ ཡ་ནྟི, ཨཱ་ཀཱ་སེ ཡ་ནྟི ཨི་དྡྷི་ཡཱ;
ནཱི་ཡ་ནྟི དྷཱི་རཱ ལོ་ཀ་མྷཱ, ཛེ་ཏྭཱ མཱ་རཾ ས་ཝཱ་ཧི་ནིཾ [ས་ཝཱ་ཧ་ནཾ (སྱཱ. ཀ.)].
༡༧༦. ཨེ་ཀཾ དྷ་མྨཾ ཨ་ཏཱི་ཏ་སྶ, མུ་སཱ་ཝཱ་དི་སྶ ཛ་ནྟུ་ནོ;
ཝི་ཏི་ཎྞ་པ་ར་ལོ་ཀ་སྶ, ན་ཏྠི པཱ་པཾ ཨ་ཀཱ་རི་ཡཾ.
༡༧༧. ན ཝེ ཀ་ད་རི་ཡཱ དེ་ཝ་ལོ་ཀཾ ཝ་ཛ་ནྟི, བཱ་ལཱ ཧ་ཝེ ན་པྤ་སཾ་ས་ནྟི དཱ་ནཾ;
དྷཱི་རོ ཙ དཱ་ནཾ ཨ་ནུ་མོ་ད་མཱ་ནོ, ཏེ་ནེ་ཝ སོ ཧོ་ཏི སུ་ཁཱི པ་ར་ཏྠ.
༡༧༨. པ་ཐ་བྱཱ ཨེ་ཀ་ར་ཛྫེ་ན, ས་གྒ་སྶ ག་མ་ནེ་ན ཝཱ;
ས་བྦ་ལོ་ཀཱ་དྷི་པ་ཙྩེ་ན, སོ་ཏཱ་པ་ཏྟི་ཕ་ལཾ ཝ་རཾ.
ལོ་ཀ་ཝ་གྒོ ཏེ་ར་ས་མོ ནི་ཊྛི་ཏོ.