༡༢. ཨ་ཏྟ་ཝ་གྒོ
༡༥༧. ཨ་ཏྟཱ་ན་ཉྩེ པི་ཡཾ ཛ་ཉྙཱ, ར་ཀྑེ་ཡྻ ནཾ སུ་ར་ཀྑི་ཏཾ;
ཏི་ཎྞཾ ཨ་ཉྙ་ཏ་རཾ ཡཱ་མཾ, པ་ཊི་ཛ་གྒེ་ཡྻ པ་ཎྜི་ཏོ.
༡༥༨. ཨ་ཏྟཱ་ན་མེ་ཝ པ་ཋ་མཾ, པ་ཏི་རཱུ་པེ ནི་ཝེ་ས་ཡེ;
ཨ་ཐ་ཉྙ་མ་ནུ་སཱ་སེ་ཡྻ, ན ཀི་ལི་སྶེ་ཡྻ པ་ཎྜི་ཏོ.
༡༥༩. ཨ་ཏྟཱ་ནཾ ཙེ ཏ་ཐཱ ཀ་ཡི་རཱ, ཡ་ཐཱ་ཉྙ་མ་ནུ་སཱ་ས་ཏི;
སུ་ད་ནྟོ ཝ་ཏ ད་མེ་ཐ, ཨ་ཏྟཱ ཧི ཀི་ར དུ་དྡ་མོ.
༡༦༠. ཨ་ཏྟཱ ཧི ཨ་ཏྟ་ནོ ནཱ་ཐོ, ཀོ ཧི ནཱ་ཐོ པ་རོ སི་ཡཱ;
ཨ་ཏྟ་ནཱ ཧི སུ་ད་ནྟེ་ན, ནཱ་ཐཾ ལ་བྷ་ཏི དུ་ལླ་བྷཾ.
༡༦༡. ཨ་ཏྟ་ནཱ ཧི ཀ་ཏཾ པཱ་པཾ, ཨ་ཏྟ་ཛཾ ཨ་ཏྟ་ས་མྦྷ་ཝཾ;
ཨ་བྷི་མ་ཏྠ་ཏི [ཨ་བྷི་མ་ནྟ་ཏི (སཱི. པཱི.)] དུ་མྨེ་དྷཾ, ཝ་ཛི་རཾ ཝ་སྨ་མ་ཡཾ [ཝ་ཛི་རཾ་ཝ’མྷ་མ་ཡཾ (སྱཱ. ཀ.)] མ་ཎིཾ.
༡༦༢. ཡ་སྶ ཨ་ཙྩ་ནྟ་དུ་སྶཱི་ལྱཾ, མཱ་ལུ་ཝཱ སཱ་ལ་མི་ཝོ་ཏྠ་ཏཾ;
ཀ་རོ་ཏི སོ ཏ་ཐ་ཏྟཱ་ནཾ, ཡ་ཐཱ ནཾ ཨི་ཙྪ་ཏཱི དི་སོ.
༡༦༣. སུ་ཀ་རཱ་ནི ཨ་སཱ་དྷཱུ་ནི, ཨ་ཏྟ་ནོ ཨ་ཧི་ཏཱ་ནི ཙ;
ཡཾ ཝེ ཧི་ཏ་ཉྩ སཱ་དྷུ་ཉྩ, ཏཾ ཝེ པ་ར་མ་དུ་ཀྐ་རཾ.
༡༦༤. ཡོ སཱ་ས་ནཾ ཨ་ར་ཧ་ཏཾ, ཨ་རི་ཡཱ་ནཾ དྷ་མྨ་ཛཱི་ཝི་ནཾ;
པ་ཊི་ཀྐོ་ས་ཏི དུ་མྨེ་དྷོ, དི་ཊྛིཾ ནི་སྶཱ་ཡ པཱ་པི་ཀཾ;
ཕ་ལཱ་ནི ཀ་ཊྛ་ཀ་སྶེ་ཝ, ཨ་ཏྟ་གྷཱ་ཏཱ་ཡ [ཨ་ཏྟ་གྷ་ཉྙཱ་ཡ (སཱི. སྱཱ. པཱི.)] ཕ་ལླ་ཏི.
༡༦༥. ཨ་ཏྟ་ནཱ ཧི [ཨ་ཏྟ་ནཱ་ཝ (སཱི. སྱཱ. པཱི.)] ཀ་ཏཾ པཱ་པཾ, ཨ་ཏྟ་ནཱ སཾ་ཀི་ལི་སྶ་ཏི;
ཨ་ཏྟ་ནཱ ཨ་ཀ་ཏཾ པཱ་པཾ, ཨ་ཏྟ་ནཱ་ཝ ཝི་སུ་ཛ྄ཛྷ་ཏི;
སུ་དྡྷཱི ཨ་སུ་དྡྷི པ་ཙྩ་ཏྟཾ, ནཱ་ཉྙོ ཨ་ཉྙཾ [ནཱ་ཉྙ་མ་ཉྙོ(སཱི.)] ཝི་སོ་དྷ་ཡེ.
༡༦༦. ཨ་ཏྟ་ད་ཏྠཾ པ་ར་ཏྠེ་ན, བ་ཧུ་ནཱ་པི ན ཧཱ་པ་ཡེ;
ཨ་ཏྟ་ད་ཏྠ་མ་བྷི་ཉྙཱ་ཡ, ས་ད་ཏྠ་པ་སུ་ཏོ སི་ཡཱ.
ཨ་ཏྟ་ཝ་གྒོ དྭཱ་ད་ས་མོ ནི་ཊྛི་ཏོ.