༦. ཏེ་མི་ཡ་ཙ་རི་ཡཱ
༤༨. ‘‘པུ་ནཱ་པ་རཾ ཡ་དཱ ཧོ་མི, ཀཱ་སི་རཱ་ཛ་སྶ ཨ་ཏྲ་ཛོ;
མཱུ་ག་པ་ཀྑོ་ཏི ནཱ་མེ་ན, ཏེ་མི་ཡོ་ཏི ཝ་ད་ནྟི མཾ.
༤༩. ‘‘སོ་ལ༹་སི་ཏྠི་ས་ཧ་སྶཱ་ནཾ, ན ཝི་ཛྫ་ཏི པུ་མོ ཏ་དཱ [ས་དཱ (སཱི.)];
ཨ་ཧོ་ར་ཏྟཱ་ནཾ ཨ་ཙྩ་ཡེ་ན, ནི་བྦ་ཏྟོ ཨ་ཧ་མེ་ཀ་ཀོ.
༥༠. ‘‘ཀི་ཙྪཱ ལ་དྡྷཾ པི་ཡཾ པུ་ཏྟཾ, ཨ་བྷི་ཛཱ་ཏཾ ཛུ་ཏི་ནྡྷ་རཾ;
སེ་ཏ་ཙྪ་ཏྟཾ དྷཱ་ར་ཡི་ཏྭཱ་ན, ས་ཡ་ནེ པོ་སེ་ཏི མཾ པི་ཏཱ.
༥༡. ‘‘ནི་དྡཱ་ཡ་མཱ་ནོ ས་ཡ་ན་ཝ་རེ, པ་བུ་ཛ྄ཛྷི་ཏྭཱ་ན་ཧཾ ཏ་དཱ;
ཨ་དྡ་སཾ པ་ཎྜ་རཾ ཚ་ཏྟཾ, ཡེ་ནཱ་ཧཾ ནི་ར་ཡཾ ག་ཏོ.
༥༢. ‘‘ས་ཧ དི་ཊྛ་སྶ མེ ཚ་ཏྟཾ, ཏཱ་སོ ཨུ་པྤ་ཛྫི བྷེ་ར་ཝོ;
ཝི་ནི་ཙྪ་ཡཾ ས་མཱ་པ་ནྣོ, ‘ཀ་ཐཱ་ཧཾ ཨི་མཾ མུ་ཉྩི་སྶཾ’.
༥༣. ‘‘པུ་བྦ་སཱ་ལོ་ཧི་ཏཱ མ་ཡ྄ཧཾ, དེ་ཝ་ཏཱ ཨ་ཏྠ་ཀཱ་མི་ནཱི;
སཱ མཾ དི་སྭཱ་ན དུ་ཀྑི་ཏཾ, ཏཱི་སུ ཋཱ་ནེ་སུ ཡོ་ཛ་ཡི.
༥༤. ‘‘‘མཱ པ་ཎྜི་ཙྩ་ཡཾ ཝི་བྷཱ་ཝ་ཡ, བཱ་ལ་མ་ཏོ བྷ་ཝ ས་བྦ་པཱ་ཎི་ནཾ;
ས་བྦོ ཏཾ ཛ་ནོ ཨོ་ཙི་ནཱ་ཡ་ཏུ, ཨེ་ཝཾ ཏ་ཝ ཨ་ཏྠོ བྷ་ཝི་སྶ་ཏི’.
༥༥. ‘‘ཨེ་ཝཾ ཝུ་ཏྟཱ་ཡ་ཧཾ ཏ་སྶཱ, ཨི་དཾ ཝ་ཙ་ན་མ་བྲ་ཝིཾ;
‘ཀ་རོ་མི ཏེ ཏཾ ཝ་ཙ་ནཾ, ཡཾ ཏྭཾ བྷ་ཎ་སི དེ་ཝ་ཏེ;
ཨ་ཏྠ་ཀཱ་མཱ་སི མེ ཨ་མྨ, ཧི་ཏ་ཀཱ་མཱ་སི དེ་ཝ་ཏེ’.
༥༦. ‘‘ཏ་སྶཱ་ཧཾ ཝ་ཙ་ནཾ སུ་ཏྭཱ, སཱ་ག་རེ་ཝ ཐ་ལཾ ལ་བྷིཾ;
ཧ་ཊྛོ སཾ་ཝི་གྒ་མཱ་ན་སོ, ཏ་ཡོ ཨ་ངྒེ ཨ་དྷི་ཊྛ་ཧིཾ.
༥༧. ‘‘མཱུ་གོ ཨ་ཧོ་སིཾ བ་དྷི་རོ, པ་ཀྑོ ག་ཏི་ཝི་ཝ་ཛྫི་ཏོ;
ཨེ་ཏེ ཨ་ངྒེ ཨ་དྷི་ཊྛཱ་ཡ, ཝ་སྶཱ་ནི སོ་ལ༹་སཾ ཝ་སིཾ.
༥༨. ‘‘ཏ་ཏོ མེ ཧ་ཏྠ་པཱ་དེ ཙ, ཛི་ཝ྄ཧཾ སོ་ཏ་ཉྩ མ་དྡི་ཡ;
ཨ་ནཱུ་ན་ཏཾ མེ པ་སྶི་ཏྭཱ, ‘ཀཱ་ལ༹་ཀ་ཎྞཱི’ཏི ནི་ནྡི་སུཾ.
༥༩. ‘‘ཏ་ཏོ ཛཱ་ན་པ་དཱ ས་བྦེ, སེ་ནཱ་པ་ཏི་པུ་རོ་ཧི་ཏཱ;
ས་བྦེ ཨེ་ཀ་མ་ནཱ ཧུ་ཏྭཱ, ཚ་ཌྜ་ནཾ ཨ་ནུ་མོ་དི་སུཾ.
༦༠. ‘‘སོ་ཧཾ ཏེ་སཾ མ་ཏིཾ སུ་ཏྭཱ, ཧ་ཊྛོ སཾ་ཝི་གྒ་མཱ་ན་སོ;
ཡ་སྶ་ཏྠཱ་ཡ ཏ་པོ་ཙི་ཎྞོ, སོ མེ ཨ་ཏྠོ ས་མི་ཛ྄ཛྷ་ཐ.
༦༡. ‘‘ནྷཱ་པེ་ཏྭཱ ཨ་ནུ་ལི་མྤི་ཏྭཱ, ཝེ་ཋེ་ཏྭཱ རཱ་ཛ་ཝེ་ཋ་ནཾ;
ཚ་ཏྟེ་ན ཨ་བྷི་སི་ཉྩི་ཏྭཱ, ཀཱ་རེ་སུཾ པུ་རཾ པ་ད་ཀྑི་ཎཾ.
༦༢. ‘‘ས་ཏྟཱ་ཧཾ དྷཱ་ར་ཡི་ཏྭཱ་ན, ཨུ་གྒ་ཏེ ར་ཝི་མ་ཎྜ་ལེ;
ར་ཐེ་ན མཾ ནཱི་ཧ་རི་ཏྭཱ, སཱ་ར་ཐཱི ཝ་ན་མུ་པཱ་ག་མི.
༦༣. ‘‘ཨེ་ཀོ་ཀཱ་སེ ར་ཐཾ ཀ་ཏྭཱ, ས་ཛྫ་སྶཾ ཧ་ཏྠ་མུ་ཙྩི་ཏོ [ཧ་ཏྠ་མུ་ཉྩི་ཏོ (སཱི. སྱཱ.)];
སཱ་ར་ཐཱི ཁ་ཎ་ཏཱི ཀཱ་སུཾ, ནི་ཁཱ་ཏུཾ པ་ཐ་ཝི་ཡཱ མ་མཾ.
༦༤. ‘‘ཨ་དྷི་ཊྛི་ཏ་མ་དྷི་ཊྛཱ་ནཾ, ཏ་ཛྫེ་ནྟོ ཝི་ཝི་དྷ་ཀཱ་ར་ཎཱ;
ན བྷི་ནྡིཾ ཏ་མ་དྷི་ཊྛཱ་ནཾ, བོ་དྷི་ཡཱ་ཡེ་ཝ ཀཱ་ར་ཎཱ.
༦༥. ‘‘མཱ་ཏཱ་པི་ཏཱ ན མེ དེ་སྶཱ, ཨ་ཏྟཱ མེ ན ཙ དེ་སྶི་ཡོ;
ས་བྦ་ཉྙུ་ཏཾ པི་ཡཾ མ་ཡ྄ཧཾ, ཏ་སྨཱ ཝ་ཏ་མ་དྷི་ཊྛ་ཧིཾ.
༦༦. ‘‘ཨེ་ཏེ ཨ་ངྒེ ཨ་དྷི་ཊྛཱ་ཡ, ཝ་སྶཱ་ནི སོ་ལ༹་སཾ ཝ་སིཾ;
ཨ་དྷི་ཊྛཱ་ནེ་ན མེ ས་མོ ན་ཏྠི, ཨེ་སཱ མེ ཨ་དྷི་ཊྛཱ་ན་པཱ་ར་མཱི’’ཏི.
ཏེ་མི་ཡ་ཙ་རི་ཡཾ ཚ་ཊྛཾ.