༩. ཝེ་སྶ་ནྟ་ར་ཙ་རི་ཡཱ
༦༧. ‘‘ཡཱ མེ ཨ་ཧོ་སི ཛ་ནི་ཀཱ, ཕུ་སྶ་ཏཱི [ཕུ་ས་ཏཱི (སཱི.)] ནཱ་མ ཁ་ཏྟི་ཡཱ;
སཱ ཨ་ཏཱི་ཏཱ་སུ ཛཱ་ཏཱི་སུ, ས་ཀྐ་སྶ མ་ཧེ་སཱི པི་ཡཱ.
༦༨. ‘‘ཏ་སྶཱ ཨཱ་ཡུ་ཀྑ་ཡཾ ཉ་ཏྭཱ, དེ་ཝི་ནྡོ ཨེ་ཏ་ད་བྲ་ཝི;
‘ད་དཱ་མི ཏེ ད་ས ཝ་རེ, ཝ་ར་བྷ་དྡེ ཡ་དི་ཙྪ་སི’.
༦༩. ‘‘ཨེ་ཝཾ ཝུ་ཏྟཱ ཙ སཱ དེ་ཝཱི, ས་ཀྐཾ པུ་ནི་ད་མ་བྲ་ཝི;
‘ཀིཾ ནུ མེ ཨ་པ་རཱ་དྷ་ཏྠི, ཀིཾ ནུ དེ་སྶཱ ཨ་ཧཾ ཏ་ཝ;
ར་མྨཱ ཙཱ་ཝེ་སི མཾ ཋཱ་ནཱ, ཝཱ་ཏོ་ཝ དྷ་ར་ཎཱི་རུ་ཧཾ’.
༧༠. ‘‘ཨེ་ཝཾ ཝུ་ཏྟོ ཙ སོ ས་ཀྐོ, པུ་ན ཏ་སྶི་ད་མ་བྲ་ཝི;
‘ན ཙེ་ཝ ཏེ ཀ་ཏཾ པཱ་པཾ, ན ཙ མེ ཏྭཾ་སི ཨ་པྤི་ཡཱ.
༧༡. ‘‘‘ཨེ་ཏྟ་ཀཾ་ཡེ་ཝ ཏེ ཨཱ་ཡུ, ཙ་ཝ་ན་ཀཱ་ལོ བྷ་ཝི་སྶ་ཏི;
པ་ཊི་གྒ་ཎྷ མ་ཡཱ དི་ནྣེ, ཝ་རེ ད་ས ཝ་རུ་ཏྟ་མེ’.
༧༢. ‘‘ས་ཀྐེ་ན སཱ དི་ནྣ་ཝ་རཱ, ཏུ་ཊྛ་ཧ་ཊྛཱ པ་མོ་དི་ཏཱ;
མ་མཾ ཨ་བྦྷ་ནྟ་རཾ ཀ་ཏྭཱ, ཕུ་སྶ་ཏཱི ད་ས ཝ་རེ ཝ་རཱི.
༧༣. ‘‘ཏ་ཏོ ཙུ་ཏཱ སཱ ཕུ་སྶ་ཏཱི, ཁ་ཏྟི་ཡེ ཨུ་པ་པ་ཛྫ་ཐ;
ཛེ་ཏུ་ཏྟ་ར་མྷི ན་ག་རེ, ས་ཉྫ་ཡེ་ན ས་མཱ་ག་མི.
༧༤. ‘‘ཡ་དཱ་ཧཾ ཕུ་སྶ་ཏི་ཡཱ ཀུ་ཙྪིཾ, ཨོ་ཀྐ་ནྟོ པི་ཡ་མཱ་ཏུ་ཡཱ;
མ་མ ཏེ་ཛེ་ན མེ མཱ་ཏཱ, ས་དཱ དཱ་ན་ར་ཏཱ ཨ་ཧུ.
༧༥. ‘‘ཨ་དྷ་ནེ ཨཱ་ཏུ་རེ ཛི་ཎྞེ, ཡཱ་ཙ་ཀེ ཨ་དྡྷི་ཀེ [པ་ཐི་ཀེ (ཀ.)] ཛ་ནེ;
ས་མ་ཎེ བྲཱ་ཧྨ་ཎེ ཁཱི་ཎེ, དེ་ཏི དཱ་ནཾ ཨ་ཀི་ཉྩ་ནེ.
༧༦. ‘‘ད་ས མཱ་སེ དྷཱ་ར་ཡི་ཏྭཱ་ན, ཀ་རོ་ནྟེ པུ་རཾ པ་ད་ཀྑི་ཎཾ;
ཝེ་སྶཱ་ནཾ ཝཱི་ཐི་ཡཱ མ་ཛ྄ཛྷེ, ཛ་ནེ་སི ཕུ་སྶ་ཏཱི མ་མཾ.
༧༧. ‘‘ན མ་ཡ྄ཧཾ མ་ཏྟི་ཀཾ ནཱ་མཾ, ན་པི པེ་ཏྟི་ཀ་ས་མྦྷ་ཝཾ;
ཛཱ་ཏེ་ཏྠ ཝེ་སྶ་ཝཱི་ཐི་ཡཱ, ཏ་སྨཱ ཝེ་སྶ་ནྟ་རོ ཨ་ཧུ.
༧༨. ‘‘ཡ་དཱ་ཧཾ དཱ་ར་ཀོ ཧོ་མི, ཛཱ་ཏི་ཡཱ ཨ་ཊྛ་ཝ་སྶི་ཀོ;
ཏ་དཱ ནི་ས་ཛྫ པཱ་སཱ་དེ, དཱ་ནཾ དཱ་ཏུཾ ཝི་ཙི་ནྟ་ཡིཾ.
༧༩. ‘‘‘ཧ་ད་ཡཾ ད་དེ་ཡྻཾ ཙ་ཀྑུཾ, མཾ་ས་མྤི རུ་དྷི་ར་མྤི ཙ;
ད་དེ་ཡྻཾ ཀཱ་ཡཾ སཱ་ཝེ་ཏྭཱ, ཡ་དི ཀོ་ཙི ཡཱ་ཙ་ཡེ མ་མཾ’.
༨༠. ‘‘ས་བྷཱ་ཝཾ ཙི་ནྟ་ཡ་ནྟ་སྶ, ཨ་ཀ་མྤི་ཏ་མ་ས་ཎྛི་ཏཾ;
ཨ་ཀ་མྤི ཏ་ཏྠ པ་ཐ་ཝཱི, སི་ནེ་རུ་ཝ་ན་ཝ་ཊཾ་ས་ཀཱ.
༨༡. ‘‘ཨ་ནྭ་དྡྷ་མཱ་སེ པ་ནྣ་ར་སེ, པུ་ཎྞ་མཱ་སེ ཨུ་པོ་ས་ཐེ;
པ་ཙྩ་ཡཾ ནཱ་ག་མཱ་རུ་ཡ྄ཧ, དཱ་ནཾ དཱ་ཏུཾ ཨུ་པཱ་ག་མིཾ.
༨༢. ‘‘ཀ་ལི་ངྒ་ར་ཊྛ་ཝི་ས་ཡཱ, བྲཱ་ཧྨ་ཎཱ ཨུ་པ་ག་ཉྪུ མཾ;
ཨ་ཡཱ་ཙུཾ མཾ ཧ་ཏྠི་ནཱ་གཾ, དྷ་ཉྙཾ མ་ངྒ་ལ་ས་མྨ་ཏཾ.
༨༣. ‘‘ཨ་ཝུ་ཊྛི་ཀོ ཛ་ན་པ་དོ, དུ་བྦྷི་ཀྑོ ཚཱ་ཏ་ཀོ མ་ཧཱ;
ད་དཱ་ཧི པ་ཝ་རཾ ནཱ་གཾ, ས་བྦ་སེ་ཏཾ ག་ཛུ་ཏྟ་མཾ.
༨༤. ‘‘ད་དཱ་མི ན ཝི་ཀ་མྤཱ་མི, ཡཾ མཾ ཡཱ་ཙ་ནྟི བྲཱ་ཧྨ་ཎཱ;
ས་ནྟཾ ན་པྤ་ཏི་གཱུ་ཧཱ་མི [ན་པྤ་ཏི་གུ་ཡ྄ཧཱ་མི (སཱི. ཀ.)], དཱ་ནེ མེ ར་མ་ཏེ མ་ནོ.
༨༥. ‘‘ན མེ ཡཱ་ཙ་ཀ་མ་ནུ་པྤ་ཏྟེ, པ་ཊི་ཀྑེ་པོ ཨ་ནུ་ཙྪ་ཝོ;
‘མཱ མེ བྷི་ཛྫི ས་མཱ་དཱ་ནཾ, ད་སྶཱ་མི ཝི་པུ་ལཾ ག་ཛཾ’.
༨༦. ‘‘ནཱ་གཾ ག་ཧེ་ཏྭཱ སོ་ཎྜཱ་ཡ, བྷི་ངྒཱ་རེ ར་ཏ་ནཱ་མ་ཡེ;
ཛ་ལཾ ཧ་ཏྠེ ཨཱ་ཀི་རི་ཏྭཱ, བྲཱ་ཧྨ་ཎཱ་ནཾ ཨ་དཾ ག་ཛཾ.
༨༧. ‘‘པུ་ནཱ་པ་རཾ ད་ད་ནྟ་སྶ, ས་བྦ་སེ་ཏཾ ག་ཛུ་ཏྟ་མཾ;
ཏ་དཱ་པི པ་ཐ་ཝཱི ཀ་མྤི, སི་ནེ་རུ་ཝ་ན་ཝ་ཊཾ་ས་ཀཱ.
༨༨. ‘‘ཏ་སྶ ནཱ་ག་སྶ དཱ་ནེ་ན, སི་ཝ་ཡོ ཀུ་དྡྷཱ ས་མཱ་ག་ཏཱ;
པ་བྦཱ་ཛེ་སུཾ ས་ཀཱ ར་ཊྛཱ, ‘ཝ་ངྐཾ ག་ཙྪ་ཏུ པ་བྦ་ཏཾ’.
༨༩. ‘‘ཏེ་སཾ ནི་ཙྪུ་བྷ་མཱ་ནཱ་ནཾ, ཨ་ཀ་མྤི་ཏྠ་མ་ས་ཎྛི་ཏཾ;
མ་ཧཱ་དཱ་ནཾ པ་ཝ་ཏྟེ་ཏུཾ, ཨེ་ཀཾ ཝ་ར་མ་ཡཱ་ཙི་སཾ.
༩༠. ‘‘ཡཱ་ཙི་ཏཱ སི་ཝ་ཡོ ས་བྦེ, ཨེ་ཀཾ ཝ་ར་མ་དཾ་སུ མེ;
སཱ་ཝ་ཡི་ཏྭཱ ཀ་ཎྞ་བྷེ་རིཾ, མ་ཧཱ་དཱ་ནཾ ད་དཱ་མ་ཧཾ.
༩༡. ‘‘ཨ་ཐེ་ཏྠ ཝ་ཏྟ་ཏཱི ས་དྡོ, ཏུ་མུ་ལོ བྷེ་ར་ཝོ མ་ཧཱ;
དཱ་ནེ་ནི་མཾ ནཱི་ཧ་ར་ནྟི, པུ་ན དཱ་ནཾ ད་དཱ་ཏ་ཡཾ.
༩༢. ‘‘ཧ་ཏྠིཾ ཨ་སྶེ ར་ཐེ ད་ཏྭཱ, དཱ་སིཾ དཱ་སཾ ག་ཝཾ དྷ་ནཾ;
མ་ཧཱ་དཱ་ནཾ ད་དི་ཏྭཱ་ན, ན་ག་རཱ ནི་ཀྑ་མིཾ ཏ་དཱ.
༩༣. ‘‘ནི་ཀྑ་མི་ཏྭཱ་ན ན་ག་རཱ, ནི་ཝ་ཏྟི་ཏྭཱ ཝི་ལོ་ཀི་ཏེ;
ཏ་དཱ་པི པ་ཐ་ཝཱི ཀ་མྤི, སི་ནེ་རུ་ཝ་ན་ཝ་ཊཾ་ས་ཀཱ.
༩༤. ‘‘ཙ་ཏུ་ཝཱ་ཧིཾ ར་ཐཾ ད་ཏྭཱ, ཋ་ཏྭཱ ཙཱ་ཏུ་མྨ་ཧཱ་པ་ཐེ;
ཨེ་ཀཱ་ཀི་ཡོ ཨ་དུ་ཏི་ཡོ, མ་དྡི་དེ་ཝིཾ ཨི་ད་མ་བྲ་ཝིཾ.
༩༥. ‘‘‘ཏྭཾ མ་དྡི ཀ་ཎྷཾ ག་ཎྷཱ་ཧི, ལ་ཧུ་ཀཱ ཨེ་སཱ ཀ་ནི་ཊྛི་ཀཱ;
ཨ་ཧཾ ཛཱ་ལིཾ ག་ཧེ་སྶཱ་མི, ག་རུ་ཀོ བྷཱ་ཏི་ཀོ ཧི སོ’.
༩༦. ‘‘པ་དུ་མཾ པུ་ཎྜ་རཱི་ཀཾ་ཝ, མ་དྡཱི ཀ་ཎྷཱ་ཛི་ན་གྒ་ཧཱི;
ཨ་ཧཾ སུ་ཝ་ཎྞ་བི་མྦཾ་ཝ, ཛཱ་ལིཾ ཁ་ཏྟི་ཡ་མ་གྒ་ཧིཾ.
༩༧. ‘‘ཨ་བྷི་ཛཱ་ཏཱ སུ་ཁུ་མཱ་ལཱ, ཁ་ཏྟི་ཡཱ ཙ་ཏུ་རོ ཛ་ནཱ;
ཝི་ས་མཾ ས་མཾ ཨ་ཀྐ་མ་ནྟཱ, ཝ་ངྐཾ ག་ཙྪཱ་མ པ་བྦ་ཏཾ.
༩༨. ‘‘ཡེ ཀེ་ཙི མ་ནུ་ཛཱ ཨེ་ནྟི, ཨ་ནུ་མ་གྒེ པ་ཊི་པྤ་ཐེ;
མ་གྒ་ནྟེ པ་ཊི་པུ་ཙྪཱ་མ, ‘ཀུ་ཧིཾ ཝ་ངྐ་ནྟ [ཝ་ངྐ་ཏ (སཱི.)] པ་བྦ་ཏོ’.
༩༩. ‘‘ཏེ ཏ་ཏྠ ཨ་མྷེ པ་སྶི་ཏྭཱ, ཀ་རུ་ཎཾ གི་ར་མུ་དཱི་ར་ཡུཾ;
དུ་ཀྑཾ ཏེ པ་ཊི་ཝེ་དེ་ནྟི, དཱུ་རེ ཝ་ངྐ་ནྟ་པ་བྦ་ཏོ.
༡༠༠. ‘‘ཡ་དི པ་སྶ་ནྟི པ་ཝ་ནེ, དཱ་ར་ཀཱ ཕ་ལི་ནེ དུ་མེ;
ཏེ་སཾ ཕ་ལཱ་ནཾ ཧེ་ཏུ་མྷི, ཨུ་པ་རོ་ད་ནྟི དཱ་ར་ཀཱ.
༡༠༡. ‘‘རོ་ད་ནྟེ དཱ་ར་ཀེ དི་སྭཱ, ཨུ་བྦི་དྡྷཱ [ཨུ་བྦི་གྒཱ (སྱཱ. ཀཾ.)] ཝི་པུ་ལཱ དུ་མཱ;
ས་ཡ་མེ་ཝོ་ཎ་མི་ཏྭཱ་ན, ཨུ་པ་ག་ཙྪ་ནྟི དཱ་ར་ཀེ.
༡༠༢. ‘‘ཨི་དཾ ཨ་ཙྪ་རི་ཡཾ དི་སྭཱ, ཨ་བྦྷུ་ཏཾ ལོ་མ་ཧཾ་ས་ནཾ;
སཱ་ཧུ་ཀཱ་རཾ [སཱ་དྷུ་ཀཱ་རཾ (ས་བྦ་ཏྠ)] པ་ཝ་ཏྟེ་སི, མ་དྡཱི ས་བྦ་ངྒ་སོ་བྷ་ནཱ.
༡༠༣. ‘‘ཨ་ཙྪེ་རཾ ཝ་ཏ ལོ་ཀ་སྨིཾ, ཨ་བྦྷུ་ཏཾ ལོ་མ་ཧཾ་ས་ནཾ;
ཝེ་སྶ་ནྟ་ར་སྶ ཏེ་ཛེ་ན, ས་ཡ་མེ་ཝོ་ཎ་ཏཱ དུ་མཱ.
༡༠༤. ‘‘ས་ངྑི་པིཾ་སུ པ་ཐཾ ཡ་ཀྑཱ, ཨ་ནུ་ཀ་མྤཱ་ཡ དཱ་ར་ཀེ;
ནི་ཀྑ་ནྟ་དི་ཝ་སེ་ནེ་ཝ [ནི་ཀྑ་ནྟ་དི་ཝ་སེ་ཡེ་ཝ (སཱི.)], ཙེ་ཏ་ར་ཊྛ་མུ་པཱ་ག་མུཾ.
༡༠༥. ‘‘ས་ཊྛི་རཱ་ཛ་ས་ཧ་སྶཱ་ནི, ཏ་དཱ ཝ་ས་ནྟི མཱ་ཏུ་ལེ;
ས་བྦེ པ་ཉྫ་ལི་ཀཱ ཧུ་ཏྭཱ, རོ་ད་མཱ་ནཱ ཨུ་པཱ་ག་མུཾ.
༡༠༦. ‘‘ཏ་ཏྠ ཝ་ཏྟེ་ཏྭཱ ས་ལླཱ་པཾ, ཙེ་ཏེ་ཧི ཙེ་ཏ་པུ་ཏྟེ་ཧི;
ཏེ ཏ་ཏོ ནི་ཀྑ་མི་ཏྭཱ་ན, ཝ་ངྐཾ ཨ་ག་མུ པ་བྦ་ཏཾ.
༡༠༧. ‘‘ཨཱ་མ་ནྟ་ཡི་ཏྭཱ དེ་ཝི་ནྡོ, ཝི་སྶ་ཀ་མྨཾ [ཝི་སུ་ཀ་མྨཾ (ཀ.)] མ་ཧི་དྡྷི་ཀཾ;
ཨ་སྶ་མཾ སུ་ཀ་ཏཾ ར་མྨཾ, པ་ཎྞ་སཱ་ལཾ སུ་མཱ་པ་ཡ.
༡༠༨. ‘‘ས་ཀྐ་སྶ ཝ་ཙ་ནཾ སུ་ཏྭཱ, ཝི་སྶ་ཀ་མྨོ མ་ཧི་དྡྷི་ཀོ;
ཨ་སྶ་མཾ སུ་ཀ་ཏཾ ར་མྨཾ, པ་ཎྞ་སཱ་ལཾ སུ་མཱ་པ་ཡི.
༡༠༩. ‘‘ཨ་ཛ྄ཛྷོ་གཱ་ཧེ་ཏྭཱ པ་ཝ་ནཾ, ཨ་པྤ་ས་དྡཾ ནི་རཱ་ཀུ་ལཾ;
ཙ་ཏུ་རོ ཛ་ནཱ མ་ཡཾ ཏ་ཏྠ, ཝ་སཱ་མ པ་བྦ་ཏ་ནྟ་རེ.
༡༡༠. ‘‘ཨ་ཧ་ཉྩ མ་དྡི་དེ་ཝཱི ཙ, ཛཱ་ལཱི ཀ་ཎྷཱ་ཛི་ནཱ ཙུ་བྷོ;
ཨ་ཉྙ་མ་ཉྙཾ སོ་ཀ་ནུ་དཱ, ཝ་སཱ་མ ཨ་སྶ་མེ ཏ་དཱ.
༡༡༡. ‘‘དཱ་ར་ཀེ ཨ་ནུ་ར་ཀྑ་ནྟོ, ཨ་སུ་ཉྙོ ཧོ་མི ཨ་སྶ་མེ;
མ་དྡཱི ཕ་ལཾ ཨཱ་ཧ་རི་ཏྭཱ, པོ་སེ་ཏི སཱ ཏ་ཡོ ཛ་ནེ.
༡༡༢. ‘‘པ་ཝ་ནེ ཝ་ས་མཱ་ན་སྶ, ཨ་དྡྷི་ཀོ མཾ ཨུ་པཱ་ག་མི;
ཨཱ་ཡཱ་ཙི པུ་ཏྟ་ཀེ མ་ཡ྄ཧཾ, ཛཱ་ལིཾ ཀ་ཎྷཱ་ཛི་ནཾ ཙུ་བྷོ.
༡༡༣. ‘‘ཡཱ་ཙ་ཀཾ ཨུ་པ་ག་ཏཾ དི་སྭཱ, ཧཱ་སོ མེ ཨུ་པ་པ་ཛྫ་ཐ;
ཨུ་བྷོ པུ་ཏྟེ ག་ཧེ་ཏྭཱ་ན, ཨ་དཱ་སིཾ བྲཱ་ཧྨ་ཎེ ཏ་དཱ.
༡༡༤. ‘‘ས་ཀེ པུ་ཏྟེ ཙ་ཛ་ནྟ་སྶ, ཛཱུ་ཛ་ཀེ བྲཱ་ཧྨ་ཎེ ཡ་དཱ;
ཏ་དཱ་པི པ་ཐ་ཝཱི ཀ་མྤི, སི་ནེ་རུ་ཝ་ན་ཝ་ཊཾ་ས་ཀཱ.
༡༡༥. ‘‘པུ་ན་དེ་ཝ ས་ཀྐོ ཨོ་རུ་ཡ྄ཧ, ཧུ་ཏྭཱ བྲཱ་ཧྨ་ཎ་ས་ནྣི་བྷོ;
ཨཱ་ཡཱ་ཙི མཾ མ་དྡི་དེ་ཝིཾ, སཱི་ལ་ཝ་ནྟིཾ པ་ཏི་བྦ་ཏཾ.
༡༡༦. ‘‘མ་དྡིཾ ཧ་ཏྠེ ག་ཧེ་ཏྭཱ་ན, ཨུ་ད་ཀ་ཉྫ་ལི པཱུ་རི་ཡ;
པ་ས་ནྣ་མ་ན་ས་ངྐ་པྤོ, ཏ་སྶ མ་དྡིཾ ཨ་དཱ་ས་ཧཾ.
༡༡༧. ‘‘མ་དྡི་ཡཱ དཱི་ཡ་མཱ་ནཱ་ཡ, ག་ག་ནེ དེ་ཝཱ པ་མོ་དི་ཏཱ;
ཏ་དཱ་པི པ་ཐ་ཝཱི ཀ་མྤི, སི་ནེ་རུ་ཝ་ན་ཝ་ཊཾ་ས་ཀཱ.
༡༡༨. ‘‘ཛཱ་ལིཾ ཀ་ཎྷཱ་ཛི་ནཾ དྷཱི་ཏཾ, མ་དྡི་དེ་ཝིཾ པ་ཏི་བྦ་ཏཾ;
ཙ་ཛ་མཱ་ནོ ན ཙི་ནྟེ་སིཾ, བོ་དྷི་ཡཱ་ཡེ་ཝ ཀཱ་ར་ཎཱ.
༡༡༩. ‘‘ན མེ དེ་སྶཱ ཨུ་བྷོ པུ་ཏྟཱ, མ་དྡི་དེ་ཝཱི ན དེ་སྶི་ཡཱ;
ས་བྦ་ཉྙུ་ཏཾ པི་ཡཾ མ་ཡ྄ཧཾ, ཏ་སྨཱ པི་ཡེ ཨ་དཱ་ས་ཧཾ.
༡༢༠. ‘‘པུ་ནཱ་པ་རཾ བྲ་ཧཱ་ར་ཉྙེ, མཱ་ཏཱ་པི་ཏུ་ས་མཱ་ག་མེ;
ཀ་རུ་ཎཾ པ་རི་དེ་ཝ་ནྟེ, ས་ལླ་པ་ནྟེ སུ་ཁཾ དུ་ཁཾ.
༡༢༡. ‘‘ཧི་རོ་ཏྟ་པྤེ་ན ག་རུ་ནཱ [ག་རུ་ནཾ (སྱཱ. ཀ.)], ཨུ་བྷི་ནྣཾ ཨུ་པ་ས་ངྐ་མི;
ཏ་དཱ་པི པ་ཐ་ཝཱི ཀ་མྤི, སི་ནེ་རུ་ཝ་ན་ཝ་ཊཾ་ས་ཀཱ.
༡༢༢. ‘‘པུ་ནཱ་པ་རཾ བྲ་ཧཱ་ར་ཉྙཱ, ནི་ཀྑ་མི་ཏྭཱ ས་ཉཱ་ཏི་བྷི;
པ་ཝི་སཱ་མི པུ་རཾ ར་མྨཾ, ཛེ་ཏུ་ཏྟ་རཾ པུ་རུ་ཏྟ་མཾ.
༡༢༣. ‘‘ར་ཏ་ནཱ་ནི ས་ཏྟ ཝ་སྶིཾ་སུ, མ་ཧཱ་མེ་གྷོ པ་ཝ་སྶ་ཐ;
ཏ་དཱ་པི པ་ཐ་ཝཱི ཀ་མྤི, སི་ནེ་རུ་ཝ་ན་ཝ་ཊཾ་ས་ཀཱ.
༡༢༤. ‘‘ཨ་ཙེ་ཏ་ནཱ་ཡཾ པ་ཐ་ཝཱི, ཨ་ཝི་ཉྙཱ་ཡ སུ་ཁཾ དུ་ཁཾ;
སཱ་པི དཱ་ན་བ་ལཱ མ་ཡ྄ཧཾ, ས་ཏྟ་ཀྑ་ཏྟུཾ པ་ཀ་མྤ་ཐཱ’’ཏི.
ཝེ་སྶ་ནྟ་ར་ཙ་རི་ཡཾ ན་ཝ་མཾ.