༡༠. ས་ས་པ་ཎྜི་ཏ་ཙ་རི་ཡཱ
༡༢༥. ‘‘པུ་ནཱ་པ་རཾ ཡ་དཱ ཧོ་མི, ས་ས་ཀོ པ་ཝ་ན་ཙཱ་ར་ཀོ;
ཏི་ཎ་པ་ཎྞ་སཱ་ཀ་ཕ་ལ་བྷ་ཀྑོ, པ་ར་ཧེ་ཋ་ན་ཝི་ཝ་ཛྫི་ཏོ.
༡༢༦. ‘‘མ་ཀྐ་ཊོ ཙ སི་ངྒཱ་ལོ ཙ, སུ་ཏྟ་པོ་ཏོ ཙ་ཧཾ ཏ་དཱ;
ཝ་སཱ་མ ཨེ་ཀ་སཱ་མ་ནྟཱ, སཱ་ཡཾ པཱ་ཏོ ཙ དི་སྶ་རེ [སཱ་ཡཾ པཱ་ཏོ པ་དི་སྶ་རེ (ཀ.)].
༡༢༧. ‘‘ཨ་ཧཾ ཏེ ཨ་ནུ་སཱ་སཱ་མི, ཀི་རི་ཡེ ཀ་ལྱཱ་ཎ་པཱ་པ་ཀེ;
‘པཱ་པཱ་ནི པ་རི་ཝ་ཛྫེ་ཐ, ཀ་ལྱཱ་ཎེ ཨ་བྷི་ནི་ཝི་སྶ་ཐ’.
༡༢༨. ‘‘ཨུ་པོ་ས་ཐ་མྷི དི་ཝ་སེ, ཙ་ནྡཾ དི་སྭཱ་ན པཱུ་རི་ཏཾ;
ཨེ་ཏེ་སཾ ཏ་ཏྠ ཨཱ་ཙི་ཀྑིཾ, དི་ཝ་སོ ཨ་ཛྫུ་པོ་ས་ཐོ.
༡༢༩. ‘‘དཱ་ནཱ་ནི པ་ཊི་ཡཱ་དེ་ཐ, ད་ཀྑི་ཎེ་ཡྻ་སྶ དཱ་ཏ་ཝེ;
ད་ཏྭཱ དཱ་ནཾ ད་ཀྑི་ཎེ་ཡྻེ, ཨུ་པ་ཝ་སྶ་ཐུ་པོ་ས་ཐཾ.
༡༣༠. ‘‘ཏེ མེ སཱ་དྷཱུ་ཏི ཝ་ཏྭཱ་ན, ཡ་ཐཱ་ས་ཏྟི ཡ་ཐཱ་བ་ལཾ;
དཱ་ནཱ་ནི པ་ཊི་ཡཱ་དེ་ཏྭཱ, ད་ཀྑི་ཎེ་ཡྻཾ ག་ཝེ་སི་སུཾ [ག་ཝེ་ས་ཡྻུཾ (ཀ.)].
༡༣༡. ‘‘ཨ་ཧཾ ནི་ས་ཛྫ ཙི་ནྟེ་སིཾ, དཱ་ནཾ ད་ཀྑི་ཎ་ནུ་ཙྪ་ཝཾ;
‘ཡ་དི་ཧཾ ལ་བྷེ ད་ཀྑི་ཎེ་ཡྻཾ, ཀིཾ མེ དཱ་ནཾ བྷ་ཝི་སྶ་ཏི.
༡༣༢. ‘‘‘ན མེ ཨ་ཏྠི ཏི་ལཱ མུ་གྒཱ, མཱ་སཱ ཝཱ ཏ་ཎྜུ་ལཱ གྷ་ཏཾ;
ཨ་ཧཾ ཏི་ཎེ་ན ཡཱ་པེ་མི, ན ས་ཀྐཱ ཏི་ཎ དཱ་ཏ་ཝེ.
༡༣༣. ‘‘‘ཡ་དི ཀོ་ཙི ཨེ་ཏི ད་ཀྑི་ཎེ་ཡྻོ, བྷི་ཀྑཱ་ཡ མ་མ ས་ནྟི་ཀེ;
ད་ཛྫཱ་ཧཾ ས་ཀ་མ་ཏྟཱ་ནཾ, ན སོ ཏུ་ཙྪོ ག་མི་སྶ་ཏི’.
༡༣༤. ‘‘མ་མ ས་ངྐ་པྤ་མ་ཉྙཱ་ཡ, ས་ཀྐོ བྲཱ་ཧྨ་ཎ་ཝ་ཎྞི་ནཱ;
ཨཱ་ས་ཡཾ མེ ཨུ་པཱ་ག་ཙྪི, དཱ་ན་ཝཱི་མཾ་ས་ནཱ་ཡ མེ.
༡༣༥. ‘‘ཏ་མ་ཧཾ དི་སྭཱ་ན ས་ནྟུ་ཊྛོ, ཨི་དཾ ཝ་ཙ་ན་མ་བྲ་ཝིཾ;
‘སཱ་དྷུ ཁོ་སི ཨ་ནུ་པྤ་ཏྟོ, གྷཱ་ས་ཧེ་ཏུ མ་མ་ནྟི་ཀེ.
༡༣༦. ‘‘‘ཨ་དི་ནྣ་པུ་བྦཾ དཱ་ན་ཝ་རཾ, ཨ་ཛྫ ད་སྶཱ་མི ཏེ ཨ་ཧཾ;
ཏུ་ཝཾ སཱི་ལ་གུ་ཎཱུ་པེ་ཏོ, ཨ་ཡུ་ཏྟཾ ཏེ པ་ར་ཧེ་ཋ་ནཾ.
༡༣༧. ‘‘‘ཨེ་ཧི ཨ་གྒིཾ པ་དཱི་པེ་ཧི, ནཱ་ནཱ་ཀ་ཊྛེ ས་མཱ་ན་ཡ;
ཨ་ཧཾ པ་ཙི་སྶ་མ་ཏྟཱ་ནཾ, པ་ཀྐཾ ཏྭཾ བྷ་ཀྑ་ཡི་སྶ་སི’.
༡༣༨. ‘‘‘སཱ་དྷཱུ’ཏི སོ ཧ་ཊྛ་མ་ནོ, ནཱ་ནཱ་ཀ་ཊྛེ ས་མཱ་ན་ཡི;
མ་ཧ་ནྟཾ ཨ་ཀཱ་སི ཙི་ཏ་ཀཾ, ཀ་ཏྭཱ ཨ་ངྒཱ་ར་ག་བྦྷ་ཀཾ.
༡༣༩. ‘‘ཨ་གྒིཾ ཏ་ཏྠ པ་དཱི་པེ་སི, ཡ་ཐཱ སོ ཁི་པྤཾ མ་ཧཱ བྷ་ཝེ;
ཕོ་ཊེ་ཏྭཱ ར་ཛ་ག་ཏེ ག་ཏྟེ, ཨེ་ཀ་མ་ནྟཾ ཨུ་པཱ་ཝི་སིཾ.
༡༤༠. ‘‘ཡ་དཱ མ་ཧཱ་ཀ་ཊྛ་པུ་ཉྫོ, ཨཱ་དི་ཏྟོ དྷ་མ་དྷ་མཱ་ཡ་ཏི [དྷུ་མ་དྷུ་མཱ་ཡ་ཏི (སཱི.), དྷ་མ་མཱ་ཡ་ཏི (ཀ.)];
ཏ་དུ་པྤ་ཏི་ཏྭཱ པ་པ་ཏིཾ, མ་ཛ྄ཛྷེ ཛཱ་ལ་སི་ཁ་ནྟ་རེ.
༡༤༡. ‘‘ཡ་ཐཱ སཱི་ཏོ་ད་ཀཾ ནཱ་མ, པ་ཝི་ཊྛཾ ཡ་སྶ ཀ་སྶ་ཙི;
ས་མེ་ཏི ད་ར་ཐ་པ་རི་ལཱ༹་ཧཾ, ཨ་སྶཱ་དཾ དེ་ཏི པཱི་ཏི ཙ.
༡༤༢. ‘‘ཏ་ཐེ་ཝ ཛ་ལི་ཏཾ ཨ་གྒིཾ, པ་ཝི་ཊྛ་སྶ མ་མཾ ཏ་དཱ;
ས་བྦཾ ས་མེ་ཏི ད་ར་ཐཾ, ཡ་ཐཱ སཱི་ཏོ་ད་ཀཾ ཝི་ཡ.
༡༤༣. ‘‘ཚ་ཝིཾ ཙ་མྨཾ མཾ་སཾ ནྷཱ་རུཾ, ཨ་ཊྛིཾ ཧ་ད་ཡ་བ་ནྡྷ་ནཾ;
ཀེ་ཝ་ལཾ ས་ཀ་ལཾ ཀཱ་ཡཾ, བྲཱ་ཧྨ་ཎ་སྶ ཨ་དཱ་ས་ཧ’’ནྟི.
ས་ས་པ་ཎྜི་ཏ་ཙ་རི་ཡཾ ད་ས་མཾ.
ཨ་ཀི་ཏྟི་ཝ་གྒོ པ་ཋ་མོ.
ཏ་སྶུ་དྡཱ་ནཾ –
ཨ་ཀི་ཏྟི་བྲཱ་ཧྨ་ཎོ ས་ངྑོ, ཀུ་རུ་རཱ་ཛཱ དྷ་ན་ཉྩ་ཡོ;
མ་ཧཱ་སུ་ད་སྶ་ནོ རཱ་ཛཱ, མ་ཧཱ་གོ་ཝི་ནྡ་བྲཱ་ཧྨ་ཎོ.
ནི་མི ཙ་ནྡ་ཀུ་མཱ་རོ ཙ, སི་ཝི ཝེ་སྶ་ནྟ་རོ ས་སོ;
ཨ་ཧ་མེ་ཝ ཏ་དཱ ཨཱ་སིཾ, ཡོ ཏེ དཱ་ན་ཝ་རེ ཨ་དཱ.
ཨེ་ཏེ དཱ་ན་པ་རི་ཀྑཱ་རཱ, ཨེ་ཏེ དཱ་ན་སྶ པཱ་ར་མཱི;
ཛཱི་ཝི་ཏཾ ཡཱ་ཙ་ཀེ ད་ཏྭཱ, ཨི་མཾ པཱ་ར་མི པཱུ་ར་ཡིཾ.
བྷི་ཀྑཱ་ཡ ཨུ་པ་ག་ཏཾ དི་སྭཱ, ས་ཀ་ཏྟཱ་ནཾ པ་རི་ཙྩ་ཛིཾ;
དཱ་ནེ་ན མེ ས་མོ ན་ཏྠི, ཨེ་སཱ མེ དཱ་ན་པཱ་ར་མཱི་ཏི.
དཱ་ན་པཱ་ར་མི་ནི་དྡེ་སོ ནི་ཊྛི་ཏོ.