༡. ཨ་ཀི་ཏྟི་ཙ་རི་ཡཱ
༡. ‘‘ཀ་པྤེ ཙ ས་ཏ་ས་ཧ་སྶེ, ཙ་ཏུ་རོ ཙ ཨ་ས་ངྑི་ཡེ;
ཨེ་ཏྠ་ནྟ་རེ ཡཾ ཙ་རི་ཏཾ, ས་བྦཾ ཏཾ བོ་དྷི་པཱ་ཙ་ནཾ.
༢. ‘‘ཨ་ཏཱི་ཏ་ཀ་པྤེ ཙ་རི་ཏཾ, ཋ་པ་ཡི་ཏྭཱ བྷ་ཝཱ་བྷ་ཝེ;
ཨི་མ་མྷི ཀ་པྤེ ཙ་རི་ཏཾ, པ་ཝ་ཀྑི་སྶཾ སུ་ཎོ་ཧི མེ.
༣. ‘‘ཡ་དཱ ཨ་ཧཾ བྲ་ཧཱ་ར་ཉྙེ, སུ་ཉྙེ ཝི་པི་ན་ཀཱ་ན་ནེ;
ཨ་ཛ྄ཛྷོ་གཱ་ཧེ་ཏྭཱ [ཨ་ཛ྄ཛྷོ་ག་ཧེ་ཏྭཱ (སཱི. སྱཱ.)] ཝི་ཧ་རཱ་མི, ཨ་ཀི་ཏྟི ནཱ་མ ཏཱ་པ་སོ.
༤. ‘‘ཏ་དཱ མཾ ཏ་པ་ཏེ་ཛེ་ན, ས་ནྟ་ཏྟོ ཏི་དི་ཝཱ་བྷི་བྷཱུ;
དྷཱ་རེ་ནྟོ བྲཱ་ཧྨ་ཎ་ཝ་ཎྞཾ, བྷི་ཀྑཱ་ཡ མཾ ཨུ་པཱ་ག་མི.
༥. ‘‘པ་ཝ་ནཱ ཨཱ་བྷ་ཏཾ པ་ཎྞཾ, ཨ་ཏེ་ལ་ཉྩ ཨ་ལོ་ཎི་ཀཾ;
མ་མ དྭཱ་རེ ཋི་ཏཾ དི་སྭཱ, ས་ཀ་ཊཱ་ཧེ་ན ཨཱ་ཀི་རིཾ.
༦. ‘‘ཏ་སྶ ད་ཏྭཱ་ན་ཧཾ པ་ཎྞཾ, ནི་ཀྐུ་ཛྫི་ཏྭཱ་ན བྷཱ་ཛ་ནཾ;
པུ་ནེ་ས་ནཾ ཛ་ཧི་ཏྭཱ་ན, པཱ་ཝི་སིཾ པ་ཎྞ་སཱ་ལ་ཀཾ.
༧. ‘‘དུ་ཏི་ཡ་མྤི ཏ་ཏི་ཡ་མྤི, ཨུ་པ་ག་ཉྪི མ་མ་ནྟི་ཀཾ;
ཨ་ཀ་མྤི་ཏོ ཨ་ནོ་ལ་གྒོ, ཨེ་ཝ་མེ་ཝ་མ་དཱ་ས་ཧཾ.
༨. ‘‘ན མེ ཏ་པྤ་ཙྩ་ཡཱ ཨ་ཏྠི, ས་རཱི་ར་སྨིཾ ཝི་ཝ་ཎྞི་ཡཾ;
པཱི་ཏི་སུ་ཁེ་ན ར་ཏི་ཡཱ, ཝཱི་ཏི་ནཱ་མེ་མི ཏཾ དི་ཝཾ.
༩. ‘‘ཡ་དི མཱ་ས་མྤི དྭེ་མཱ་སཾ, ད་ཀྑི་ཎེ་ཡྻཾ ཝ་རཾ ལ་བྷེ;
ཨ་ཀ་མྤི་ཏོ ཨ་ནོ་ལཱི་ནོ, ད་དེ་ཡྻཾ དཱ་ན་མུ་ཏྟ་མཾ.
༡༠. ‘‘ན ཏ་སྶ དཱ་ནཾ ད་ད་མཱ་ནོ, ཡ་སཾ ལཱ་བྷ་ཉྩ པ་ཏྠ་ཡིཾ;
ས་བྦ་ཉྙུ་ཏཾ པ་ཏྠ་ཡཱ་ནོ, ཏཱ་ནི ཀ་མྨཱ་ནི ཨཱ་ཙ་རི’’ནྟི.
ཨ་ཀི་ཏྟི་ཙ་རི་ཡཾ པ་ཋ་མཾ.