༩. ཨ་ནོ་མ་ད་སྶཱི་བུ་དྡྷ་ཝཾ་སོ
༡. སོ་བྷི་ཏ་སྶ ཨ་པ་རེ་ན, ས་མྦུ་དྡྷོ དྭི་པ་དུ་ཏྟ་མོ;
ཨ་ནོ་མ་ད་སྶཱི ཨ་མི་ཏ་ཡ་སོ, ཏེ་ཛ་སྶཱི དུ་ར་ཏི་ཀྐ་མོ.
༢. སོ ཚེ་ཏྭཱ བ་ནྡྷ་ནཾ ས་བྦཾ, ཝི་དྡྷཾ་སེ་ཏྭཱ ཏ་ཡོ བྷ་ཝེ;
ཨ་ནི་ཝ་ཏྟི་ག་མ་ནཾ མ་གྒཾ, དེ་སེ་སི དེ་ཝ་མཱ་ནུ་སེ.
༣. སཱ་ག་རོ་ཝ ཨ་ས་ངྑོ་བྷོ, པ་བྦ་ཏོ་ཝ དུ་རཱ་ས་དོ;
ཨཱ་ཀཱ་སོ་ཝ ཨ་ན་ནྟོ སོ, སཱ་ལ་རཱ་ཛཱ་ཝ ཕུ་ལླི་ཏོ.
༤. ད་སྶ་ནེ་ན་པི ཏཾ བུ་དྡྷཾ, ཏོ་སི་ཏཱ ཧོ་ནྟི པཱ་ཎི་ནོ;
བྱཱ་ཧ་ར་ནྟཾ གི་རཾ སུ་ཏྭཱ, ཨ་མ་ཏཾ པཱ་པུ་ཎ་ནྟི ཏེ.
༥. དྷ་མྨཱ་བྷི་ས་མ་ཡོ ཏ་སྶ, ཨི་དྡྷོ ཕཱི་ཏོ ཏ་དཱ ཨ་ཧུ;
ཀོ་ཊི་ས་ཏཱ་ནི ཨ་བྷི་ས་མིཾ་སུ, པ་ཋ་མེ དྷ་མྨ་དེ་ས་ནེ.
༦. ཏ་ཏོ པ་རཾ ཨ་བྷི་ས་མ་ཡེ, ཝ་སྶ་ནྟེ དྷ་མྨ་ཝུ་ཊྛི་ཡོ;
ཨ་སཱི་ཏི་ཀོ་ཊི་ཡོ་བྷི་ས་མིཾ་སུ, དུ་ཏི་ཡེ དྷ་མྨ་དེ་ས་ནེ.
༧. ཏ་ཏོ་པ་ར་ཉྷི ཝ་སྶ་ནྟེ, ཏ་པྤ་ཡ་ནྟེ ཙ པཱ་ཎི་ནཾ;
ཨ་ཊྛ་ས་ཏྟ་ཏི་ཀོ་ཊཱི་ནཾ, ཏ་ཏི་ཡཱ་བྷི་ས་མ་ཡོ ཨ་ཧུ.
༨. ས་ནྣི་པཱ་ཏཱ ཏ་ཡོ ཨཱ་སུཾ, ཏ་སྶཱ་པི ཙ མ་ཧེ་སི་ནོ;
ཨ་བྷི་ཉྙཱ་བ་ལ་པྤ་ཏྟཱ་ནཾ, པུ་པྥི་ཏཱ་ནཾ ཝི་མུ་ཏྟི་ཡཱ.
༩. ཨ་ཊྛ་ས་ཏ་ས་ཧ་སྶཱ་ནཾ, ས་ནྣི་པཱ་ཏོ ཏ་དཱ ཨ་ཧུ;
པ་ཧཱི་ན་མ་ད་མོ་ཧཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༡༠. ས་ཏྟ་ས་ཏ་ས་ཧ་སྶཱ་ནཾ, དུ་ཏི་ཡོ ཨཱ་སི ས་མཱ་ག་མོ;
ཨ་ན་ངྒ་ཎཱ་ནཾ ཝི་ར་ཛཱ་ནཾ, ཨུ་པ་ས་ནྟཱ་ན ཏཱ་དི་ནཾ.
༡༡. ཚ་ནྣཾ ས་ཏ་ས་ཧ་སྶཱ་ནཾ, ཏ་ཏི་ཡོ ཨཱ་སི ས་མཱ་ག་མོ;
ཨ་བྷི་ཉྙཱ་བ་ལ་པྤ་ཏྟཱ་ནཾ, ནི་བྦུ་ཏཱ་ནཾ ཏ་པ་སྶི་ནཾ.
༡༢. ཨ་ཧཾ ཏེ་ན ས་མ་ཡེ་ན, ཡ་ཀྑོ ཨཱ་སིཾ མ་ཧི་དྡྷི་ཀོ;
ནེ་ཀཱ་ནཾ ཡ་ཀྑ་ཀོ་ཊཱི་ནཾ, ཝ་ས་ཝ་ཏྟི་མྷི ཨི་སྶ་རོ.
༡༣. ཏ་དཱ་པི ཏཾ བུ་དྡྷ་ཝ་རཾ, ཨུ་པ་ག་ནྟྭཱ མ་ཧེ་སི་ནཾ;
ཨ་ནྣ་པཱ་ནེ་ན ཏ་པྤེ་སིཾ, ས་ས་ངྒྷཾ ལོ་ཀ་ནཱ་ཡ་ཀཾ.
༡༤. སོ་པི མཾ ཏ་དཱ བྱཱ་ཀཱ་སི, ཝི་སུ་དྡྷ་ན་ཡ་ནོ མུ་ནི;
‘‘ཨ་པ་རི་མེ་ཡྻི་ཏོ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༥. ‘‘པ་དྷཱ་ནཾ པ་ད་ཧི་ཏྭཱ་ན…པེ… ཧེ་སྶཱ་མ ས་མྨུ་ཁཱ ཨི་མཾ’’.
༡༦. ཏ་སྶཱ་པི ཝ་ཙ་ནཾ སུ་ཏྭཱ, ཧ་ཊྛོ སཾ་ཝི་གྒ་མཱ་ན་སོ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས་པཱ་ར་མི་པཱུ་རི་ཡཱ.
༡༧. ན་ག་རཾ ཙ་ནྡ་ཝ་ཏཱི ནཱ་མ, ཡ་ས་ཝཱ ནཱ་མ ཁ་ཏྟི་ཡོ;
མཱ་ཏཱ ཡ་སོ་དྷ་རཱ ནཱ་མ, ཨ་ནོ་མ་ད་སྶི་སྶ ས་ཏྠུ་ནོ.
༡༨. ད་ས་ཝ་སྶ་ས་ཧ་སྶཱ་ནི, ཨ་གཱ་རཾ ཨ་ཛ྄ཛྷ སོ ཝ་སི;
སི་རཱི ཨུ་པ་སི་རཱི ཝ་ཌྜྷོ, ཏ་ཡོ པཱ་སཱ་ད་མུ་ཏྟ་མཱ.
༡༩. ཏེ་ཝཱི་ས་ཏི་ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
སི་རི་མཱ ནཱ་མ སཱ ནཱ་རཱི, ཨུ་པ་ཝཱ་ཎོ ནཱ་མ ཨ་ཏྲ་ཛོ.
༢༠. ནི་མི་ཏྟེ ཙ་ཏུ་རོ དི་སྭཱ, སི་ཝི་ཀཱ་ཡཱ་བྷི་ནི་ཀྑ་མི;
ཨ་ནཱུ་ན་ད་ས་མཱ་སཱ་ནི, པ་དྷཱ་ནཾ པ་ད་ཧཱི ཛི་ནོ.
༢༡. བྲ་ཧྨུ་ནཱ ཡཱ་ཙི་ཏོ ས་ནྟོ, ཨ་ནོ་མ་ད་སྶཱི མ་ཧཱ་མུ་ནི;
ཝ་ཏྟི ཙ་ཀྐཾ མ་ཧཱ་ཝཱི་རོ, ཨུ་ཡྻཱ་ནེ སོ སུ་ད་སྶ་ནེ [སུ་ད་སྶ་ནུ་ཡྻཱ་ན་མུ་ཏྟ་མེ (སྱཱ. ཀཾ.)].
༢༢. ནི་ས་བྷོ ཙ ཨ་ནོ་མོ ཙ [ཨ་སོ་ཀོ ཙ (སཱི.)], ཨ་ཧེ་སུཾ ཨ་གྒ་སཱ་ཝ་ཀཱ;
ཝ་རུ་ཎོ ནཱ་མུ་པ་ཊྛཱ་ཀོ, ཨ་ནོ་མ་ད་སྶི་སྶ ས་ཏྠུ་ནོ.
༢༣. སུ་ནྡ་རཱི ཙ སུ་མ་ནཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, ཨ་ཛྫུ་ནོ་ཏི པ་ཝུ་ཙྩ་ཏི.
༢༤. ན་ནྡི་ཝ་ཌྜྷོ སི་རི་ཝ་ཌྜྷོ, ཨ་ཧེ་སུཾ ཨ་གྒུ་པ་ཊྛ་ཀཱ;
ཨུ་པྤ་ལཱ ཙེ་ཝ པ་དུ་མཱ ཙ, ཨ་ཧེ་སུཾ ཨ་གྒུ་པ་ཊྛི་ཀཱ.
༢༥. ཨ་ཊྛ་པ་ཎྞཱ་ས་ར་ཏ་ནཾ, ཨ་ཙྩུ་གྒ་ཏོ མ་ཧཱ་མུ་ནི;
པ་བྷཱ ནི་དྡྷཱ་ཝ་ཏཱི ཏ་སྶ, ས་ཏ་རཾ་སཱི་ཝ ཨུ་གྒ་ཏོ.
༢༦. ཝ་སྶ་ས་ཏ་ས་ཧ་སྶཱ་ནི, ཨཱ་ཡུ ཝི་ཛྫ་ཏི ཏཱ་ཝ་དེ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༢༧. སུ་པུ་པྥི་ཏཾ པཱ་ཝ་ཙ་ནཾ, ཨ་ར་ཧ་ནྟེ་ཧི ཏཱ་དི་ཧི;
ཝཱི་ཏ་རཱ་གེ་ཧི ཝི་མ་ལེ་ཧི, སོ་བྷི་ཏྠ ཛི་ན་སཱ་ས་ནཾ.
༢༨. སོ ཙ ས་ཏྠཱ ཨ་མི་ཏ་ཡ་སོ, ཡུ་གཱ་ནི ཏཱ་ནི ཨ་ཏུ་ལི་ཡཱ་ནི;
ས་བྦཾ ཏ་མ་ནྟ་ར་ཧི་ཏཾ, ན་ནུ རི་ཏྟཱ ས་བྦ་ས་ངྑཱ་རཱ.
༢༩. ཨ་ནོ་མ་ད་སྶཱི ཛི་ནོ ས་ཏྠཱ, དྷ་མྨཱ་རཱ་མ་མྷི ནི་བྦུ་ཏོ;
ཏ་ཏྠེ་ཝ་སྶ ཛི་ན་ཐཱུ་པོ, ཨུ་བྦེ་དྷོ པ་ཉྩ་ཝཱི་ས་ཏཱི་ཏི.
ཨ་ནོ་མ་ད་སྶི་སྶ བྷ་ག་ཝ་ཏོ ཝཾ་སོ ས་ཏྟ་མོ.