༡༠. པ་དུ་མ་བུ་དྡྷ་ཝཾ་སོ
༡. ཨ་ནོ་མ་ད་སྶི་སྶ ཨ་པ་རེ་ན, ས་མྦུ་དྡྷོ དྭི་པ་དུ་ཏྟ་མོ;
པ་དུ་མོ ནཱ་མ ནཱ་མེ་ན, ཨ་ས་མོ ཨ་པྤ་ཊི་པུ་གྒ་ལོ.
༢. ཏ་སྶཱ་པི ཨ་ས་མཾ སཱི་ལཾ, ས་མཱ་དྷི་པི ཨ་ན་ནྟ་ཀོ;
ཨ་ས་ངྑེ་ཡྻཾ ཉཱ་ཎ་ཝ་རཾ, ཝི་མུ་ཏྟི་པི ཨ་ནཱུ་པ་མཱ.
༣. ཏ་སྶཱ་པི ཨ་ཏུ་ལ་ཏེ་ཛ་སྶ, དྷ་མྨ་ཙ་ཀྐ་པྤ་ཝ་ཏྟ་ནེ;
ཨ་བྷི་ས་མ་ཡཱ ཏ་ཡོ ཨཱ་སུཾ, མ་ཧཱ་ཏ་མ་པ་ཝཱ་ཧ་ནཱ.
༤. པ་ཋ་མཱ་བྷི་ས་མ་ཡེ བུ་དྡྷོ, ཀོ་ཊི་ས་ཏ་མ་བོ་དྷ་ཡི;
དུ་ཏི་ཡཱ་བྷི་ས་མ་ཡེ དྷཱི་རོ, ན་ཝུ་ཏི་ཀོ་ཊི་མ་བོ་དྷ་ཡི.
༥. ཡ་དཱ ཙ པ་དུ་མོ བུ་དྡྷོ, ཨོ་ཝ་དཱི ས་ཀ་མ་ཏྲ་ཛཾ;
ཏ་དཱ ཨ་སཱི་ཏི་ཀོ་ཊཱི་ནཾ, ཏ་ཏི་ཡཱ་བྷི་ས་མ་ཡོ ཨ་ཧུ.
༦. ས་ནྣི་པཱ་ཏཱ ཏ་ཡོ ཨཱ་སུཾ, པ་དུ་མ་སྶ མ་ཧེ་སི་ནོ;
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ.
༧. ཀ་ཐི་ན་ཏྠཱ་ར་ས་མ་ཡེ, ཨུ་པྤ་ནྣེ ཀ་ཐི་ན་ཙཱི་ཝ་རེ;
དྷ་མྨ་སེ་ནཱ་པ་ཏི་ཏྠཱ་ཡ, བྷི་ཀྑཱུ སི་བྦིཾ་སུ [ཡཱ་ཙིཾ་སུ (ཀ.)] ཙཱི་ཝ་རཾ.
༨. ཏ་དཱ ཏེ ཝི་མ་ལཱ བྷི་ཀྑཱུ, ཚ་ལ༹་བྷི་ཉྙཱ མ་ཧི་དྡྷི་ཀཱ;
ཏཱི་ཎི ས་ཏ་ས་ཧ་སྶཱ་ནི, ས་མིཾ་སུ ཨ་པ་རཱ་ཛི་ཏཱ.
༩. པུ་ནཱ་པ་རཾ སོ ན་རཱ་ས་བྷོ [ན་ར་ཝུ་ས་བྷོ (སྱཱ. ཀཾ.)], པ་ཝ་ནེ ཝཱ་སཾ ཨུ་པཱ་ག་མི;
ཏ་དཱ ས་མཱ་ག་མོ ཨཱ་སི, དྭི་ནྣཾ ས་ཏ་ས་ཧ་སྶི་ནཾ.
༡༠. ཨ་ཧཾ ཏེ་ན ས་མ་ཡེ་ན, སཱི་ཧོ ཨཱ་སིཾ མི་གཱ་དྷི་བྷཱུ;
ཝི་ཝེ་ཀ་མ་ནུ་བྲཱུ་ཧ་ནྟཾ, པ་ཝ་ནེ ཨ་དྡ་སཾ ཛི་ནཾ.
༡༡. ཝ་ནྡི་ཏྭཱ སི་ར་སཱ པཱ་དེ, ཀ་ཏྭཱ་ན ཏཾ པ་ད་ཀྑི་ཎཾ;
ཏི་ཀྑ་ཏྟུཾ ཨ་བྷི་ནཱ་དི་ཏྭཱ, ས་ཏྟཱ་ཧཾ ཛི་ན་མུ་པ་ཊྛ་ཧཾ.
༡༢. ས་ཏྟཱ་ཧཾ ཝ་ར་ས་མཱ་པ་ཏྟི་ཡཱ, ཝུ་ཊྛ་ཧི་ཏྭཱ ཏ་ཐཱ་ག་ཏོ;
མ་ན་སཱ ཙི་ནྟ་ཡི་ཏྭཱ་ན, ཀོ་ཊི་བྷི་ཀྑཱུ ས་མཱ་ན་ཡི.
༡༣. ཏ་དཱ་པི སོ མ་ཧཱ་ཝཱི་རོ, ཏེ་སཾ མ་ཛ྄ཛྷེ ཝི་ཡཱ་ཀ་རི;
‘‘ཨ་པ་རི་མེ་ཡྻི་ཏོ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༤. ‘‘པ་དྷཱ་ནཾ པ་ད་ཧི་ཏྭཱ་ན…པེ… ཧེ་སྶཱ་མ ས་མྨུ་ཁཱ ཨི་མཾ’’.
༡༥. ཏ་སྶཱ་པི ཝ་ཙ་ནཾ སུ་ཏྭཱ, བྷི་ཡྻོ ཙི་ཏྟཾ པ་སཱ་ད་ཡིཾ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས་པཱ་ར་མི་པཱུ་རི་ཡཱ.
༡༦. ཙ་མྤ་ཀཾ ནཱ་མ ན་ག་རཾ, ཨ་ས་མོ ནཱ་མ ཁ་ཏྟི་ཡོ;
ཨ་ས་མཱ ནཱ་མ ཛ་ནི་ཀཱ, པ་དུ་མ་སྶ མ་ཧེ་སི་ནོ.
༡༧. ད་ས་ཝ་སྶ་ས་ཧ་སྶཱ་ནི, ཨ་གཱ་རཾ ཨ་ཛ྄ཛྷ སོ ཝ་སི;
ན་ནྡཱ་ཝ་སུ་ཡ་སུ་ཏྟ་རཱ, ཏ་ཡོ པཱ་སཱ་ད་མུ་ཏྟ་མཱ.
༡༨. ཏེ་ཏྟིཾ་ས ཙ ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
ཨུ་ཏྟ་རཱ ནཱ་མ སཱ ནཱ་རཱི, ར་མྨོ ནཱ་མཱ་སི ཨ་ཏྲ་ཛོ.
༡༩. ནི་མི་ཏྟེ ཙ་ཏུ་རོ དི་སྭཱ, ར་ཐ་ཡཱ་ནེ་ན ནི་ཀྑ་མི;
ཨ་ནཱུ་ན་ཨ་ཊྛ་མཱ་སཱ་ནི, པ་དྷཱ་ནཾ པ་ད་ཧཱི ཛི་ནོ.
༢༠. བྲ་ཧྨུ་ནཱ ཡཱ་ཙི་ཏོ ས་ནྟོ, པ་དུ་མོ ལོ་ཀ་ནཱ་ཡ་ཀོ;
ཝ་ཏྟི ཙ་ཀྐཾ མ་ཧཱ་ཝཱི་རོ, དྷ་ན་ཉྩུ་ཡྻཱ་ན་མུ་ཏྟ་མེ.
༢༡. སཱ་ལོ ཙ ཨུ་པ་སཱ་ལོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
ཝ་རུ་ཎོ ནཱ་མུ་པ་ཊྛཱ་ཀོ, པ་དུ་མ་སྶ མ་ཧེ་སི་ནོ.
༢༢. རཱ་དྷཱ ཙེ་ཝ སུ་རཱ་དྷཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, མ་ཧཱ་སོ་ཎོ་ཏི ཝུ་ཙྩ་ཏི.
༢༣. བྷི་ཡྻོ ཙེ་ཝ ཨ་ས་མོ ཙ, ཨ་ཧེ་སུཾ ཨ་གྒུ་པ་ཊྛ་ཀཱ;
རུ་ཙཱི ཙ ན་ནྡ་རཱ་མཱ ཙ, ཨ་ཧེ་སུཾ ཨ་གྒུ་པ་ཊྛི་ཀཱ.
༢༤. ཨ་ཊྛ་པ་ཎྞཱ་ས་ར་ཏ་ནཾ, ཨ་ཙྩུ་གྒ་ཏོ མ་ཧཱ་མུ་ནི;
པ་བྷཱ ནི་དྡྷཱ་ཝ་ཏཱི ཏ་སྶ, ཨ་ས་མཱ ས་བྦ་སོ དི་སཱ.
༢༥. ཙ་ནྡ་པྤ་བྷཱ སཱུ་རི་ཡ་པྤ་བྷཱ, ར་ཏ་ན་གྒི་མ་ཎི་པྤ་བྷཱ;
ས་བྦཱ་པི ཏཱ ཧ་ཏཱ ཧོ་ནྟི, པ་ཏྭཱ ཛི་ན་པ་བྷུ་ཏྟ་མཾ.
༢༦. ཝ་སྶ་ས་ཏ་ས་ཧ་སྶཱ་ནི, ཨཱ་ཡུ ཝི་ཛྫ་ཏི ཏཱ་ཝ་དེ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༢༧. པ་རི་པ་ཀྐ་མཱ་ན་སེ ས་ཏྟེ, བོ་དྷ་ཡི་ཏྭཱ ཨ་སེ་ས་ཏོ;
སེ་ས་ཀེ ཨ་ནུ་སཱ་སི་ཏྭཱ, ནི་བྦུ་ཏོ སོ ས་སཱ་ཝ་ཀོ.
༢༨. ཨུ་ར་གོ་ཝ ཏ་ཙཾ ཛི་ཎྞཾ, ཝ་དྡྷ་པ་ཏྟཾ་ཝ པཱ་ད་པོ;
ཛ་ཧི་ཏྭཱ ས་བྦ་ས་ངྑཱ་རེ, ནི་བྦུ་ཏོ སོ ཡ་ཐཱ སི་ཁཱི.
༢༩. པ་དུ་མོ ཛི་ན་ཝ་རོ ས་ཏྠཱ, དྷ་མྨཱ་རཱ་མ་མྷི ནི་བྦུ་ཏོ;
དྷཱ་ཏུ་ཝི་ཏྠཱ་རི་ཀཾ ཨཱ་སི, ཏེ་སུ ཏེ་སུ པ་དེ་ས་ཏོ་ཏི.
པ་དུ་མ་སྶ བྷ་ག་ཝ་ཏོ ཝཾ་སོ ཨ་ཊྛ་མོ.