༨. སོ་བྷི་ཏ་བུ་དྡྷ་ཝཾ་སོ
༡. རེ་ཝ་ཏ་སྶ ཨ་པ་རེ་ན, སོ་བྷི་ཏོ ནཱ་མ ནཱ་ཡ་ཀོ;
ས་མཱ་ཧི་ཏོ ས་ནྟ་ཙི་ཏྟོ, ཨ་ས་མོ ཨ་པྤ་ཊི་པུ་གྒ་ལོ.
༢. སོ ཛི་ནོ ས་ཀ་གེ་ཧ་མྷི, མཱ་ན་སཾ ཝི་ནི་ཝ་ཏྟ་ཡི;
པ་ཏྭཱ་ན ཀེ་ཝ་ལཾ བོ་དྷིཾ, དྷ་མྨ་ཙ་ཀྐཾ པ་ཝ་ཏྟ་ཡི.
༣. ཡཱ་ཝ ཧེ་ཊྛཱ ཨ་ཝཱི་ཙི་ཏོ, བྷ་ཝ་གྒཱ ཙཱ་པི ཨུ་དྡྷ་ཏོ;
ཨེ་ཏྠ་ནྟ་རེ ཨེ་ཀ་པ་རི་སཱ, ཨ་ཧོ་སི དྷ་མྨ་དེ་ས་ནེ.
༤. ཏཱ་ཡ པ་རི་སཱ་ཡ ས་མྦུ་དྡྷོ, དྷ་མྨ་ཙ་ཀྐཾ པ་ཝ་ཏྟ་ཡི;
ག་ཎ་ནཱ་ཡ ན ཝ་ཏྟ་བྦོ, པ་ཋ་མཱ་བྷི་ས་མ་ཡོ ཨ་ཧུ.
༥. ཏ་ཏོ པ་ར་མྤི དེ་སེ་ནྟེ, མ་རཱུ་ན་ཉྩ ས་མཱ་ག་མེ;
ན་ཝུ་ཏི་ཀོ་ཊི་ས་ཧ་སྶཱ་ནཾ, དུ་ཏི་ཡཱ་བྷི་ས་མ་ཡོ ཨ་ཧུ.
༦. པུ་ནཱ་པ་རཾ རཱ་ཛ་པུ་ཏྟོ, ཛ་ཡ་སེ་ནོ ནཱ་མ ཁ་ཏྟི་ཡོ;
ཨཱ་རཱ་མཾ རོ་པ་ཡི་ཏྭཱ་ན, བུ་དྡྷེ ནི་ཡྻཱ་ད་ཡཱི ཏ་དཱ.
༧. ཏ་སྶ ཡཱ་གཾ པ་ཀི་ཏྟེ་ནྟོ, དྷ་མྨཾ དེ་སེ་སི ཙ་ཀྑུ་མཱ;
ཏ་དཱ ཀོ་ཊི་ས་ཧ་སྶཱ་ནཾ, ཏ་ཏི་ཡཱ་བྷི་ས་མ་ཡོ ཨ་ཧུ.
༨. ས་ནྣི་པཱ་ཏཱ ཏ་ཡོ ཨཱ་སུཾ, སོ་བྷི་ཏ་སྶ མ་ཧེ་སི་ནོ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༩. ཨུ་གྒ་ཏོ ནཱ་མ སོ རཱ་ཛཱ, དཱ་ནཾ དེ་ཏི ན་རུ་ཏྟ་མེ;
ཏ་མྷི དཱ་ནེ ས་མཱ་ག་ཉྪུཾ, ཨ་ར་ཧ་ནྟཱ [ཨ་ར་ཧ་ཏཾ (ཀ.)] ས་ཏ་ཀོ་ཊི་ཡོ.
༡༠. པུ་ནཱ་པ་རཾ པུ་ར་ག་ཎོ [པུ་ག་ག་ཎོ (ཀ.)], དེ་ཏི དཱ་ནཾ ན་རུ་ཏྟ་མེ;
ཏ་དཱ ན་ཝུ་ཏི་ཀོ་ཊཱི་ནཾ, དུ་ཏི་ཡོ ཨཱ་སི ས་མཱ་ག་མོ.
༡༡. དེ་ཝ་ལོ་ཀེ ཝ་སི་ཏྭཱ་ན, ཡ་དཱ ཨོ་རོ་ཧ་ཏཱི ཛི་ནོ;
ཏ་དཱ ཨ་སཱི་ཏི་ཀོ་ཊཱི་ནཾ, ཏ་ཏི་ཡོ ཨཱ་སི ས་མཱ་ག་མོ.
༡༢. ཨ་ཧཾ ཏེ་ན ས་མ་ཡེ་ན, སུ་ཛཱ་ཏོ ནཱ་མ བྲཱ་ཧྨ་ཎོ;
ཏ་དཱ ས་སཱ་ཝ་ཀཾ བུ་དྡྷཾ, ཨ་ནྣ་པཱ་ནེ་ན ཏ་པྤ་ཡིཾ.
༡༣. སོ་པི མཾ བུ་དྡྷོ བྱཱ་ཀཱ་སི, སོ་བྷི་ཏོ ལོ་ཀ་ནཱ་ཡ་ཀོ;
‘‘ཨ་པ་རི་མེ་ཡྻི་ཏོ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༤. ‘‘པ་དྷཱ་ནཾ པ་ད་ཧི་ཏྭཱ་ན…པེ… ཧེ་སྶཱ་མ ས་མྨུ་ཁཱ ཨི་མཾ’’.
༡༥. ཏ་སྶཱ་པི ཝ་ཙ་ནཾ སུ་ཏྭཱ, ཧ་ཊྛོ སཾ་ཝི་གྒ་མཱ་ན་སོ;
ཏ་མེ་ཝ་ཏྠ་མ་ནུ་པྤ་ཏྟི་ཡཱ, ཨུ་གྒཾ དྷི་ཏི་མ་ཀཱ་ས་ཧཾ.
༡༦. སུ་དྷ་མྨཾ ནཱ་མ ན་ག་རཾ, སུ་དྷ་མྨོ ནཱ་མ ཁ་ཏྟི་ཡོ;
སུ་དྷ་མྨཱ ནཱ་མ ཛ་ནི་ཀཱ, སོ་བྷི་ཏ་སྶ མ་ཧེ་སི་ནོ.
༡༧. ན་ཝ་ཝ་སྶ་ས་ཧ་སྶཱ་ནི, ཨ་གཱ་རཾ ཨ་ཛ྄ཛྷ སོ ཝ་སི;
ཀུ་མུ་དོ ནཱ་ལི༹་ནོ པ་དུ་མོ, ཏ་ཡོ པཱ་སཱ་ད་མུ་ཏྟ་མཱ.
༡༨. ས་ཏྟ་ཏིཾ་ས་ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
མ་ཎི་ལཱ [མ་ཁི་ལཱ (ཨ་ཊྛ.), ས་མ་ངྒཱི (སཱི.), མ་ཀི་ལཱ (སྱཱ. ཀཾ.)] ནཱ་མ སཱ ནཱ་རཱི, སཱི་ཧོ ནཱ་མཱ་སི ཨ་ཏྲ་ཛོ.
༡༩. ནི་མི་ཏྟེ ཙ་ཏུ་རོ དི་སྭཱ, པཱ་སཱ་དེ་ནཱ་བྷི་ནི་ཀྑ་མི;
ས་ཏྟཱ་ཧཾ པ་དྷཱ་ན་ཙཱ་རཾ, ཙ་རི་ཏྭཱ པུ་རི་སུ་ཏྟ་མོ.
༢༠. བྲ་ཧྨུ་ནཱ ཡཱ་ཙི་ཏོ ས་ནྟོ, སོ་བྷི་ཏོ ལོ་ཀ་ནཱ་ཡ་ཀོ;
ཝ་ཏྟི ཙ་ཀྐཾ མ་ཧཱ་ཝཱི་རོ, སུ་དྷ་མྨུ་ཡྻཱ་ན་མུ་ཏྟ་མེ.
༢༡. ཨ་ས་མོ ཙ སུ་ནེ་ཏྟོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
ཨ་ནོ་མོ ནཱ་མུ་པ་ཊྛཱ་ཀོ, སོ་བྷི་ཏ་སྶ མ་ཧེ་སི་ནོ.
༢༢. ན་ཀུ་ལཱ ཙ སུ་ཛཱ་ཏཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བུ་ཛ྄ཛྷ་མཱ་ནོ ཙ སོ བུ་དྡྷོ, ནཱ་ག་མཱུ་ལེ ཨ་བུ་ཛ྄ཛྷ་ཐ.
༢༣. ར་མྨོ ཙེ་ཝ སུ་ད་ཏྟོ ཙ, ཨ་ཧེ་སུཾ ཨ་གྒུ་པ་ཊྛ་ཀཱ;
ན་ཀུ་ལཱ ཙེ་ཝ ཙི་ཏྟཱ ཙ, ཨ་ཧེ་སུཾ ཨ་གྒུ་པ་ཊྛི་ཀཱ.
༢༤. ཨ་ཊྛ་པ་ཎྞཱ་ས་ར་ཏ་ནཾ, ཨ་ཙྩུ་གྒ་ཏོ མ་ཧཱ་མུ་ནི;
ཨོ་བྷཱ་སེ་ཏི དི་སཱ ས་བྦཱ, ས་ཏ་རཾ་སཱི་ཝ ཨུ་གྒ་ཏོ.
༢༥. ཡ་ཐཱ སུ་ཕུ་ལླཾ པ་ཝ་ནཾ, ནཱ་ནཱ་ག་ནྡྷེ་ཧི དྷཱུ་པི་ཏཾ;
ཏ་ཐེ་ཝ ཏ་སྶ པཱ་ཝ་ཙ་ནཾ, སཱི་ལ་ག་ནྡྷེ་ཧི དྷཱུ་པི་ཏཾ.
༢༦. ཡ་ཐཱ་པི སཱ་ག་རོ ནཱ་མ, ད་སྶ་ནེ་ན ཨ་ཏ་པྤི་ཡོ;
ཏ་ཐེ་ཝ ཏ་སྶ པཱ་ཝ་ཙ་ནཾ, ས་ཝ་ཎེ་ན ཨ་ཏ་པྤི་ཡཾ.
༢༧. ན་ཝུ་ཏི་ཝ་སྶ་ས་ཧ་སྶཱ་ནི, ཨཱ་ཡུ ཝི་ཛྫ་ཏི ཏཱ་ཝ་དེ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༢༨. ཨོ་ཝཱ་དཾ ཨ་ནུ་སི་ཊྛི་ཉྩ, ད་ཏྭཱ་ན སེ་ས་ཀེ ཛ་ནེ;
ཧུ་ཏཱ་ས་ནོ་ཝ ཏཱ་པེ་ཏྭཱ, ནི་བྦུ་ཏོ སོ ས་སཱ་ཝ་ཀོ.
༢༩. སོ ཙ བུ་དྡྷོ ཨ་ས་མ་ས་མོ, ཏེ་པི སཱ་ཝ་ཀཱ བ་ལ་པྤ་ཏྟཱ;
ས་བྦཾ ཏ་མ་ནྟ་ར་ཧི་ཏཾ, ན་ནུ རི་ཏྟཱ ས་བྦ་ས་ངྑཱ་རཱ.
༣༠. སོ་བྷི་ཏོ ཝ་ར་ས་མྦུ་དྡྷོ, སཱི་ཧཱ་རཱ་མ་མྷི ནི་བྦུ་ཏོ;
དྷཱ་ཏུ་ཝི་ཏྠཱ་རི་ཀཾ ཨཱ་སི, ཏེ་སུ ཏེ་སུ པ་དེ་ས་ཏོ་ཏི.
སོ་བྷི་ཏ་སྶ བྷ་ག་ཝ་ཏོ ཝཾ་སོ ཚ་ཊྛོ.