༥. མ་ངྒ་ལ་བུ་དྡྷ་ཝཾ་སོ
༡. ཀོ་ཎྜ་ཉྙ་སྶ ཨ་པ་རེ་ན, མ་ངྒ་ལོ ནཱ་མ ནཱ་ཡ་ཀོ;
ཏ་མཾ ལོ་ཀེ ནི་ཧ་ནྟྭཱ་ན, དྷ་མྨོ་ཀྐ་མ་བྷི་དྷཱ་ར་ཡི.
༢. ཨ་ཏུ་ལཱ་སི པ་བྷཱ ཏ་སྶ, ཛི་ནེ་ཧ་ཉྙེ་ཧི ཨུ་ཏྟ་རིཾ;
ཙ་ནྡ་སཱུ་རི་ཡ་པ་བྷཾ ཧ་ནྟྭཱ, ད་ས་ས་ཧ་སྶཱི ཝི་རོ་ཙ་ཏི.
༣. སོ་པི བུ་དྡྷོ པ་ཀཱ་སེ་སི, ཙ་ཏུ་རོ ས་ཙྩ་ཝ་རུ་ཏྟ་མེ;
ཏེ ཏེ ས་ཙྩ་ར་སཾ པཱི་ཏྭཱ, ཝི་ནོ་དེ་ནྟི མ་ཧཱ་ཏ་མཾ.
༤. པ་ཏྭཱ་ན བོ་དྷི་མ་ཏུ་ལཾ, པ་ཋ་མེ དྷ་མྨ་དེ་ས་ནེ;
ཀོ་ཊི་ས་ཏ་ས་ཧ་སྶཱ་ནཾ, དྷ་མྨཱ་བྷི་ས་མ་ཡོ ཨ་ཧུ.
༥. སུ་རི་ནྡ་དེ་ཝ་བྷ་ཝ་ནེ, བུ་དྡྷོ དྷ་མྨ་མ་དེ་ས་ཡི;
ཏ་དཱ ཀོ་ཊི་ས་ཧ་སྶཱ་ནཾ [ན་ཝ་ཀོ་ཊི་ས་ཧ་སྶཱ་ནཾ (སཱི.)], དུ་ཏི་ཡོ ས་མ་ཡོ ཨ་ཧུ.
༦. ཡ་དཱ སུ་ན་ནྡོ ཙ་ཀྐ་ཝ་ཏྟཱི, ས་མྦུ་དྡྷཾ ཨུ་པ་ས་ངྐ་མི;
ཏ་དཱ ཨཱ་ཧ་ནི ས་མྦུ་དྡྷོ, དྷ་མྨ་བྷེ་རིཾ ཝ་རུ་ཏྟ་མཾ.
༧. སུ་ན་ནྡ་སྶཱ་ནུ་ཙ་རཱ ཛ་ན་ཏཱ, ཏ་དཱ་སུཾ ན་ཝུ་ཏི་ཀོ་ཊི་ཡོ;
ས་བྦེ་པི ཏེ ནི་ར་ཝ་སེ་སཱ, ཨ་ཧེ་སུཾ ཨེ་ཧི བྷི་ཀྑུ་ཀཱ.
༨. ས་ནྣི་པཱ་ཏཱ ཏ་ཡོ ཨཱ་སུཾ, མ་ངྒ་ལ་སྶ མ་ཧེ་སི་ནོ;
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ.
༩. དུ་ཏི་ཡོ ཀོ་ཊི་ས་ཏ་ས་ཧ་སྶཱ་ནཾ, ཏ་ཏི་ཡོ ན་ཝུ་ཏི་ཀོ་ཊི་ནཾ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ཏ་དཱ ཨཱ་སི ས་མཱ་ག་མོ.
༡༠. ཨ་ཧཾ ཏེ་ན ས་མ་ཡེ་ན, སུ་རུ་ཙཱི ནཱ་མ བྲཱ་ཧྨ་ཎོ;
ཨ་ཛ྄ཛྷཱ་ཡ་ཀོ མ་ནྟ་དྷ་རོ, ཏི་ཎྞཾ ཝེ་དཱ་ན པཱ་ར་གཱུ.
༡༡. ཏ་མ་ཧཾ ཨུ་པ་ས་ངྐ་མྨ, ས་ར་ཎཾ ག་ནྟྭཱ་ན ས་ཏྠུ་ནོ;
ས་མྦུ་དྡྷ་པྤ་མུ་ཁཾ ས་ངྒྷཾ, ག་ནྡྷ་མཱ་ལེ་ན པཱུ་ཛ་ཡིཾ;
པཱུ་ཛེ་ཏྭཱ ག་ནྡྷ་མཱ་ལེ་ན, ག་ཝ་པཱ་ནེ་ན ཏ་པྤ་ཡིཾ.
༡༢. སོ་པི མཾ བུ་དྡྷོ བྱཱ་ཀཱ་སི, མ་ངྒ་ལོ དྭི་པ་དུ་ཏྟ་མོ;
‘‘ཨ་པ་རི་མེ་ཡྻི་ཏོ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༣. ‘‘པ་དྷཱ་ནཾ པ་ད་ཧི་ཏྭཱ་ན…པེ… ཧེ་སྶཱ་མ ས་མྨུ་ཁཱ ཨི་མཾ’’.
༡༤. ཏ་སྶཱ་པི ཝ་ཙ་ནཾ སུ་ཏྭཱ, བྷི་ཡྻོ ཙི་ཏྟཾ པ་སཱ་ད་ཡིཾ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས པཱ་ར་མི་པཱུ་རི་ཡཱ.
༡༥. ཏ་དཱ པཱི་ཏི་མ་ནུ་བྲཱུ་ཧ་ནྟོ, ས་མྦོ་དྷི་ཝ་ར་པ་ཏྟི་ཡཱ;
བུ་དྡྷེ ད་ཏྭཱ་ན མཾ གེ་ཧཾ, པ་བྦ་ཛིཾ ཏ་སྶ ས་ནྟི་ཀེ.
༡༦. སུ་ཏྟ་ནྟཾ ཝི་ན་ཡ་ཉྩཱ་པི, ན་ཝ་ངྒཾ ས་ཏྠུ་སཱ་ས་ནཾ;
ས་བྦཾ པ་རི་ཡཱ་པུ་ཎི་ཏྭཱ, སོ་བྷ་ཡིཾ ཛི་ན་སཱ་ས་ནཾ.
༡༧. ཏ་ཏྠ་པྤ་མ་ཏྟོ ཝི་ཧ་ར་ནྟོ, བྲ་ཧྨཾ བྷཱ་ཝེ་ཏྭ བྷཱ་ཝ་ནཾ;
ཨ་བྷི་ཉྙཱ་པཱ་ར་མིཾ ག་ནྟྭཱ, བྲ་ཧྨ་ལོ་ཀ་མ་ག་ཙྪ་ཧཾ.
༡༨. ཨུ་ཏྟ་རཾ ནཱ་མ ན་ག་རཾ, ཨུ་ཏྟ་རོ ནཱ་མ ཁ་ཏྟི་ཡོ;
ཨུ་ཏྟ་རཱ ནཱ་མ ཛ་ནི་ཀཱ, མ་ངྒ་ལ་སྶ མ་ཧེ་སི་ནོ.
༡༩. ན་ཝ་ཝ་སྶ་ས་ཧ་སྶཱ་ནི, ཨ་གཱ་རཾ ཨ་ཛ྄ཛྷ སོ ཝ་སི;
ཡ་ས་ཝཱ སུ་ཙི་མཱ སི་རཱི་མཱ, ཏ་ཡོ པཱ་སཱ་ད་མུ་ཏྟ་མཱ.
༢༠. ས་མ་ཏིཾ་ས་ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
ཡ་ས་ཝ་ཏཱི ནཱ་མ ནཱ་རཱི, སཱི་ཝ་ལོ ནཱ་མ ཨ་ཏྲ་ཛོ.
༢༡. ནི་མི་ཏྟེ ཙ་ཏུ་རོ དི་སྭཱ, ཨ་སྶ་ཡཱ་ནེ་ན ནི་ཀྑ་མི;
ཨ་ནཱུ་ན་ཨ་ཊྛ་མཱ་སཱ་ནི, པ་དྷཱ་ནཾ པ་ད་ཧཱི ཛི་ནོ.
༢༢. བྲ་ཧྨུ་ནཱ ཡཱ་ཙི་ཏོ ས་ནྟོ, མ་ངྒ་ལོ ནཱ་མ ནཱ་ཡ་ཀོ;
ཝ་ཏྟི ཙ་ཀྐཾ མ་ཧཱ་ཝཱི་རོ, ཝ་ནེ སི་རཱི་ཝ་རུ་ཏྟ་མེ.
༢༣. སུ་དེ་ཝོ དྷ་མྨ་སེ་ནོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
པཱ་ལི་ཏོ ནཱ་མུ་པ་ཊྛཱ་ཀོ, མ་ངྒ་ལ་སྶ མ་ཧེ་སི་ནོ.
༢༤. སཱི་ཝ་ལཱ ཙ ཨ་སོ་ཀཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, ནཱ་ག་རུ་ཀྑོ་ཏི ཝུ་ཙྩ་ཏི.
༢༥. ན་ནྡོ ཙེ་ཝ ཝི་སཱ་ཁོ ཙ, ཨ་ཧེ་སུཾ ཨ་གྒུ་པ་ཊྛ་ཀཱ;
ཨ་ནུ་ལཱ ཙེ་ཝ སུ་ཏ་ནཱ ཙ, ཨ་ཧེ་སུཾ ཨ་གྒུ་པ་ཊྛི་ཀཱ.
༢༦. ཨ་ཊྛཱ་སཱི་ཏི ར་ཏ་ནཱ་ནི, ཨ་ཙྩུ་གྒ་ཏོ མ་ཧཱ་མུ་ནི;
ཏ་ཏོ ནི་དྡྷཱ་ཝ་ཏཱི རཾ་སཱི, ཨ་ནེ་ཀ་ས་ཏ་ས་ཧ་སྶི་ཡོ.
༢༧. ན་ཝུ་ཏི་ཝ་སྶ་ས་ཧ་སྶཱ་ནི, ཨཱ་ཡུ ཝི་ཛྫ་ཏི ཏཱ་ཝ་དེ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༢༨. ཡ་ཐཱ་པི སཱ་ག་རེ ཨཱུ་མཱི, ན ས་ཀྐཱ ཏཱ ག་ཎེ་ཏུ་ཡེ;
ཏ་ཐེ་ཝ སཱ་ཝ་ཀཱ ཏ་སྶ, ན ས་ཀྐཱ ཏེ ག་ཎེ་ཏུ་ཡེ.
༢༩. ཡཱ་ཝ ཨ་ཊྛཱ་སི ས་མྦུ་དྡྷོ, མ་ངྒ་ལོ ལོ་ཀ་ནཱ་ཡ་ཀོ;
ན ཏ་སྶ སཱ་ས་ནེ ཨ་ཏྠི, ས་ཀི་ལེ་ས་མ་ར་ཎཾ [སཾ་ཀི་ལེ་ས་མ་ར་ཎཾ (སཱི.)] ཏ་དཱ.
༣༠. དྷ་མྨོ་ཀྐཾ དྷཱ་ར་ཡི་ཏྭཱ་ན, ས་ནྟཱ་རེ་ཏྭཱ མ་ཧཱ་ཛ་ནཾ;
ཛ་ལི་ཏྭཱ དྷཱུ་མ་ཀེ་ཏཱུ་ཝ, ནི་བྦུ་ཏོ སོ མ་ཧཱ་ཡ་སོ.
༣༡. ས་ངྑཱ་རཱ་ནཾ ས་བྷཱ་ཝ་ཏྠཾ, ད་སྶ་ཡི་ཏྭཱ ས་དེ་ཝ་ཀེ;
ཛ་ལི་ཏྭཱ ཨ་གྒི་ཀྑ་ནྡྷོ་ཝ, སཱུ་རི་ཡོ ཨ་ཏྠ་ངྒ་ཏོ ཡ་ཐཱ.
༣༢. ཨུ་ཡྻཱ་ནེ ཝ་སྶ་རེ ནཱ་མ, བུ་དྡྷོ ནི་བྦཱ་ཡི མ་ངྒ་ལོ;
ཏ་ཏྠེ་ཝ་སྶ ཛི་ན་ཐཱུ་པོ, ཏིཾ་ས་ཡོ་ཛ་ན་མུ་གྒ་ཏོ་ཏི.
མ་ངྒ་ལ་སྶ བྷ་ག་ཝ་ཏོ ཝཾ་སོ ཏ་ཏི་ཡོ.