༤. ཀོ་ཎྜ་ཉྙ་བུ་དྡྷ་ཝཾ་སོ
༡. དཱི་པ་ངྐ་ར་སྶ ཨ་པ་རེ་ན, ཀོ་ཎྜ་ཉྙོ ནཱ་མ ནཱ་ཡ་ཀོ;
ཨ་ན་ནྟ་ཏེ་ཛོ ཨ་མི་ཏ་ཡ་སོ, ཨ་པྤ་མེ་ཡྻོ དུ་རཱ་ས་དོ.
༢. དྷ་ར་ཎཱུ་པ་མོ ཁ་མ་ནེ་ན, སཱི་ལེ་ན སཱ་ག་རཱུ་པ་མོ;
ས་མཱ་དྷི་ནཱ མེ་རཱུ་པ་མོ, ཉཱ་ཎེ་ན ག་ག་ནཱུ་པ་མོ.
༣. ཨི་ནྡྲི་ཡ་བ་ལ་བོ་ཛ྄ཛྷ་ངྒ-མ་གྒ་ས་ཙྩ་པྤ་ཀཱ་ས་ནཾ;
པ་ཀཱ་སེ་སི ས་དཱ བུ་དྡྷོ, ཧི་ཏཱ་ཡ ས་བྦ་པཱ་ཎི་ནཾ.
༤. དྷ་མྨ་ཙ་ཀྐཾ པ་ཝ་ཏྟེ་ནྟེ, ཀོ་ཎྜ་ཉྙེ ལོ་ཀ་ནཱ་ཡ་ཀེ;
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མཱ་བྷི་ས་མ་ཡོ ཨ་ཧུ.
༥. ཏ་ཏོ པ་ར་མྤི དེ་སེ་ནྟེ, ན་ར་མ་རཱུ་ནཾ ས་མཱ་ག་མེ;
ན་ཝུ་ཏི་ཀོ་ཊི་ས་ཧ་སྶཱ་ནཾ, དུ་ཏི་ཡཱ་བྷི་ས་མ་ཡོ ཨ་ཧུ.
༦. ཏི་ཏྠི་ཡེ ཨ་བྷི་མ་དྡ་ནྟོ, ཡ་དཱ དྷ་མྨ་མ་དེ་ས་ཡི;
ཨ་སཱི་ཏི་ཀོ་ཊི་ས་ཧ་སྶཱ་ནཾ, ཏ་ཏི་ཡཱ་བྷི་ས་མ་ཡོ ཨ་ཧུ.
༧. ས་ནྣི་པཱ་ཏཱ ཏ་ཡོ ཨཱ་སུཾ, ཀོ་ཎྜ་ཉྙ་སྶ མ་ཧེ་སི་ནོ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༨. ཀོ་ཊི་ས་ཏ་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ;
དུ་ཏི་ཡོ ཀོ་ཊི་ས་ཧ་སྶཱ་ནཾ, ཏ་ཏི་ཡོ ན་ཝུ་ཏི་ཀོ་ཊི་ནཾ.
༩. ཨ་ཧཾ ཏེ་ན ས་མ་ཡེ་ན, ཝི་ཛི་ཏཱ་ཝཱི ནཱ་མ ཁ་ཏྟི་ཡོ;
ས་མུ་དྡཾ ཨ་ནྟ་མ་ནྟེ་ན, ཨི་སྶ་རི་ཡཾ ཝ་ཏྟ་ཡཱ་མ་ཧཾ.
༡༠. ཀོ་ཊི་ས་ཏ་ས་ཧ་སྶཱ་ནཾ, ཝི་མ་ལཱ་ནཾ མ་ཧེ་སི་ནཾ;
ས་ཧ ལོ་ཀ་གྒ་ནཱ་ཐེ་ན, པ་ར་མ་ནྣེ་ན ཏ་པྤ་ཡིཾ.
༡༡. སོ་པི མཾ བུ་དྡྷོ བྱཱ་ཀཱ་སི, ཀོ་ཎྜ་ཉྙོ ལོ་ཀ་ནཱ་ཡ་ཀོ;
‘‘ཨ་པ་རི་མེ་ཡྻི་ཏོ ཀ་པྤེ, བུ་དྡྷོ ལོ་ཀེ བྷ་ཝི་སྶ་ཏི.
༡༢. ‘‘པ་དྷཱ་ནཾ པ་ད་ཧི་ཏྭཱ་ན, ཀ་ཏྭཱ དུ་ཀྐ་ར་ཀཱ་རི་ཀཾ;
ཨ་སྶ་ཏྠ་མཱུ་ལེ ས་མྦུ་དྡྷོ, བུ་ཛ྄ཛྷི་སྶ་ཏི མ་ཧཱ་ཡ་སོ.
༡༣. ‘‘ཨི་མ་སྶ ཛ་ནི་ཀཱ མཱ་ཏཱ, མཱ་ཡཱ ནཱ་མ བྷ་ཝི་སྶ་ཏི;
པི་ཏཱ སུ་དྡྷོ་ད་ནོ ནཱ་མ, ཨ་ཡཾ ཧེ་སྶ་ཏི གོ་ཏ་མོ.
༡༤. ‘‘ཀོ་ལི་ཏོ ཨུ་པ་ཏི་སྶོ ཙ, ཨ་གྒཱ ཧེ་སྶ་ནྟི སཱ་ཝ་ཀཱ;
ཨཱ་ན་ནྡོ ནཱ་མུ་པ་ཊྛཱ་ཀོ, ཨུ་པ་ཊྛི་སྶ་ཏི་མཾ ཛི་ནཾ.
༡༥. ‘‘ཁེ་མཱ ཨུ་པྤ་ལ་ཝ་ཎྞཱ ཙ, ཨ་གྒཱ ཧེ་སྶ་ནྟི སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, ཨ་སྶ་ཏྠོ་ཏི པ་ཝུ་ཙྩ་ཏི.
༡༦. ‘‘ཙི་ཏྟོ ཙ ཧ་ཏྠཱ་ལ༹་ཝ་ཀོ, ཨ་གྒཱ ཧེ་སྶ་ནྟུ་པ་ཊྛ་ཀཱ;
ན་ནྡ་མཱ་ཏཱ ཙ ཨུ་ཏྟ་རཱ, ཨ་གྒཱ ཧེ་སྶ་ནྟུ་པ་ཊྛི་ཀཱ;
ཨཱ་ཡུ ཝ་སྶ་ས་ཏཾ ཏ་སྶ, གོ་ཏ་མ་སྶ ཡ་ས་སྶི་ནོ’’.
༡༧. ཨི་དཾ སུ་ཏྭཱ་ན ཝ་ཙ་ནཾ, ཨ་ས་མ་སྶ མ་ཧེ་སི་ནོ;
ཨཱ་མོ་དི་ཏཱ ན་ར་མ་རཱུ, བུ་དྡྷ་བཱི་ཛཾ ཀི་ར ཨ་ཡཾ.
༡༨. ཨུ་ཀྐུ་ཊྛི་ས་དྡཱ ཝ་ཏྟ་ནྟི, ཨ་པྥོ་ཊེ་ནྟི ཧ་ས་ནྟི ཙ;
ཀ་ཏ་ཉྫ་ལཱི ན་མ་སྶ་ནྟི, ད་ས་ས་ཧ་སྶི་དེ་ཝ་ཏཱ.
༡༩. ‘‘ཡ་དི་མ་སྶ ལོ་ཀ་ནཱ་ཐ་སྶ, ཝི་ར་ཛ྄ཛྷི་སྶཱ་མ སཱ་ས་ནཾ;
ཨ་ནཱ་ག་ཏ་མྷི ཨ་དྡྷཱ་ནེ, ཧེ་སྶཱ་མ ས་མྨུ་ཁཱ ཨི་མཾ.
༢༠. ‘‘ཡ་ཐཱ མ་ནུ་སྶཱ ན་དིཾ ཏ་ར་ནྟཱ, པ་ཊི་ཏི་ཏྠཾ ཝི་ར་ཛ྄ཛྷི་ཡ;
ཧེ་ཊྛཱ་ཏི་ཏྠེ ག་ཧེ་ཏྭཱ་ན, ཨུ་ཏྟ་ར་ནྟི མ་ཧཱ་ན་དིཾ.
༢༡. ‘‘ཨེ་ཝ་མེ་ཝ མ་ཡཾ ས་བྦེ, ཡ་དི མུ་ཉྩཱ་མི་མཾ ཛི་ནཾ;
ཨ་ནཱ་ག་ཏ་མྷི ཨ་དྡྷཱ་ནེ, ཧེ་སྶཱ་མ ས་མྨུ་ཁཱ ཨི་མཾ’’.
༢༢. ཏ་སྶཱ་ཧཾ ཝ་ཙ་ནཾ སུ་ཏྭཱ, བྷི་ཡྻོ ཙི་ཏྟཾ པ་སཱ་ད་ཡིཾ;
ཏ་མེ་ཝ ཨ་ཏྠཾ སཱ་དྷེ་ནྟོ, མ་ཧཱ་ར་ཛྫཾ ཛི་ནེ ཨ་དཾ;
མ་ཧཱ་ར་ཛྫཾ ད་དི་ཏྭཱ་ན [ཙ་ཛི་ཏྭཱ (སཱི.)], པ་བྦ་ཛིཾ ཏ་སྶ ས་ནྟི་ཀེ.
༢༣. སུ་ཏྟ་ནྟཾ ཝི་ན་ཡ་ཉྩཱ་པི, ན་ཝ་ངྒཾ ས་ཏྠུ་སཱ་ས་ནཾ;
ས་བྦཾ པ་རི་ཡཱ་པུ་ཎི་ཏྭཱ་ན, སོ་བྷ་ཡིཾ ཛི་ན་སཱ་ས་ནཾ.
༢༤. ཏ་ཏྠ་པྤ་མ་ཏྟོ ཝི་ཧ་ར་ནྟོ, ནི་ས་ཛྫ་ཊྛཱ་ན་ཙ་ངྐ་མེ;
ཨ་བྷི་ཉྙཱ་པཱ་ར་མིཾ ག་ནྟྭཱ, བྲ་ཧྨ་ལོ་ཀ་མ་ག་ཉྪ་ཧཾ.
༢༥. ན་ག་རཾ ར་མྨ་ཝ་ཏཱི ནཱ་མ, སུ་ན་ནྡོ ནཱ་མ ཁ་ཏྟི་ཡོ;
སུ་ཛཱ་ཏཱ ནཱ་མ ཛ་ནི་ཀཱ, ཀོ་ཎྜ་ཉྙ་སྶ མ་ཧེ་སི་ནོ.
༢༦. ད་ས་ཝ་སྶ་ས་ཧ་སྶཱ་ནི, ཨ་གཱ་རཾ ཨ་ཛ྄ཛྷ སོ ཝ་སི [ཨ་གཱ་ར་མ་ཛ྄ཛྷེ ཙ སོ ཝ་སི (སྱཱ.)];
སུ་ཙི སུ་རུ་ཙི སུ་བྷོ ཙ, ཏ་ཡོ པཱ་སཱ་ད་མུ་ཏྟ་མཱ.
༢༧. ཏཱི་ཎི་ས་ཏ་ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
རུ་ཙི་དེ་ཝཱི ནཱ་མ ནཱ་རཱི, ཝི་ཛི་ཏ་སེ་ནོ ཨ་ཏྲ་ཛོ.
༢༨. ནི་མི་ཏྟེ ཙ་ཏུ་རོ དི་སྭཱ, ར་ཐ་ཡཱ་ནེ་ན ནི་ཀྑ་མི;
ཨ་ནཱུ་ན་ད་ས་མཱ་སཱ་ནི, པ་དྷཱ་ནཾ པ་ད་ཧཱི ཛི་ནོ.
༢༩. བྲ་ཧྨུ་ནཱ ཡཱ་ཙི་ཏོ ས་ནྟོ, ཀོ་ཎྜ་ཉྙོ དྭི་པ་དུ་ཏྟ་མོ;
ཝ་ཏྟི ཙ་ཀྐཾ མ་ཧཱ་ཝཱི་རོ, དེ་ཝཱ་ནཾ ན་ག་རུ་ཏྟ་མེ.
༣༠. བྷ་དྡོ ཙེ་ཝ སུ་བྷ་དྡོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
ཨ་ནུ་རུ་དྡྷོ ནཱ་མུ་པ་ཊྛཱ་ཀོ, ཀོ་ཎྜ་ཉྙ་སྶ མ་ཧེ་སི་ནོ.
༣༡. ཏི་སྶཱ ཙ ཨུ་པ་ཏི་སྶཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
སཱ་ལ་ཀ་ལྱཱ་ཎི་ཀོ བོ་དྷི, ཀོ་ཎྜ་ཉྙ་སྶ མ་ཧེ་སི་ནོ.
༣༢. སོ་ཎོ ཙ ཨུ་པ་སོ་ཎོ ཙ, ཨ་ཧེ་སུཾ ཨ་གྒུ་པ་ཊྛ་ཀཱ;
ན་ནྡཱ ཙེ་ཝ སི་རཱི་མཱ ཙ, ཨ་ཧེ་སུཾ ཨ་གྒུ་པ་ཊྛི་ཀཱ.
༣༣. སོ ཨ་ཊྛཱ་སཱི་ཏི ཧ་ཏྠཱ་ནི, ཨ་ཙྩུ་གྒ་ཏོ མ་ཧཱ་མུ་ནི;
སོ་བྷ་ཏེ ཨུ་ལུ༹་རཱ་ཛཱ་ཝ སཱུ་རི་ཡོ མ་ཛ྄ཛྷ་ནྷི་ཀེ ཡ་ཐཱ.
༣༤. ཝ་སྶ་ས་ཏ་ས་ཧ་སྶཱ་ནི, ཨཱ་ཡུ ཝི་ཛྫ་ཏི ཏཱ་ཝ་དེ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༣༥. ཁཱི་ཎཱ་ས་ཝེ་ཧི ཝི་མ་ལེ་ཧི, ཝི་ཙི་ཏྟཱ ཨཱ་སི མེ་ད་ནཱི;
ཡ་ཐཱ ག་ག་ན་མུ་ལཱུ༹་ཧི, ཨེ་ཝཾ སོ ཨུ་པ་སོ་བྷ་ཐ.
༣༦. ཏེ་པི ནཱ་གཱ ཨ་པྤ་མེ་ཡྻཱ, ཨ་ས་ངྑོ་བྷཱ དུ་རཱ་ས་དཱ;
ཝི་ཛྫུ་པཱ་ཏཾ་ཝ ད་སྶེ་ཏྭཱ, ནི་བྦུ་ཏཱ ཏེ མ་ཧཱ་ཡ་སཱ.
༣༧. སཱ ཙ ཨ་ཏུ་ལི་ཡཱ ཛི་ན་སྶ ཨི་དྡྷི, ཉཱ་ཎ་པ་རི་བྷཱ་ཝི་ཏོ ཙ ས་མཱ་དྷི;
ས་བྦཾ ཏ་མ་ནྟ་ར་ཧི་ཏཾ, ན་ནུ རི་ཏྟཱ ས་བྦ་ས་ངྑཱ་རཱ.
༣༨. ཀོ་ཎྜ་ཉྙོ པ་ཝ་རོ བུ་དྡྷོ, ཙ་ནྡཱ་རཱ་མ་མྷི ནི་བྦུ་ཏོ;
ཏ་ཏྠེ་ཝ ཙེ་ཏི་ཡོ ཙི་ཏྟོ, ས་ཏྟ ཡོ་ཛ་ན་མུ་སྶི་ཏོ་ཏི.
ཀོ་ཎྜ་ཉྙ་སྶ བྷ་ག་ཝ་ཏོ ཝཾ་སོ དུ་ཏི་ཡོ.