༣. དཱི་པ་ངྐ་ར་བུ་དྡྷ་ཝཾ་སོ
༡. ཏ་དཱ ཏེ བྷོ་ཛ་ཡི་ཏྭཱ་ན, ས་ས་ངྒྷཾ ལོ་ཀ་ནཱ་ཡ་ཀཾ;
ཨུ་པ་ག་ཙྪུཾ ས་ར་ཎཾ ཏ་སྶ, དཱི་པ་ངྐ་ར་སྶ ས་ཏྠུ་ནོ.
༢. ས་ར་ཎཱ་ག་མ་ནེ ཀ་ཉྩི, ནི་ཝེ་སེ་སི ཏ་ཐཱ་ག་ཏོ;
ཀ་ཉྩི པ་ཉྩ་སུ སཱི་ལེ་སུ, སཱི་ལེ ད་ས་ཝི་དྷེ པ་རཾ.
༣. ཀ་སྶ་ཙི དེ་ཏི སཱ་མ་ཉྙཾ, ཙ་ཏུ་རོ ཕ་ལ་མུ་ཏྟ་མེ;
ཀ་སྶ་ཙི ཨ་ས་མེ དྷ་མྨེ, དེ་ཏི སོ པ་ཊི་ས་མྦྷི་དཱ.
༤. ཀ་སྶ་ཙི ཝ་ར་ས་མཱ་པ་ཏྟི་ཡོ, ཨ་ཊྛ དེ་ཏི ན་རཱ་ས་བྷོ;
ཏི་སྶོ ཀ་སྶ་ཙི ཝི་ཛྫཱ་ཡོ, ཚ་ལ༹་བྷི་ཉྙཱ པ་ཝེ་ཙྪ་ཏི.
༥. ཏེ་ན ཡོ་གེ་ན ཛ་ན་ཀཱ་ཡཾ, ཨོ་ཝ་ད་ཏི མ་ཧཱ་མུ་ནི;
ཏེ་ན ཝི་ཏྠཱ་རི་ཀཾ ཨཱ་སི, ལོ་ཀ་ནཱ་ཐ་སྶ སཱ་ས་ནཾ.
༦. མ་ཧཱ་ཧ་ནུ་ས་བྷ་ཀྑ་ནྡྷོ, དཱི་པ་ངྐ་ར་སྶ ནཱ་མ་ཀོ;
བ་ཧཱུ ཛ་ནེ ཏཱ་ར་ཡ་ཏི, པ་རི་མོ་ཙེ་ཏི དུ་གྒ་ཏིཾ.
༧. བོ་དྷ་ནེ་ཡྻཾ ཛ་ནཾ དི་སྭཱ, ས་ཏ་ས་ཧ་སྶེ་པི ཡོ་ཛ་ནེ;
ཁ་ཎེ་ན ཨུ་པ་ག་ནྟྭཱ་ན, བོ་དྷེ་ཏི ཏཾ མ་ཧཱ་མུ་ནི.
༨. པ་ཋ་མཱ་བྷི་ས་མ་ཡེ བུ་དྡྷོ, ཀོ་ཊི་ས་ཏ་མ་བོ་དྷ་ཡི;
དུ་ཏི་ཡཱ་བྷི་ས་མ་ཡེ ནཱ་ཐོ, ན་ཝུ་ཏི་ཀོ་ཊི་མ་བོ་དྷ་ཡི.
༩. ཡ་དཱ ཙ དེ་ཝ་བྷ་ཝ་ན་མྷི, བུ་དྡྷོ དྷ་མྨ་མ་དེ་ས་ཡི;
ན་ཝུ་ཏི་ཀོ་ཊི་ས་ཧ་སྶཱ་ནཾ, ཏ་ཏི་ཡཱ་བྷི་ས་མ་ཡོ ཨ་ཧུ.
༡༠. ས་ནྣི་པཱ་ཏཱ ཏ་ཡོ ཨཱ་སུཾ, དཱི་པ་ངྐ་ར་སྶ ས་ཏྠུ་ནོ;
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ.
༡༡. པུ་ན ནཱ་ར་ད་ཀཱུ་ཊ་མྷི, པ་ཝི་ཝེ་ཀ་ག་ཏེ ཛི་ནེ;
ཁཱི་ཎཱ་ས་ཝཱ ཝཱི་ཏ་མ་ལཱ, ས་མིཾ་སུ ས་ཏ་ཀོ་ཊི་ཡོ.
༡༢. ཡ་མྷི ཀཱ་ལེ མ་ཧཱ་ཝཱི་རོ, སུ་ད་སྶ་ན་སི་ལུ་ཙྩ་ཡེ;
ན་ཝ་ཀོ་ཊི་ས་ཧ་སྶེ་ཧི, པ་ཝཱ་རེ་སི མ་ཧཱ་མུ་ནི.
༡༣. ད་ས་ཝཱི་ས་ས་ཧ་སྶཱ་ནཾ, དྷ་མྨཱ་བྷི་ས་མ་ཡོ ཨ་ཧུ;
ཨེ་ཀ་དྭི་ནྣཾ ཨ་བྷི་ས་མ་ཡཱ, ག་ཎ་ནཱ་ཏོ ཨ་ས་ངྑི་ཡཱ.
༡༤. ཝི་ཏྠཱ་རི་ཀཾ བཱ་ཧུ་ཛ་ཉྙཾ, ཨི་དྡྷཾ ཕཱི་ཏཾ ཨ་ཧཱུ ཏ་དཱ;
དཱི་པ་ངྐ་ར་སྶ བྷ་ག་ཝ་ཏོ, སཱ་ས་ནཾ སུ་ཝི་སོ་དྷི་ཏཾ.
༡༥. ཙ་ཏྟཱ་རི ས་ཏ་ས་ཧ་སྶཱ་ནི, ཚ་ལ༹་བྷི་ཉྙཱ མ་ཧི་དྡྷི་ཀཱ;
དཱི་པ་ངྐ་རཾ ལོ་ཀ་ཝི་དུཾ, པ་རི་ཝཱ་རེ་ནྟི ས་བྦ་དཱ.
༡༦. ཡེ ཀེ་ཙི ཏེ་ན ས་མ་ཡེ་ན, ཛ་ཧ་ནྟི མཱ་ནུ་སཾ བྷ་ཝཾ;
ཨ་པ་ཏྟ་མཱ་ན་སཱ སེ་ཁཱ, ག་ར་ཧི་ཏཱ བྷ་ཝ་ནྟི ཏེ.
༡༧. སུ་པུ་པྥི་ཏཾ པཱ་ཝ་ཙ་ནཾ, ཨ་ར་ཧ་ནྟེ་ཧི ཏཱ་དི་ཧི;
ཁཱི་ཎཱ་ས་ཝེ་ཧི ཝི་མ་ལེ་ཧི, ཨུ་པ་སོ་བྷ་ཏི ས་བྦ་དཱ.
༡༨. ན་ག་རཾ ར་མྨ་ཝ་ཏཱི ནཱ་མ, སུ་དེ་ཝོ ནཱ་མ ཁ་ཏྟི་ཡོ;
སུ་མེ་དྷཱ ནཱ་མ ཛ་ནི་ཀཱ, དཱི་པ་ངྐ་ར་སྶ ས་ཏྠུ་ནོ.
༡༩. ད་ས་ཝ་སྶ་ས་ཧ་སྶཱ་ནི, ཨ་གཱ་རཾ ཨ་ཛ྄ཛྷ སོ ཝ་སི [ཨ་ཛ྄ཛྷཱ་ཝ་སཱི ཛི་ནོ (སྱཱ. ཀ.)];
ཧཾ་སཱ ཀོ་ཉྩཱ མ་ཡཱུ་རཱ ཙ, ཏ་ཡོ པཱ་སཱ་ད་མུ་ཏྟ་མཱ.
༢༠. ཏཱི་ཎི་ས་ཏ་ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
པ་དུ་མཱ ནཱ་མ སཱ ནཱ་རཱི, ཨུ་ས་བྷ་ཀྑ་ནྡྷོ ཨ་ཏྲ་ཛོ.
༢༡. ནི་མི་ཏྟེ ཙ་ཏུ་རོ དི་སྭཱ, ཧ་ཏྠི་ཡཱ་ནེ་ན ནི་ཀྑ་མི;
ཨ་ནཱུ་ན་ད་ས་མཱ་སཱ་ནི, པ་དྷཱ་ནེ པ་ད་ཧཱི ཛི་ནོ.
༢༢. པ་དྷཱ་ན་ཙཱ་རཾ ཙ་རི་ཏྭཱ་ན, ཨ་བུ་ཛ྄ཛྷི མཱ་ན་སཾ མུ་ནི;
བྲ་ཧྨུ་ནཱ ཡཱ་ཙི་ཏོ ས་ནྟོ, དཱི་པ་ངྐ་རོ མ་ཧཱ་མུ་ནི.
༢༣. ཝ་ཏྟི ཙ་ཀྐཾ མ་ཧཱ་ཝཱི་རོ, ན་ནྡཱ་རཱ་མེ སི་རཱི་གྷ་རེ [སི་རཱི་དྷ་རེ (སཱི.)];
ནི་སི་ནྣོ སི་རཱི་ས་མཱུ་ལ་མྷི, ཨ་ཀཱ ཏི་ཏྠི་ཡ་མ་དྡ་ནཾ.
༢༤. སུ་མ་ངྒ་ལོ ཙ ཏི་སྶོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
སཱ་ག་ཏོ [སོ་བྷི་ཏོ (ཀ.)] ནཱ་མུ་པ་ཊྛཱ་ཀོ, དཱི་པ་ངྐ་ར་སྶ ས་ཏྠུ་ནོ.
༢༥. ན་ནྡཱ ཙེ་ཝ སུ་ན་ནྡཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, པི་པྥ་ལཱི་ཏི པ་ཝུ་ཙྩ་ཏི.
༢༦. ཏ་པུ་སྶ་བྷ་ལླི་ཀཱ [ཏ་པ་སྶུ་བྷ་ལླི་ཀཱ (སཱི.)] ནཱ་མ, ཨ་ཧེ་སུཾ ཨ་གྒུ་པ་ཊྛ་ཀཱ;
སི་རི་མཱ ཀོ་ཎཱ ཨུ་པ་ཊྛི་ཀཱ, དཱི་པ་ངྐ་ར་སྶ ས་ཏྠུ་ནོ.
༢༧. ཨ་སཱི་ཏི་ཧ་ཏྠ་མུ་བྦེ་དྷོ, དཱི་པ་ངྐ་རོ མ་ཧཱ་མུ་ནི;
སོ་བྷ་ཏི དཱི་པ་རུ་ཀྑོ་ཝ, སཱ་ལ་རཱ་ཛཱ་ཝ ཕུ་ལླི་ཏོ.
༢༨. ས་ཏ་ས་ཧ་སྶ་ཝ་སྶཱ་ནི, ཨཱ་ཡུ ཏ་སྶ མ་ཧེ་སི་ནོ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༢༩. ཛོ་ཏ་ཡི་ཏྭཱ་ན ས་དྡྷ་མྨཾ, ས་ནྟཱ་རེ་ཏྭཱ མ་ཧཱ་ཛ་ནཾ;
ཛ་ལི་ཏྭཱ ཨ་གྒི་ཀྑ་ནྡྷོ་ཝ, ནི་བྦུ་ཏོ སོ ས་སཱ་ཝ་ཀོ.
༣༠. སཱ ཙ ཨི་དྡྷི སོ ཙ ཡ་སོ, ཏཱ་ནི ཙ པཱ་དེ་སུ ཙ་ཀྐ་ར་ཏ་ནཱ་ནི;
ས་བྦཾ ཏ་མ་ནྟ་ར་ཧི་ཏཾ [ས་མ་ནྟ་ར་ཧི་ཏཾ (སཱི. སྱཱ. ཀ.)], ན་ནུ རི་ཏྟཱ ས་བྦ་ས་ངྑཱ་རཱ [ས་བྦ་ས་ངྑཱ་རཱ་ཏི (ས་བྦ་ཏྠ)].
༣༡. དཱི་པ་ངྐ་རོ ཛི་ནོ ས་ཏྠཱ, ན་ནྡཱ་རཱ་མ་མྷི ནི་བྦུ་ཏོ;
ཏ་ཏྠེ་ཝ་སྶ ཛི་ན་ཐཱུ་པོ, ཚ་ཏྟིཾ་སུ་བྦེ་དྷ་ཡོ་ཛ་ནོ་ཏི.
དཱི་པ་ངྐ་ར་སྶ བྷ་ག་ཝ་ཏོ ཝཾ་སོ པ་ཋ་མོ.