༢༨. བུ་དྡྷ་པ་ཀི་ཎྞ་ཀ་ཀ་ཎྜཾ
༡. ཨ་པ་རི་མེ་ཡྻི་ཏོ ཀ་པྤེ, ཙ་ཏུ་རོ ཨཱ་སུཾ ཝི་ནཱ་ཡ་ཀཱ;
ཏ་ཎྷ་ངྐ་རོ མེ་དྷ་ངྐ་རོ, ཨ་ཐོ་པི ས་ར་ཎ་ངྐ་རོ;
དཱི་པ་ངྐ་རོ ཙ ས་མྦུ་དྡྷོ, ཨེ་ཀ་ཀ་པྤ་མྷི ཏེ ཛི་ནཱ.
༢. དཱི་པ་ངྐ་ར་སྶ ཨ་པ་རེ་ན, ཀོ་ཎྜ་ཉྙོ ནཱ་མ ནཱ་ཡ་ཀོ;
ཨེ་ཀོ་ཝ ཨེ་ཀ་ཀ་པྤ་མྷི, ཏཱ་རེ་སི ཛ་ན་ཏཾ བ་ཧུཾ.
༣. དཱི་པ་ངྐ་ར་སྶ བྷ་ག་ཝ་ཏོ, ཀོ་ཎྜ་ཉྙ་སྶ ཙ ས་ཏྠུ་ནོ;
ཨེ་ཏེ་སཾ ཨ་ནྟ་རཱ ཀ་པྤཱ, ག་ཎ་ནཱ་ཏོ ཨ་ས་ངྑི་ཡཱ.
༤. ཀོ་ཎྜ་ཉྙ་སྶ ཨ་པ་རེ་ན, མ་ངྒ་ལོ ནཱ་མ ནཱ་ཡ་ཀོ;
ཏེ་ས་མྤི ཨ་ནྟ་རཱ ཀ་པྤཱ, ག་ཎ་ནཱ་ཏོ ཨ་ས་ངྑི་ཡཱ.
༥. མ་ངྒ་ལོ ཙ སུ་མ་ནོ ཙ, རེ་ཝ་ཏོ སོ་བྷི་ཏོ མུ་ནི;
ཏེ་པི བུ་དྡྷཱ ཨེ་ཀ་ཀ་པྤེ, ཙ་ཀྑུ་མ་ནྟོ པ་བྷ་ངྐ་རཱ.
༦. སོ་བྷི་ཏ་སྶ ཨ་པ་རེ་ན, ཨ་ནོ་མ་ད་སྶཱི མ་ཧཱ་ཡ་སོ;
ཏེ་ས་མྤི ཨ་ནྟ་རཱ ཀ་པྤཱ, ག་ཎ་ནཱ་ཏོ ཨ་ས་ངྑི་ཡཱ.
༧. ཨ་ནོ་མ་ད་སྶཱི པ་དུ་མོ, ནཱ་ར་དོ ཙཱ་པི ནཱ་ཡ་ཀོ;
ཏེ་པི བུ་དྡྷཱ ཨེ་ཀ་ཀ་པྤེ, ཏ་མ་ནྟ་ཀཱ་ར་ཀཱ མུ་ནཱི.
༨. ནཱ་ར་ད་སྶ ཨ་པ་རེ་ན, པ་དུ་མུ་ཏྟ་རོ ནཱ་མ ནཱ་ཡ་ཀོ;
ཨེ་ཀ་ཀ་པྤ་མྷི ཨུ་པྤ་ནྣོ, ཏཱ་རེ་སི ཛ་ན་ཏཾ བ་ཧུཾ.
༩. ནཱ་ར་ད་སྶ བྷ་ག་ཝ་ཏོ, པ་དུ་མུ་ཏྟ་ར་སྶ ས་ཏྠུ་ནོ;
ཏེ་ས་མྤི ཨ་ནྟ་རཱ ཀ་པྤཱ, ག་ཎ་ནཱ་ཏོ ཨ་ས་ངྑི་ཡཱ.
༡༠. ཀ་པྤ་ས་ཏ་ས་ཧ་སྶ་མྷི, ཨེ་ཀོ ཨཱ་སི མ་ཧཱ་མུ་ནི;
པ་དུ་མུ་ཏྟ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ.
༡༡. ཏིཾ་ས་ཀ་པྤ་ས་ཧ་སྶ་མྷི, དུ་ཝེ ཨཱ་སུཾ ཝི་ནཱ་ཡ་ཀཱ [ཨཱ་སིཾ་སུ ནཱ་ཡ་ཀཱ (སྱཱ. ཀ.)];
སུ་མེ་དྷོ ཙ སུ་ཛཱ་ཏོ ཙ, ཨོ་ར་ཏོ པ་དུ་མུ་ཏྟ་རཱ.
༡༢. ཨ་ཊྛཱ་ར་སེ ཀ་པྤ་ས་ཏེ, ཏ་ཡོ ཨཱ་སུཾ ཝི་ནཱ་ཡ་ཀཱ [ཨཱ་སིཾ་སུ ནཱ་ཡ་ཀཱ (སྱཱ. ཀ.)];
པི་ཡ་ད་སྶཱི ཨ་ཏྠ་ད་སྶཱི, དྷ་མྨ་ད་སྶཱི ཙ ནཱ་ཡ་ཀཱ.
༡༣. ཨོ་ར་ཏོ ཙ སུ་ཛཱ་ཏ་སྶ, ས་མྦུ་དྡྷཱ དྭི་པ་དུ་ཏྟ་མཱ;
ཨེ་ཀ་ཀ་པྤ་མྷི ཏེ བུ་དྡྷཱ, ལོ་ཀེ ཨ་པྤ་ཊི་པུ་གྒ་ལཱ.
༡༤. ཙ་ཏུ་ནྣ་ཝུ་ཏི་ཏོ ཀ་པྤེ, ཨེ་ཀོ ཨཱ་སི མ་ཧཱ་མུ་ནི;
སི་དྡྷ་ཏྠོ སོ ལོ་ཀ་ཝི་དཱུ, ས་ལླ་ཀ་ཏྟོ ཨ་ནུ་ཏྟ་རོ.
༡༥. དྭེ་ན་ཝུ་ཏེ ཨི་ཏོ ཀ་པྤེ, དུ་ཝེ ཨཱ་སུཾ ཝི་ནཱ་ཡ་ཀཱ;
ཏི་སྶོ ཕུ་སྶོ ཙ ས་མྦུ་དྡྷཱ, ཨ་ས་མཱ ཨ་པྤ་ཊི་པུ་གྒ་ལཱ.
༡༦. ཨེ་ཀ་ན་ཝུ་ཏི་ཏོ ཀ་པྤེ, ཝི་པ་སྶཱི ནཱ་མ ནཱ་ཡ་ཀོ;
སོ་པི བུ་དྡྷོ ཀཱ་རུ་ཎི་ཀོ, ས་ཏྟེ མོ་ཙེ་སི བ་ནྡྷ་ནཱ.
༡༧. ཨེ་ཀ་ཏིཾ་སེ ཨི་ཏོ ཀ་པྤེ, དུ་ཝེ ཨཱ་སུཾ ཝི་ནཱ་ཡ་ཀཱ;
སི་ཁཱི ཙ ཝེ་སྶ་བྷཱུ ཙེ་ཝ, ཨ་ས་མཱ ཨ་པྤ་ཊི་པུ་གྒ་ལཱ.
༡༨. ཨི་མ་མྷི བྷ་དྡ་ཀེ ཀ་པྤེ, ཏ་ཡོ ཨཱ་སུཾ ཝི་ནཱ་ཡ་ཀཱ;
ཀ་ཀུ་ས་ནྡྷོ ཀོ་ཎཱ་ག་མ་ནོ, ཀ་སྶ་པོ ཙཱ་པི ནཱ་ཡ་ཀོ.
༡༩. ཨ་ཧ་མེ་ཏ་ར་ཧི ས་མྦུ་དྡྷོ, མེ་ཏྟེ་ཡྻོ ཙཱ་པི ཧེ་སྶ་ཏི;
ཨེ་ཏེ་པི་མེ པ་ཉྩ བུ་དྡྷཱ, དྷཱི་རཱ ལོ་ཀཱ་ནུ་ཀ་མྤ་ཀཱ.
༢༠. ཨེ་ཏེ་སཾ དྷ་མྨ་རཱ་ཛཱུ་ནཾ, ཨ་ཉྙེ་སཾ་ནེ་ཀ་ཀོ་ཊི་ནཾ;
ཨཱ་ཙི་ཀྑི་ཏྭཱ་ན ཏཾ མ་གྒཾ, ནི་བྦུ་ཏཱ ཏེ ས་སཱ་ཝ་ཀཱ་ཏི.
བུ་དྡྷ་པ་ཀི་ཎྞ་ཀ་ཀ་ཎྜཾ ནི་ཊྛི་ཏཾ.