༢༤. ཀ་ཀུ་ས་ནྡྷ་བུ་དྡྷ་ཝཾ་སོ
༡. ཝེ་སྶ་བྷུ་སྶ ཨ་པ་རེ་ན, ས་མྦུ་དྡྷོ དྭི་པ་དུ་ཏྟ་མོ;
ཀ་ཀུ་ས་ནྡྷོ ནཱ་མ ནཱ་མེ་ན, ཨ་པྤ་མེ་ཡྻོ དུ་རཱ་ས་དོ.
༢. ཨུ་གྒྷཱ་ཊེ་ཏྭཱ ས་བྦ་བྷ་ཝཾ, ཙ་རི་ཡཱ་ཡ པཱ་ར་མིཾ ག་ཏོ;
སཱི་ཧོ་ཝ པ་ཉྫ་རཾ བྷེ་ཏྭཱ, པ་ཏྟོ ས་མྦོ་དྷི་མུ་ཏྟ་མཾ.
༣. དྷ་མྨ་ཙ་ཀྐཾ པ་ཝ་ཏྟེ་ནྟེ, ཀ་ཀུ་ས་ནྡྷེ ལོ་ཀ་ནཱ་ཡ་ཀེ;
ཙ་ཏྟཱ་རཱི་ས་ཀོ་ཊི་ས་ཧ་སྶཱ་ནཾ, དྷ་མྨཱ་བྷི་ས་མ་ཡོ ཨ་ཧུ.
༤. ཨ་ནྟ་ལི་ཀྑ་མྷི ཨཱ་ཀཱ་སེ, ཡ་མ་ཀཾ ཀ་ཏྭཱ ཝི་ཀུ་བྦ་ནཾ;
ཏིཾ་ས་ཀོ་ཊི་ས་ཧ་སྶཱ་ནཾ, བོ་དྷེ་སི དེ་ཝ་མཱ་ནུ་སེ.
༥. ན་ར་དེ་ཝ་སྶ ཡ་ཀྑ་སྶ, ཙ་ཏུ་ས་ཙྩ་པྤ་ཀཱ་ས་ནེ;
དྷ་མྨཱ་བྷི་ས་མ་ཡོ ཏ་སྶ, ག་ཎ་ནཱ་ཏོ ཨ་ས་ངྑི་ཡོ.
༦. ཀ་ཀུ་ས་ནྡྷ་སྶ བྷ་ག་ཝ་ཏོ, ཨེ་ཀོ ཨཱ་སི ས་མཱ་ག་མོ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༧. ཙ་ཏྟཱ་ལཱི་ས་ས་ཧ་སྶཱ་ནཾ, ཏ་དཱ ཨཱ་སི ས་མཱ་ག་མོ;
ད་ནྟ་བྷཱུ་མི་མ་ནུ་པྤ་ཏྟཱ་ནཾ, ཨཱ་ས་ཝཱ་རི་ག་ཎ་ཀྑ་ཡཱ.
༨. ཨ་ཧཾ ཏེ་ན ས་མ་ཡེ་ན, ཁེ་མོ ནཱ་མཱ་སི ཁ་ཏྟི་ཡོ;
ཏ་ཐཱ་ག་ཏེ ཛི་ན་པུ་ཏྟེ, དཱ་ནཾ ད་ཏྭཱ ཨ་ན་པྤ་ཀཾ.
༩. པ་ཏྟ་ཉྩ ཙཱི་ཝ་རཾ ད་ཏྭཱ, ཨ་ཉྫ་ནཾ མ་དྷུ་ལ་ཊྛི་ཀཾ;
ཨི་མེ་ཏཾ པ་ཏྠི་ཏཾ ས་བྦཾ, པ་ཊི་ཡཱ་དེ་མི ཝ་རཾ ཝ་རཾ.
༡༠. སོ་པི མཾ བུ་དྡྷོ བྱཱ་ཀཱ་སི, ཀ་ཀུ་ས་ནྡྷོ ཝི་ནཱ་ཡ་ཀོ;
‘‘ཨི་མ་མྷི བྷ་དྡ་ཀེ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༡. ‘‘ཨ་ཧུ ཀ་པི་ལ་ཝ྄ཧ་ཡཱ ར་མྨཱ…པེ… ཧེ་སྶཱ་མ ས་མྨུ་ཁཱ ཨི་མཾ’’.
༡༢. ཏ་སྶཱ་པི ཝ་ཙ་ནཾ སུ་ཏྭཱ, བྷི་ཡྻོ ཙི་ཏྟཾ པ་སཱ་ད་ཡིཾ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས་པཱ་ར་མི་པཱུ་རི་ཡཱ.
༡༣. ན་ག་རཾ ཁེ་མཱ་ཝ་ཏཱི ནཱ་མ, ཁེ་མོ ནཱ་མཱ་ས་ཧཾ ཏ་དཱ;
ས་བྦ་ཉྙུ་ཏཾ ག་ཝེ་ས་ནྟོ, པ་བྦ་ཛིཾ ཏ་སྶ ས་ནྟི་ཀེ.
༡༤. བྲཱ་ཧྨ་ཎོ ཨ་གྒི་ད་ཏྟོ ཙ, ཨཱ་སི བུ་དྡྷ་སྶ སོ པི་ཏཱ;
ཝི་སཱ་ཁཱ ནཱ་མ ཛ་ནི་ཀཱ, ཀ་ཀུ་ས་ནྡྷ་སྶ ས་ཏྠུ་ནོ.
༡༥. ཝ་ས་ཏེ ཏ་ཏྠ ཁེ་མེ པུ་རེ, ས་མྦུ་དྡྷ་སྶ མ་ཧཱ་ཀུ་ལཾ;
ན་རཱ་ནཾ པ་ཝ་རཾ སེ་ཊྛཾ, ཛཱ་ཏི་མ་ནྟཾ མ་ཧཱ་ཡ་སཾ.
༡༦. ཙ་ཏུ་ཝ་སྶ་ས་ཧ་སྶཱ་ནི, ཨ་གཱ་རཾ ཨ་ཛ྄ཛྷ སོ ཝ་སི;
ཀཱ་མ -ཀཱ་མ་ཝ་ཎྞ-ཀཱ་མ་སུ་དྡྷི་ནཱ་མཱ [སུ་ཙི སུ་རུ་ཙི ར་ཏི་ཝ་དྡྷ་ན་ནཱ་མ་ཀཱ (སཱི.)], ཏ་ཡོ པཱ་སཱ་ད་མུ་ཏྟ་མཱ.
༡༧. ས་མ་ཏིཾ་ས་ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
རོ་ཙི་ནཱི ནཱ་མ སཱ ནཱ་རཱི, ཨུ་ཏྟ་རོ ནཱ་མ ཨ་ཏྲ་ཛོ.
༡༨. ནི་མི་ཏྟེ ཙ་ཏུ་རོ དི་སྭཱ, ར་ཐ་ཡཱ་ནེ་ན ནི་ཀྑ་མི;
ཨ་ནཱུ་ན་ཨ་ཊྛ་མཱ་སཱ་ནི, པ་དྷཱ་ནཾ པ་ད་ཧཱི ཛི་ནོ.
༡༩. བྲ་ཧྨུ་ནཱ ཡཱ་ཙི་ཏོ ས་ནྟོ, ཀ་ཀུ་ས་ནྡྷོ ཝི་ནཱ་ཡ་ཀོ;
ཝ་ཏྟི ཙ་ཀྐཾ མ་ཧཱ་ཝཱི་རོ, མི་ག་དཱ་ཡེ ན་རུ་ཏྟ་མོ.
༢༠. ཝི་དྷུ་རོ ཙ ས་ཉྫཱི་ཝོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
བུ་དྡྷི་ཛོ ནཱ་མུ་པ་ཊྛཱ་ཀོ, ཀ་ཀུ་ས་ནྡྷ་སྶ ས་ཏྠུ་ནོ.
༢༡. སཱ་མཱ ཙ ཙ་མྤཱ་ནཱ་མཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, སི་རཱི་སོ་ཏི པ་ཝུ་ཙྩ་ཏི.
༢༢. ཨ་ཙྩུ་ཏོ ཙ སུ་མ་ནོ ཙ, ཨ་ཧེ་སུཾ ཨ་གྒུ་པ་ཊྛ་ཀཱ;
ན་ནྡཱ ཙེ་ཝ སུ་ན་ནྡཱ ཙ, ཨ་ཧེ་སུཾ ཨ་གྒུ་པ་ཊྛི་ཀཱ.
༢༣. ཙ་ཏྟཱ་ལཱི་ས་ར་ཏ་ནཱ་ནི, ཨ་ཙྩུ་གྒ་ཏོ མ་ཧཱ་མུ་ནི;
ཀ་ན་ཀ་པྤ་བྷཱ ནི་ཙྪ་ར་ཏི, ས་མ་ནྟཱ ད་ས་ཡོ་ཛ་ནཾ.
༢༤. ཙ་ཏྟཱ་ལཱི་ས་ཝ་སྶ་ས་ཧ་སྶཱ་ནི, ཨཱ་ཡུ ཏ་སྶ མ་ཧེ་སི་ནོ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༢༥. དྷ་མྨཱ་པ་ཎཾ པ་སཱ་རེ་ཏྭཱ, ན་ར་ནཱ་རཱི་ནཾ ས་དེ་ཝ་ཀེ;
ན་དི་ཏྭཱ སཱི་ཧ་ནཱ་དཾ་ཝ, ནི་བྦུ་ཏོ སོ ས་སཱ་ཝ་ཀོ.
༢༦. ཨ་ཊྛ་ངྒ་ཝ་ཙ་ན་ས་མྤ་ནྣོ, ཨ་ཙྪི་དྡཱ་ནི ནི་ར་ནྟ་རཾ;
ས་བྦཾ ཏ་མ་ནྟ་ར་ཧི་ཏཾ, ན་ནུ རི་ཏྟཱ ས་བྦ་ས་ངྑཱ་རཱ.
༢༧. ཀ་ཀུ་ས་ནྡྷོ ཛི་ན་ཝ་རོ, ཁེ་མཱ་རཱ་མ་མྷི ནི་བྦུ་ཏོ;
ཏ་ཏྠེ་ཝ་སྶ ཐཱུ་པ་ཝ་རོ, གཱ་ཝུ་ཏཾ ན་བྷ་མུ་གྒ་ཏོ་ཏི.
ཀ་ཀུ་ས་ནྡྷ་སྶ བྷ་ག་ཝ་ཏོ ཝཾ་སོ དྭཱ་ཝཱི་ས་ཏི་མོ.