༢༢. སི་ཁཱི་བུ་དྡྷ་ཝཾ་སོ
༡. ཝི་པ་སྶི་སྶ ཨ་པ་རེ་ན, ས་མྦུ་དྡྷོ དྭི་པ་དུ་ཏྟ་མོ;
སི་ཁི་ཝ྄ཧ་ཡོ ཨཱ་སི ཛི་ནོ, ཨ་ས་མོ ཨ་པྤ་ཊི་པུ་གྒ་ལོ.
༢. མཱ་ར་སེ་ནཾ པ་མ་དྡི་ཏྭཱ, པ་ཏྟོ ས་མྦོ་དྷི་མུ་ཏྟ་མཾ;
དྷ་མྨ་ཙ་ཀྐཾ པ་ཝ་ཏྟེ་སི, ཨ་ནུ་ཀ་མྤཱ་ཡ པཱ་ཎི་ནཾ.
༣. དྷ་མྨ་ཙ་ཀྐཾ པ་ཝ་ཏྟེ་ནྟེ, སི་ཁི་མྷི ཛི་ན་པུ་ངྒ་ཝེ [མུ་ནི་པུ་ངྒ་ཝེ (སཱི.)];
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མཱ་བྷི་ས་མ་ཡོ ཨ་ཧུ.
༤. ཨ་པ་ར་མྤི དྷ་མྨཾ དེ་སེ་ནྟེ, ག་ཎ་སེ་ཊྛེ ན་རུ་ཏྟ་མེ;
ན་ཝུ་ཏི་ཀོ་ཊི་ས་ཧ་སྶཱ་ནཾ, དུ་ཏི་ཡཱ་བྷི་ས་མ་ཡོ ཨ་ཧུ.
༥. ཡ་མ་ཀ་པཱ་ཊི་ཧཱ་རི་ཡ་ཉྩ [ཡ་མ་ཀཾ པཱ་ཊི་ཧཱི་ར་ཉྩ (སཱི.)], ད་སྶ་ཡ་ནྟེ ས་དེ་ཝ་ཀེ;
ཨ་སཱི་ཏི་ཀོ་ཊི་ས་ཧ་སྶཱ་ནཾ, ཏ་ཏི་ཡཱ་བྷི་ས་མ་ཡོ ཨ་ཧུ.
༦. ས་ནྣི་པཱ་ཏཱ ཏ་ཡོ ཨཱ་སུཾ, སི་ཁི་སྶཱ་པི མ་ཧེ་སི་ནོ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༧. བྷི་ཀྑུ་ས་ཏ་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ;
ཨ་སཱི་ཏི་བྷི་ཀྑུ་ས་ཧ་སྶཱ་ནཾ, དུ་ཏི་ཡོ ཨཱ་སི ས་མཱ་ག་མོ.
༨. ས་ཏྟ་ཏི་བྷི་ཀྑུ་ས་ཧ་སྶཱ་ནཾ, ཏ་ཏི་ཡོ ཨཱ་སི ས་མཱ་ག་མོ;
ཨ་ནུ་པ་ལི་ཏྟོ པ་དུ་མཾ་ཝ, ཏོ་ཡ་མྷི ས་མྤ་ཝ་ཌྜྷི་ཏཾ.
༩. ཨ་ཧཾ ཏེ་ན ས་མ་ཡེ་ན, ཨ་རི་ནྡ་མོ ནཱ་མ ཁ་ཏྟི་ཡོ;
ས་མྦུ་དྡྷ་པྤ་མུ་ཁཾ ས་ངྒྷཾ, ཨ་ནྣ་པཱ་ནེ་ན ཏ་པྤ་ཡིཾ.
༡༠. བ་ཧུཾ དུ་སྶ་ཝ་རཾ ད་ཏྭཱ, དུ་སྶ་ཀོ་ཊིཾ ཨ་ན་པྤ་ཀཾ;
ཨ་ལ་ངྐ་ཏཾ ཧ་ཏྠི་ཡཱ་ནཾ, ས་མྦུ་དྡྷ་སྶ ཨ་དཱ་ས་ཧཾ.
༡༡. ཧ་ཏྠི་ཡཱ་ནཾ ནི་མྨི་ནི་ཏྭཱ, ཀ་པྤི་ཡཾ ཨུ་པ་ནཱ་མ་ཡིཾ;
པཱུ་ར་ཡིཾ མཱ་ན་སཾ མ་ཡ྄ཧཾ, ནི་ཙྩཾ ད་ལ༹ྷ་མུ་པ་ཊྛི་ཏཾ.
༡༢. སོ་པི མཾ བུ་དྡྷོ བྱཱ་ཀཱ་སི, སི་ཁཱི ལོ་ཀ་གྒ་ནཱ་ཡ་ཀོ;
‘‘ཨེ་ཀ་ཏིཾ་སེ ཨི་ཏོ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༣. ‘‘ཨ་ཧུ ཀ་པི་ལ་ཝ྄ཧ་ཡཱ ར་མྨཱ…པེ… ཧེ་སྶཱ་མ ས་མྨུ་ཁཱ ཨི་མཾ’’.
༡༤. ཏ་སྶཱ་ཧཾ ཝ་ཙ་ནཾ སུ་ཏྭཱ, བྷི་ཡྻོ ཙི་ཏྟཾ པ་སཱ་ད་ཡིཾ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས་པཱ་ར་མི་པཱུ་རི་ཡཱ.
༡༥. ན་ག་རཾ ཨ་རུ་ཎ་ཝ་ཏཱི ནཱ་མ, ཨ་རུ་ཎོ ནཱ་མ ཁ་ཏྟི་ཡོ;
པ་བྷཱ་ཝ་ཏཱི ནཱ་མ ཛ་ནི་ཀཱ, སི་ཁི་སྶཱ་པི མ་ཧེ་སི་ནོ.
༡༦. ས་ཏྟ་ཝ་སྶ་ས་ཧ་སྶཱ་ནི, ཨ་གཱ་རཾ ཨ་ཛ྄ཛྷ སོ ཝ་སི;
སུ་ཙ་ནྡ་ཀོ གི་རི ཝ་ས་བྷོ [སུ་ཙ་ནྡོ གི་རི་ཝ་ཧ་ནོ (སཱི.)], ཏ་ཡོ པཱ་སཱ་ད་མུ་ཏྟ་མཱ.
༡༧. ཙ་ཏུ་ཝཱི་ས་ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
ས་བྦ་ཀཱ་མཱ ནཱ་མ ནཱ་རཱི, ཨ་ཏུ་ལོ ནཱ་མ ཨ་ཏྲ་ཛོ.
༡༨. ནི་མི་ཏྟེ ཙ་ཏུ་རོ དི་སྭཱ, ཧ་ཏྠི་ཡཱ་ནེ་ན ནི་ཀྑ་མི;
ཨ་ཊྛ་མཱ་སཾ པ་དྷཱ་ན་ཙཱ་རཾ, ཨ་ཙ་རཱི པུ་རི་སུ་ཏྟ་མོ.
༡༩. བྲ་ཧྨུ་ནཱ ཡཱ་ཙི་ཏོ ས་ནྟོ, སི་ཁཱི ལོ་ཀ་གྒ་ནཱ་ཡ་ཀོ;
ཝ་ཏྟི ཙ་ཀྐཾ མ་ཧཱ་ཝཱི་རོ, མི་ག་དཱ་ཡེ ན་རུ་ཏྟ་མོ.
༢༠. ཨ་བྷི་བྷཱུ ས་མྦྷ་ཝོ ཙེ་ཝ, ཨ་ཧེ་སུཾ ཨ་གྒ་སཱ་ཝ་ཀཱ;
ཁེ་མ་ངྐ་རོ ནཱ་མུ་པ་ཊྛཱ་ཀོ, སི་ཁི་སྶཱ་པི མ་ཧེ་སི་ནོ.
༢༡. ས་ཁི་ལཱ ཙ པ་དུ་མཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, པུ་ཎྜ་རཱི་ཀོ་ཏི ཝུ་ཙྩ་ཏི.
༢༢. སི་རི་ཝ་ཌྜྷོ ཙ ན་ནྡོ ཙ, ཨ་ཧེ་སུཾ ཨ་གྒུ་པ་ཊྛ་ཀཱ;
ཙི་ཏྟཱ ཙེ་ཝ སུ་གུ་ཏྟཱ ཙ, ཨ་ཧེ་སུཾ ཨ་གྒུ་པ་ཊྛི་ཀཱ.
༢༣. ཨུ་ཙྩ་ཏྟ་ནེ་ན སོ བུ་དྡྷོ, ས་ཏྟ་ཏི་ཧ་ཏྠ་མུ་གྒ་ཏོ;
ཀ་ཉྩ་ན་གྒྷི་ཡ་ས་ངྐཱ་སོ, དྭ་ཏྟིཾ་ས་ཝ་ར་ལ་ཀྑ་ཎོ.
༢༤. ཏ་སྶཱ་པི བྱཱ་མ་པྤ་བྷཱ ཀཱ་ཡཱ, དི་ཝཱ་ར་ཏྟིཾ ནི་ར་ནྟ་རཾ;
དི་སོ་དི་སཾ ནི་ཙྪ་ར་ནྟི, ཏཱི་ཎི་ཡོ་ཛ་ན་སོ པ་བྷཱ.
༢༥. ས་ཏྟ་ཏི་ཝ་སྶ་ས་ཧ་སྶཱ་ནི, ཨཱ་ཡུ ཏ་སྶ མ་ཧེ་སི་ནོ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༢༦. དྷ་མྨ་མེ་གྷཾ པ་ཝ་སྶེ་ཏྭཱ, ཏེ་མ་ཡི་ཏྭཱ ས་དེ་ཝ་ཀེ;
ཁེ་མ་ནྟཾ པཱ་པ་ཡི་ཏྭཱ་ན, ནི་བྦུ་ཏོ སོ ས་སཱ་ཝ་ཀོ.
༢༧. ཨ་ནུ་བྱ་ཉྫ་ན་ས་མྤ་ནྣཾ, དྭ་ཏྟིཾ་ས་ཝ་ར་ལ་ཀྑ་ཎཾ;
ས་བྦཾ ཏ་མ་ནྟ་ར་ཧི་ཏཾ, ན་ནུ རི་ཏྟཱ ས་བྦ་ས་ངྑཱ་རཱ.
༢༨. སི་ཁཱི མུ་ནི་ཝ་རོ བུ་དྡྷོ, ཨ་སྶཱ་རཱ་མ་མྷི ནི་བྦུ་ཏོ;
ཏ་ཏྠེ་ཝ་སྶ ཐཱུ་པ་ཝ་རོ, ཏཱི་ཎི་ཡོ་ཛ་ན་མུ་གྒ་ཏོ་ཏི.
སི་ཁི་སྶ བྷ་ག་ཝ་ཏོ ཝཾ་སོ ཝཱི་ས་ཏི་མོ.