༢༡. ཝི་པ་སྶཱི་བུ་དྡྷ་ཝཾ་སོ
༡. ཕུ་སྶ་སྶ ཙ ཨ་པ་རེ་ན, ས་མྦུ་དྡྷོ དྭི་པ་དུ་ཏྟ་མོ;
ཝི་པ་སྶཱི ནཱ་མ ནཱ་མེ་ན, ལོ་ཀེ ཨུ་པྤ་ཛྫི ཙ་ཀྑུ་མཱ.
༢. ཨ་ཝི་ཛྫཾ ས་བྦཾ པ་དཱ་ལེ་ཏྭཱ, པ་ཏྟོ ས་མྦོ་དྷི་མུ་ཏྟ་མཾ;
དྷ་མྨ་ཙ་ཀྐཾ པ་ཝ་ཏྟེ་ཏུཾ, པ་ཀྐཱ་མི བ་ནྡྷུ་མ་ཏཱི་པུ་རཾ.
༣. དྷ་མྨ་ཙ་ཀྐཾ པ་ཝ་ཏྟེ་ཏྭཱ, ཨུ་བྷོ བོ་དྷེ་སི ནཱ་ཡ་ཀོ;
ག་ཎ་ནཱ་ཡ ན ཝ་ཏྟ་བྦོ, པ་ཋ་མཱ་བྷི་ས་མ་ཡོ ཨ་ཧུ.
༤. པུ་ནཱ་པ་རཾ ཨ་མི་ཏ་ཡ་སོ, ཏ་ཏྠ ས་ཙྩཾ པ་ཀཱ་ས་ཡི;
ཙ་ཏུ་རཱ་སཱི་ཏི་ས་ཧ་སྶཱ་ནཾ, དུ་ཏི་ཡཱ་བྷི་ས་མ་ཡོ ཨ་ཧུ.
༥. ཙ་ཏུ་རཱ་སཱི་ཏི་ས་ཧ་སྶཱ་ནི, ས་མྦུ་དྡྷཾ ཨ་ནུ་པ་བྦ་ཛུཾ;
ཏེ་ས་མཱ་རཱ་མ་པ་ཏྟཱ་ནཾ, དྷ་མྨཾ དེ་སེ་སི ཙ་ཀྑུ་མཱ.
༦. ས་བྦཱ་ཀཱ་རེ་ན བྷཱ་ས་ཏོ, སུ་ཏྭཱ ཨུ་པ་ནི་སཱ་དི་ནོ [ཨུ་པ་ནི་སྶཱ ཛི་ནོ (སྱཱ. ཀཾ.)];
ཏེ་པི དྷ་མྨ་ཝ་རཾ ག་ནྟྭཱ, ཏ་ཏི་ཡཱ་བྷི་ས་མ་ཡོ ཨ་ཧུ.
༧. ས་ནྣི་པཱ་ཏཱ ཏ་ཡོ ཨཱ་སུཾ, ཝི་པ་སྶི་སྶ མ་ཧེ་སི་ནོ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༨. ཨ་ཊྛ་ས་ཊྛི་ས་ཏ་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ;
བྷི་ཀྑུ་ས་ཏ་ས་ཧ་སྶཱ་ནཾ, དུ་ཏི་ཡོ ཨཱ་སི ས་མཱ་ག་མོ.
༩. ཨ་སཱི་ཏི་བྷི་ཀྑུ་ས་ཧ་སྶཱ་ནཾ, ཏ་ཏི་ཡོ ཨཱ་སི ས་མཱ་ག་མོ;
ཏ་ཏྠ བྷི་ཀྑུ་ག་ཎ་མ་ཛ྄ཛྷེ, ས་མྦུ་དྡྷོ ཨ་ཏི་རོ་ཙ་ཏི.
༡༠. ཨ་ཧཾ ཏེ་ན ས་མ་ཡེ་ན, ནཱ་ག་རཱ་ཛཱ མ་ཧི་དྡྷི་ཀོ;
ཨ་ཏུ་ལོ ནཱ་མ ནཱ་མེ་ན, པུ་ཉྙ་ཝ་ནྟོ ཛུ་ཏི་ནྡྷ་རོ.
༡༡. ནེ་ཀཱ་ནཾ ནཱ་ག་ཀོ་ཊཱི་ནཾ, པ་རི་ཝཱ་རེ་ཏྭཱ་ན་ཧཾ ཏ་དཱ;
ཝ་ཛྫ་ནྟོ དི་བྦ་ཏུ་རི་ཡེ་ཧི, ལོ་ཀ་ཛེ་ཊྛཾ ཨུ་པཱ་ག་མིཾ.
༡༢. ཨུ་པ་ས་ངྐ་མི་ཏྭཱ ས་མྦུ་དྡྷཾ, ཝི་པ་སྶིཾ ལོ་ཀ་ནཱ་ཡ་ཀཾ;
མ་ཎི་མུ་ཏྟ་ར་ཏ་ན་ཁ་ཙི་ཏཾ, ས་བྦཱ་བྷ་ར་ཎ་ཝི་བྷཱུ་སི་ཏཾ;
ནི་མ་ནྟེ་ཏྭཱ དྷ་མྨ་རཱ་ཛ་སྶ, སུ་ཝ་ཎྞ་པཱི་ཋ་མ་དཱ་ས་ཧཾ.
༡༣. སོ་པི མཾ བུ་དྡྷོ བྱཱ་ཀཱ་སི, ས་ངྒྷ་མ་ཛ྄ཛྷེ ནི་སཱི་དི་ཡ;
‘‘ཨེ་ཀ་ན་ཝུ་ཏི་ཏོ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༤. ‘‘ཨ་ཧུ ཀ་པི་ལ་ཝ྄ཧ་ཡཱ ར་མྨཱ, ནི་ཀྑ་མི་ཏྭཱ ཏ་ཐཱ་ག་ཏོ;
པ་དྷཱ་ནཾ པ་ད་ཧི་ཏྭཱ་ན, ཀ་ཏྭཱ དུ་ཀྐ་ར་ཀཱ་རི་ཀཾ.
༡༥. ‘‘ཨ་ཛ་པཱ་ལ་རུ་ཀྑ་མཱུ་ལ་སྨིཾ, ནི་སཱི་དི་ཏྭཱ ཏ་ཐཱ་ག་ཏོ;
ཏ་ཏྠ པཱ་ཡཱ་སཾ པ་གྒ་ཡ྄ཧ, ནེ་ར་ཉྫ་ར་མུ་པེ་ཧི་ཏི.
༡༦. ‘‘ནེ་ར་ཉྫ་རཱ་ཡ ཏཱི་ར་མྷི, པཱ་ཡཱ་སཾ ཨ་ད སོ ཛི་ནོ;
པ་ཊི་ཡ་ཏྟ་ཝ་ར་མ་གྒེ་ན, བོ་དྷི་མཱུ་ལ་མུ་པེ་ཧི་ཏི.
༡༧. ‘‘ཏ་ཏོ པ་ད་ཀྑི་ཎཾ ཀ་ཏྭཱ, བོ་དྷི་མ་ཎྜཾ ཨ་ནུ་ཏྟ་རོ;
ཨ་སྶ་ཏྠ་མཱུ་ལེ ས་མྦོ་དྷིཾ, བུ་ཛ྄ཛྷི་སྶ་ཏི མ་ཧཱ་ཡ་སོ.
༡༨. ‘‘ཨི་མ་སྶ ཛ་ནི་ཀཱ མཱ་ཏཱ, མཱ་ཡཱ ནཱ་མ བྷ་ཝི་སྶ་ཏི;
པི་ཏཱ སུ་དྡྷོ་ད་ནོ ནཱ་མ, ཨ་ཡཾ ཧེ་སྶ་ཏི གོ་ཏ་མོ.
༡༩. ‘‘ཨ་ནཱ་ས་ཝཱ ཝཱི་ཏ་རཱ་གཱ, ས་ནྟ་ཙི་ཏྟཱ ས་མཱ་ཧི་ཏཱ;
ཀོ་ལི་ཏོ ཨུ་པ་ཏི་སྶོ ཙ, ཨ་གྒཱ ཧེ་སྶ་ནྟི སཱ་ཝ་ཀཱ;
ཨཱ་ན་ནྡོ ནཱ་མུ་པ་ཊྛཱ་ཀོ, ཨུ་པ་ཊྛི་སྶ་ཏི་མཾ ཛི་ནཾ.
༢༠. ‘‘ཁེ་མཱ ཨུ་པྤ་ལ་ཝ་ཎྞཱ ཙ, ཨ་གྒཱ ཧེ་སྶ་ནྟི སཱ་ཝི་ཀཱ;
ཨ་ནཱ་ས་ཝཱ ཝཱི་ཏ་རཱ་གཱ, ས་ནྟ་ཙི་ཏྟཱ ས་མཱ་ཧི་ཏཱ;
བོ་དྷི ཏ་སྶ བྷ་ག་ཝ་ཏོ, ཨ་སྶ་ཏྠོ་ཏི པ་ཝུ་ཙྩ་ཏི.
༢༡. ‘‘ཙི་ཏྟོ ཙ ཧ་ཏྠཱ་ལ༹་ཝ་ཀོ, ཨ་གྒཱ ཧེ་སྶ་ནྟུ་པ་ཊྛ་ཀཱ;
ན་ནྡ་མཱ་ཏཱ ཙ ཨུ་ཏྟ་རཱ, ཨ་གྒཱ ཧེ་སྶ་ནྟུ་པ་ཊྛི་ཀཱ;
ཨཱ་ཡུ ཝ་སྶ་ས་ཏཾ ཏ་སྶ, གོ་ཏ་མ་སྶ ཡ་ས་སྶི་ནོ.
༢༢. ‘‘ཨི་དཾ སུ་ཏྭཱ་ན ཝ་ཙ་ནཾ…པེ… ཧེ་སྶཱ་མ ས་མྨུ་ཁཱ ཨི་མཾ’’.
༢༣. ཏ་སྶཱ་ཧཾ ཝ་ཙ་ནཾ སུ་ཏྭཱ, བྷི་ཡྻོ ཙི་ཏྟཾ པ་སཱ་ད་ཡིཾ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས་པཱ་ར་མི་པཱུ་རི་ཡཱ.
༢༤. ན་ག་རཾ བ་ནྡྷུ་མ་ཏཱི ནཱ་མ, བ་ནྡྷུ་མཱ ནཱ་མ ཁ་ཏྟི་ཡོ;
མཱ་ཏཱ བ་ནྡྷུ་མ་ཏཱི ནཱ་མ, ཝི་པ་སྶི་སྶ མ་ཧེ་སི་ནོ.
༢༥. ཨ་ཊྛ་ཝ་སྶ་ས་ཧ་སྶཱ་ནི, ཨ་གཱ་རཾ ཨ་ཛ྄ཛྷ སོ ཝ་སི;
ན་ནྡོ སུ་ན་ནྡོ སི་རི་མཱ, ཏ་ཡོ པཱ་སཱ་ད་མུ་ཏྟ་མཱ.
༢༦. ཏི་ཙ་ཏྟཱ་རཱི་ས་ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
སུ་ད་སྶ་ནཱ ནཱ་མ སཱ ནཱ་རཱི, ས་མ་ཝ་ཏྟ་ཀྑ་ནྡྷོ ནཱ་མ ཨ་ཏྲ་ཛོ.
༢༧. ནི་མི་ཏྟེ ཙ་ཏུ་རོ དི་སྭཱ, ར་ཐ་ཡཱ་ནེ་ན ནི་ཀྑ་མི;
ཨ་ནཱུ་ན་ཨ་ཊྛ་མཱ་སཱ་ནི, པ་དྷཱ་ནཾ པ་ད་ཧཱི ཛི་ནོ.
༢༨. བྲ་ཧྨུ་ནཱ ཡཱ་ཙི་ཏོ ས་ནྟོ, ཝི་པ་སྶཱི ལོ་ཀ་ནཱ་ཡ་ཀོ;
ཝ་ཏྟི ཙ་ཀྐཾ མ་ཧཱ་ཝཱི་རོ, མི་ག་དཱ་ཡེ ན་རུ་ཏྟ་མོ.
༢༩. ཁ་ཎྜོ ཙ ཏི་སྶ་ནཱ་མོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
ཨ་སོ་ཀོ ནཱ་མུ་པ་ཊྛཱ་ཀོ, ཝི་པ་སྶི་སྶ མ་ཧེ་སི་ནོ.
༣༠. ཙ་ནྡཱ ཙ ཙ་ནྡ་མི་ཏྟཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, པཱ་ཊ་ལཱི་ཏི པ་ཝུ་ཙྩ་ཏི.
༣༡. པུ་ན་བྦ་སུ་མི་ཏྟོ ནཱ་གོ ཙ, ཨ་ཧེ་སུཾ ཨ་གྒུ་པ་ཊྛ་ཀཱ;
སི་རི་མཱ ཨུ་ཏྟ་རཱ ཙེ་ཝ, ཨ་ཧེ་སུཾ ཨ་གྒུ་པ་ཊྛི་ཀཱ.
༣༢. ཨ་སཱི་ཏི་ཧ་ཏྠ་མུ་བྦེ་དྷོ, ཝི་པ་སྶཱི ལོ་ཀ་ནཱ་ཡ་ཀོ;
པ་བྷཱ ནི་དྡྷཱ་ཝ་ཏི ཏ་སྶ, ས་མ་ནྟཱ ས་ཏྟ་ཡོ་ཛ་ནེ.
༣༣. ཨ་སཱི་ཏི་ཝ་སྶ་ས་ཧ་སྶཱ་ནི, ཨཱ་ཡུ བུ་དྡྷ་སྶ ཏཱ་ཝ་དེ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༣༤. བ་ཧུ་དེ་ཝ་མ་ནུ་སྶཱ་ནཾ, བ་ནྡྷ་ནཱ པ་རི་མོ་ཙ་ཡི;
མ་གྒཱ་མ་གྒ་ཉྩ ཨཱ་ཙི་ཀྑི, ཨ་ཝ་སེ་ས་པུ་ཐུ་ཛྫ་ནེ.
༣༥. ཨཱ་ལོ་ཀཾ ད་སྶ་ཡི་ཏྭཱ་ན, དེ་སེ་ཏྭཱ ཨ་མ་ཏཾ པ་དཾ;
ཛ་ལི་ཏྭཱ ཨ་གྒི་ཀྑ་ནྡྷོ་ཝ, ནི་བྦུ་ཏོ སོ ས་སཱ་ཝ་ཀོ.
༣༦. ཨི་དྡྷི་ཝ་རཾ པུ་ཉྙ་ཝ་རཾ, ལ་ཀྑ་ཎ་ཉྩ ཀུ་སུ་མི་ཏཾ;
ས་བྦཾ ཏ་མ་ནྟ་ར་ཧི་ཏཾ, ན་ནུ རི་ཏྟཱ ས་བྦ་ས་ངྑཱ་རཱ.
༣༧. ཝི་པ་སྶཱི ཛི་ན་ཝ་རོ བུ་དྡྷོ, སུ་མི་ཏྟཱ་རཱ་མ་མྷི ནི་བྦུ་ཏོ;
ཏ་ཏྠེ་ཝ་སྶ ཐཱུ་པ་ཝ་རོ, ས་ཏྟ་ཡོ་ཛ་ན་མུ་སྶི་ཏོ་ཏི.
ཝི་པ་སྶི་སྶ བྷ་ག་ཝ་ཏོ ཝཾ་སོ ཨེ་ཀཱུ་ན་ཝཱི་ས་ཏི་མོ.