༢. སུ་མེ་དྷ་པ་ཏྠ་ནཱ་ཀ་ཐཱ
༡. ཀ་པྤེ ཙ ས་ཏ་ས་ཧ་སྶེ, ཙ་ཏུ་རོ ཙ ཨ་ས་ངྑི་ཡེ;
ཨ་མ་རཾ ནཱ་མ ན་ག་རཾ, ད་སྶ་ནེ་ཡྻཾ མ་ནོ་ར་མཾ.
༢. ད་ས་ཧི ས་དྡེ་ཧི ཨ་ཝི་ཝི་ཏྟཾ, ཨ་ནྣ་པཱ་ན་ས་མཱ་ཡུ་ཏཾ;
ཧ་ཏྠི་ས་དྡཾ ཨ་སྶ་ས་དྡཾ, བྷེ་རི་ས་ངྑ་ར་ཐཱ་ནི ཙ;
ཁཱ་ད་ཐ པི་ཝ་ཐ ཙེ་ཝ, ཨ་ནྣ་པཱ་ནེ་ན གྷོ་སི་ཏཾ.
༣. ན་ག་རཾ ས་བྦ་ངྒ་ས་མྤ་ནྣཾ, ས་བྦ་ཀ་མྨ་མུ་པཱ་ག་ཏཾ;
ས་ཏྟ་ར་ཏ་ན་ས་མྤ་ནྣཾ, ནཱ་ནཱ་ཛ་ན་ས་མཱ་ཀུ་ལཾ;
ས་མི་དྡྷཾ དེ་ཝ་ན་ག་རཾ་ཝ, ཨཱ་ཝཱ་སཾ པུ་ཉྙ་ཀ་མྨི་ནཾ.
༤. ན་ག་རེ ཨ་མ་ར་ཝ་ཏི་ཡཱ, སུ་མེ་དྷོ ནཱ་མ བྲཱ་ཧྨ་ཎོ;
ཨ་ནེ་ཀ་ཀོ་ཊི་ས་ནྣི་ཙ་ཡོ, པ་ཧཱུ་ཏ་དྷ་ན་དྷ་ཉྙ་ཝཱ.
༥. ཨ་ཛ྄ཛྷཱ་ཡ་ཀོ མ་ནྟ་དྷ་རོ, ཏི་ཎྞཾ ཝེ་དཱ་ན པཱ་ར་གཱུ;
ལ་ཀྑ་ཎེ ཨི་ཏི་ཧཱ་སེ ཙ, ས་དྷ་མྨེ པཱ་ར་མིཾ ག་ཏོ.
༦. ར་ཧོ་ག་ཏོ ནི་སཱི་དི་ཏྭཱ, ཨེ་ཝཾ ཙི་ནྟེ་ས་ཧཾ ཏ་དཱ;
‘‘དུ་ཀྑོ པུ་ན་བྦྷ་ཝོ ནཱ་མ, ས་རཱི་ར་སྶ ཙ བྷེ་ད་ནཾ.
༧. ‘‘ཛཱ་ཏི་དྷ་མྨོ ཛ་རཱ་དྷ་མྨོ, བྱཱ་དྷི་དྷ་མྨོ ས་ཧཾ [ཙ་ཧཾ (སཱི. སྱཱ.)] ཏ་དཱ;
ཨ་ཛ་རཾ ཨ་མ་ཏཾ ཁེ་མཾ, པ་རི་ཡེ་སི་སྶཱ་མི ནི་བྦུ་ཏིཾ.
༨. ‘‘ཡཾ་ནཱུ་ནི་མཾ པཱུ་ཏི་ཀཱ་ཡཾ, ནཱ་ནཱ་ཀུ་ཎ་པ་པཱུ་རི་ཏཾ;
ཚ་ཌྜ་ཡི་ཏྭཱ་ན ག་ཙྪེ་ཡྻཾ, ཨ་ན་པེ་ཀྑོ ཨ་ན་ཏྠི་ཀོ.
༩. ‘‘ཨ་ཏྠི ཧེ་ཧི་ཏི སོ མ་གྒོ, ན སོ ས་ཀྐཱ ན ཧེ་ཏུ་ཡེ;
པ་རི་ཡེ་སི་སྶཱ་མི ཏཾ མ་གྒཾ, བྷ་ཝ་ཏོ པ་རི་མུ་ཏྟི་ཡཱ.
༡༠. ‘‘ཡ་ཐཱ་པི དུ་ཀྑེ ཝི་ཛྫ་ནྟེ, སུ་ཁཾ ནཱ་མ་པི ཝི་ཛྫ་ཏི;
ཨེ་ཝཾ བྷ་ཝེ ཝི་ཛྫ་མཱ་ནེ, ཝི་བྷ་ཝོ་པི ཨི་ཙྪི་ཏ་བྦ་ཀོ.
༡༡. ‘‘ཡ་ཐཱ་པི ཨུ་ཎྷེ ཝི་ཛྫ་ནྟེ, ཨ་པ་རཾ ཝི་ཛྫ་ཏི སཱི་ཏ་ལཾ;
ཨེ་ཝཾ ཏི་ཝི་དྷ་གྒི ཝི་ཛྫ་ནྟེ, ནི་བྦཱ་ནཾ ཨི་ཙྪི་ཏ་བྦ་ཀཾ.
༡༢. ‘‘ཡ་ཐཱ་པི པཱ་པེ ཝི་ཛྫ་ནྟེ, ཀ་ལྱཱ་ཎ་མ་པི ཝི་ཛྫ་ཏི;
ཨེ་ཝ་མེ་ཝ ཛཱ་ཏི ཝི་ཛྫ་ནྟེ, ཨ་ཛཱ་ཏི་པི་ཙྪི་ཏ་བྦ་ཀཾ.
༡༣. ‘‘ཡ་ཐཱ གཱུ་ཐ་ག་ཏོ པུ་རི་སོ, ཏ་ལཱ༹་ཀཾ དི་སྭཱ་ན པཱུ་རི་ཏཾ;
ན ག་ཝེ་ས་ཏི ཏཾ ཏ་ལཱ༹་ཀཾ, ན དོ་སོ ཏ་ལཱ༹་ཀ་སྶ སོ.
༡༤. ‘‘ཨེ་ཝཾ ཀི་ལེ་ས་མ་ལ་དྷོ་ཝ, ཝི་ཛྫ་ནྟེ ཨ་མ་ཏ་ནྟ་ལེ༹;
ན ག་ཝེ་ས་ཏི ཏཾ ཏ་ལཱ༹་ཀཾ, ན དོ་སོ ཨ་མ་ཏ་ནྟ་ལེ༹.
༡༥. ‘‘ཡ་ཐཱ ཨ་རཱི་ཧི པ་རི་རུ་དྡྷོ, ཝི་ཛྫ་ནྟེ ག་མ་ན་མྤ་ཐེ;
ན པ་ལཱ་ཡ་ཏི སོ པུ་རི་སོ, ན དོ་སོ ཨ་ཉྫ་ས་སྶ སོ.
༡༦. ‘‘ཨེ་ཝཾ ཀི་ལེ་ས་པ་རི་རུ་དྡྷོ, ཝི་ཛྫ་མཱ་ནེ སི་ཝེ པ་ཐེ;
ན ག་ཝེ་ས་ཏི ཏཾ མ་གྒཾ, ན དོ་སོ སི་ཝ་མ་ཉྫ་སེ.
༡༧. ‘‘ཡ་ཐཱ་པི བྱཱ་དྷི་ཏོ པུ་རི་སོ, ཝི་ཛྫ་མཱ་ནེ ཏི་ཀི་ཙྪ་ཀེ;
ན ཏི་ཀི་ཙྪཱ་པེ་ཏི ཏཾ བྱཱ་དྷིཾ, ན དོ་སོ སོ ཏི་ཀི་ཙྪ་ཀེ.
༡༨. ‘‘ཨེ་ཝཾ ཀི་ལེ་ས་བྱཱ་དྷཱི་ཧི, དུ་ཀྑི་ཏོ པ་རི་པཱི་ལི༹་ཏོ;
ན ག་ཝེ་ས་ཏི ཏཾ ཨཱ་ཙ་རི་ཡཾ, ན དོ་སོ སོ ཝི་ནཱ་ཡ་ཀེ.
༡༩. ‘‘ཡ་ཐཱ་པི ཀུ་ཎ་པཾ པུ་རི་སོ, ཀ་ཎྛེ བ་ནྡྷཾ ཛི་གུ་ཙྪི་ཡ;
མོ་ཙ་ཡི་ཏྭཱ་ན ག་ཙྪེ་ཡྻ, སུ་ཁཱི སེ་རཱི ས་ཡཾ་ཝ་སཱི.
༢༠. ‘‘ཏ་ཐེ་ཝི་མཾ པཱུ་ཏི་ཀཱ་ཡཾ, ནཱ་ནཱ་ཀུ་ཎ་པ་ས་ཉྩ་ཡཾ;
ཚ་ཌྜ་ཡི་ཏྭཱ་ན ག་ཙྪེ་ཡྻཾ, ཨ་ན་པེ་ཀྑོ ཨ་ན་ཏྠི་ཀོ.
༢༡. ‘‘ཡ་ཐཱ ཨུ་ཙྩཱ་ར་ཊྛཱ་ན་མྷི, ཀ་རཱི་སཾ ན་ར་ནཱ་རི་ཡོ;
ཚ་ཌྜ་ཡི་ཏྭཱ་ན ག་ཙྪ་ནྟི, ཨ་ན་པེ་ཀྑཱ ཨ་ན་ཏྠི་ཀཱ.
༢༢. ‘‘ཨེ་ཝ་མེ་ཝཱ་ཧཾ ཨི་མཾ ཀཱ་ཡཾ, ནཱ་ནཱ་ཀུ་ཎ་པ་པཱུ་རི་ཏཾ;
ཚ་ཌྜ་ཡི་ཏྭཱ་ན ག་ཙྪི་སྶཾ, ཝ་ཙྩཾ ཀ་ཏྭཱ ཡ་ཐཱ ཀུ་ཊིཾ.
༢༣. ‘‘ཡ་ཐཱ་པི ཛ་ཛྫ་རཾ ནཱ་ཝཾ, པ་ལུ་གྒཾ ཨུ་ད་གཱ་ཧི་ནིཾ [ཨུ་ད་ཀ་གཱ་ཧི་ཎིཾ (སཱི.), ཨུ་ད་ཀ་གཱ་ཧི་ནིཾ (སྱཱ.)];
སཱ་མཱི ཚ་ཌྜེ་ཏྭཱ ག་ཙྪ་ནྟི, ཨ་ན་པེ་ཀྑཱ ཨ་ན་ཏྠི་ཀཱ.
༢༤. ‘‘ཨེ་ཝ་མེ་ཝཱ་ཧཾ ཨི་མཾ ཀཱ་ཡཾ, ན་ཝ་ཙྪི་དྡཾ དྷུ་ཝ་སྶ་ཝཾ;
ཚ་ཌྜ་ཡི་ཏྭཱ་ན ག་ཙྪི་སྶཾ, ཛི་ཎྞ་ནཱ་ཝཾ་ཝ སཱ་མི་ཀཱ.
༢༥. ‘‘ཡ་ཐཱ་པི པུ་རི་སོ ཙོ་རེ་ཧི, ག་ཙྪ་ནྟོ བྷ་ཎྜ་མཱ་དི་ཡ;
བྷ་ཎྜ་ཙྪེ་ད་བྷ་ཡཾ དི་སྭཱ, ཚ་ཌྜ་ཡི་ཏྭཱ་ན ག་ཙྪ་ཏི.
༢༦. ‘‘ཨེ་ཝ་མེ་ཝ ཨ་ཡཾ ཀཱ་ཡོ, མ་ཧཱ་ཙོ་ར་ས་མོ ཝི་ཡ;
པ་ཧཱ་ཡི་མཾ ག་མི་སྶཱ་མི, ཀུ་ས་ལ་ཙྪེ་ད་ནཱ བྷ་ཡཱ’’.
༢༧. ཨེ་ཝཱ་ཧཾ ཙི་ནྟ་ཡི་ཏྭཱ་ན, ནེ་ཀ་ཀོ་ཊི་ས་ཏཾ དྷ་ནཾ;
ནཱ་ཐཱ་ནཱ་ཐཱ་ནཾ ད་ཏྭཱ་ན, ཧི་མ་ཝ་ནྟ་མུ་པཱ་ག་མིཾ.
༢༨. ཧི་མ་ཝ་ནྟ་སྶཱ་ཝི་དཱུ་རེ, དྷ་མྨི་ཀོ ནཱ་མ པ་བྦ་ཏོ;
ཨ་སྶ་མོ སུ་ཀ་ཏོ མ་ཡ྄ཧཾ, པ་ཎྞ་སཱ་ལཱ སུ་མཱ་པི་ཏཱ.
༢༩. ཙ་ངྐ་མཾ ཏ་ཏྠ མཱ་པེ་སིཾ, པ་ཉྩ་དོ་ས་ཝི་ཝ་ཛྫི་ཏཾ;
ཨ་ཊྛ་གུ་ཎ་ས་མཱུ་པེ་ཏཾ, ཨ་བྷི་ཉྙཱ་བ་ལ་མཱ་ཧ་རིཾ.
༣༠. སཱ་ཊ་ཀཾ པ་ཛ་ཧིཾ ཏ་ཏྠ, ན་ཝ་དོ་ས་མུ་པཱ་ག་ཏཾ;
ཝཱ་ཀ་ཙཱི་རཾ ནི་ཝཱ་སེ་སིཾ, དྭཱ་ད་ས་གུ་ཎ་མུ་པཱ་ག་ཏཾ.
༣༡. ཨ་ཊྛ་དོ་ས་ས་མཱ་ཀི་ཎྞཾ, པ་ཛ་ཧིཾ པ་ཎྞ་སཱ་ལ་ཀཾ;
ཨུ་པཱ་ག་མིཾ རུ་ཀྑ་མཱུ་ལཾ, གུ་ཎེ ད་ས་ཧུ་པཱ་ག་ཏཾ.
༣༢. ཝཱ་པི་ཏཾ རོ་པི་ཏཾ དྷ་ཉྙཾ, པ་ཛ་ཧིཾ ནི་ར་ཝ་སེ་ས་ཏོ;
ཨ་ནེ་ཀ་གུ་ཎ་ས་མྤ་ནྣཾ, པ་ཝ་ཏྟ་ཕ་ལ་མཱ་དི་ཡིཾ.
༣༣. ཏ་ཏྠ་པྤ་དྷཱ་ནཾ པ་ད་ཧིཾ, ནི་ས་ཛྫ་ཊྛཱ་ན་ཙ་ངྐ་མེ;
ཨ་བྦྷ་ནྟ་ར་མྷི ས་ཏྟཱ་ཧེ, ཨ་བྷི་ཉྙཱ་བ་ལ་པཱ་པུ་ཎིཾ.
༣༤. ཨེ་ཝཾ མེ སི་དྡྷི་པྤ་ཏྟ་སྶ, ཝ་སཱི་བྷཱུ་ཏ་སྶ སཱ་ས་ནེ;
དཱི་པ་ངྐ་རོ ནཱ་མ ཛི་ནོ, ཨུ་པྤ་ཛྫི ལོ་ཀ་ནཱ་ཡ་ཀོ.
༣༥. ཨུ་པྤ་ཛྫ་ནྟེ ཙ ཛཱ་ཡ་ནྟེ, བུ་ཛ྄ཛྷ་ནྟེ དྷ་མྨ་དེ་ས་ནེ;
ཙ་ཏུ་རོ ནི་མི་ཏྟེ ནཱ་དྡ་སཾ, ཛྷཱ་ན་ར་ཏི་ས་མ་པྤི་ཏོ.
༣༦. པ་ཙྩ་ནྟ་དེ་ས་ཝི་ས་ཡེ, ནི་མ་ནྟེ་ཏྭཱ ཏ་ཐཱ་ག་ཏཾ;
ཏ་སྶ ཨཱ་ག་མ་ནཾ མ་གྒཾ, སོ་དྷེ་ནྟི ཏུ་ཊྛ་མཱ་ན་སཱ.
༣༧. ཨ་ཧཾ ཏེ་ན ས་མ་ཡེ་ན, ནི་ཀྑ་མི་ཏྭཱ ས་ཀ་སྶ་མཱ;
དྷུ་ན་ནྟོ ཝཱ་ཀ་ཙཱི་རཱ་ནི, ག་ཙྪཱ་མི ཨ་མྦ་རེ ཏ་དཱ.
༣༨. ཝེ་ད་ཛཱ་ཏཾ ཛ་ནཾ དི་སྭཱ, ཏུ་ཊྛ་ཧ་ཊྛཾ པ་མོ་དི་ཏཾ;
ཨོ་རོ་ཧི་ཏྭཱ་ན ག་ག་ནཱ, མ་ནུ་སྶེ པུ་ཙྪི ཏཱ་ཝ་དེ.
༣༩. ‘‘ཏུ་ཊྛ་ཧ་ཊྛོ པ་མུ་དི་ཏོ, ཝེ་ད་ཛཱ་ཏོ མ་ཧཱ་ཛ་ནོ;
ཀ་སྶ སོ་དྷཱི་ཡ་ཏི མ་གྒོ, ཨ་ཉྫ་སཾ ཝ་ཊུ་མཱ་ཡ་ནཾ’’.
༤༠. ཏེ མེ པུ་ཊྛཱ ཝི་ཡཱ་ཀཾ་སུ, ‘‘བུ་དྡྷོ ལོ་ཀེ ཨ་ནུ་ཏྟ་རོ;
དཱི་པ་ངྐ་རོ ནཱ་མ ཛི་ནོ, ཨུ་པྤ་ཛྫི ལོ་ཀ་ནཱ་ཡ་ཀོ;
ཏ་སྶ སོ་དྷཱི་ཡ་ཏི མ་གྒོ, ཨ་ཉྫ་སཾ ཝ་ཊུ་མཱ་ཡ་ནཾ’’.
༤༡. བུ་དྡྷོ་ཏི་ཝ་ཙ་ནཾ [བུ་དྡྷོ་ཏི མ་མ (སཱི. སྱཱ. ཀ.)] སུ་ཏྭཱ་ན, པཱི་ཏི ཨུ་པྤ་ཛྫི ཏཱ་ཝ་དེ;
བུ་དྡྷོ བུ་དྡྷོ་ཏི ཀ་ཐ་ཡ་ནྟོ, སོ་མ་ན་སྶཾ པ་ཝེ་ད་ཡིཾ.
༤༢. ཏ་ཏྠ ཋ་ཏྭཱ ཝི་ཙི་ནྟེ་སིཾ, ཏུ་ཊྛོ སཾ་ཝི་གྒ་མཱ་ན་སོ;
‘‘ཨི་དྷ བཱི་ཛཱ་ནི རོ་པི་སྶཾ, ཁ་ཎོ ཝེ མཱ ཨུ་པ་ཙྩ་གཱ.
༤༣. ‘‘ཡ་དི བུ་དྡྷ་སྶ སོ་དྷེ་ཐ, ཨེ་ཀོ་ཀཱ་སཾ ད་དཱ་ཐ མེ;
ཨ་ཧ་མྤི སོ་དྷ་ཡི་སྶཱ་མི, ཨ་ཉྫ་སཾ ཝ་ཊུ་མཱ་ཡ་ནཾ’’.
༤༤. ཨ་དཾ་སུ ཏེ མ་མོ་ཀཱ་སཾ, སོ་དྷེ་ཏུཾ ཨ་ཉྫ་སཾ ཏ་དཱ;
བུ་དྡྷོ བུ་དྡྷོ་ཏི ཙི་ནྟེ་ནྟོ, མ་གྒཾ སོ་དྷེ་མ་ཧཾ ཏ་དཱ.
༤༥. ཨ་ནི་ཊྛི་ཏེ མ་མོ་ཀཱ་སེ, དཱི་པ་ངྐ་རོ མ་ཧཱ་མུ་ནི;
ཙ་ཏཱུ་ཧི ས་ཏ་ས་ཧ་སྶེ་ཧི, ཚ་ལ༹་བྷི་ཉྙེ་ཧི ཏཱ་དི་ཧི;
ཁཱི་ཎཱ་ས་ཝེ་ཧི ཝི་མ་ལེ་ཧི, པ་ཊི་པ་ཛྫི ཨ་ཉྫ་སཾ ཛི་ནོ.
༤༦. པ་ཙྩུ་གྒ་མ་ནཱ ཝ་ཏྟ་ནྟི, ཝ་ཛྫ་ནྟི བྷེ་རི་ཡོ བ་ཧཱུ;
ཨཱ་མོ་དི་ཏཱ ན་ར་མ་རཱུ, སཱ་དྷུ་ཀཱ་རཾ པ་ཝ་ཏྟ་ཡུཾ.
༤༧. དེ་ཝཱ མ་ནུ་སྶེ པ་སྶ་ནྟི, མ་ནུ་སྶཱ་པི ཙ དེ་ཝ་ཏཱ;
ཨུ་བྷོ་པི ཏེ པ་ཉྫ་ལི་ཀཱ, ཨ་ནུ་ཡ་ནྟི ཏ་ཐཱ་ག་ཏཾ.
༤༨. དེ་ཝཱ དི་བྦེ་ཧི ཏུ་རི་ཡེ་ཧི, མ་ནུ་སྶཱ མཱ་ནུ་སེ་ཧི ཙ [མཱ་ནུ་སྶ་ཀེ་ཧི ཙ མཱ་ནུ་ས་ཀེ་ཧི ཙ (སྱཱ. ཀ.)];
ཨུ་བྷོ་པི ཏེ ཝ་ཛྫ་ཡ་ནྟཱ, ཨ་ནུ་ཡ་ནྟི ཏ་ཐཱ་ག་ཏཾ.
༤༩. དི་བྦཾ མ་ནྡཱ་ར་ཝཾ པུ་པྥཾ, པ་དུ་མཾ པཱ་རི་ཚ་ཏྟ་ཀཾ;
དི་སོ་དི་སཾ ཨོ་ཀི་ར་ནྟི, ཨཱ་ཀཱ་ས་ན་བྷ་ག་ཏཱ མ་རཱུ.
༥༠. དི་བྦཾ ཙ་ནྡ་ན་ཙུ་ཎྞ་ཉྩ, ཝ་ར་ག་ནྡྷ་ཉྩ ཀེ་ཝ་ལཾ;
དི་སོ་དི་སཾ ཨོ་ཀི་ར་ནྟི, ཨཱ་ཀཱ་ས་ན་བྷ་ག་ཏཱ [ཨཱ་ཀཱ་སེ ན་བྷ་གཱ (སྱཱ.)] མ་རཱུ.
༥༡. ཙ་མྤ་ཀཾ ས་ར་ལཾ ནཱི་པཾ, ནཱ་ག་པུ་ནྣཱ་ག་ཀེ་ཏ་ཀཾ;
དི་སོ་དི་སཾ ཨུ་ཀྑི་པ་ནྟི, བྷཱུ་མི་ཏ་ལ་ག་ཏཱ ན་རཱ.
༥༢. ཀེ་སེ མུ་ཉྩི་ཏྭཱ་ཧཾ ཏ་ཏྠ, ཝཱ་ཀ་ཙཱི་ར་ཉྩ ཙ་མྨ་ཀཾ;
ཀ་ལ་ལེ པ་ཏྠ་རི་ཏྭཱ་ན, ཨ་ཝ་ཀུ་ཛྫོ ནི་པ་ཛྫ་ཧཾ.
༥༣. ‘‘ཨ་ཀྐ་མི་ཏྭཱ་ན མཾ བུ་དྡྷོ, ས་ཧ སི་སྶེ་ཧི ག་ཙྪ་ཏུ;
མཱ ནཾ ཀ་ལ་ལེ ཨ་ཀྐ་མི་ཏྠ, ཧི་ཏཱ་ཡ མེ བྷ་ཝི་སྶ་ཏི’’.
༥༤. པ་ཐ་ཝི་ཡཾ ནི་པ་ནྣ་སྶ, ཨེ་ཝཾ མེ ཨཱ་སི ཙེ་ཏ་སོ;
‘‘ཨི་ཙྪ་མཱ་ནོ ཨ་ཧཾ ཨ་ཛྫ, ཀི་ལེ་སེ ཛྷཱ་པ་ཡེ མ་མ.
༥༥. ‘‘ཀིཾ མེ ཨ་ཉྙཱ་ཏ་ཝེ་སེ་ན, དྷ་མྨཾ ས་ཙྪི་ཀ་ཏེ་ནི་དྷ;
ས་བྦ་ཉྙུ་ཏཾ པཱ་པུ་ཎི་ཏྭཱ, བུ་དྡྷོ ཧེ་སྶཾ ས་དེ་ཝ་ཀེ.
༥༦. ‘‘ཀིཾ མེ ཨེ་ཀེ་ན ཏི་ཎྞེ་ན, པུ་རི་སེ་ན ཐཱ་མ་ད་སྶི་ནཱ;
ས་བྦ་ཉྙུ་ཏཾ པཱ་པུ་ཎི་ཏྭཱ, ས་ནྟཱ་རེ་སྶཾ ས་དེ་ཝ་ཀཾ.
༥༧. ‘‘ཨི་མི་ནཱ མེ ཨ་དྷི་ཀཱ་རེ་ན, ཀ་ཏེ་ན པུ་རི་སུ་ཏྟ་མེ;
ས་བྦ་ཉྙུ་ཏཾ པཱ་པུ་ཎི་ཏྭཱ, ཏཱ་རེ་མི ཛ་ན་ཏཾ བ་ཧུཾ.
༥༨. ‘‘སཾ་སཱ་ར་སོ་ཏཾ ཚི་ནྡི་ཏྭཱ, ཝི་དྡྷཾ་སེ་ཏྭཱ ཏ་ཡོ བྷ་ཝེ;
དྷ་མྨ་ནཱ་ཝཾ ས་མཱ་རུ་ཡ྄ཧ, ས་ནྟཱ་རེ་སྶཾ ས་དེ་ཝ་ཀཾ’’.
༥༩. མ་ནུ་སྶ་ཏྟཾ ལི་ངྒ་ས་མྤ་ཏྟི, ཧེ་ཏུ ས་ཏྠཱ་ར་ད་སྶ་ནཾ;
པ་བྦ་ཛྫཱ གུ་ཎ་ས་མྤ་ཏྟི, ཨ་དྷི་ཀཱ་རོ ཙ ཚ་ནྡ་ཏཱ;
ཨ་ཊྛ་དྷ་མྨ་ས་མོ་དྷཱ་ནཱ, ཨ་བྷི་ནཱི་ཧཱ་རོ ས་མི་ཛ྄ཛྷ་ཏི.
༦༠. དཱི་པ་ངྐ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ;
ཨུ་སྶཱི་ས་ཀེ མཾ ཋ་ཏྭཱ་ན, ཨི་དཾ ཝ་ཙ་ན་མ་བྲ་ཝི.
༦༡. ‘‘པ་སྶ་ཐ ཨི་མཾ ཏཱ་པ་སཾ, ཛ་ཊི་ལཾ ཨུ་གྒ་ཏཱ་པ་ནཾ;
ཨ་པ་རི་མེ་ཡྻི་ཏོ ཀ་པྤེ, བུ་དྡྷོ ལོ་ཀེ བྷ་ཝི་སྶ་ཏི.
༦༢. ‘‘ཨ་ཧུ ཀ་པི་ལ་ཝ྄ཧ་ཡཱ ར་མྨཱ, ནི་ཀྑ་མི་ཏྭཱ ཏ་ཐཱ་ག་ཏོ;
པ་དྷཱ་ནཾ པ་ད་ཧི་ཏྭཱ་ན, ཀ་ཏྭཱ དུ་ཀྐ་ར་ཀཱ་རི་ཀཾ.
༦༣. ‘‘ཨ་ཛ་པཱ་ལ་རུ་ཀྑ་མཱུ་ལ་སྨིཾ, ནི་སཱི་དི་ཏྭཱ ཏ་ཐཱ་ག་ཏོ;
ཏ་ཏྠ པཱ་ཡཱ་སཾ པ་གྒ་ཡ྄ཧ, ནེ་ར་ཉྫ་ར་མུ་པེ་ཧི་ཏི.
༦༤. ‘‘ནེ་ར་ཉྫ་རཱ་ཡ ཏཱི་ར་མྷི, པཱ་ཡཱ་སཾ ཨ་ད སོ ཛི་ནོ;
པ་ཊི་ཡ་ཏྟ་ཝ་ར་མ་གྒེ་ན, བོ་དྷི་མཱུ་ལ་མུ་པེ་ཧི་ཏི.
༦༥. ‘‘ཏ་ཏོ པ་ད་ཀྑི་ཎཾ ཀ་ཏྭཱ, བོ་དྷི་མ་ཎྜཾ ཨ་ནུ་ཏྟ་རོ [ཨ་ནུ་ཏྟ་རཾ (སྱཱ. ཀཾ.)];
ཨ་སྶ་ཏྠ་རུ་ཀྑ་མཱུ་ལ་མྷི, བུ་ཛ྄ཛྷི་སྶ་ཏི མ་ཧཱ་ཡ་སོ.
༦༦. ‘‘ཨི་མ་སྶ ཛ་ནི་ཀཱ མཱ་ཏཱ, མཱ་ཡཱ ནཱ་མ བྷ་ཝི་སྶ་ཏི;
པི་ཏཱ སུ་དྡྷོ་ད་ནོ ནཱ་མ, ཨ་ཡཾ ཧེ་སྶ་ཏི གོ་ཏ་མོ.
༦༧. ‘‘ཨ་ནཱ་ས་ཝཱ ཝཱི་ཏ་རཱ་གཱ, ས་ནྟ་ཙི་ཏྟཱ ས་མཱ་ཧི་ཏཱ;
ཀོ་ལི་ཏོ ཨུ་པ་ཏི་སྶོ ཙ, ཨ་གྒཱ ཧེ་སྶ་ནྟི སཱ་ཝ་ཀཱ;
ཨཱ་ན་ནྡོ ནཱ་མུ་པ་ཊྛཱ་ཀོ, ཨུ་པ་ཊྛི་སྶ་ཏི་མཾ [ཨུ་པ་ཊྛི་སྶ་ཏི ཏཾ (སཱི.)] ཛི་ནཾ.
༦༨. ‘‘ཁེ་མཱ ཨུ་པྤ་ལ་ཝ་ཎྞཱ ཙ, ཨ་གྒཱ ཧེ་སྶ་ནྟི སཱ་ཝི་ཀཱ;
ཨ་ནཱ་ས་ཝཱ ཝཱི་ཏ་རཱ་གཱ, ས་ནྟ་ཙི་ཏྟཱ ས་མཱ་ཧི་ཏཱ;
བོ་དྷི ཏ་སྶ བྷ་ག་ཝ་ཏོ, ཨ་སྶ་ཏྠོ་ཏི པ་ཝུ་ཙྩ་ཏི.
༦༩. ‘‘ཙི་ཏྟོ ཙ ཧ་ཏྠཱ་ལ༹་ཝ་ཀོ [ཧ་ཏྠཱ་ལ་ཝ་ཀོ (སཱི.)], ཨ་གྒཱ ཧེ་སྶ་ནྟུ་པ་ཊྛ་ཀཱ;
ཨུ་ཏྟ་རཱ ན་ནྡ་མཱ་ཏཱ ཙ, ཨ་གྒཱ ཧེ་སྶ་ནྟུ་པ་ཊྛི་ཀཱ’’.
༧༠. ཨི་དཾ སུ་ཏྭཱ་ན ཝ་ཙ་ནཾ, ཨ་ས་མ་སྶ མ་ཧེ་སི་ནོ;
ཨཱ་མོ་དི་ཏཱ ན་ར་མ་རཱུ, བུ་དྡྷ་བཱི་ཛཾ ཀི་ར [བུ་དྡྷ་བཱི་ཛ་ངྐུ་རོ (སཱི. སྱཱ.)] ཨ་ཡཾ.
༧༡. ཨུ་ཀྐུ་ཊྛི་ས་དྡཱ ཝ་ཏྟ་ནྟི, ཨ་པྥོ་ཊེ་ནྟི [ཨ་པྥོ་ཋེ་ནྟི (སཱི.)] ཧ་ས་ནྟི ཙ;
ཀ་ཏ་ཉྫ་ལཱི ན་མ་སྶ་ནྟི, ད་ས་ས་ཧ་སྶཱི ས་དེ་ཝ་ཀཱ.