༡༨. སི་དྡྷ་ཏྠ་བུ་དྡྷ་ཝཾ་སོ
༡. དྷ་མྨ་ད་སྶི་སྶ ཨ་པ་རེ་ན, སི་དྡྷ་ཏྠོ ནཱ་མ ནཱ་ཡ་ཀོ;
ནི་ཧ་ནི་ཏྭཱ ཏ་མཾ ས་བྦཾ, སཱུ་རི་ཡོ ཨ་བྦྷུ་གྒ་ཏོ ཡ་ཐཱ.
༢. སོ་པི པ་ཏྭཱ་ན ས་མྦོ་དྷིཾ, ས་ནྟཱ་རེ་ནྟོ ས་དེ་ཝ་ཀཾ;
ཨ་བྷི་ཝ་སྶི དྷ་མྨ་མེ་གྷེ་ན, ནི་བྦཱ་པེ་ནྟོ ས་དེ་ཝ་ཀཾ.
༣. ཏ་སྶཱ་པི ཨ་ཏུ་ལ་ཏེ་ཛ་སྶ, ཨ་ཧེ་སུཾ ཨ་བྷི་ས་མ་ཡཱ ཏ་ཡོ;
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མཱ་བྷི་ས་མ་ཡོ ཨ་ཧུ.
༤. པུ་ནཱ་པ་རཾ བྷཱི་མ་ར་ཐེ [ཧི་མ་ར་ཊྛེ (ཀ.)], ཡ་དཱ ཨཱ་ཧ་ནི དུ་ནྡུ་བྷིཾ;
ཏ་དཱ ན་ཝུ་ཏི་ཀོ་ཊཱི་ནཾ, དུ་ཏི་ཡཱ་བྷི་ས་མ་ཡོ ཨ་ཧུ.
༥. ཡ་དཱ བུ་དྡྷོ དྷ་མྨཾ དེ་སེ་སི, ཝེ་བྷཱ་རེ སོ པུ་རུ་ཏྟ་མེ;
ཏ་དཱ ན་ཝུ་ཏི་ཀོ་ཊཱི་ནཾ, ཏ་ཏི་ཡཱ་བྷི་ས་མ་ཡོ ཨ་ཧུ.
༦. ས་ནྣི་པཱ་ཏཱ ཏ་ཡོ ཨཱ་སུཾ, ཏ་སྨི་མྤི དྭི་པ་དུ་ཏྟ་མེ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༧. ཀོ་ཊི་ས་ཏཱ་ནཾ ན་ཝུ་ཏཱི་ནཾ [ན་ཝུ་ཏི་ཡཱ (སྱཱ. ཀཾ.)], ཨ་སཱི་ཏི་ཡཱ་པི ཙ ཀོ་ཊི་ནཾ;
ཨེ་ཏེ ཨཱ་སུཾ ཏ་ཡོ ཋཱ་ནཱ, ཝི་མ་ལཱ་ནཾ ས་མཱ་ག་མེ.
༨. ཨ་ཧཾ ཏེ་ན ས་མ་ཡེ་ན, མ་ངྒ་ལོ ནཱ་མ ཏཱ་པ་སོ;
ཨུ་གྒ་ཏེ་ཛོ དུ་པྤ་ས་ཧོ, ཨ་བྷི་ཉྙཱ་བ་ལ་ས་མཱ་ཧི་ཏོ.
༩. ཛ་མྦུ་ཏོ ཕ་ལ་མཱ་ནེ་ཏྭཱ [ཕ་ལ་མཱ་ཧ་ཏྭཱ (སཱི. སྱཱ.)] སི་དྡྷ་ཏྠ་སྶ ཨ་དཱ་ས་ཧཾ;
པ་ཊི་གྒ་ཧེ་ཏྭཱ ས་མྦུ་དྡྷོ, ཨི་དཾ ཝ་ཙ་ན་མ་བྲ་ཝི.
༡༠. ‘‘པ་སྶ་ཐ ཨི་མཾ ཏཱ་པ་སཾ, ཛ་ཊི་ལཾ ཨུ་གྒ་ཏཱ་པ་ནཾ;
ཙ་ཏུ་ནྣ་ཝུ་ཏི་ཏོ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༡. ‘‘པ་དྷཱ་ནཾ པ་ད་ཧི་ཏྭཱ་ན…པེ… ཧེ་སྶཱ་མ ས་མྨུ་ཁཱ ཨི་མཾ’’.
༡༢. ཏ་སྶཱ་པི ཝ་ཙ་ནཾ སུ་ཏྭཱ, བྷི་ཡྻོ ཙི་ཏྟཾ པ་སཱ་ད་ཡིཾ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས་པཱ་ར་མི་པཱུ་རི་ཡཱ.
༡༣. ཝེ་བྷཱ་རཾ ནཱ་མ ན་ག་རཾ, ཨུ་དེ་ནོ ནཱ་མ ཁ་ཏྟི་ཡོ;
སུ་ཕ་སྶཱ ནཱ་མ ཛ་ནི་ཀཱ, སི་དྡྷ་ཏྠ་སྶ མ་ཧེ་སི་ནོ.
༡༤. ད་ས་ཝ་སྶ་ས་ཧ་སྶཱ་ནི, ཨ་གཱ་རཾ ཨ་ཛ྄ཛྷ སོ ཝ་སི;
ཀོ་ཀཱ་སུ་པྤ་ལ་ཀོ་ཀ་ན་དཱ, ཏ་ཡོ པཱ་སཱ་ད་མུ་ཏྟ་མཱ.
༡༥. ཏི་སོ་ལ༹་ས་ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
སོ་མ་ན་སྶཱ ནཱ་མ སཱ ནཱ་རཱི, ཨ་ནུ་པ་མོ ནཱ་མ ཨ་ཏྲ་ཛོ.
༡༦. ནི་མི་ཏྟེ ཙ་ཏུ་རོ དི་སྭཱ, སི་ཝི་ཀཱ་ཡཱ་བྷི་ནི་ཀྑ་མི;
ཨ་ནཱུ་ན་ད་ས་མཱ་སཱ་ནི, པ་དྷཱ་ནཾ པ་ད་ཧཱི ཛི་ནོ.
༡༧. བྲ་ཧྨུ་ནཱ ཡཱ་ཙི་ཏོ ས་ནྟོ, སི་དྡྷ་ཏྠོ ལོ་ཀ་ནཱ་ཡ་ཀོ;
ཝ་ཏྟི ཙ་ཀྐཾ མ་ཧཱ་ཝཱི་རོ, མི་ག་དཱ་ཡེ ན་རུ་ཏྟ་མོ.
༡༨. ས་མྦ་ལོ ཙ སུ་མི་ཏྟོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
རེ་ཝ་ཏོ ནཱ་མུ་པ་ཊྛཱ་ཀོ, སི་དྡྷ་ཏྠ་སྶ མ་ཧེ་སི་ནོ.
༡༩. སཱི་ཝ་ལཱ ཙ སུ་རཱ་མཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, ཀ་ཎི་ཀཱ་རོ་ཏི ཝུ་ཙྩ་ཏི.
༢༠. སུ་པྤི་ཡོ ཙ ས་མུ་དྡོ ཙ, ཨ་ཧེ་སུཾ ཨ་གྒུ་པ་ཊྛ་ཀཱ;
ར་མྨཱ ཙེ་ཝ སུ་ར་མྨཱ ཙ, ཨ་ཧེ་སུཾ ཨ་གྒུ་པ་ཊྛི་ཀཱ.
༢༡. སོ བུ་དྡྷོ ས་ཊྛི་ར་ཏ་ནཾ, ཨ་ཧོ་སི ན་བྷ་མུ་གྒ་ཏོ;
ཀ་ཉྩ་ན་གྒྷི་ཡ་ས་ངྐཱ་སོ, ད་ས་ས་ཧ་སྶཱི ཝི་རོ་ཙ་ཏི.
༢༢. སོ་པི བུ་དྡྷོ ཨ་ས་མ་ས་མོ, ཨ་ཏུ་ལོ ཨ་པྤ་ཊི་པུ་གྒ་ལོ;
ཝ་སྶ་ས་ཏ་ས་ཧ་སྶཱ་ནི, ལོ་ཀེ ཨ་ཊྛཱ་སི ཙ་ཀྑུ་མཱ.
༢༣. ཝི་པུ་ལཾ པ་བྷཾ ད་སྶ་ཡི་ཏྭཱ, པུ་པྥཱ་པེ་ཏྭཱ་ན སཱ་ཝ་ཀེ;
ཝི་ལཱ་སེ་ཏྭཱ ས་མཱ་པ་ཏྱཱ, ནི་བྦུ་ཏོ སོ ས་སཱ་ཝ་ཀོ.
༢༤. སི་དྡྷ་ཏྠོ མུ་ནི་ཝ་རོ བུ་དྡྷོ, ཨ་ནོ་མཱ་རཱ་མ་མྷི ནི་བྦུ་ཏོ;
ཏ་ཏྠེ་ཝ་སྶ ཐཱུ་པ་ཝ་རོ, ཙ་ཏུ་ཡོ་ཛ་ན་མུ་གྒ་ཏོ་ཏི.
སི་དྡྷ་ཏྠ་སྶ བྷ་ག་ཝ་ཏོ ཝཾ་སོ སོ་ལ༹་ས་མོ.