༡༦. ཨ་ཏྠ་ད་སྶཱི་བུ་དྡྷ་ཝཾ་སོ
༡. ཏ་ཏྠེ་ཝ མ་ཎྜ་ཀ་པྤ་མྷི, ཨ་ཏྠ་ད་སྶཱི མ་ཧཱ་ཡ་སོ;
མ་ཧཱ་ཏ་མཾ ནི་ཧ་ནྟྭཱ་ན, པ་ཏྟོ ས་མྦོ་དྷི་མུ་ཏྟ་མཾ.
༢. བྲ་ཧྨུ་ནཱ ཡཱ་ཙི་ཏོ ས་ནྟོ, དྷ་མྨ་ཙ་ཀྐཾ པ་ཝ་ཏྟ་ཡི;
ཨ་མ་ཏེ་ན ཏ་པྤ་ཡཱི ལོ་ཀཾ, ད་ས་ས་ཧ་སྶི་ས་དེ་ཝ་ཀཾ.
༣. ཏ་སྶཱ་པི ལོ་ཀ་ནཱ་ཐ་སྶ, ཨ་ཧེ་སུཾ ཨ་བྷི་ས་མ་ཡཱ ཏ་ཡོ;
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མཱ་བྷི་ས་མ་ཡོ ཨ་ཧུ.
༤. ཡ་དཱ བུ་དྡྷོ ཨ་ཏྠ་ད་སྶཱི, ཙ་ར་ཏེ དེ་ཝ་ཙཱ་རི་ཀཾ;
ཀོ་ཊི་ས་ཏ་ས་ཧ་སྶཱ་ནཾ, དུ་ཏི་ཡཱ་བྷི་ས་མ་ཡོ ཨ་ཧུ.
༥. པུ་ནཱ་པ་རཾ ཡ་དཱ བུ་དྡྷོ, དེ་སེ་སི པི་ཏུ་ས་ནྟི་ཀེ;
ཀོ་ཊི་ས་ཏ་ས་ཧ་སྶཱ་ནཾ, ཏ་ཏི་ཡཱ་བྷི་ས་མ་ཡོ ཨ་ཧུ.
༦. ས་ནྣི་པཱ་ཏཱ ཏ་ཡོ ཨཱ་སུཾ, ཏ་སྶཱ་པི ཙ མ་ཧེ་སི་ནོ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༧. ཨ་ཊྛ་ན་ཝུ་ཏི་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ;
ཨ་ཊྛཱ་སཱི་ཏི་ས་ཧ་སྶཱ་ནཾ, དུ་ཏི་ཡོ ཨཱ་སི ས་མཱ་ག་མོ.
༨. ཨ་ཊྛ་ས་ཏྟ་ཏི་ས་ཏ་ས་ཧ་སྶཱ་ནཾ, ཏ་ཏི་ཡོ ཨཱ་སི ས་མཱ་ག་མོ;
ཨ་ནུ་པཱ་དཱ ཝི་མུ་ཏྟཱ་ནཾ, ཝི་མ་ལཱ་ནཾ མ་ཧེ་སི་ནཾ.
༩. ཨ་ཧཾ ཏེ་ན ས་མ་ཡེ་ན, ཛ་ཊི་ལོ ཨུ་གྒ་ཏཱ་པ་ནོ;
སུ་སཱི་མོ ནཱ་མ ནཱ་མེ་ན, མ་ཧི་ཡཱ སེ་ཊྛ་ས་མྨ་ཏོ.
༡༠. དི་བྦཾ མ་ནྡཱ་ར་ཝཾ པུ་པྥཾ, པ་དུ་མཾ པཱ་རི་ཚ་ཏྟ་ཀཾ;
དེ་ཝ་ལོ་ཀཱ་ཧ་རི་ཏྭཱ་ན, ས་མྦུ་དྡྷ་མ་བྷི་པཱུ་ཛ་ཡིཾ.
༡༡. སོ་པི མཾ བུ་དྡྷོ བྱཱ་ཀཱ་སི, ཨ་ཏྠ་ད་སྶཱི མ་ཧཱ་མུ་ནི;
‘‘ཨ་ཊྛཱ་ར་སེ ཀ་པྤ་ས་ཏེ, ཨ་ཡཾ བུ་དྡྷོ བྷ་ཝི་སྶ་ཏི.
༡༢. ‘‘པ་དྷཱ་ནཾ པ་ད་ཧི་ཏྭཱ་ན…པེ… ཧེ་སྶཱ་མ ས་མྨུ་ཁཱ ཨི་མཾ’’.
༡༣. ཏ་སྶཱ་པི ཝ་ཙ་ནཾ སུ་ཏྭཱ, ཧ་ཊྛོ [ཏུ་ཊྛོ (སྱཱ. ཀཾ.)] སཾ་ཝི་གྒ་མཱ་ན་སོ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས་པཱ་ར་མི་པཱུ་རི་ཡཱ.
༡༤. སོ་བྷ་ཎཾ ནཱ་མ ན་ག་རཾ, སཱ་ག་རོ ནཱ་མ ཁ་ཏྟི་ཡོ;
སུ་ད་སྶ་ནཱ ནཱ་མ ཛ་ནི་ཀཱ, ཨ་ཏྠ་ད་སྶི་སྶ ས་ཏྠུ་ནོ.
༡༥. ད་ས་ཝ་སྶ་ས་ཧ་སྶཱ་ནི, ཨ་གཱ་རཾ ཨ་ཛ྄ཛྷ སོ ཝ་སི;
ཨ་མ་ར་གི་རི སུ་གི་རི ཝཱ་ཧ་ནཱ, ཏ་ཡོ པཱ་སཱ་ད་མུ་ཏྟ་མཱ.
༡༦. ཏེ་ཏྟིཾ་ས་ཉྩ ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
ཝི་སཱ་ཁཱ ནཱ་མ ནཱ་རཱི ཙ, སེ་ལོ ནཱ་མཱ་སི ཨ་ཏྲ་ཛོ.
༡༧. ནི་མི་ཏྟེ ཙ་ཏུ་རོ དི་སྭཱ, ཨ་སྶ་ཡཱ་ནེ་ན ནི་ཀྑ་མི;
ཨ་ནཱུ་ན་ཨ་ཊྛ་མཱ་སཱ་ནི, པ་དྷཱ་ནཾ པ་ད་ཧཱི ཛི་ནོ.
༡༨. བྲ་ཧྨུ་ནཱ ཡཱ་ཙི་ཏོ ས་ནྟོ, ཨ་ཏྠ་ད་སྶཱི མ་ཧཱ་ཡ་སོ;
ཝ་ཏྟི ཙ་ཀྐཾ མ་ཧཱ་ཝཱི་རོ, ཨ་ནོ་མུ་ཡྻཱ་ནེ ན་རཱ་ས་བྷོ.
༡༩. ས་ནྟོ ཙ ཨུ་པ་ས་ནྟོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
ཨ་བྷ་ཡོ ནཱ་མུ་པ་ཊྛཱ་ཀོ, ཨ་ཏྠ་ད་སྶི་སྶ ས་ཏྠུ་ནོ.
༢༠. དྷ་མྨཱ ཙེ་ཝ སུ་དྷ་མྨཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, ཙ་མྤ་ཀོ་ཏི པ་ཝུ་ཙྩ་ཏི.
༢༡. ན་ཀུ་ལོ ཙ ནི་ས་བྷོ ཙ, ཨ་ཧེ་སུཾ ཨ་གྒུ་པ་ཊྛ་ཀཱ;
མ་ཀི་ལཱ ཙ སུ་ན་ནྡཱ ཙ, ཨ་ཧེ་སུཾ ཨ་གྒུ་པ་ཊྛི་ཀཱ.
༢༢. སོ་པི བུ་དྡྷོ ཨ་ས་མ་ས་མོ, ཨ་སཱི་ཏི་ཧ་ཏྠ་མུ་གྒ་ཏོ;
སོ་བྷ་ཏེ སཱ་ལ་རཱ་ཛཱ་ཝ, ཨུ་ལུ༹་རཱ་ཛཱ་ཝ པཱུ་རི་ཏོ.
༢༣. ཏ་སྶ པཱ་ཀ་ཏི་ཀཱ རཾ་སཱི, ཨ་ནེ་ཀ་ས་ཏ་ཀོ་ཊི་ཡོ;
ཨུ་དྡྷཾ ཨ་དྷོ ད་ས དི་སཱ, ཕ་ར་ནྟི ཡོ་ཛ་ནཾ ས་དཱ.
༢༤. སོ་པི བུ་དྡྷོ ན་རཱ་ས་བྷོ, ས་བྦ་ས་ཏྟུ་ཏྟ་མོ མུ་ནི;
ཝ་སྶ་ས་ཏ་ས་ཧ་སྶཱ་ནི, ལོ་ཀེ ཨ་ཊྛཱ་སི ཙ་ཀྑུ་མཱ.
༢༥. ཨ་ཏུ་ལཾ ད་སྶེ་ཏྭཱ ཨོ་བྷཱ་སཾ, ཝི་རོ་ཙེ་ཏྭཱ ས་དེ་ཝ་ཀེ [ཨ་ཏུ་ལཾ ད་སྶ་ཡི་ཏྭཱ་ན, ཨོ་བྷཱ་སེ་ཏྭཱ ས་དེ་ཝ་ཀེ (སཱི. ཀ.)];
སོ་པི ཨ་ནི་ཙྩ་ཏཾ པ་ཏྟོ, ཡ་ཐ་གྒུ་པཱ་དཱ་ན་ས་ངྑ་ཡཱ.
༢༦. ཨ་ཏྠ་ད་སྶཱི ཛི་ན་ཝ་རོ, ཨ་ནོ་མཱ་རཱ་མ་མྷི ནི་བྦུ་ཏོ;
དྷཱ་ཏུ་ཝི་ཏྠཱ་རི་ཀཾ ཨཱ་སི, ཏེ་སུ ཏེ་སུ པ་དེ་ས་ཏོ་ཏི.
ཨ་ཏྠ་ད་སྶི་སྶ བྷ་ག་ཝ་ཏོ ཝཾ་སོ ཙུ་དྡ་ས་མོ.