༡༠. ཏི་པ་དུ་མི་ཡ་ཏྠེ་ར་ཨ་པ་དཱ་ནཾ
༤༨. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨཱ་ན པཱ་ར་གཱུ;
ད་ནྟོ ད་ནྟ་པ་རི་ཝུ་ཏོ, ན་ག་རཱ ནི་ཀྑ་མཱི ཏ་དཱ.
༤༩. ‘‘ན་ག་རེ ཧཾ་ས་ཝ་ཏི་ཡཾ, ཨ་ཧོ་སིཾ མཱ་ལི་ཀོ ཏ་དཱ;
ཡཾ ཏ་ཏྠ ཨུ་ཏྟ་མཾ ཏོ་ཎི, པ་དྨ་པུ་པྥཱ་ནི [ཨུ་ཏྟ་མཾ པུ་པྥཾ, ཏཱི་ཎི པུ་པྥཱ་ནི (སཱི.)] ཨ་གྒ་ཧིཾ.
༥༠. ‘‘ཨ་དྡ་སཾ ཝི་ར་ཛཾ བུ་དྡྷཾ, པ་ཊི་མ་གྒ་ནྟ་རཱ་པ་ཎེ;
ས་ཧ [སོ་ཧཾ (སཱི.)] དི་སྭཱ་ན ས་མྦུ་དྡྷཾ, ཨེ་ཝཾ ཙི་ནྟེ་ས་ཧཾ ཏ་དཱ.
༥༡. ‘‘ཀིཾ མེ ཨི་མེ་ཧི པུ་པྥེ་ཧི, ར་ཉྙོ ཨུ་པ་ནི་ཏེ་ཧི མེ;
གཱ་མཾ ཝཱ གཱ་མ་ཁེ་ཏྟཾ ཝཱ, ས་ཧ་སྶཾ ཝཱ ལ་བྷེ་ཡྻ་ཧཾ.
༥༢. ‘‘ཨ་ད་ནྟ་ད་མ་ནཾ ཝཱི་རཾ, ས་བྦ་ས་ཏྟ་སུ་ཁཱ་ཝ་ཧཾ;
ལོ་ཀ་ནཱ་ཐཾ པཱུ་ཛ་ཡི་ཏྭཱ, ལ་ཙྪཱ་མི ཨ་མ་ཏཾ དྷ་ནཾ.
༥༣. ‘‘ཨེ་ཝཱ་ཧཾ ཙི་ནྟ་ཡི་ཏྭཱ་ན, ས་ཀཾ ཙི་ཏྟཾ པ་སཱ་ད་ཡིཾ;
ཏཱི་ཎི ལོ་ཧི་ཏ་ཀེ ག་ཡ྄ཧ, ཨཱ་ཀཱ་སེ ཨུ་ཀྑི་པིཾ ཏ་དཱ.
༥༤. ‘‘མ་ཡཱ ཨུ་ཀྑི་ཏྟ་མ་ཏྟ་མྷི, ཨཱ་ཀཱ་སེ པ་ཏྠ་རིཾ་སུ ཏེ;
དྷཱ་རིཾ་སུ མ་ཏྠ་ཀེ ཏ་ཏྠ, ཨུ་དྡྷཾ་ཝ་ཎྚཱ ཨ་དྷོ་མུ་ཁཱ.
༥༥. ‘‘ཡེ ཀེ་ཙི མ་ནུ་ཛཱ དི་སྭཱ, ཨུ་ཀྐུ་ཊྛིཾ ས་མྤ་ཝ་ཏྟ་ཡུཾ;
དེ་ཝ་ཏཱ ཨ་ནྟ་ལི་ཀྑ་མྷི, སཱ་དྷུ་ཀཱ་རཾ པ་ཝ་ཏྟ་ཡུཾ.
༥༦. ‘‘ཨ་ཙྪེ་རཾ ལོ་ཀེ ཨུ་པྤ་ནྣཾ, བུ་དྡྷ་སེ་ཊྛ་སྶ ཝཱ་ཧ་སཱ;
ས་བྦེ དྷ་མྨཾ སུ་ཎི་སྶཱ་མ, པུ་པྥཱ་ནཾ ཝཱ་ཧ་སཱ མ་ཡཾ.
༥༧. ‘‘པ་དུ་མུ་ཏྟ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ;
ཝཱི་ཐི་ཡ་ཉྷི ཋི་ཏོ ས་ནྟོ, ཨི་མཱ གཱ་ཐཱ ཨ་བྷཱ་ས་ཐ.
༥༨. ‘‘‘ཡོ སོ བུ་དྡྷཾ ཨ་པཱུ་ཛེ་སི, ར་ཏྟ་པ་དྨེ་ཧི [ར་ཏྟ་པ་དུ་མེ་ཧི (སཱི. སྱཱ.)] མཱ་ཎ་ཝོ;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༥༩. ‘‘‘ཏིཾ་ས་ཀ་པྤ་ས་ཧ་སྶཱ་ནི, དེ་ཝ་ལོ་ཀེ ར་མི་སྶ་ཏི;
ཏིཾ་ས་ཀ་པྤཱ་ནི [ཏིཾ་ས་ཀྑ་ཏྟུ་ཉྩ (སྱཱ.)] དེ་ཝི་ནྡོ, དེ་ཝ་ར་ཛྫཾ ཀ་རི་སྶ་ཏི.
༦༠. ‘‘‘མ་ཧཱ་ཝི་ཏྠཱ་རི་ཀཾ ནཱ་མ, བྱ་མྷཾ ཧེ་སྶ་ཏི ཏཱ་ཝ་དེ;
ཏི་ཡོ་ཛ་ན་ས་ཏུ་བྦི་དྡྷཾ, དི་ཡ་ཌྜྷ་ས་ཏ་ཝི་ཏྠ་ཏཾ.
༦༡. ‘‘‘ཙ་ཏྟཱ་རི་ས་ཏ་ས་ཧ་སྶཱ་ནི, ནི་ཡྻཱུ་ཧཱ ཙ སུ་མཱ་པི་ཏཱ;
ཀཱུ་ཊཱ་གཱ་ར་ཝ་རཱུ་པེ་ཏཱ, མ་ཧཱ་ས་ཡ་ན་མ་ཎྜི་ཏཱ.
༦༢. ‘‘‘ཀོ་ཊི་ས་ཏ་ས་ཧ་སྶི་ཡོ, པ་རི་ཝཱ་རེ་སྶ་ནྟི ཨ་ཙྪ་རཱ;
ཀུ་ས་ལཱ ན་ཙྩ་གཱི་ཏ་སྶ, ཝཱ་དི་ཏེ་པི པ་ད་ཀྑི་ཎཱ.
༦༣. ‘‘‘ཨེ་ཏཱ་དི་སེ བྱ་མྷ་ཝ་རེ, ནཱ་རཱི་ག་ཎ་ས་མཱ་ཀུ་ལེ;
ཝ་སྶི་སྶ་ཏི པུ་པྥ་ཝ་སྶོ, དི་བྦོ [པ་ད (ཀ.)] ལོ་ཧི་ཏ་ཀོ ས་དཱ.
༦༤. ‘‘‘བྷི་ཏྟི་ཁཱི་ལེ ནཱ་ག་ད་ནྟེ, དྭཱ་ར་བཱ་ཧཱ་ཡ ཏོ་ར་ཎེ;
ཙ་ཀྐ་མ་ཏྟཱ ལོ་ཧི་ཏ་ཀཱ, ཨོ་ལ་མྦི་སྶ་ནྟི ཏཱ་ཝ་དེ.
༦༥. ‘‘‘པ་ཏྟེ་ན པ་ཏྟ་ས་ཉྪ་ནྣེ, ཨ་ནྟོ་བྱ་མྷ་ཝ་རེ ཨི་མཾ;
ཨ་ཏྠ་རི་ཏྭཱ པཱ་རུ་པི་ཏྭཱ, ཏུ་ཝ་ཊྚི་སྶ་ནྟི ཏཱ་ཝ་དེ.
༦༦. ‘‘‘བྷ་ཝ་ནཾ པ་རི་ཝཱ་རེ་ཏྭཱ, ས་མ་ནྟཱ ས་ཏ་ཡོ་ཛ་ནེ;
ཏེ་པི པ་དྨཱ [ཏེ ཝི་སུ་དྡྷཱ (སཱི. སྱཱ.)] ལོ་ཧི་ཏ་ཀཱ, དི་བྦ་ག་ནྡྷཾ པ་ཝཱ་ཡ་རེ.
༦༧. ‘‘‘པ་ཉྩ་ས་ཏྟ་ཏི་ཀྑ་ཏྟུ་ཉྩ, ཙ་ཀྐ་ཝ་ཏྟཱི བྷ་ཝི་སྶ་ཏི;
པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ.
༦༨. ‘‘‘ས་མྤ་ཏྟི་ཡོ དུ་ཝེ བྷུ་ཏྭཱ, ཨ་ནཱི་ཏི ཨ་ནུ་པ་དྡ་ཝོ;
ས་མྤ་ཏྟེ པ་རི་ཡོ་སཱ་ནེ, ནི་བྦཱ་ནཾ པཱ་པུ་ཎི་སྶ་ཏི’ [ཕ་སྶ་ཡི་སྶ་ཏི (སཱི.), པ་སྶ་ཡི་སྶ་ཏི (ཀ.)].
༦༩. ‘‘སུ་དི་ཊྛོ ཝ་ཏ མེ བུ་དྡྷོ, ཝཱ་ཎི་ཛྫཾ སུ་པ་ཡོ་ཛི་ཏཾ;
པ་དྨཱ་ནི ཏཱི་ཎི པཱུ་ཛེ་ཏྭཱ, ཨ་ནུ་བྷོ་སིཾ ཏི་ས་མྤ་དཱ [ཨ་ནུ་བྷཱུ་ཡ་ནྟི ས་མྤ་དཱ (ཀ.)].
༧༠. ‘‘ཨ་ཛྫ མེ དྷ་མྨ་པྤ་ཏྟ་སྶ, ཝི་པྤ་མུ་ཏྟ་སྶ ས་བྦ་སོ;
སུ་པུ་པྥི་ཏཾ ལོ་ཧི་ཏ་ཀཾ, དྷཱ་ར་ཡི་སྶ་ཏི མ་ཏྠ་ཀེ.
༧༡. ‘‘མ་མ ཀ་མྨཾ ཀ་ཐེ་ནྟ་སྶ, པ་དུ་མུ་ཏྟ་ར་ས་ཏྠུ་ནོ;
ས་ཏ་པཱ་ཎ་ས་ཧ་སྶཱ་ནཾ, དྷ་མྨཱ་བྷི་ས་མ་ཡོ ཨ་ཧུ.
༧༢. ‘‘ས་ཏ་ས་ཧ་སྶི་ཏོ ཀ་པྤེ, ཡཾ བུ་དྡྷ་མ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, ཏི་པ་དུ་མཱ་ནི་དཾ ཕ་ལཾ.
༧༣. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ས་བྦཱ་ས་ཝཱ པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༧༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཏི་པ་དུ་མི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཏི་པ་དུ་མི་ཡ་ཏྠེ་ར་སྶཱ་པ་དཱ་ནཾ ད་ས་མཾ.
ནཱ་ག་ས་མཱ་ལ་ཝ་གྒོ ཨ་ཊྛ་མོ.