༩. ཏི་མི་ར་ཝ་གྒོ
༡. ཏི་མི་ར་པུ་པྥི་ཡ་ཏྠེ་ར་ཨ་པ་དཱ་ནཾ
༡. ‘‘ཙ་ནྡ་བྷཱ་གཱ་ན་དཱི་ཏཱི་རེ, ཨ་ནུ་སོ་ཏཾ ཝ་ཛཱ་མ་ཧཾ;
ནི་སི་ནྣཾ ས་མ་ཎཾ དི་སྭཱ, ཝི་པྤ་ས་ནྣ་མ་ནཱ་ཝི་ལཾ.
༢. ‘‘ཏ་ཏྠ ཙི་ཏྟཾ པ་སཱ་དེ་ཏྭཱ [པ་སཱ་དེ་སིཾ (སྱཱ.)], ཨེ་ཝཾ ཙི་ནྟེ་ས་ཧཾ ཏ་དཱ;
ཏཱ་ར་ཡི་སྶ་ཏི ཏི་ཎྞོ་ཡཾ, ད་ནྟོ་ཡཾ ད་མ་ཡི་སྶ་ཏི.
༣. ‘‘ཨ་སྶཱ་སི་སྶ་ཏི ཨ་སྶ་ཏྠོ, ས་ནྟོ ཙ ས་མ་ཡི་སྶ་ཏི;
མོ་ཙ་ཡི་སྶ་ཏི མུ་ཏྟོ ཙ, ནི་བྦཱ་པེ་སྶ་ཏི ནི་བྦུ་ཏོ.
༤. ‘‘ཨེ་ཝཱ་ཧཾ ཙི་ནྟ་ཡི་ཏྭཱ་ན, སི་དྡྷ་ཏྠ་སྶ མ་ཧེ་སི་ནོ;
ག་ཧེ་ཏྭཱ ཏི་མི་ར་པུ་པྥཾ, མ་ཏྠ་ཀེ ཨོ་ཀི་རིཾ ཨ་ཧཾ [ཏ་དཱ (སྱཱ.)].
༥. ‘‘ཨ་ཉྫ་ལིཾ པ་གྒ་ཧེ་ཏྭཱ་ན, ཀ་ཏྭཱ ཙ ནཾ པ་ད་ཀྑི་ཎཾ;
ཝ་ནྡི་ཏྭཱ ས་ཏྠུ་ནོ པཱ་དེ, པ་ཀྐཱ་མིཾ ཨ་པ་རཾ དི་སཾ.
༦. ‘‘ཨ་ཙི་རཾ ག་ཏ་མ་ཏྟཾ མཾ, མི་ག་རཱ་ཛཱ ཝི་ཧེ་ཋ་ཡི;
པ་པཱ་ཏ་མ་ནུ་ག་ཙྪ་ནྟོ, ཏ་ཏྠེ་ཝ པ་པ་ཏིཾ ཨ་ཧཾ.
༧. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, པུ་པྥ་པཱུ་ཛཱ་ཡི་དཾ [བུ་དྡྷ་པཱུ་ཛཱ་ཡི་དཾ (སཱི. སྱཱ.)] ཕ་ལཾ.
༨. ‘‘ཚ་པྤ་ཉྙཱ་ས་མྷི ཀ་པྤ་མྷི, ས་ཏྟེ་ཝཱ་སུཾ མ་ཧཱ་ཡ་སཱ [མ་ཧཱ་ར་ཧཱ (སྱཱ. ཀ.)];
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༩. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཏི་མི་ར་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཏི་མི་ར་པུ་པྥི་ཡ་ཏྠེ་ར་སྶཱ་པ་དཱ་ནཾ པ་ཋ་མཾ.
༢. ག་ཏ་ས་ཉྙ་ཀ་ཏྠེ་ར་ཨ་པ་དཱ་ནཾ
༡༠. ‘‘ཛཱ་ཏི་ཡཱ ས་ཏྟ་ཝ་སྶོ་ཧཾ, པ་བྦ་ཛིཾ ཨ་ན་གཱ་རི་ཡཾ;
ཨ་ཝ་ནྡིཾ ས་ཏྠུ་ནོ པཱ་དེ, ཝི་པྤ་ས་ནྣེ་ན ཙེ་ཏ་སཱ.
༡༡. ‘‘ས་ཏྟ་ན་ངྒ་ལ་ཀཱི་པུ་པྥེ, ཨཱ་ཀཱ་སེ ཨུ་ཀྑི་པིཾ ཨ་ཧཾ;
ཏི་སྶཾ བུ་དྡྷཾ ས་མུ་དྡི་སྶ, ཨ་ན་ནྟ་གུ་ཎ་སཱ་ག་རཾ.
༡༢. ‘‘སུ་ག་ཏཱ་ནུ་ག་ཏཾ མ་གྒཾ, པཱུ་ཛེ་ཏྭཱ ཧ་ཊྛ་མཱ་ན་སོ;
ཨ་ཉྫ་ལི་ཉྩ [ཨ་ཉྫ་ལི་སྶ (ཀ.)] ཏ་དཱ་ཀཱ་སིཾ, པ་ས་ནྣོ སེ་ཧི པཱ་ཎི་བྷི.
༡༣. ‘‘དྭེ་ན་ཝུ་ཏེ ཨི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༡༤. ‘‘ཨི་ཏོ ཨ་ཊྛ་མ་ཀེ ཀ་པྤེ, ཏ་ཡོ ཨ་གྒི་སི་ཁཱ ཨ་ཧུ;
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༡༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ག་ཏ་ས་ཉྙ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ག་ཏ་ས་ཉྙ་ཀ་ཏྠེ་ར་སྶཱ་པ་དཱ་ནཾ དུ་ཏི་ཡཾ.
༣. ནི་པ་ནྣ་ཉྫ་ལི་ཀ་ཏྠེ་ར་ཨ་པ་དཱ་ནཾ
༡༦. ‘‘རུ་ཀྑ་མཱུ་ལེ ནི་སི་ནྣོ་ཧཾ, བྱཱ་དྷི་ཏོ པ་ར་མེ་ན ཙ;
པ་ར་མ་ཀཱ་རུ་ཉྙ་པ་ཏྟོ་མྷི, ཨ་ར་ཉྙེ ཀཱ་ན་ནེ ཨ་ཧཾ.
༡༧. ‘‘ཨ་ནུ་ཀ་མྤཾ ཨུ་པཱ་དཱ་ཡ, ཏི་སྶོ ས་ཏྠཱ ཨུ་པེ་སི མཾ;
སོ་ཧཾ ནི་པ་ནྣ་ཀོ ས་ནྟོ, སི་རེ ཀ་ཏྭཱ་ན ཨ་ཉྫ་ལིཾ.
༡༨. ‘‘པ་ས་ནྣ་ཙི་ཏྟོ སུ་མ་ནོ, ས་བྦ་ས་ཏྟཱ་ན་མུ་ཏྟ་མཾ;
ས་མྦུ་དྡྷཾ ཨ་བྷི་ཝཱ་དེ་ཏྭཱ, ཏ་ཏྠ ཀཱ་ལ་ངྐ་ཏོ ཨ་ཧཾ.
༡༩. ‘‘དྭེ་ན་ཝུ་ཏེ ཨི་ཏོ ཀ་པྤེ, ཡཾ ཝ་ནྡིཾ པུ་རི་སུ་ཏྟ་མཾ;
དུ་གྒ་ཏིཾ ནཱ་བྷི་ཛཱ་ནཱ་མི, ཝ་ནྡ་ནཱ་ཡ ཨི་དཾ ཕ་ལཾ.
༢༠. ‘‘ཨི་ཏོ པ་ཉྩ་མ་ཀེ ཀ་པྤེ, པ་ཉྩེ་ཝཱ་སུཾ མ་ཧཱ་སི་ཁཱ;
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༢༡. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ནི་པ་ནྣ་ཉྫ་ལི་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ནི་པ་ནྣ་ཉྫ་ལི་ཀ་ཏྠེ་ར་སྶཱ་པ་དཱ་ནཾ ཏ་ཏི་ཡཾ.
༤. ཨ་དྷོ་པུ་པྥི་ཡ་ཏྠེ་ར་ཨ་པ་དཱ་ནཾ
༢༢. ‘‘ཨ་བྷི་བྷཱུ ནཱ་མ སོ བྷི་ཀྑུ, སི་ཁི་ནོ ཨ་གྒ་སཱ་ཝ་ཀོ;
མ་ཧཱ་ནུ་བྷཱ་ཝོ ཏེ་ཝི་ཛྫོ, ཧི་མ་ཝ་ནྟཾ ཨུ་པཱ་ག་མི.
༢༣. ‘‘ཨ་ཧ་མྤི ཧི་མ་ཝ་ནྟ་མྷི, ར་མ་ཎཱི་ཡ་སྶ་མེ ཨི་སི;
ཝ་སཱ་མི ཨ་པྤ་མ་ཉྙཱ་སུ, ཨི་དྡྷཱི་སུ ཙ ཏ་དཱ ཝ་སཱི.
༢༤. ‘‘པ་ཀྑི་ཛཱ་ཏོ ཝི་ཡཱ་ཀཱ་སེ, པ་བྦ་ཏཾ ཨ་དྷི་ཝ་ཏྟ་ཡིཾ [ཨ་བྷི་པ་ཏྠ་ཡིཾ (སྱཱ.), ཨ་བྷི་མ་ཏྠ་ཡིཾ (ཀ.), ཨ་དྷི་ཝ་ཏྠ་ཡི་ནྟི པ་བྦ་ཏ་སྶ ཨུ་པ་རི ག་ཙྪི་ནྟི་ཨ་ཏྠོ];
ཨ་དྷོ་པུ་པྥཾ ག་ཧེ་ཏྭཱ་ན, ཨཱ་ག་ཙྪིཾ [ཨ་ག་ཙྪིཾ (ཀ.)] པ་བྦ་ཏཾ ཨ་ཧཾ.
༢༥. ‘‘ས་ཏྟ པུ་པྥཱ་ནི ག་ཎྷི་ཏྭཱ, མ་ཏྠ་ཀེ ཨོ་ཀི་རིཾ ཨ་ཧཾ;
ཨཱ་ལོ་ཀི་ཏེ [ཨཱ་ལོ་ཀི་ཏོ (སྱཱ.)] ཙ ཝཱི་རེ་ན, པ་ཀྐཱ་མིཾ པཱ་ཙི་ནཱ་མུ་ཁོ.
༢༦. ‘‘ཨཱ་ཝཱ་སཾ ཨ་བྷི་ས་མྦྷོ་སིཾ, པ་ཏྭཱ་ན ཨ་སྶ་མཾ ཨ་ཧཾ;
ཁཱ་རི་བྷཱ་རཾ ག་ཧེ་ཏྭཱ་ན, པཱ་ཡཱ་སིཾ [པཱ་ཝི་སིཾ (སཱི.)] པ་བྦ་ཏ་ནྟ་རཾ.
༢༧. ‘‘ཨ་ཛ་ག་རོ མཾ པཱི་ལེ༹་སི, གྷོ་ར་རཱུ་པོ མ་ཧ་བྦ་ལོ;
པུ་བྦ་ཀ་མྨཾ ས་རི་ཏྭཱ་ན, ཏ་ཏྠ ཀཱ་ལ་ངྐ་ཏོ ཨ་ཧཾ.
༢༨. ‘‘ཨེ་ཀ་ཏྟིཾ་སེ ཨི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, པུ་པྥ་པཱུ་ཛཱ་ཡི་དཾ ཕ་ལཾ.
༢༩. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨ་དྷོ་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨ་དྷོ་པུ་པྥི་ཡ་ཏྠེ་ར་སྶཱ་པ་དཱ་ནཾ ཙ་ཏུ་ཏྠཾ.
༥. རཾ་སི་ས་ཉྙ་ཀ་ཏྠེ་ར་ཨ་པ་དཱ་ནཾ
༣༠. ‘‘པ་བྦ་ཏེ ཧི་མ་ཝ་ནྟ་མྷི, ཝཱ་སཾ ཀ་པྤེ་ས་ཧཾ པུ་རེ;
ཨ་ཛི་ནུ་ཏྟ་ར་ཝཱ་སོ་ཧཾ, ཝ་སཱ་མི པ་བྦ་ཏ་ནྟ་རེ.
༣༡. ‘‘སུ་ཝ་ཎྞ་ཝ་ཎྞཾ ས་མྦུ་དྡྷཾ, ས་ཏ་རཾ་སིཾ་ཝ བྷཱ་ཎུ་མཾ;
ཝ་ན་ནྟ་ར་ག་ཏཾ དི་སྭཱ, སཱ་ལ་རཱ་ཛཾ་ཝ པུ་པྥི་ཏཾ.
༣༢. ‘‘རཾ་སྱཱ [རཾ་སེ (སྱཱ. ཀ.)] ཙི་ཏྟཾ པ་སཱ་དེ་ཏྭཱ, ཝི་པ་སྶི་སྶ མ་ཧེ་སི་ནོ;
པ་གྒ་ཡ྄ཧ ཨ་ཉྫ་ལིཾ ཝ་ནྡིཾ, སི་ར་སཱ ཨུ་ཀྐུ་ཊཱི [སི་ར་སཱ ཨུ་ཀྐུ་ཊི་ཀོ (སྱཱ.), སི་ར་སུ་ཀྐུ་ཊི་ཀོ (ཀ.)] ཨ་ཧཾ.
༣༣. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, རཾ་སི་ས་ཉྙཱ་ཡི་དཾ ཕ་ལཾ.
༣༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ རཾ་སི་ས་ཉྙ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
རཾ་སི་ས་ཉྙ་ཀ་ཏྠེ་ར་སྶཱ་པ་དཱ་ནཾ པ་ཉྩ་མཾ.
༦. དུ་ཏི་ཡ་རཾ་སི་ས་ཉྙ་ཀ་ཏྠེ་ར་ཨ་པ་དཱ་ནཾ
༣༥. ‘‘པ་བྦ་ཏེ ཧི་མ་ཝ་ནྟ་མྷི, ཝཱ་ཀ་ཙཱི་ར་དྷ་རོ ཨ་ཧཾ;
ཙ་ངྐ་མ་ཉྩ ས་མཱ་རཱུ་ལ༹ྷོ, ནི་སཱི་དིཾ པཱ་ཙི་ནཱ་མུ་ཁོ.
༣༦. ‘‘པ་བྦ་ཏེ སུ་ག་ཏཾ དི་སྭཱ, ཕུ་སྶཾ ཛྷཱ་ན་ར་ཏཾ ཏ་དཱ;
ཨ་ཉྫ་ལིཾ པ་གྒ་ཧེ་ཏྭཱ་ན, རཾ་སྱཱ ཙི་ཏྟཾ པ་སཱ་ད་ཡིཾ.
༣༧. ‘‘དྭེ་ན་ཝུ་ཏེ ཨི་ཏོ ཀ་པྤེ, ཡཾ ས་ཉྙ་མ་ལ་བྷིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, རཾ་སི་ས་ཉྙཱ་ཡི་དཾ ཕ་ལཾ.
༣༨. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ རཾ་སི་ས་ཉྙ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
དུ་ཏི་ཡ་རཾ་སི་ས་ཉྙ་ཀ་ཏྠེ་ར་སྶཱ་པ་དཱ་ནཾ ཚ་ཊྛཾ.
༧. ཕ་ལ་དཱ་ཡ་ཀ་ཏྠེ་ར་ཨ་པ་དཱ་ནཾ
༣༩. ‘‘པ་བྦ་ཏེ ཧི་མ་ཝ་ནྟ་མྷི, ཁ་རཱ་ཛི་ན་དྷ་རོ ཨ་ཧཾ;
ཕུ་སྶཾ ཛི་ན་ཝ་རཾ དི་སྭཱ, ཕ་ལ་ཧ་ཏྠོ ཕ་ལཾ ཨ་དཾ.
༤༠. ‘‘ཡ་མ་ཧཾ ཕ་ལ་མ་དཱ་སིཾ, ཝི་པྤ་ས་ནྣེ་ན ཙེ་ཏ་སཱ;
བྷ་ཝེ ནི་བྦ་ཏྟ་མཱ་ན་མྷི, ཕ་ལཾ ནི་བྦ་ཏྟ་ཏེ མ་མ.
༤༡. ‘‘དྭེ་ན་ཝུ་ཏེ ཨི་ཏོ ཀ་པྤེ, ཡཾ ཕ་ལཾ ཨ་ད་དིཾ ཨ་ཧཾ;
དུ་གྒ་ཏིཾ ནཱ་བྷི་ཛཱ་ནཱ་མི, ཕ་ལ་དཱ་ན་སྶི་དཾ ཕ་ལཾ.
༤༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཕ་ལ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཕ་ལ་དཱ་ཡ་ཀ་ཏྠེ་ར་སྶཱ་པ་དཱ་ནཾ ས་ཏྟ་མཾ.
༨. ས་དྡ་ས་ཉྙ་ཀ་ཏྠེ་ར་ཨ་པ་དཱ་ནཾ
༤༣. ‘‘པ་བྦ་ཏེ ཧི་མ་ཝ་ནྟ་མྷི, ཝ་སཱ་མི པ་ཎྞ་ས་ནྠ་རེ;
ཕུ་སྶ་སྶ དྷ་མྨཾ བྷ་ཎ་ཏོ, ས་དྡེ ཙི་ཏྟཾ པ་སཱ་ད་ཡིཾ.
༤༤. ‘‘དྭེ་ན་ཝུ་ཏེ ཨི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, པུ་ཉྙ་ཀ་མྨ་སྶི་དཾ ཕ་ལཾ.
༤༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ས་དྡ་ས་ཉྙ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ས་དྡ་ས་ཉྙ་ཀ་ཏྠེ་ར་སྶཱ་པ་དཱ་ནཾ ཨ་ཊྛ་མཾ.
༩. བོ་དྷི་སི་ཉྩ་ཀ་ཏྠེ་ར་ཨ་པ་དཱ་ནཾ
༤༦. ‘‘ཝི་པ་སྶི་སྶ བྷ་ག་ཝ་ཏོ, མ་ཧཱ་བོ་དྷི་མ་ཧོ ཨ་ཧུ;
པ་བྦ་ཛྫུ་པ་ག་ཏོ ས་ནྟོ, ཨུ་པ་ག་ཙྪིཾ ཨ་ཧཾ ཏ་དཱ.
༤༧. ‘‘ཀུ་སུ་མོ་ད་ཀ་མཱ་དཱ་ཡ, བོ་དྷི་ཡཱ ཨོ་ཀི་རིཾ ཨ་ཧཾ;
མོ་ཙ་ཡི་སྶ་ཏི ནོ མུ་ཏྟོ, ནི་བྦཱ་པེ་སྶ་ཏི ནི་བྦུ་ཏོ.
༤༨. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ བོ་དྷི་མ་བྷི་སི་ཉྩ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བོ་དྷི་སི་ཉྩཱ་ཡི་དཾ ཕ་ལཾ.
༤༩. ‘‘ཏེ་ཏྟིཾ་སེ ཝ་ཏྟ་མཱ་ན་མྷི, ཀ་པྤེ ཨཱ་སུཾ ཛ་ནཱ་དྷི་པཱ;
ཨུ་ད་ཀ་སེ་ཙ་ནཱ ནཱ་མ, ཨ་ཊྛེ་ཏེ ཙ་ཀྐ་ཝ་ཏྟི་ནོ.
༥༠. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ བོ་དྷི་སི་ཉྩ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
བོ་དྷི་སི་ཉྩ་ཀ་ཏྠེ་ར་སྶཱ་པ་དཱ་ནཾ ན་ཝ་མཾ.
༡༠. པ་དུ་མ་པུ་པྥི་ཡ་ཏྠེ་ར་ཨ་པ་དཱ་ནཾ
༥༡. ‘‘པོ་ཀྑ་ར་ཝ་ནཾ པ་ཝི་ཊྛོ, བྷ་ཉྫ་ནྟོ པ་དུ་མཱ་ནི་ཧཾ;
ཏ་ཏྠ་དྡ་སཾ ཕུ་སྶཾ བུ་དྡྷཾ [ཨ་དྡ་སཾ ཕུ་སྶ་ས་མྦུ་དྡྷཾ (སཱི. སྱཱ.)], བཱ་ཏྟིཾ་ས་ཝ་ར་ལ་ཀྑ་ཎཾ.
༥༢. ‘‘པ་དུ་མ་པུ་པྥཾ ག་ཧེ་ཏྭཱ་ན, ཨཱ་ཀཱ་སེ ཨུ་ཀྑི་པིཾ ཨ་ཧཾ;
པཱ་པ་ཀ་མྨཾ ས་རི་ཏྭཱ་ན, པ་བྦ་ཛིཾ ཨ་ན་གཱ་རི་ཡཾ.
༥༣. ‘‘པ་བྦ་ཛི་ཏྭཱ་ན ཀཱ་ཡེ་ན, མ་ན་སཱ སཾ་ཝུ་ཏེ་ན ཙ;
ཝ་ཙཱི་དུ་ཙྩ་རི་ཏཾ ཧི་ཏྭཱ, ཨཱ་ཛཱི་ཝཾ པ་རི་སོ་དྷ་ཡིཾ.
༥༤. ‘‘དྭེ་ན་ཝུ་ཏེ ཨི་ཏོ ཀ་པྤེ, ཡཾ པུ་པྥ་མ་བྷི་རོ་པ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༥༥. ‘‘པ་དུ་མཱ་བྷཱ་ས་ནཱ་མཱ ཙ, ཨ་ཊྛཱ་ར་ས མ་ཧཱི་པ་ཏཱི;
ཨ་ཊྛཱ་ར་སེ་སུ ཀ་པྤེ་སུ, ཨ་ཊྛ་ཏཱ་ལཱི་ས་མཱ་སི་སུཾ.
༥༦. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ པ་དུ་མ་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི;
པ་དུ་མ་པུ་པྥི་ཡ་ཏྠེ་ར་སྶཱ་པ་དཱ་ནཾ ད་ས་མཾ.
ཏི་མི་ར་ཝ་གྒོ ན་ཝ་མོ.