༡༠. ཨ་ས་ན་བོ་དྷི་ཡ་ཏྠེ་ར་ཨ་པ་དཱ་ནཾ
༧༨. ‘‘ཛཱ་ཏི་ཡཱ ས་ཏྟ་ཝ་སྶོ་ཧཾ, ཨ་དྡ་སཾ ལོ་ཀ་ནཱ་ཡ་ཀཾ;
པ་ས་ནྣ་ཙི་ཏྟོ སུ་མ་ནོ, ཨུ་པ་ག་ཙྪིཾ ན་རུ་ཏྟ་མཾ.
༧༩. ‘‘ཏི་སྶ་སྶཱ་ཧཾ བྷ་ག་ཝ་ཏོ, ལོ་ཀ་ཛེ་ཊྛ་སྶ ཏཱ་དི་ནོ;
ཧ་ཊྛོ ཧ་ཊྛེ་ན ཙི་ཏྟེ་ན, རོ་པ་ཡིཾ བོ་དྷི་མུ་ཏྟ་མཾ.
༨༠. ‘‘ཨ་ས་ནོ ནཱ་མ་དྷེ་ཡྻེ་ན, དྷ་ར་ཎཱི་རུ་ཧ་པཱ་ད་པོ;
པ་ཉྩ་ཝ་སྶེ པ་རི་ཙ་རིཾ, ཨ་ས་ནཾ བོ་དྷི་མུ་ཏྟ་མཾ.
༨༡. ‘‘པུ་པྥི་ཏཾ པཱ་ད་པཾ དི་སྭཱ, ཨ་བྦྷུ་ཏཾ ལོ་མ་ཧཾ་ས་ནཾ;
ས་ཀཾ ཀ་མྨཾ པ་ཀི་ཏྟེ་ནྟོ, བུ་དྡྷ་སེ་ཊྛཾ ཨུ་པཱ་ག་མིཾ.
༨༢. ‘‘ཏི་སྶོ ཏ་དཱ སོ ས་མྦུ་དྡྷོ, ས་ཡ་མྦྷཱུ ཨ་གྒ་པུ་གྒ་ལོ;
བྷི་ཀྑུ་ས་ངྒྷེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.
༨༣. ‘‘‘ཡེ་ནཱ་ཡཾ རོ་པི་ཏཱ བོ་དྷི, བུ་དྡྷ་པཱུ་ཛཱ ཙ ས་ཀྐ་ཏཱ;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༨༤. ‘‘‘ཏིཾ་ས་ཀ་པྤཱ་ནི དེ་ཝེ་སུ, དེ་ཝ་ར་ཛྫཾ ཀ་རི་སྶ་ཏི;
ཙ་ཏུ་ས་ཊྛི ཙ་ཀྑ་ཏྟུཾ སོ, ཙ་ཀྐ་ཝ་ཏྟཱི བྷ་ཝི་སྶ་ཏི.
༨༥. ‘‘‘ཏུ་སི་ཏཱ ཧི ཙ་ཝི་ཏྭཱ་ན, སུ་ཀྐ་མཱུ་ལེ་ན ཙོ་དི་ཏོ;
དྭེ ས་མྤ་ཏྟཱི ཨ་ནུ་བྷོ་ཏྭཱ, མ་ནུ་སྶ་ཏྟེ ར་མི་སྶ་ཏི.
༨༦. ‘‘‘པ་དྷཱ་ན་པ་ཧི་ཏ་ཏྟོ སོ, ཨུ་པ་ས་ནྟོ ནི་རཱུ་པ་དྷི;
ས་བྦཱ་ས་ཝེ པ་རི་ཉྙཱ་ཡ, ནི་བྦཱ་ཡི་སྶ་ཏི་ནཱ་ས་ཝོ’.
༨༧. ‘‘ཝི་ཝེ་ཀ་མ་ནུ་ཡུ་ཏྟོ་ཧཾ, ཨུ་པ་ས་ནྟོ ནི་རཱུ་པ་དྷི;
ནཱ་གོ་ཝ བ་ནྡྷ་ནཾ ཚེ་ཏྭཱ, ཝི་ཧ་རཱ་མི ཨ་ནཱ་ས་ཝོ.
༨༨. ‘‘དྭེ་ན་ཝུ་ཏེ ཨི་ཏོ ཀ་པྤེ, བོ་དྷིཾ རོ་པེ་ས་ཧཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, བོ་དྷི་རོ་པ་སྶི་དཾ ཕ་ལཾ.
༨༩. ‘‘ཙ་ཏུ་ས་ཏྟ་ཏི་ཏོ ཀ་པྤེ, ད་ཎྜ་སེ་ནོ་ཏི ཝི་སྶུ་ཏོ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི ཏ་དཱ ཨ་ཧུཾ.
༩༠. ‘‘ཏེ་ས་ཏྟ་ཏི་མྷི་ཏོ ཀ་པྤེ, ས་ཏྟཱ་ཧེ་སུཾ མ་ཧཱི་པ་ཏཱི;
ས་མ་ནྟ་ནེ་མི་ནཱ་མེ་ན, རཱ་ཛཱ་ནོ ཙ་ཀྐ་ཝ་ཏྟི་ནོ.
༩༡. ‘‘པ་ཎྞ་ཝཱི་ས་ཏི་ཏོ ཀ་པྤེ, པུ་ཎྞ་ཀོ ནཱ་མ ཁ་ཏྟི་ཡོ;
ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.
༩༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨ་ས་ན་བོ་དྷི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨ་ས་ན་བོ་དྷི་ཡ་ཏྠེ་ར་སྶཱ་པ་དཱ་ནཾ ད་ས་མཾ.
བཱི་ཛ་ནི་ཝ་གྒོ ཚ་ཊྛོ.