༩. དྷ་མྨ་རུ་ཙི་ཡ་ཏྠེ་ར་ཨ་པ་དཱ་ནཾ
༡༦༤. ‘‘ཡ་དཱ དཱི་པ་ངྐ་རོ བུ་དྡྷོ, སུ་མེ་དྷཾ བྱཱ་ཀ་རཱི ཛི་ནོ;
‘ཨ་པ་རི་མེ་ཡྻེ ཨི་ཏོ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༦༥. ‘‘‘ཨི་མ་སྶ ཛ་ནི་ཀཱ མཱ་ཏཱ, མཱ་ཡཱ ནཱ་མ བྷ་ཝི་སྶ་ཏི;
པི་ཏཱ སུ་དྡྷོ་ད་ནོ ནཱ་མ, ཨ་ཡཾ ཧེ་སྶ་ཏི གོ་ཏ་མོ.
༡༦༦. ‘‘‘པ་དྷཱ་ནཾ པ་ད་ཧི་ཏྭཱ་ན, ཀ་ཏྭཱ དུ་ཀྐ་ར་ཀཱ་རི་ཀཾ;
ཨ་སྶ་ཏྠ་མཱུ་ལེ ས་མྦུ་དྡྷོ, བུ་ཛ྄ཛྷི་སྶ་ཏི མ་ཧཱ་ཡ་སོ.
༡༦༧. ‘‘‘ཨུ་པ་ཏི་སྶོ ཀོ་ལི་ཏོ ཙ, ཨ་གྒཱ ཧེ་སྶ་ནྟི སཱ་ཝ་ཀཱ;
ཨཱ་ན་ནྡོ ནཱ་མ ནཱ་མེ་ན [ཨཱ་ན་ནྡོ ནཱ་མུ་པ་ཊྛཱ་ཀོ (སྱཱ.)], ཨུ་པ་ཊྛི་སྶ་ཏི་མཾ ཛི་ནཾ.
༡༦༨. ‘‘‘ཁེ་མཱ ཨུ་པྤ་ལ་ཝ་ཎྞཱ ཙ, ཨ་གྒཱ ཧེ་སྶ་ནྟི སཱ་ཝི་ཀཱ;
ཙི་ཏྟོ ཨཱ་ལ༹་ཝ་ཀོ ཙེ་ཝ, ཨ་གྒཱ ཧེ་སྶ་ནྟུ་པཱ་ས་ཀཱ.
༡༦༩. ‘‘‘ཁུ་ཛྫུ་ཏྟ་རཱ ན་ནྡ་མཱ་ཏཱ, ཨ་གྒཱ ཧེ་སྶ་ནྟུ་པཱ་སི་ཀཱ;
བོ་དྷི ཨི་མ་སྶ ཝཱི་ར་སྶ, ཨ་སྶ་ཏྠོ་ཏི པ་ཝུ་ཙྩ་ཏི’.
༡༧༠. ‘‘ཨི་དཾ སུ་ཏྭཱ་ན ཝ་ཙ་ནཾ, ཨ་ས་མ་སྶ མ་ཧེ་སི་ནོ;
ཨཱ་མོ་དི་ཏཱ ན་ར་མ་རཱུ, ན་མ་སྶ་ནྟི ཀ་ཏ་ཉྫ་ལཱི.
༡༧༡. ‘‘ཏ་དཱ་ཧཾ མཱ་ཎ་ཝོ ཨཱ་སིཾ, མེ་གྷོ ནཱ་མ སུ་སི་ཀྑི་ཏོ;
སུ་ཏྭཱ བྱཱ་ཀ་ར་ཎཾ སེ་ཊྛཾ, སུ་མེ་དྷ་སྶ མ་ཧཱ་མུ་ནེ.
༡༧༢. ‘‘སཾ་ཝི་ས་ཊྛོ བྷ་ཝི་ཏྭཱ་ན, སུ་མེ་དྷེ ཀ་རུ་ཎཱ་ས་ཡེ [ཀ་རུ་ཎཱ་ལ་ཡེ (སྱཱ.)];
པ་བྦ་ཛ་ནྟ་ཉྩ ཏཾ ཝཱི་རཾ, ས་ཧཱ་ཝ ཨ་ནུ་པ་བྦ་ཛིཾ.
༡༧༣. ‘‘སཾ་ཝུ་ཏོ པཱ་ཏི་མོ་ཀྑ་སྨིཾ, ཨི་ནྡྲི་ཡེ་སུ ཙ པ་ཉྩ་སུ;
སུ་དྡྷཱ་ཛཱི་ཝོ ས་ཏོ ཝཱི་རོ, ཛི་ན་སཱ་ས་ན་ཀཱ་ར་ཀོ.
༡༧༤. ‘‘ཨེ་ཝཾ ཝི་ཧ་ར་མཱ་ནོ་ཧཾ, པཱ་པ་མི་ཏྟེ་ན ཀེ་ན་ཙི;
ནི་ཡོ་ཛི་ཏོ ཨ་ནཱ་ཙཱ་རེ, སུ་མ་གྒཱ པ་རི་དྷཾ་སི་ཏོ.
༡༧༥. ‘‘ཝི་ཏ་ཀྐ་ཝ་སི་ཀོ ཧུ་ཏྭཱ, སཱ་ས་ན་ཏོ ཨ་པ་ཀྐ་མིཾ;
པ་ཙྪཱ ཏེ་ན ཀུ་མི་ཏྟེ་ན, པ་ཡུ་ཏྟོ མཱ་ཏུ་གྷཱ་ཏ་ནཾ.
༡༧༦. ‘‘ཨ་ཀ་རིཾ ཨཱ་ན་ནྟ་རི་ཡཾ [ཨ་ཀ་རིཾ ན་ནྟ་རི་ཡ་ཉྩ (སྱཱ. ཀ.)], གྷཱ་ཏ་ཡིཾ དུ་ཊྛ་མཱ་ན་སོ;
ཏ་ཏོ ཙུ་ཏོ མ་ཧཱ་ཝཱི་ཙིཾ, ཨུ་པ་པ་ནྣོ སུ་དཱ་རུ་ཎཾ.
༡༧༧. ‘‘ཝི་ནི་པཱ་ཏ་ག་ཏོ ས་ནྟོ, སཾ་ས་རིཾ དུ་ཀྑི་ཏོ ཙི་རཾ;
ན པུ་ནོ ཨ་དྡ་སཾ ཝཱི་རཾ, སུ་མེ་དྷཾ ན་ར་པུ་ངྒ་ཝཾ.
༡༧༨. ‘‘ཨ་སྨིཾ ཀ་པྤེ ས་མུ་དྡ་མྷི, མ་ཙྪོ ཨཱ་སིཾ ཏི་མི་ངྒ་ལོ;
དི་སྭཱ་ཧཾ སཱ་ག་རེ ནཱ་ཝཾ, གོ་ཙ་ར་ཏྠ་མུ་པཱ་ག་མིཾ.
༡༧༩. ‘‘དི་སྭཱ མཾ ཝཱ་ཎི་ཛཱ བྷཱི་ཏཱ, བུ་དྡྷ་སེ་ཊྛ་མ་ནུ་སྶ་རུཾ;
གོ་ཏ་མོ་ཏི མ་ཧཱ་གྷོ་སཾ, སུ་ཏྭཱ ཏེ་ཧི ཨུ་དཱི་རི་ཏཾ.
༡༨༠. ‘‘པུ་བྦ་ས་ཉྙཾ ས་རི་ཏྭཱ་ན, ཏ་ཏོ ཀཱ་ལ་ངྐ་ཏོ ཨ་ཧཾ;
སཱ་ཝ་ཏྠི་ཡཾ ཀུ་ལེ ཨི་དྡྷེ, ཛཱ་ཏོ བྲཱ་ཧྨ་ཎ་ཛཱ་ཏི་ཡཾ.
༡༨༡. ‘‘ཨཱ་སིཾ དྷ་མྨ་རུ་ཙི ནཱ་མ, ས་བྦ་པཱ་པ་ཛི་གུ་ཙྪ་ཀོ;
དི་སྭཱ་ཧཾ ལོ་ཀ་པ་ཛྫོ་ཏཾ, ཛཱ་ཏི་ཡཱ ས་ཏྟ་ཝ་སྶི་ཀོ.
༡༨༢. ‘‘མ་ཧཱ་ཛེ་ཏ་ཝ་ནཾ ག་ནྟྭཱ, པ་བྦ་ཛིཾ ཨ་ན་གཱ་རི་ཡཾ;
ཨུ་པེ་མི བུ་དྡྷཾ ཏི་ཀྑ་ཏྟུཾ, ར་ཏྟི་ཡཱ དི་ཝ་ས་སྶ ཙ.
༡༨༣. ‘‘ཏ་དཱ དི་སྭཱ མུ་ནི ཨཱ་ཧ, ཙི་རཾ དྷ་མྨ་རུ་ཙཱི་ཏི མཾ;
ཏ་ཏོ་ཧཾ ཨ་ཝ་ཙཾ བུ་དྡྷཾ, པུ་བྦ་ཀ་མྨ་པ་བྷཱ་ཝི་ཏཾ.
༡༨༤. ‘‘སུ་ཙི་རཾ ས་ཏ་པུ་ཉྙ་ལ་ཀྑ་ཎཾ, པ་ཏི་པུ་བྦེ་ན ཝི་སུ་དྡྷ་པ་ཙྩ་ཡཾ;
ཨ་ཧ་མ་ཛྫ་སུ་པེ་ཀྑ་ནཾ ཝ་ཏ, ཏ་ཝ པ་སྶཱ་མི ནི་རུ་པ་མཾ ཝི་གྒ་ཧཾ [ནི་རཱུ་པ་མ་གྒ་ཧཾ (སཱི.)].
༡༨༥. ‘‘སུ་ཙི་རཾ ཝི་ཧ་ཏ་ཏྟ་མོ མ་ཡཱ, སུ་ཙི་ར་ཀྑེ་ན ན་དཱི ཝི་སོ་སི་ཏཱ;
སུ་ཙི་རཾ ཨ་མ་ལཾ ཝི་སོ་དྷི་ཏཾ, ན་ཡ་ནཾ ཉཱ་ཎ་མ་ཡཾ མ་ཧཱ་མུ་ནེ.
༡༨༦. ‘‘ཙི་ར་ཀཱ་ལ་ས་མ་ངྒི་ཏོ [ཙི་ར་ཀཱ་ལཾ ས་མཱ་ག་ཏོ (པཱི.)] ཏ་ཡཱ, ཨ་ཝི་ན་ཊྛོ པུ་ན་ར་ནྟ་རཾ ཙི་རཾ;
པུ་ན་ར་ཛྫ་ས་མཱ་ག་ཏོ ཏ་ཡཱ, ན ཧི ན་སྶ་ནྟི ཀ་ཏཱ་ནི གོ་ཏ་མ.
༡༨༧. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༡༨༨. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༡༨༩. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ དྷ་མྨ་རུ་ཙི་ཡོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
དྷ་མྨ་རུ་ཙི་ཡ་ཏྠེ་ར་སྶཱ་པ་དཱ་ནཾ ན་ཝ་མཾ.