༡༠. སཱ་ལ་མ་ཎྜ་པི་ཡ་ཏྠེ་ར་ཨ་པ་དཱ་ནཾ
༡༩༠. ‘‘ཨ་ཛ྄ཛྷོ་གཱ་ཧེ་ཏྭཱ སཱ་ལ་ཝ་ནཾ, སུ་ཀ་ཏོ ཨ་སྶ་མོ མ་མ;
སཱ་ལ་པུ་པྥེ་ཧི ས་ཉྪ་ནྣོ, ཝ་སཱ་མི ཝི་པི་ནེ ཏ་དཱ.
༡༩༡. ‘‘པི་ཡ་ད་སྶཱི ཙ བྷ་ག་ཝཱ, ས་ཡ་མྦྷཱུ ཨ་གྒ་པུ་གྒ་ལོ;
ཝི་ཝེ་ཀ་ཀཱ་མོ ས་མྦུ་དྡྷོ, སཱ་ལ་ཝ་ན་མུ་པཱ་ག་མི.
༡༩༢. ‘‘ཨ་སྶ་མཱ ཨ་བྷི་ནི་ཀྑ་མྨ, པ་ཝ་ནཾ ཨ་ག་མཱ་ས་ཧཾ;
མཱུ་ལ་ཕ་ལཾ ག་ཝེ་ས་ནྟོ, ཨཱ་ཧི་ཎྜཱ་མི ཝ་ནེ ཏ་དཱ.
༡༩༣. ‘‘ཏ་ཏྠ་དྡ་སཱ་སིཾ ས་མྦུ་དྡྷཾ, པི་ཡ་ད་སྶིཾ མ་ཧཱ་ཡ་སཾ;
སུ་ནི་སི་ནྣཾ ས་མཱ་པ་ནྣཾ, ཝི་རོ་ཙ་ནྟཾ མ་ཧཱ་ཝ་ནེ.
༡༩༤. ‘‘ཙ་ཏུ་ད་ཎྜེ ཋ་པེ་ཏྭཱ་ན, བུ་དྡྷ་སྶ ཨུ་པ་རཱི ཨ་ཧཾ;
མ་ཎྜ་པཾ སུ་ཀ་ཏཾ ཀ་ཏྭཱ, སཱ་ལ་པུ་པྥེ་ཧི ཚཱ་ད་ཡིཾ.
༡༩༥. ‘‘ས་ཏྟཱ་ཧཾ དྷཱ་ར་ཡི་ཏྭཱ་ན, མ་ཎྜ་པཾ སཱ་ལ་ཚཱ་དི་ཏཾ;
ཏ་ཏྠ ཙི་ཏྟཾ པ་སཱ་དེ་ཏྭཱ, བུ་དྡྷ་སེ་ཊྛ་མ་ཝ་ནྡ་ཧཾ.
༡༩༦. ‘‘བྷ་ག་ཝཱ ཏ་མྷི ས་མ་ཡེ, ཝུ་ཊྛ་ཧི་ཏྭཱ ས་མཱ་དྷི་ཏོ;
ཡུ་ག་མ་ཏྟཾ པེ་ཀྑ་མཱ་ནོ, ནི་སཱི་དི པུ་རི་སུ་ཏྟ་མོ.
༡༩༧. ‘‘སཱ་ཝ་ཀོ ཝ་རུ་ཎོ ནཱ་མ, པི་ཡ་ད་སྶི་སྶ ས་ཏྠུ་ནོ;
ཝ་སཱི་ས་ཏ་ས་ཧ་སྶེ་ཧི, ཨུ་པ་ག་ཙྪི ཝི་ནཱ་ཡ་ཀཾ.
༡༩༨. ‘‘པི་ཡ་ད་སྶཱི ཙ བྷ་ག་ཝཱ, ལོ་ཀ་ཛེ་ཊྛོ ན་རཱ་ས་བྷོ;
བྷི་ཀྑུ་ས་ངྒྷེ ནི་སཱི་དི་ཏྭཱ, སི་ཏཾ པཱ་ཏུ་ཀ་རཱི ཛི་ནོ.
༡༩༩. ‘‘ཨ་ནུ་རུ་དྡྷོ ཨུ་པ་ཊྛཱ་ཀོ, པི་ཡ་ད་སྶི་སྶ ས་ཏྠུ་ནོ;
ཨེ་ཀཾ་སཾ ཙཱི་ཝ་རཾ ཀ་ཏྭཱ, ཨ་པུ་ཙྪི་ཏྠ མ་ཧཱ་མུ་ནིཾ.
༢༠༠. ‘‘‘ཀོ ནུ ཁོ བྷ་ག་ཝཱ ཧེ་ཏུ, སི་ཏ་ཀ་མྨ་སྶ ས་ཏྠུ་ནོ;
ཀཱ་ར་ཎེ ཝི་ཛྫ་མཱ་ན་མྷི, ས་ཏྠཱ པཱ་ཏུ་ཀ་རེ སི་ཏཾ’.
༢༠༡. ‘‘‘ས་ཏྟཱ་ཧཾ སཱ་ལ་ཙྪ་ད་ནཾ [པུ་པྥ་ཚ་ད་ནཾ (སཱི. སྱཱ. པཱི.)], ཡོ མེ དྷཱ་རེ་སི མཱ་ཎ་ཝོ;
ཏ་སྶ ཀ་མྨཾ ས་རི་ཏྭཱ་ན, སི་ཏཾ པཱ་ཏུ་ཀ་རིཾ ཨ་ཧཾ.
༢༠༢. ‘‘‘ཨ་ནོ་ཀཱ་སཾ ན པ་སྶཱ་མི, ཡ་ཏྠ [ཡཾ ཏཾ (སྱཱ. པཱི. ཀ.)] པུ་ཉྙཾ ཝི་པ་ཙྩ་ཏི;
དེ་ཝ་ལོ་ཀེ མ་ནུ་སྶེ ཝཱ, ཨོ་ཀཱ་སོ་ཝ ན ས་མྨ་ཏི.
༢༠༣. ‘‘‘དེ་ཝ་ལོ་ཀེ ཝ་ས་ནྟ་སྶ, པུ་ཉྙ་ཀ་མྨ་ས་མ་ངྒི་ནོ;
ཡཱ་ཝ་ཏཱ པ་རི་སཱ ཏ་སྶ, སཱ་ལ་ཙྪ་ནྣཱ བྷ་ཝི་སྶ་ཏི.
༢༠༤. ‘‘‘ཏ་ཏྠ དི་བྦེ་ཧི ན་ཙྩེ་ཧི, གཱི་ཏེ་ཧི ཝཱ་དི་ཏེ་ཧི ཙ;
ར་མི་སྶ་ཏི ས་དཱ ས་ནྟོ, པུ་ཉྙ་ཀ་མྨ་ས་མཱ་ཧི་ཏོ.
༢༠༥. ‘‘‘ཡཱ་ཝ་ཏཱ པ་རི་སཱ ཏ་སྶ, ག་ནྡྷ་ག་ནྡྷཱི བྷ་ཝི་སྶ་ཏི;
སཱ་ལ་སྶ པུ་པྥ་ཝ་སྶོ ཙ, པ་ཝ་སྶི་སྶ་ཏི ཏཱ་ཝ་དེ.
༢༠༦. ‘‘‘ཏ་ཏོ ཙུ་ཏོ་ཡཾ མ་ནུ་ཛོ, མཱ་ནུ་སཾ ཨཱ་ག་མི་སྶ་ཏི;
ཨི་དྷཱ་པི སཱ་ལ་ཙྪ་ད་ནཾ, ས་བྦ་ཀཱ་ལཾ དྷ་རི་སྶ་ཏི [དྷ་རི་ཡ་ཏི (སཱི. པཱི.)].
༢༠༧. ‘‘‘ཨི་དྷ ན་ཙྩ་ཉྩ གཱི་ཏ་ཉྩ, ས་མྨ་ཏཱ་ལ༹་ས་མཱ་ཧི་ཏཾ;
པ་རི་ཝཱ་རེ་སྶ་ནྟི མཾ ནི་ཙྩཾ, བུ་དྡྷ་པཱུ་ཛཱ་ཡི་དཾ ཕ་ལཾ.
༢༠༨. ‘‘‘ཨུ་གྒ་ཙྪ་ནྟེ ཙ སཱུ་རི་ཡེ, སཱ་ལ་ཝ་སྶཾ པ་ཝ་སྶ་ཏི;
པུ་ཉྙ་ཀ་མྨེ་ན སཾ་ཡུ་ཏྟཾ, ཝ་སྶ་ཏེ ས་བྦ་ཀཱ་ལི་ཀཾ.
༢༠༩. ‘‘‘ཨ་ཊྛཱ་ར་སེ ཀ་པྤ་ས་ཏེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༢༡༠. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
ས་བྦཱ་ས་ཝེ པ་རི་ཉྙཱ་ཡ, ནི་བྦཱ་ཡི་སྶ་ཏི་ནཱ་ས་ཝོ.
༢༡༡. ‘‘‘དྷ་མྨཾ ཨ་བྷི་ས་མེ་ནྟ་སྶ, སཱ་ལ་ཙྪ་ནྣཾ བྷ་ཝི་སྶ་ཏི;
ཙི་ཏ་ཀེ ཛྷཱ་ཡ་མཱ་ན་སྶ, ཚ་ད་ནཾ ཏ་ཏྠ ཧེ་སྶ་ཏི’.
༢༡༢. ‘‘ཝི་པཱ་ཀཾ ཀི་ཏྟ་ཡི་ཏྭཱ་ན, པི་ཡ་ད་སྶཱི མ་ཧཱ་མུ་ནི;
པ་རི་སཱ་ཡ དྷ་མྨཾ དེ་སེ་སི, ཏ་པྤེ་ནྟོ དྷ་མྨ་ཝུ་ཊྛི་ཡཱ.
༢༡༣. ‘‘ཏིཾ་ས་ཀ་པྤཱ་ནི དེ་ཝེ་སུ, དེ་ཝ་ར་ཛྫ་མ་ཀཱ་ར་ཡིཾ;
ས་ཊྛི ཙ ས་ཏྟ་ཀྑ་ཏྟུ་ཉྩ, ཙ་ཀྐ་ཝ་ཏྟཱི ཨ་ཧོ་ས་ཧཾ.
༢༡༤. ‘‘དེ་ཝ་ལོ་ཀཱ ཨི་དྷཱ་ག་ནྟྭཱ, ལ་བྷཱ་མི ཝི་པུ་ལཾ སུ་ཁཾ;
ཨི་དྷཱ་པི སཱ་ལ་ཙྪ་ད་ནཾ, མ་ཎྜ་པ་སྶ ཨི་དཾ ཕ་ལཾ.
༢༡༥. ‘‘ཨ་ཡཾ པ་ཙྪི་མ་ཀོ མ་ཡ྄ཧཾ, ཙ་རི་མོ ཝ་ཏྟ་ཏེ བྷ་ཝོ;
ཨི་དྷཱ་པི སཱ་ལ་ཙྪ་ད་ནཾ, ཧེ་སྶ་ཏི ས་བྦ་ཀཱ་ལི་ཀཾ.
༢༡༦. ‘‘མ་ཧཱ་མུ་ནིཾ ཏོ་ས་ཡི་ཏྭཱ, གོ་ཏ་མཾ ས་ཀྱ་པུ་ངྒ་ཝཾ;
པ་ཏྟོ་མྷི ཨ་ཙ་ལཾ ཋཱ་ནཾ, ཧི་ཏྭཱ ཛ་ཡ་པ་རཱ་ཛ་ཡཾ.
༢༡༧. ‘‘ཨ་ཊྛཱ་ར་སེ ཀ་པྤ་ས་ཏེ, ཡཾ བུ་དྡྷ་མ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༢༡༨. ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༢༡༩. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༢༢༠. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ སཱ་ལ་མ་ཎྜ་པི་ཡོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
སཱ་ལ་མ་ཎྜ་པི་ཡ་ཏྠེ་ར་སྶཱ་པ་དཱ་ནཾ ད་ས་མཾ.
པཾ་སུ་ཀཱུ་ལ་ཝ་གྒོ ཨེ་ཀཱུ་ན་པ་ཉྙཱ་ས་མོ.