༤༩. པཾ་སུ་ཀཱུ་ལ་ཝ་གྒོ
༡. པཾ་སུ་ཀཱུ་ལ་ས་ཉྙ་ཀ་ཏྠེ་ར་ཨ་པ་དཱ་ནཾ
༡. ‘‘ཏི་སྶོ ནཱ་མཱ་སི བྷ་ག་ཝཱ, ས་ཡ་མྦྷཱུ ཨ་གྒ་པུ་གྒ་ལོ;
པཾ་སུ་ཀཱུ་ལཾ ཋ་པེ་ཏྭཱ་ན, ཝི་ཧཱ་རཾ པཱ་ཝི་སཱི ཛི་ནོ.
༢. ‘‘ཝི་ན་ཏཾ [ས་ཛྫི་ཏཾ (སྱཱ.), ཏི་ཡ་ནྟཾ (པཱི.)] དྷ་ནུ་མཱ་དཱ་ཡ, བྷ་ཀྑ་ཏྠཱ་ཡ ཙ་རིཾ ཨ་ཧཾ;
མ་ཎྜ་ལ་གྒཾ ག་ཧེ་ཏྭཱ་ན, ཀཱ་ན་ནཾ པཱ་ཝི་སིཾ ཨ་ཧཾ.
༣. ‘‘ཏ་ཏྠ་དྡ་སཾ པཾ་སུ་ཀཱུ་ལཾ, དུ་མ་གྒེ ལ་གྒི་ཏཾ ཏ་དཱ;
ཙཱ་པཾ ཏ་ཏྠེ་ཝ ནི་ཀྑི་པྤ, སི་རེ ཀ་ཏྭཱ་ན ཨ་ཉྫ་ལིཾ.
༤. ‘‘པ་ས་ནྣ་ཙི་ཏྟོ སུ་མ་ནོ, ཝི་པུ་ལཱ་ཡ ཙ པཱི་ཏི་ཡཱ;
བུ་དྡྷ་སེ་ཊྛཾ ས་རི་ཏྭཱ་ན, པཾ་སུ་ཀཱུ་ལཾ ཨ་ཝ་ནྡ་ཧཾ.
༥. ‘‘དྭེ་ན་ཝུ་ཏེ ཨི་ཏོ ཀ་པྤེ, པཾ་སུ་ཀཱུ་ལ་མ་ཝ་ནྡ་ཧཾ;
དུ་གྒ་ཏིཾ ནཱ་བྷི་ཛཱ་ནཱ་མི, ཝ་ནྡ་ནཱ་ཡ ཨི་དཾ ཕ་ལཾ.
༦. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ནཱ་གོ་ཝ བ་ནྡྷ་ནཾ ཚེ་ཏྭཱ, ཝི་ཧ་རཱ་མི ཨ་ནཱ་ས་ཝོ.
༧. ‘‘སྭཱ་ག་ཏཾ ཝ་ཏ མེ ཨཱ་སི, མ་མ བུ་དྡྷ་སྶ ས་ནྟི་ཀེ;
ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ནཾ.
༨. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ པཾ་སུ་ཀཱུ་ལ་ས་ཉྙ་ཀོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
པཾ་སུ་ཀཱུ་ལ་ས་ཉྙ་ཀ་ཏྠེ་ར་སྶཱ་པ་དཱ་ནཾ པ་ཋ་མཾ.
༢. བུ་དྡྷ་ས་ཉྙ་ཀ་ཏྠེ་ར་ཨ་པ་དཱ་ནཾ
༩. ‘‘ཨ་ཛ྄ཛྷཱ་ཡ་ཀོ མ་ནྟ་དྷ་རོ, ཏི་ཎྞཾ ཝེ་དཱ་ན པཱ་ར་གཱུ;
ལ་ཀྑ་ཎེ ཨི་ཏི་ཧཱ་སེ ཙ, ས་ནི་གྷ་ཎྜུ་ས་ཀེ་ཊུ་བྷེ.
༡༠. ‘‘ན་དཱི་སོ་ཏ་པ་ཊི་བྷཱ་གཱ, སི་སྶཱ ཨཱ་ཡ་ནྟི མེ ཏ་དཱ;
ཏེ་སཱ་ཧཾ མ་ནྟེ [མ་ནྟཾ (སྱཱ. ཀ.)] ཝཱ་ཙེ་མི, ར་ཏྟི་ནྡི་ཝ་མ་ཏ་ནྡི་ཏོ.
༡༡. ‘‘སི་དྡྷ་ཏྠོ ནཱ་མ ས་མྦུ་དྡྷོ, ལོ་ཀེ ཨུ་པྤ་ཛྫི ཏཱ་ཝ་དེ;
ཏ་མ་ནྡྷ་ཀཱ་རཾ ནཱ་སེ་ཏྭཱ, ཉཱ་ཎཱ་ལོ་ཀཾ པ་ཝ་ཏྟ་ཡི.
༡༢. ‘‘མ་མ ཨ་ཉྙ་ཏ་རོ སི་སྶོ, སི་སྶཱ་ནཾ སོ ཀ་ཐེ་སི མེ;
སུ་ཏྭཱ་ན ཏེ ཨེ་ཏ་མ་ཏྠཾ, ཨཱ་རོ་ཙེ་སུཾ མ་མཾ ཏ་དཱ.
༡༣. ‘‘བུ་དྡྷོ ལོ་ཀེ ས་མུ་པྤ་ནྣོ, ས་བྦ་ཉྙཱུ ལོ་ཀ་ནཱ་ཡ་ཀོ;
ཏ་སྶཱ་ནུ་ཝ་ཏྟ་ཏི ཛ་ནོ, ལཱ་བྷོ ཨ་མྷཾ ན ཝི་ཛྫ་ཏི [ན ཧེ་སྶ་ཏི (སཱི. པཱི.)].
༡༤. ‘‘ཨ་དྷི་ཙྩུ་པྤ་ཏྟི་ཀཱ བུ་དྡྷཱ, ཙ་ཀྑུ་མ་ནྟོ མ་ཧཱ་ཡ་སཱ;
ཡཾ་ནཱུ་ནཱ་ཧཾ བུ་དྡྷ་སེ་ཊྛཾ, པ་སྶེ་ཡྻཾ ལོ་ཀ་ནཱ་ཡ་ཀཾ.
༡༥. ‘‘ཨ་ཛི་ནཾ མེ ག་ཧེ་ཏྭཱ་ན, ཝཱ་ཀ་ཙཱི་རཾ ཀ་མ་ཎྜ་ལུཾ;
ཨ་སྶ་མཱ ཨ་བྷི་ནི་ཀྑ་མྨ, སི་སྶེ ཨཱ་མ་ནྟ་ཡིཾ ཨ་ཧཾ.
༡༦. ‘‘ཨོ་དུ་མྦ་རི་ཀ་པུ་པྥཾ་ཝ, ཙ་ནྡ་མྷི ས་ས་ཀཾ ཡ་ཐཱ;
ཝཱ་ཡ་སཱ་ནཾ ཡ་ཐཱ ཁཱི་རཾ, དུ་ལླ་བྷོ ལོ་ཀ་ནཱ་ཡ་ཀོ [དུ་ལླ་བྷཱ ལོ་ཀ་ནཱ་ཡ་ཀཱ (སཱི.), དུ་ལླ་བྷཾ ལོ་ཀ་ནཱ་ཡ་ཀཾ (སྱཱ. པཱི. ཀ.)].
༡༧. ‘‘བུ་དྡྷོ ལོ་ཀ་མྷི ཨུ་པྤ་ནྣོ, མ་ནུ་སྶ་ཏྟ་མྤི དུ་ལླ་བྷཾ;
ཨུ་བྷོ་སུ ཝི་ཛྫ་མཱ་ནེ་སུ, ས་ཝ་ན་ཉྩ སུ་དུ་ལླ་བྷཾ.
༡༨. ‘‘བུ་དྡྷོ ལོ་ཀེ ས་མུ་པྤ་ནྣོ, ཙ་ཀྑུཾ ལ་ཙྪཱ་མ ནོ བྷ་ཝཾ;
ཨེ་ཐ ས་བྦེ ག་མི་སྶཱ་མ, ས་མྨཱ་ས་མྦུ་དྡྷ་ས་ནྟི་ཀཾ.
༡༩. ‘‘ཀ་མ་ཎྜ་ལུ་དྷ་རཱ ས་བྦེ, ཁ་རཱ་ཛི་ན་ནི་ཝཱ་སི་ནོ;
ཏེ ཛ་ཊཱ བྷཱ་ར་བྷ་རི་ཏཱ, ནི་ཀྑ་མུཾ ཝི་པི་ནཱ ཏ་དཱ.
༢༠. ‘‘ཡུ་ག་མ་ཏྟཾ པེ་ཀྑ་མཱ་ནཱ, ཨུ་ཏྟ་མ་ཏྠཾ ག་ཝེ་སི་ནོ;
ཨཱ་ས་ཏྟི་དོ་ས་ར་ཧི་ཏཱ, ཨ་ས་མྦྷཱི་ཏཱ་ཝ ཀེ་ས་རཱི.
༢༡. ‘‘ཨ་པྤ་ཀི་ཙྩཱ ཨ་ལོ་ལུ་པྤཱ, ནི་པ་ཀཱ ས་ནྟ་ཝུ་ཏྟི་ནོ;
ཨུ་ཉྪཱ་ཡ ཙ་ར་མཱ་ནཱ ཏེ, བུ་དྡྷ་སེ་ཊྛ་མུ་པཱ་ག་མུཾ.
༢༢. ‘‘དི་ཡ་ཌྜྷ་ཡོ་ཛ་ནེ སེ་སེ, བྱཱ་དྷི མེ ཨུ་པ་པ་ཛྫ་ཐ;
བུ་དྡྷ་སེ་ཊྛཾ ས་རི་ཏྭཱ་ན, ཏ་ཏྠ ཀཱ་ལ་ངྐ་ཏོ ཨ་ཧཾ.
༢༣. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ ས་ཉྙ་མ་ལ་བྷིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་ས་ཉྙཱ་ཡི་དཾ ཕ་ལཾ.
༢༤. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༢༥. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༢༦. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ བུ་དྡྷ་ས་ཉྙ་ཀོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
བུ་དྡྷ་ས་ཉྙ་ཀ་ཏྠེ་ར་སྶཱ་པ་དཱ་ནཾ དུ་ཏི་ཡཾ.
༣. བྷི་ས་དཱ་ཡ་ཀ་ཏྠེ་ར་ཨ་པ་དཱ་ནཾ
༢༧. ‘‘ཨོ་ག་ཡ྄ཧ ཡཾ [ཨོ་ག་ཡ྄ཧཱ་ཧཾ (སཱི. སྱཱ. པཱི.)] པོ་ཀྑ་ར་ཎིཾ, ནཱ་ནཱ་ཀུ་ཉྫ་ར་སེ་ཝི་ཏཾ;
ཨུ་དྡྷ་རཱ་མི བྷི་སཾ ཏ་ཏྠ, གྷཱ་ས་ཧེ་ཏུ [ཨ་ས་ན་ཧེ་ཏུ (སྱཱ.)] ཨ་ཧཾ ཏ་དཱ.
༢༨. ‘‘བྷ་ག་ཝཱ ཏ་མྷི ས་མ་ཡེ, པ་དུ་མུ་ཏྟ་ར་ས་ཝ྄ཧ་ཡོ;
ར་ཏྟ་མྦ་ར་དྷ་རོ [ར་ཏྟ་ཀ་མྦ་ལ་དྷ་རོ (སྱཱ.)] བུ་དྡྷོ, ག་ཙྪ་ཏི ཨ་ནི་ལ་ཉྫ་སེ.
༢༩. ‘‘དྷུ་ན་ནྟོ པཾ་སུ་ཀཱུ་ལཱ་ནི, ས་དྡ་མ་སྶོ་ས་ཧཾ ཏ་དཱ;
ཨུ་དྡྷཾ ནི་ཛ྄ཛྷཱ་ཡ་མཱ་ནོ་ཧཾ, ཨ་དྡ་སཾ ལོ་ཀ་ནཱ་ཡ་ཀཾ.
༣༠. ‘‘ཏ་ཏྠེ་ཝ ཋི་ཏ་ཀོ ས་ནྟོ, ཨཱ་ཡཱ་ཙིཾ ལོ་ཀ་ནཱ་ཡ་ཀཾ;
མ་དྷུཾ བྷི་སེ་ཧི ས་ཝ་ཏི, ཁཱི་རཾ ས་པྤིཾ མུ་ལཱ༹་ལི་བྷི.
༣༡. ‘‘པ་ཊི་གྒ་ཎྷཱ་ཏུ མེ བུ་དྡྷོ, ཨ་ནུ་ཀ་མྤཱ་ཡ ཙ་ཀྑུ་མཱ;
ཏ་ཏོ ཀཱ་རུ་ཎི་ཀོ ས་ཏྠཱ, ཨོ་རུ་ཧི་ཏྭཱ མ་ཧཱ་ཡ་སོ.
༣༢. ‘‘པ་ཊི་གྒ་ཎྷི མ་མཾ བྷི་ཀྑཾ, ཨ་ནུ་ཀ་མྤཱ་ཡ ཙ་ཀྑུ་མཱ;
པ་ཊི་གྒ་ཧེ་ཏྭཱ ས་མྦུ་དྡྷོ, ཨ་ཀཱ མེ ཨ་ནུ་མོ་ད་ནཾ.
༣༣. ‘‘‘སུ་ཁཱི ཧོ་ཏུ [ཧོ་ཧི (སཱི. སྱཱ. པཱི. ཀ.)] མ་ཧཱ་པུ་ཉྙ, ག་ཏི ཏུ་ཡ྄ཧཾ ས་མི་ཛ྄ཛྷ་ཏུ;
ཨི་མི་ནཱ བྷི་ས་དཱ་ནེ་ན, ལ་བྷ་སྶུ ཝི་པུ་ལཾ སུ་ཁཾ’.
༣༤. ‘‘ཨི་དཾ ཝ་ཏྭཱ་ན ས་མྦུ་དྡྷོ, ཛ་ལ་ཛུ་ཏྟ་མ་ནཱ་མ་ཀོ;
བྷི་ཀྑ་མཱ་དཱ་ཡ ས་མྦུ་དྡྷོ, ཨ་མྦ་རེ་ནཱ་ག་མཱ ཛི་ནོ.
༣༥. ‘‘ཏ་ཏོ བྷི་སཾ ག་ཧེ་ཏྭཱ་ན, ཨཱ་ག་ཙྪིཾ མ་མ ཨ་སྶ་མཾ;
བྷི་སཾ རུ་ཀྑེ ལ་གེ་ཏྭཱ་ན [ལ་གྒི་ཏྭཱ་ན (སྱཱ. ཀ.)], མ་མ དཱ་ན་མ་ནུ་སྶ་རིཾ.
༣༦. ‘‘མ་ཧཱ་ཝཱ་ཏོ ཝུ་ཊྛ་ཧི་ཏྭཱ, ས་ཉྩཱ་ལེ་སི ཝ་ནཾ ཏ་དཱ;
ཨཱ་ཀཱ་སོ ཨ་བྷི་ནཱ་དི་ཏྠ, ཨ་ས་ནི་ཡཱ ཕ་ལ་ནྟི་ཡཱ.
༣༧. ‘‘ཏ་ཏོ མེ ཨ་ས་ནི་པཱ་ཏོ, མ་ཏྠ་ཀེ ནི་པ་ཏཱི ཏ་དཱ;
སོ་ཧཾ ནི་སི་ནྣ་ཀོ ས་ནྟོ, ཏ་ཏྠ ཀཱ་ལ་ངྐ་ཏོ ཨ་ཧུཾ.
༣༨. ‘‘པུ་ཉྙ་ཀ་མྨེ་ན སཾ་ཡུ་ཏྟོ, ཏུ་སི་ཏཾ ཨུ་པ་པ་ཛྫ་ཧཾ;
ཀ་ལེ༹་ཝ་རཾ མེ པ་ཏི་ཏཾ, དེ་ཝ་ལོ་ཀེ ར་མིཾ ཨ་ཧཾ.
༣༩. ‘‘ཚ་ལ༹་སཱི་ཏི་ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
སཱ་ཡ་པཱ་ཏཾ [སཱ་ཡཾ པཱ་ཏཾ (སྱཱ. ཀ.)] ཨུ་པ་ཊྛ་ནྟི, བྷི་ས་དཱ་ན་སྶི་དཾ ཕ་ལཾ.
༤༠. ‘‘མ་ནུ་སྶ་ཡོ་ནི་མཱ་ག་ནྟྭཱ, སུ་ཁི་ཏོ ཧོ་མ་ཧཾ ས་དཱ;
བྷོ་གེ མེ ཨཱུ་ན་ཏཱ ན་ཏྠི, བྷི་ས་དཱ་ན་སྶི་དཾ ཕ་ལཾ.
༤༡. ‘‘ཨ་ནུ་ཀ་མྤི་ཏ་ཀོ ཏེ་ན, དེ་ཝ་དེ་ཝེ་ན ཏཱ་དི་ནཱ;
ས་བྦཱ་ས་ཝཱ པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༤༢. ‘‘ས་ཏ་ས་ཧ་སྶི་ཏོ ཀ་པྤེ, ཡཾ བྷི་སཾ [བྷི་ཀྑཾ (ས་བྦ་ཏྠ)] ཨ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, བྷི་ས་དཱ་ན་སྶི་དཾ ཕ་ལཾ.
༤༣. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༤༤. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༤༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ བྷི་ས་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
བྷི་ས་དཱ་ཡ་ཀ་ཏྠེ་ར་སྶཱ་པ་དཱ་ནཾ ཏ་ཏི་ཡཾ.
༤. ཉཱ་ཎ་ཐ་ཝི་ཀ་ཏྠེ་ར་ཨ་པ་དཱ་ནཾ
༤༦. ‘‘ད་ཀྑི་ཎེ ཧི་མ་ཝ་ནྟ་སྶ, སུ་ཀ་ཏོ ཨ་སྶ་མོ མ་མ;
ཨུ་ཏྟ་མ་ཏྠཾ ག་ཝེ་ས་ནྟོ, ཝ་སཱ་མི ཝི་པི་ནེ ཏ་དཱ.
༤༧. ‘‘ལཱ་བྷཱ་ལཱ་བྷེ་ན ས་ནྟུ་ཊྛོ, མཱུ་ལེ་ན ཙ ཕ་ལེ་ན ཙ;
ཨ་ནྭེ་ས་ནྟོ ཨཱ་ཙ་རི་ཡཾ, ཝ་སཱ་མི ཨེ་ཀ་ཀོ ཨ་ཧཾ.
༤༨. ‘‘སུ་མེ་དྷོ ནཱ་མ ས་མྦུ་དྡྷོ, ལོ་ཀེ ཨུ་པྤ་ཛྫི ཏཱ་ཝ་དེ;
ཙ་ཏུ་ས་ཙྩཾ པ་ཀཱ་སེ་ཏི, ཨུ་དྡྷ་ར་ནྟོ མ་ཧཱ་ཛ་ནཾ.
༤༩. ‘‘ནཱ་ཧཾ སུ་ཎོ་མི ས་མྦུ་དྡྷཾ, ན་པི མེ ཀོ་ཙི སཾ་ས་ཏི [བྷཱ་ས་ཏི (སཱི.), སཱ་ས་ཏི (སྱཱ. པཱི.)];
ཨ་ཊྛ་ཝ་སྶེ ཨ་ཏི་ཀྐ་ནྟེ, ཨ་སྶོ་སིཾ ལོ་ཀ་ནཱ་ཡ་ཀཾ.
༥༠. ‘‘ཨ་གྒི་དཱ་རུཾ ནཱི་ཧ་རི་ཏྭཱ, ས་མྨ་ཛྫི་ཏྭཱ་ན ཨ་སྶ་མཾ;
ཁཱ་རི་བྷཱ་རཾ ག་ཧེ་ཏྭཱ་ན, ནི་ཀྑ་མིཾ ཝི་པི་ནཱ ཨ་ཧཾ.
༥༡. ‘‘ཨེ་ཀ་ར་ཏྟིཾ ཝ་ས་ནྟོ་ཧཾ, གཱ་མེ་སུ ནི་ག་མེ་སུ ཙ;
ཨ་ནུ་པུ་བྦེ་ན ཙ་ནྡ་ཝ་ཏིཾ, ཏ་དཱ་ཧཾ ཨུ་པ་ས་ངྐ་མིཾ.
༥༢. ‘‘བྷ་ག་ཝཱ ཏ་མྷི ས་མ་ཡེ, སུ་མེ་དྷོ ལོ་ཀ་ནཱ་ཡ་ཀོ;
ཨུ་དྡྷ་ར་ནྟོ བ་ཧཱུ ས་ཏྟེ, དེ་སེ་ཏི ཨ་མ་ཏཾ པ་དཾ.
༥༣. ‘‘ཛ་ན་ཀཱ་ཡ་མ་ཏི་ཀྐ་མྨ, ཝ་ནྡི་ཏྭཱ ཛི་ན་སཱ་ག་རཾ;
ཨེ་ཀཾ་སཾ ཨ་ཛི་ནཾ ཀ་ཏྭཱ, ས་ནྠ་ཝིཾ ལོ་ཀ་ནཱ་ཡ་ཀཾ.
༥༤. ‘‘‘ཏུ་ཝཾ ས་ཏྠཱ ཙ ཀེ་ཏུ ཙ, དྷ་ཛོ ཡཱུ་པོ ཙ པཱ་ཎི་ནཾ;
པ་རཱ་ཡ་ནོ [པ་རཱ་ཡ་ཎོ (སཱི. པཱི.)] པ་ཏི་ཊྛཱ ཙ, དཱི་པོ ཙ དྭི་པ་དུ་ཏྟ་མོ.
ཨེ་ཀ་ཝཱི་ས་ཏི་མཾ བྷཱ་ཎ་ཝཱ་རཾ.
༥༥. ‘‘‘ནེ་པུ་ཉྙོ ད་སྶ་ནེ ཝཱི་རོ, ཏཱ་རེ་སི ཛ་ན་ཏཾ ཏུ་ཝཾ;
ན་ཏྠ་ཉྙོ ཏཱ་ར་ཀོ ལོ་ཀེ, ཏ་ཝུ་ཏྟ་རི་ཏ་རོ མུ་ནེ.
༥༦. ‘‘‘ས་ཀྐཱ ཐེ་ཝེ [ཧ་ཝེ (སཱི. པཱི.) བྷ་ཝེ (སྱཱ. ཀ.)] ཀུ་ས་གྒེ་ན, པ་མེ་ཏུཾ སཱ་ག་རུ་ཏྟ་མེ [སཱ་ག་རུ་ཏྟ་མོ (སཱི. སྱཱ. པཱི.)];
ན་ཏྭེ་ཝ ཏ་ཝ ས་བྦ་ཉྙུ, ཉཱ་ཎཾ ས་ཀྐཱ པ་མེ་ཏ་ཝེ.
༥༧. ‘‘‘ཏུ་ལ་ད་ཎྜེ [ཏུ་ལ་མ་ཎྜ་ལེ (སཱི. པཱི.)] ཋ་པེ་ཏྭཱ་ན, མ་ཧིཾ [མ་ཧཱི (སྱཱ. པཱི.)] ས་ཀྐཱ དྷ་རེ་ཏ་ཝེ;
ན་ཏྭེ་ཝ ཏ་ཝ པ་ཉྙཱ་ཡ, པ་མཱ་ཎ་མ་ཏྠི ཙ་ཀྑུ་མ.
༥༨. ‘‘‘ཨཱ་ཀཱ་སོ མི་ནི་ཏུཾ ས་ཀྐཱ, ར་ཛྫུ་ཡཱ ཨ་ངྒུ་ལེ་ན ཝཱ;
ན་ཏྭེ་ཝ ཏ་ཝ ས་བྦ་ཉྙུ, སཱི་ལཾ ས་ཀྐཱ པ་མེ་ཏ་ཝེ.
༥༩. ‘‘‘མ་ཧཱ་ས་མུ་དྡེ ཨུ་ད་ཀཾ, ཨཱ་ཀཱ་སོ ཙ ཝ་སུ་ནྡྷ་རཱ;
པ་རི་མེ་ཡྻཱ་ནི ཨེ་ཏཱ་ནི, ཨ་པྤ་མེ་ཡྻོ་སི ཙ་ཀྑུ་མ’.
༦༠. ‘‘ཚ་ཧི གཱ་ཐཱ་ཧི ས་བྦ་ཉྙུཾ, ཀི་ཏྟ་ཡི་ཏྭཱ མ་ཧཱ་ཡ་སཾ;
ཨ་ཉྫ་ལིཾ པ་གྒ་ཧེ་ཏྭཱ་ན, ཏུ་ཎྷཱི ཨ་ཊྛཱ་ས་ཧཾ ཏ་དཱ.
༦༡. ‘‘ཡཾ ཝ་ད་ནྟི སུ་མེ་དྷོ་ཏི, བྷཱུ་རི་པ་ཉྙཾ སུ་མེ་དྷ་སཾ;
བྷི་ཀྑུ་ས་ངྒྷེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.
༦༢. ‘‘‘ཡོ མེ ཉཱ་ཎཾ པ་ཀི་ཏྟེ་སི, ཝི་པྤ་ས་ནྣེ་ན ཙེ་ཏ་སཱ;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༦༣. ‘‘‘ས་ཏྟ་ས་ཏྟ་ཏི ཀ་པྤཱ་ནི, དེ་ཝ་ལོ་ཀེ ར་མི་སྶ་ཏི;
ས་ཧ་སྶ་ཀྑ་ཏྟུཾ དེ་ཝི་ནྡོ, དེ་ཝ་ར་ཛྫཾ ཀ་རི་སྶ་ཏི.
༦༤. ‘‘‘ཨ་ནེ་ཀ་ས་ཏ་ཀྑ་ཏྟུ་ཉྩ, ཙ་ཀྐ་ཝ་ཏྟཱི བྷ་ཝི་སྶ་ཏི;
པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ.
༦༥. ‘‘‘དེ་ཝ་བྷཱུ་ཏོ མ་ནུ་སྶོ ཝཱ, པུ་ཉྙ་ཀ་མྨ་ས་མཱ་ཧི་ཏོ;
ཨ་ནཱུ་ན་མ་ན་ས་ངྐ་པྤོ, ཏི་ཀྑ་པ་ཉྙོ བྷ་ཝི་སྶ་ཏི’.
༦༦. ‘‘ཏིཾ་ས་ཀ་པྤ་ས་ཧ་སྶ་མྷི, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༦༧. ‘‘ཨ་གཱ་རཱ ཨ་བྷི་ནི་ཀྑ་མྨ, པ་བྦ་ཛི་སྶ་ཏི ཀི་ཉྩ་ནོ;
ཛཱ་ཏི་ཡཱ ས་ཏྟ་ཝ་སྶེ་ན, ཨ་ར་ཧ་ཏྟཾ ཕུ་སི་སྶ་ཏི.
༦༨. ‘‘ཡ་ཏོ ས་རཱ་མི ཨ་ཏྟཱ་ནཾ, ཡ་ཏོ པ་ཏྟོ་སྨི སཱ་ས་ནཾ;
ཨེ་ཏྠ་ནྟ་རེ ན ཛཱ་ནཱ་མི, ཙེ་ཏ་ནཾ ཨ་མ་ནོ་ར་མཾ.
༦༩. ‘‘སཾ་ས་རི་ཏྭཱ བྷ་ཝེ ས་བྦེ, ས་མྤ་ཏྟཱ་ནུ་བྷ་ཝིཾ ཨ་ཧཾ;
བྷོ་གེ མེ ཨཱུ་ན་ཏཱ ན་ཏྠི, ཕ་ལཾ ཉཱ་ཎ་སྶ ཐོ་མ་ནེ.
༧༠. ‘‘ཏི་ཡ་གྒཱི ནི་བྦུ་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ས་བྦཱ་ས་ཝཱ པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༧༡. ‘‘ཏིཾ་ས་ཀ་པྤ་ས་ཧ་སྶ་མྷི, ཡཾ ཉཱ་ཎ་མ་ཐ་ཝིཾ ཨ་ཧཾ [མ་བྷི་ཐོ་མ་ཡིཾ (སཱི. པཱི.), མ་བྷི་ཐོ་མ་ཧཾ (སྱཱ.)];