༨. ཏོ་དེ་ཡྻ་ཏྠེ་ར་ཨ་པ་དཱ་ནཾ
༢༢༤. ‘‘རཱ་ཛཱ ཨ་ཛི་ཏ་ཉྫ་ཡོ [རཱ་ཛཱ་སི ཝི་ཛ་ཡོ (སཱི. ཨ་ཊྛ.), རཱ་ཛཱ ཝི་ཛི་ཏ་ཛ་ཡོ (སྱཱ.)] ནཱ་མ, ཀེ་ཏུ་མ་ཏཱི་པུ་རུ་ཏྟ་མེ;
སཱུ་རོ ཝི་ཀྐ་མ་ས་མྤ་ནྣོ, པུ་ར་མ་ཛ྄ཛྷཱ་ཝ་སཱི ཏ་དཱ.
༢༢༥. ‘‘ཏ་སྶ ར་ཉྙོ པ་མ་ཏྟ་སྶ, ཨ་ཊ་ཝི་ཡོ ས་མུ་ཊྛ་ཧུཾ;
ཨོ་ཏཱ་རཱ [ཨུ་ཏྟ་རཱ (སྱཱ.), ཨོ་ཙ་རཱ (པཱི.)] ཏུ་ཎྜི་ཀཱ ཙེ་ཝ, ར་ཊྛཾ ཝི་དྡྷཾ་ས་ཡུཾ ཏ་དཱ.
༢༢༦. ‘‘པ་ཙྩ་ནྟེ ཀུ་པི་ཏེ ཁི་པྤཾ, ས་ནྣི་པཱ་ཏེ་སི་རི་ནྡ་མོ;
བྷ་ཊེ ཙེ་ཝ བ་ལ་ཏྠེ ཙ, ཨ་རིཾ ནི་གྒཱ་ཧ་ཡི ཏ་དཱ.
༢༢༧. ‘‘ཧ་ཏྠཱ་རོ་ཧཱ ཨ་ནཱི་ཀ་ཊྛཱ, སཱུ་རཱ ཙ ཙ་མྨ་ཡོ་དྷི་ནོ;
དྷ་ནུ་གྒ་ཧཱ ཙ ཨུ་གྒཱ ཙ, ས་བྦེ ས་ནྣི་པ་ཏུཾ ཏ་དཱ.
༢༢༨. ‘‘ཨཱ་ལཱ༹་རི་ཀཱ ཙ ཀ་པྤ་ཀཱ, ནྷཱ་པ་ཀཱ མཱ་ལ་ཀཱ་ར་ཀཱ;
སཱུ་རཱ ཝི་ཛི་ཏ་ས་ངྒཱ་མཱ, ས་བྦེ ས་ནྣི་པ་ཏུཾ ཏ་དཱ.
༢༢༩. ‘‘ཁ་གྒ་ཧ་ཏྠཱ ཙ པུ་རི་སཱ, ཙཱ་པ་ཧ་ཏྠཱ ཙ ཝ་མྨི་ནོ;
ལུ་དྡཱ ཝི་ཛི་ཏ་ས་ངྒཱ་མཱ, ས་བྦེ ས་ནྣི་པ་ཏུཾ ཏ་དཱ.
༢༣༠. ‘‘ཏི་དྷཱ་པ་བྷི་ནྣཱ མཱ་ཏ་ངྒཱ, ཀུ་ཉྫ་རཱ ས་ཊྛི་ཧཱ་ཡ་ནཱ;
སུ་ཝ་ཎྞ་ཀ་ཙྪཱ་ལ་ངྐཱ་རཱ, ས་བྦེ ས་ནྣི་པ་ཏུཾ ཏ་དཱ.
༢༣༡. ‘‘ཁ་མཱ སཱི་ཏ་སྶ ཨུ་ཎྷ་སྶ, ཨུ་ཀྐཱ་རུ་ཧ་ར་ཎ་སྶ ཙ;
ཡོ་དྷཱ་ཛཱི་ཝཱ ཀ་ཏ་ཀ་མྨཱ, ས་བྦེ ས་ནྣི་པ་ཏུཾ ཏ་དཱ.
༢༣༢. ‘‘ས་ངྑ་ས་དྡཾ བྷེ་རི་ས་དྡཾ, ཨ་ཐོ ཨུ་ཏུ་ཛ [ཨུ་དྡྷ་ཝ (སཱི.), ཨུ་དྡ་ཊ (སྱཱ.)] ས་དྡ་ཀཾ;
ཨེ་ཏེ་ཧི ཏེ ཧཱ་ས་ཡ་ནྟཱ, ས་བྦེ ས་ནྣི་པ་ཏུཾ ཏ་དཱ.
༢༣༣. ‘‘ཏི་སཱུ་ལ་ཀོ་ནྟི་མ་ནྟེ་ཧི [ཏི་སཱུ་ལ་ཀོ་ནྟ་མ་ནྟེ་ཧི (སཱི.), ཀ་ཝ་ཙེ་ཧི ཏོ་མ་རེ་ཧི (སཱི.), དྷ་ནཱུ་ཧི ཏོ་མ་རེ་ཧི (སྱཱ.)] ཙ;
ཀོ་ཊྚེ་ནྟཱ་ནཾ ནི་པཱ་ཏེ་ནྟཱ [ཀོ་ཊྚ་ཡ་ནྟཱ ནི་ཝ་ཏྟེ་ནྟཱ (སྱཱ.)], ས་བྦེ ས་ནྣི་པ་ཏུཾ ཏ་དཱ.
༢༣༤. ‘‘ཀི་མེ་ཝཱ་ཏི་ནི་སཱ་མེ་ཏྭཱ [ཀ་ཝ་ཙཱ་ནི་ཝཱ་སེ་ཏྭཱ (སྱཱ.)], ས་རཱ་ཛཱ ཨ་ཛི་ཏ་ཉྫ་ཡོ [ཨ་ཛི་ནཾ ཛི་ནོ (སཱི.), ཨ་ཛི་ཏ་ཉྫི་ནོ (སྱཱ.)];
ས་ཊྛི པཱ་ཎ་ས་ཧ་སྶཱ་ནི, སཱུ་ལེ ཨུ་ཏྟཱ་ས་ཡིཾ ཏ་དཱ.
༢༣༥. ‘‘ས་དྡཾ མཱ་ནུ་ས་ཀཱ་ཀཾ་སུ, ཨ་ཧོ རཱ་ཛཱ ཨ་དྷ་མྨི་ཀོ;
ནི་ར་ཡེ པ་ཙྩ་མཱ་ན་སྶ, ཀ་དཱ ཨ་ནྟོ བྷ་ཝི་སྶ་ཏི.
༢༣༦. ‘‘ས་ཡ་ནེ་ཧཾ ཏུ་ཝ་ཊྚེ་ནྟོ, པ་སྶཱ་མི ནི་ར་ཡེ ཏ་དཱ;
ན སུ་པཱ་མི དི་ཝཱ་ར་ཏྟིཾ, སཱུ་ལེ་ན ཏ་ཛྫ་ཡ་ནྟི མཾ.
༢༣༧. ‘‘ཀིཾ པ་མཱ་དེ་ན ར་ཛྫེ་ན, ཝཱ་ཧ་ནེ་ན བ་ལེ་ན ཙ;
ན ཏེ པ་ཧོ་ནྟི དྷཱ་རེ་ཏུཾ, ཏཱ་པ་ཡ་ནྟི [ཏཱ་ས་ཡ་ནྟི (སཱི. སྱཱ.)] མ་མཾ ས་དཱ.
༢༣༨. ‘‘ཀིཾ མེ པུ་ཏྟེ་ཧི དཱ་རེ་ཧི, ར་ཛྫེ་ན ས་ཀ་ལེ་ན ཙ;
ཡཾ་ནཱུ་ན པ་བྦ་ཛེ་ཡྻཱ་ཧཾ, ག་ཏི་མ་གྒཾ ཝི་སོ་དྷ་ཡེ.
༢༣༩. ‘‘ས་ཊྛི ནཱ་ག་ས་ཧ་སྶཱ་ནི, ས་བྦཱ་ལ་ངྐཱ་ར་བྷཱུ་སི་ཏེ;
སུ་ཝ་ཎྞ་ཀ་ཙྪེ མཱ་ཏ་ངྒེ, ཧེ་མ་ཀ་པྤ་ན་ཝཱ་ས་སེ.
༢༤༠. ‘‘ཨཱ་རཱུ་ལ༹ྷེ གཱ་མ་ཎཱི་ཡེ་ཧི, ཏོ་མ་ར་ངྐུ་ས་པཱ་ཎི་བྷི;
ས་ངྒཱ་མཱ་ཝ་ཙ་རེ ཋཱ་ནེ, ཨ་ན་པེ་ཀྑོ ཝི་ཧཱ་ཡ་ཧཾ;
ས་ཀ་ཀ་མྨེ་ན ས་ནྟ་ཏྟོ, ནི་ཀྑ་མིཾ ཨ་ན་གཱ་རི་ཡཾ.
༢༤༡. ‘‘ས་ཊྛི ཨ་སྶ་ས་ཧ་སྶཱ་ནི, ས་བྦཱ་ལ་ངྐཱ་ར་བྷཱུ་སི་ཏེ;
ཨཱ་ཛཱ་ནཱི་ཡེ་ཝ ཛཱ་ཏི་ཡཱ, སི་ནྡྷ་ཝེ སཱི་གྷ་ཝཱ་ཧ་ནེ.
༢༤༢. ‘‘ཨཱ་རཱུ་ལ༹ྷེ གཱ་མ་ཎཱི་ཡེ་ཧི, ཙཱ་པ་ཧ་ཏྠེ་ཧི ཝ་མྨི་བྷི;
པ་ཧཱ་རེ་ཏྭཱ་ན [པ་ཧཱ་ཡི་ཏྭཱ་ན (སཱི. པཱི.), ཚ་ཌྜ་ཡི་ཏྭཱ་ན (སྱཱ.)] ཏེ ས་བྦེ, ནི་ཀྑ་མིཾ ཨ་ན་གཱ་རི་ཡཾ.
༢༤༣. ‘‘ས་ཊྛི ར་ཐ་ས་ཧ་སྶཱ་ནི, ས་བྦཱ་ལ་ངྐཱ་ར་བྷཱུ་སི་ཏེ;
དཱི་པེ ཨ་ཐོ་པི ཝེ་ཡ་གྒྷེ, ས་ནྣ་དྡྷེ ཨུ་སྶི་ཏ་དྡྷ་ཛེ;
ཏེ ས་བྦེ པ་རི་ཧཱ་རེ་ཏྭཱ [པ་རི་ཝ་ཛྫེ་ཏྭཱ (སྱཱ.), པ་རི་ཧཱ་ཡི་ཏྭཱ (པཱི.)], པ་བྦ་ཛིཾ ཨ་ན་གཱ་རི་ཡཾ.
༢༤༤. ‘‘ས་ཊྛི དྷེ་ནུ་ས་ཧ་སྶཱ་ནི, ས་བྦཱ ཀཾ་སཱུ་པ་དྷཱ་ར་ཎཱ;
ཏཱ་ཡོ་པི [གཱ་ཝི་ཡོ (སྱཱ.), དྷེ་ནུ་ཡོ (ཀ.)] ཚ་ཌྜ་ཡི་ཏྭཱ་ན, པ་བྦ་ཛིཾ ཨ་ན་གཱ་རི་ཡཾ.
༢༤༥. ‘‘ས་ཊྛི ཨི་ཏྠི་ས་ཧ་སྶཱ་ནི, ས་བྦཱ་ལ་ངྐཱ་ར་བྷཱུ་སི་ཏཱ;
ཝི་ཙི་ཏྟ་ཝ་ཏྠཱ་བྷ་ར་ཎཱ, ཨཱ་མུ་ཀྐ་མ་ཎི་ཀུ་ཎྜ་ལཱ.
༢༤༦. ‘‘ཨ་ལཱ༹་ར་པ་མྷཱ ཧ་སུ་ལཱ, སུ་ས་ཉྙཱ ཏ་ནུ་མ་ཛ྄ཛྷི་མཱ;
ཏཱ ཧི་ཏྭཱ ཀ་ནྡ་མཱ་ནཱ་ཡོ, པ་བྦ་ཛིཾ ཨ་ན་གཱ་རི་ཡཾ.
༢༤༧. ‘‘ས་ཊྛི གཱ་མ་ས་ཧ་སྶཱ་ནི, པ་རི་པུ་ཎྞཱ་ནི ས་བྦ་སོ;
ཚ་ཌྜ་ཡི་ཏྭཱ་ན ཏཾ ར་ཛྫཾ, པ་བྦ་ཛིཾ ཨ་ན་གཱ་རི་ཡཾ.
༢༤༨. ‘‘ན་ག་རཱ ནི་ཀྑ་མི་ཏྭཱ་ན, ཧི་མ་ཝ་ནྟ་མུ་པཱ་ག་མིཾ;
བྷཱ་གཱི་ར་ཐཱི་ན་དཱི་ཏཱི་རེ, ཨ་སྶ་མཾ མཱ་པ་ཡིཾ ཨ་ཧཾ.
༢༤༩. ‘‘པ་ཎྞ་སཱ་ལཾ ཀ་རི་ཏྭཱ་ན, ཨ་གྱཱ་གཱ་རཾ ཨ་ཀཱ་ས་ཧཾ;
ཨཱ་ར་དྡྷ་ཝཱི་རི་ཡོ པ་ཧི་ཏ་ཏྟོ, ཝ་སཱ་མི ཨ་སྶ་མེ ཨ་ཧཾ.
༢༥༠. ‘‘མ་ཎྜ་པེ རུ་ཀྑ་མཱུ་ལེ ཝཱ, སུ་ཉྙཱ་གཱ་རེ ཙ ཛྷཱ་ཡ་ཏོ;
ན ཏུ ཝི་ཛྫ་ཏི ཏཱ་སོ མེ, ན པ་སྶེ བྷ་ཡ་བྷེ་ར་ཝཾ.
༢༥༡. ‘‘སུ་མེ་དྷོ ནཱ་མ ས་མྦུ་དྡྷོ, ཨ་གྒོ ཀཱ་རུ་ཎི་ཀོ མུ་ནི;
ཉཱ་ཎཱ་ལོ་ཀེ་ན ཛོ་ཏ་ནྟོ, ལོ་ཀེ ཨུ་པྤ་ཛྫི ཏཱ་ཝ་དེ.
༢༥༢. ‘‘མ་མ ཨ་སྶ་མ་སཱ་མ་ནྟཱ, ཡ་ཀྑོ ཨཱ་སི མ་ཧི་དྡྷི་ཀོ;
བུ་དྡྷ་སེ་ཊྛ་མྷི ཨུ་པྤ་ནྣེ, ཨཱ་རོ་ཙེ་སི མ་མཾ ཏ་དཱ.
༢༥༣. ‘‘བུ་དྡྷོ ལོ་ཀེ ས་མུ་པྤ་ནྣོ, སུ་མེ་དྷོ ནཱ་མ ཙ་ཀྑུ་མཱ;
ཏཱ་རེ་ཏི ཛ་ན་ཏཾ ས་བྦཾ, ཏ་མྤི སོ ཏཱ་ར་ཡི་སྶ་ཏི.
༢༥༤. ‘‘ཡ་ཀྑ་སྶ ཝ་ཙ་ནཾ སུ་ཏྭཱ, སཾ་ཝི་གྒོ ཨཱ་སི ཏཱ་ཝ་དེ;
བུ་དྡྷོ བུ་དྡྷོ་ཏི ཙི་ནྟེ་ནྟོ, ཨ་སྶ་མཾ པ་ཊི་སཱ་མ་ཡིཾ.
༢༥༥. ‘‘ཨ་གྒི་དཱ་རུ་ཉྩ ཚ་ཌྜེ་ཏྭཱ, སཾ་སཱ་མེ་ཏྭཱ་ན ས་ནྠ་ཏཾ;
ཨ་སྶ་མཾ ཨ་བྷི་ཝ་ནྡི་ཏྭཱ, ནི་ཀྑ་མིཾ ཝི་པི་ནཱ ཨ་ཧཾ.
༢༥༦. ‘‘ཏ་ཏོ ཙ་ནྡ་ན་མཱ་དཱ་ཡ, གཱ་མཱ གཱ་མཾ པུ་རཱ པུ་རཾ;
དེ་ཝ་དེ་ཝཾ ག་ཝེ་ས་ནྟོ, ཨུ་པ་ག་ཙྪིཾ ཝི་ནཱ་ཡ་ཀཾ.
༢༥༧. ‘‘བྷ་ག་ཝཱ ཏ་མྷི ས་མ་ཡེ, སུ་མེ་དྷོ ལོ་ཀ་ནཱ་ཡ་ཀོ;
ཙ་ཏུ་ས་ཙྩཾ པ་ཀཱ་སེ་ནྟོ, བོ་དྷེ་ཏི ཛ་ན་ཏཾ བ་ཧུཾ.
༢༥༨. ‘‘ཨ་ཉྫ་ལིཾ པ་གྒ་ཧེ་ཏྭཱ་ན, སཱི་སེ ཀ་ཏྭཱ་ན ཙ་ནྡ་ནཾ;
ས་མྦུ་དྡྷཾ ཨ་བྷི་ཝཱ་དེ་ཏྭཱ, ཨི་མཱ གཱ་ཐཱ ཨ་བྷཱ་ས་ཧཾ.
༢༥༩. ‘‘‘ཝ་སྶི་ཀེ པུ་པྥ་མཱ་ན་མྷི, ས་ནྟི་ཀེ ཨུ་པ་ཝཱ་ཡ་ཏི;
ཏྭཾ ཝཱི་ར གུ་ཎ་ག་ནྡྷེ་ན, དི་སཱ ས་བྦཱ པ་ཝཱ་ཡ་སི.
༢༦༠. ‘‘‘ཙ་མྤ་ཀེ ནཱ་ག་ཝ་ནི་ཀེ, ཨ་ཏི་མུ་ཏྟ་ཀ་ཀེ་ཏ་ཀེ;
སཱ་ལེ་སུ པུ་པྥ་མཱ་ནེ་སུ, ཨ་ནུ་ཝཱ་ཏཾ པ་ཝཱ་ཡ་ཏི.
༢༦༡. ‘‘‘ཏ་ཝ ག་ནྡྷཾ སུ་ཎི་ཏྭཱ་ན, ཧི་མ་ཝ་ནྟཱ ཨི་དྷཱ་ག་མིཾ;
པཱུ་ཛེ་མི ཏཾ མ་ཧཱ་ཝཱི་ར, ལོ་ཀ་ཛེ་ཊྛ མ་ཧཱ་ཡ་ས’.
༢༦༢. ‘‘ཝ་ར་ཙ་ནྡ་ནེ་ནཱ་ནུ་ལི་མྤིཾ, སུ་མེ་དྷཾ ལོ་ཀ་ནཱ་ཡ་ཀཾ;
ས་ཀཾ ཙི་ཏྟཾ པ་སཱ་དེ་ཏྭཱ, ཏུ་ཎྷཱི ཨ་ཊྛཱ་སི ཏཱ་ཝ་དེ.
༢༦༣. ‘‘སུ་མེ་དྷོ ནཱ་མ བྷ་ག་ཝཱ, ལོ་ཀ་ཛེ་ཊྛོ ན་རཱ་ས་བྷོ;
བྷི་ཀྑུ་ས་ངྒྷེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.
༢༦༤. ‘‘‘ཡོ མེ གུ་ཎེ པ་ཀི་ཏྟེ་སི, ཙ་ནྡ་ན་ཉྩ ཨ་པཱུ་ཛ་ཡི;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༢༦༥. ‘‘‘ཨཱ་དེ་ཡྻ་ཝཱ་ཀྱ་ཝ་ཙ་ནོ, བྲ་ཧྨཱ ཨུ་ཛུ པ་ཏཱ་པ་ཝཱ;
པ་ཉྩ་ཝཱི་ས་ཏི་ཀ་པྤཱ་ནི, ས་པྤ་བྷཱ་སོ བྷ་ཝི་སྶ་ཏི.
༢༦༦. ‘‘‘ཚ་བྦཱི་ས་ཏི་ཀ་པྤ་ས་ཏེ, དེ་ཝ་ལོ་ཀེ ར་མི་སྶ་ཏི;
ས་ཧ་སྶ་ཀྑ་ཏྟུཾ རཱ་ཛཱ ཙ, ཙ་ཀྐ་ཝ་ཏྟཱི བྷ་ཝི་སྶ་ཏི.
༢༦༧. ‘‘‘ཏེ་ཏྟིཾ་ས་ཀྑ་ཏྟུཾ དེ་ཝི་ནྡོ, དེ་ཝ་ར་ཛྫཾ ཀ་རི་སྶ་ཏི;
པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ.
༢༦༨. ‘‘‘ཏ་ཏོ ཙུ་ཏོ་ཡཾ མ་ནུ་ཛོ, མ་ནུ་སྶ་ཏྟཾ ག་མི་སྶ་ཏི;
པུ་ཉྙ་ཀ་མྨེ་ན སཾ་ཡུ་ཏྟོ, བྲ་ཧྨ་བ་ནྡྷུ བྷ་ཝི་སྶ་ཏི.
༢༦༩. ‘‘‘ཨ་ཛ྄ཛྷཱ་ཡ་ཀོ མ་ནྟ་དྷ་རོ, ཏི་ཎྞཾ ཝེ་དཱ་ན པཱ་ར་གཱུ;
ཏི་ལ་ཀྑ་ཎེ་ན ས་མྤ་ནྣོ, བཱ་ཝ་རཱི ནཱ་མ བྲཱ་ཧྨ་ཎོ.
༢༧༠. ‘‘‘ཏ་སྶ སི་སྶོ བྷ་ཝི་ཏྭཱ་ན, ཧེ་སྶ་ཏི མ་ནྟ་པཱ་ར་གཱུ;
ཨུ་པ་ག་ནྟྭཱ་ན ས་མྦུ་དྡྷཾ, གོ་ཏ་མཾ ས་ཀྱ་པུ་ངྒ་ཝཾ.
༢༧༡. ‘‘‘པུ་ཙྪི་ཏྭཱ ནི་པུ་ཎེ པ་ཉྷེ, བྷཱ་ཝ་ཡི་ཏྭཱ་ན ཨ་ཉྫ་སཾ [ཧཱ་ས་ཡི་ཏྭཱ་ན མཱ་ན་སཾ (སྱཱ.), བྷཱ་ཝ་ཡི་ཏྭཱ་ན ས་ཉྩ་ཡཾ (ཀ.)];
ས་བྦཱ་ས་ཝེ པ་རི་ཉྙཱ་ཡ, ཝི་ཧ་རི་སྶ་ཏི་ནཱ་ས་ཝོ’.
༢༧༢. ‘‘ཏི་ཝི་དྷ་གྒི ནི་བྦུ་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ས་བྦཱ་ས་ཝེ པ་རི་ཉྙཱ་ཡ, ཝི་ཧ་རཱ་མི ཨ་ནཱ་ས་ཝོ.
༢༧༣. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༢༧༤. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༢༧༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཏོ་དེ་ཡྻོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཏོ་དེ་ཡྻ་ཏྠེ་ར་སྶཱ་པ་དཱ་ནཾ ཨ་ཊྛ་མཾ.