༤༡. མེ་ཏྟེ་ཡྻ་ཝ་གྒོ
༡. ཏི་སྶ་མེ་ཏྟེ་ཡྻ་ཏྠེ་ར་ཨ་པ་དཱ་ནཾ
༡. ‘‘པ་བྦྷཱ་ར་ཀཱུ་ཊཾ ནི་སྶཱ་ཡ, སོ་བྷི་ཏོ ནཱ་མ ཏཱ་པ་སོ;
པ་ཝ་ཏྟ་ཕ་ལཾ བྷུ་ཉྫི་ཏྭཱ, ཝ་ས་ཏི པ་བྦ་ཏ་ནྟ་རེ.
༢. ‘‘ཨ་གྒིཾ དཱ་རུཾ ཨཱ་ཧ་རི་ཏྭཱ, ཨུ་ཛྫཱ་ལེ་སིཾ ཨ་ཧཾ ཏ་དཱ;
ཨུ་ཏྟ་མ་ཏྠཾ ག་ཝེ་ས་ནྟོ, བྲ་ཧྨ་ལོ་ཀཱུ་པ་པ་ཏྟི་ཡཱ.
༣. ‘‘པ་དུ་མུ་ཏྟ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ;
མ་མུ་དྡྷ་རི་ཏུ་ཀཱ་མོ སོ, ཨཱ་ག་ཙྪི མ་མ ས་ནྟི་ཀེ.
༤. ‘‘ཀིཾ ཀ་རོ་སི མ་ཧཱ་པུ་ཉྙ, དེ་ཧི མེ ཨ་གྒི་དཱ་རུ་ཀཾ;
ཨ་ཧ་མ་གྒིཾ པ་རི་ཙ་རེ, ཏ་ཏོ མེ སུ་དྡྷི ཧོ་ཧི་ཏི [ཧེ་ཧི་ཏི (སཱི.)].
༥. ‘‘སུ་བྷ་དྡ་ཀོ ཏྭཾ མ་ནུ་ཛེ, དེ་ཝ་ཏེ ཏྭཾ པ་ཛཱ་ན་སི;
ཏུ་ཝཾ ཨ་གྒིཾ པ་རི་ཙ་ར, ཧ་ནྡ ཏེ ཨ་གྒི་དཱ་རུ་ཀཾ.
༦. ‘‘ཏ་ཏོ ཀ་ཊྛཾ ག་ཧེ་ཏྭཱ་ན, ཨ་གྒིཾ ཨུ་ཛྫཱ་ལ་ཡཱི ཛི་ནོ;
ན ཏ་ཏྠ ཀ་ཊྛཾ པ་ཛ྄ཛྷཱ་ཡི, པཱ་ཊི་ཧེ་རཾ མ་ཧེ་སི་ནོ.
༧. ‘‘ན ཏེ ཨ་གྒི པ་ཛྫ་ལ་ཏི, ཨཱ་ཧུ་ཏཱི ཏེ ན ཝི་ཛྫ་ཏི;
ནི་ར་ཏྠ་ཀཾ ཝ་ཏཾ ཏུ་ཡ྄ཧཾ, ཨ་གྒིཾ པ་རི་ཙ་ར་སྶུ མེ.
༨. ‘‘ཀཱི་དི་སོ སོ [ཏེ (སྱཱ. ཀ.)] མ་ཧཱ་ཝཱི་ར, ཨ་གྒི ཏ་ཝ པ་ཝུ་ཙྩ་ཏི;
མ་ཡ྄ཧ་མྤི ཀ་ཐ་ཡ་སྶེ་ཏཾ, ཨུ་བྷོ པ་རི་ཙ་རཱ་མ་སེ.
༩. ‘‘ཧེ་ཏུ་དྷ་མྨ་ནི་རོ་དྷཱ་ཡ, ཀི་ལེ་ས་ས་མ་ཎཱ་ཡ ཙ;
ཨི་སྶཱ་མ་ཙྪ་རི་ཡཾ ཧི་ཏྭཱ, ཏ་ཡོ ཨེ་ཏེ མ་མཱ་ཧུ་ཏཱི.
༡༠. ‘‘ཀཱི་དི་སོ ཏྭཾ མ་ཧཱ་ཝཱི་ར, ཀ་ཐཾ གོ་ཏྟོ་སི མཱ་རི་ས;
ཨཱ་ཙཱ་ར་པ་ཊི་པ་ཏྟི ཏེ, བཱ་ལ༹ྷཾ ཁོ མ་མ རུ་ཙྩ་ཏི.
༡༡. ‘‘ཁ་ཏྟི་ཡ་མྷི ཀུ་ལེ ཛཱ་ཏོ, ཨ་བྷི་ཉྙཱ་པཱ་ར་མིཾ ག་ཏོ;
ས་བྦཱ་ས་ཝ་པ་རི་ཀྑཱི་ཎོ, ན་ཏྠི དཱ་ནི པུ་ན་བྦྷ་ཝོ.
༡༢. ‘‘ཡ་དི བུ་དྡྷོ་སི ས་བྦ་ཉྙཱུ, པ་བྷ་ངྐ་ར ཏ་མོ་ནུ་ད;
ན་མ་སྶི་སྶཱ་མི ཏཾ དེ་ཝ, དུ་ཀྑ་སྶ་ནྟ་ཀ་རོ ཏུ་ཝཾ.
༡༣. ‘‘པ་ཏྠ་རི་ཏྭཱ་ཛི་ན་ཙ་མྨཾ, ནི་སཱི་ད་ན་མ་དཱ་ས་ཧཾ;
ནི་སཱི་ད ནཱ་ཐ ས་བྦ་ཉྙུ, ཨུ་པ་ཊྛི་སྶཱ་མ་ཧཾ ཏུ་ཝཾ.
༡༤. ‘‘ནི་སཱི་དི བྷ་ག་ཝཱ ཏ་ཏྠ, ཨ་ཛི་ན་མྷི སུ་ཝི་ཏྠ་ཏེ;
ནི་མ་ནྟ་ཡི་ཏྭཱ ས་མྦུ་དྡྷཾ, པ་བྦ་ཏཾ ཨ་ག་མཱ་ས་ཧཾ.
༡༥. ‘‘ཁཱ་རི་བྷཱ་ར་ཉྩ པཱུ་རེ་ཏྭཱ, ཏི་ནྡུ་ཀ་ཕ་ལ་མཱ་ཧ་རིཾ;
མ་དྷུ་ནཱ ཡོ་ཛ་ཡི་ཏྭཱ་ན, ཕ་ལཾ བུ་དྡྷ་སྶ་དཱ་ས་ཧཾ.
༡༦. ‘‘མ་མ ནི་ཛ྄ཛྷཱ་ཡ་མཱ་ན་སྶ, པ་རི་བྷུ་ཉྫི ཏ་དཱ ཛི་ནོ;
ཏ་ཏྠ ཙི་ཏྟཾ པ་སཱ་དེ་སིཾ, པེ་ཀྑ་ནྟོ ལོ་ཀ་ནཱ་ཡ་ཀཾ.
༡༧. ‘‘པ་དུ་མུ་ཏྟ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ;
མ་མ་སྶ་མེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.
༡༨. ‘‘‘ཡོ མཾ ཕ་ལེ་ན ཏ་པྤེ་སི, པ་ས་ནྣོ སེ་ཧི པཱ་ཎི་བྷི;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༡༩. ‘‘‘པ་ཉྩ་ཝཱི་ས་ཏི་ཀྑ་ཏྟུཾ སོ, དེ་ཝ་ར་ཛྫཾ ཀ་རི་སྶ་ཏི;
ས་ཧ་སྶ་ཀྑ་ཏྟུཾ རཱ་ཛཱ ཙ, ཙ་ཀྐ་ཝ་ཏྟཱི བྷ་ཝི་སྶ་ཏི.
༢༠. ‘‘‘ཏ་སྶ ས་ངྐ་པྤ་མ་ཉྙཱ་ཡ, པུ་བྦ་ཀ་མྨ་ས་མ་ངྒི་ནོ;
ཨ་ནྣཾ པཱ་ན་ཉྩ ཝ་ཏྠ་ཉྩ, ས་ཡ་ན་ཉྩ མ་ཧཱ་ར་ཧཾ.
༢༡. ‘‘‘པུ་ཉྙ་ཀ་མྨེ་ན སཾ་ཡུ་ཏྟཱ, ནི་བྦ་ཏྟི་སྶ་ནྟི ཏཱ་ཝ་དེ;
ས་དཱ པ་མུ་དི་ཏོ ཙཱ་ཡཾ, བྷ་ཝི་སྶ་ཏི ཨ་ནཱ་མ་ཡོ.
༢༢. ‘‘‘ཨུ་པ་པ་ཛྫ་ཏི ཡཾ ཡོ་ནིཾ, དེ་ཝ་ཏྟཾ ཨ་ཐ མཱ་ནུ་སཾ;
ས་བྦ་ཏྠ སུ་ཁི་ཏོ ཧུ་ཏྭཱ, མ་ནུ་སྶ་ཏྟཾ ག་མི་སྶ་ཏི.
༢༣. ‘‘‘ཨ་ཛ྄ཛྷཱ་ཡ་ཀོ མ་ནྟ་དྷ་རོ, ཏི་ཎྞཾ ཝེ་དཱ་ན པཱ་ར་གཱུ;
ས་མྦུ་དྡྷཾ ཨུ་པ་ག་ནྟྭཱ་ན, ཨ་ར་ཧཱ སོ བྷ་ཝི་སྶ་ཏི’.
༢༤. ‘‘ཡ་ཏོ ས་རཱ་མི ཨ་ཏྟཱ་ནཾ, ཡ་ཏོ པ་ཏྟོ་སྨི ཝི་ཉྙུ་ཏཾ;
བྷོ་གེ མེ ཨཱུ་ན་ཏཱ ན་ཏྠི, ཕ་ལ་དཱ་ན་སྶི་དཾ ཕ་ལཾ.
༢༥. ‘‘ཝ་ར་དྷ་མྨ་མ་ནུ་པྤ་ཏྟོ, རཱ་ག་དོ་སེ ས་མཱུ་ཧ་ནིཾ;
ས་བྦཱ་ས་ཝ་པ་རི་ཀྑཱི་ཎོ, ན་ཏྠི དཱ་ནི པུ་ན་བྦྷ་ཝོ.
༢༦. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ནཱ་གོ་ཝ བ་ནྡྷ་ནཾ ཚེ་ཏྭཱ, ཝི་ཧ་རཱ་མི ཨ་ནཱ་ས་ཝོ.
༢༧. ‘‘སྭཱ་ག་ཏཾ ཝ་ཏ མེ ཨཱ་སི, མ་མ བུ་དྡྷ་སྶ ས་ནྟི་ཀེ;
ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ནཾ.
༢༨. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཏི་སྶ་མེ་ཏྟེ་ཡྻོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཏི་སྶ་མེ་ཏྟེ་ཡྻ་ཏྠེ་ར་སྶཱ་པ་དཱ་ནཾ པ་ཋ་མཾ.
༢. པུ་ཎྞ་ཀ་ཏྠེ་ར་ཨ་པ་དཱ་ནཾ
༢༩. ‘‘པ་བྦྷཱ་ར་ཀཱུ་ཊཾ ནི་སྶཱ་ཡ, ས་ཡ་མྦྷཱུ ཨ་པ་རཱ་ཛི་ཏོ;
ཨཱ་བཱ་དྷི་ཀོ ཙ སོ [ཨཱ་བཱ་དྷི་ཀོ ག་རུ (སཱི.)] བུ་དྡྷོ, ཝ་ས་ཏི པ་བྦ་ཏ་ནྟ་རེ.
༣༠. ‘‘མ་མ ཨ་སྶ་མ་སཱ་མ་ནྟཱ, པ་ནཱ་དོ ཨཱ་སི ཏཱ་ཝ་དེ;
བུ་དྡྷེ ནི་བྦཱ་ཡ་མཱ་ན་མྷི, ཨཱ་ལོ་ཀོ ཨུ་ད་པ་ཛྫ་ཐ [ཨཱ་སི ཏཱ་ཝ་དེ (སྱཱ. ཀ.)].
༣༡. ‘‘ཡཱ་ཝ་ཏཱ ཝ་ན་ས་ཎྜ་སྨིཾ, ཨ་ཙྪ་ཀོ་ཀ་ཏ་ར་ཙྪ་ཀཱ;
ཝཱ་ལཱ༹ ཙ [བྱ་གྒྷཱ (སཱི.)] ཀེ་ས་རཱི ས་བྦེ, ཨ་བྷི་ག་ཛྫིཾ་སུ ཏཱ་ཝ་དེ.
༣༢. ‘‘ཨུ་པྤཱ་ཏཾ ཏ་མ་ཧཾ དི་སྭཱ, པ་བྦྷཱ་རཾ ཨ་ག་མཱ་ས་ཧཾ;
ཏ་ཏྠ་དྡ་སྶཱ་སིཾ ས་མྦུ་དྡྷཾ, ནི་བྦུ་ཏཾ ཨ་པ་རཱ་ཛི་ཏཾ.
༣༣. ‘‘སུ་ཕུ་ལླཾ སཱ་ལ་རཱ་ཛཾ་ཝ, ས་ཏ་རཾ་སིཾ་ཝ ཨུ་གྒ་ཏཾ;
ཝཱི་ཏ་ཙྩི་ཀཾ་ཝ ཨ་ངྒཱ་རཾ, ནི་བྦུ་ཏཾ ཨ་པ་རཱ་ཛི་ཏཾ.
༣༤. ‘‘ཏི་ཎཾ ཀ་ཊྛ་ཉྩ པཱུ་རེ་ཏྭཱ, ཙི་ཏ་ཀཾ ཏ་ཏྠ་ཀཱ་ས་ཧཾ;
ཙི་ཏ་ཀཾ སུ་ཀ་ཏཾ ཀ་ཏྭཱ, ས་རཱི་རཾ ཛྷཱ་པ་ཡིཾ ཨ་ཧཾ.
༣༥. ‘‘ས་རཱི་རཾ ཛྷཱ་པ་ཡི་ཏྭཱ་ན, ག་ནྡྷ་ཏོ་ཡཾ ས་མོ་ཀི་རིཾ;
ཨ་ནྟ་ལི་ཀྑེ ཋི་ཏོ ཡ་ཀྑོ, ནཱ་མ་མ་གྒ་ཧི ཏཱ་ཝ་དེ.
༣༦. ‘‘ཡཾ པཱུ་རི་ཏཾ [ཏཾ པཱུ་རི་ཏཾ (སྱཱ.), ས་པྤུ་རི་ས (ཀ.)] ཏ་ཡཱ ཀི་ཙྩཾ, ས་ཡ་མྦྷུ་སྶ མ་ཧེ་སི་ནོ;
པུ་ཎྞ་ཀོ ནཱ་མ ནཱ་མེ་ན, ས་དཱ ཧོ་ཧི ཏུ་ཝཾ [ཡ་དཱ ཧོ་སི ཏུ་ཝཾ (སྱཱ.), ས་དཱ ཧོ་ཧི་ཏི ཏྭཾ (ཀ.)] མུ་ནེ.
༣༧. ‘‘ཏ་མྷཱ ཀཱ་ཡཱ ཙ་ཝི་ཏྭཱ་ན, དེ་ཝ་ལོ་ཀཾ ཨ་ག་ཙྪ་ཧཾ;
ཏ་ཏྠ དི་བྦ་མ་ཡོ ག་ནྡྷོ, ཨ་ནྟ་ལི་ཀྑཱ པ་ཝ་སྶ་ཏི [ཨ་ནྟ་ལི་ཀྑེ པ་ཝཱ་ཡ་ཏི (སཱི.)].
༣༨. ‘‘ཏ་ཏྲཱ་པི ནཱ་མ་དྷེ་ཡྻཾ མེ, པུ་ཎྞ་ཀོ་ཏི ཨ་ཧཱུ ཏ་དཱ;
དེ་ཝ་བྷཱུ་ཏོ མ་ནུ་སྶོ ཝཱ, ས་ངྐ་པྤཾ པཱུ་ར་ཡཱ་མ་ཧཾ.
༣༩. ‘‘ཨི་དཾ པ་ཙྪི་མ་ཀཾ མ་ཡ྄ཧཾ, ཙ་རི་མོ ཝ་ཏྟ་ཏེ བྷ་ཝོ;
ཨི་དྷཱ་པི པུ་ཎྞ་ཀོ ནཱ་མ, ནཱ་མ་དྷེ་ཡྻཾ པ་ཀཱ་ས་ཏི.
༤༠. ‘‘ཏོ་ས་ཡི་ཏྭཱ་ན ས་མྦུ་དྡྷཾ, གོ་ཏ་མཾ ས་ཀྱ་པུ་ངྒ་ཝཾ;
ས་བྦཱ་ས་ཝེ པ་རི་ཉྙཱ་ཡ, ཝི་ཧ་རཱ་མི ཨ་ནཱ་ས་ཝོ.
༤༡. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཏ་ནུ་ཀི་ཙྩ་སྶི་དཾ ཕ་ལཾ.
༤༢. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༤༣. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༤༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ པུ་ཎྞ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
པུ་ཎྞ་ཀ་ཏྠེ་ར་སྶཱ་པ་དཱ་ནཾ དུ་ཏི་ཡཾ.
༣. མེ་ཏྟ་གུ་ཏྠེ་ར་ཨ་པ་དཱ་ནཾ
༤༥. ‘‘ཧི་མ་ཝ་ནྟ་སྶཱ་ཝི་དཱུ་རེ, ཨ་སོ་ཀོ ནཱ་མ པ་བྦ་ཏོ;
ཏ་ཏྠཱ་སི ཨ་སྶ་མོ མ་ཡ྄ཧཾ, ཝི་སྶ་ཀ་མྨེ་ན [ཝི་སུ་ཀ་མྨེ་ན (སཱི. སྱཱ. ཀ.)] མཱ་པི་ཏོ.
༤༦. ‘‘སུ་མེ་དྷོ ནཱ་མ ས་མྦུ་དྡྷོ, ཨ་གྒོ ཀཱ་རུ་ཎི་ཀོ མུ་ནི;
ནི་ཝཱ་ས་ཡི་ཏྭཱ པུ་བྦ་ཎྷེ, པི་ཎྜཱ་ཡ མེ [མཾ (སཱི.)] ཨུ་པཱ་ག་མི.
༤༧. ‘‘ཨུ་པཱ་ག་ཏཾ མ་ཧཱ་ཝཱི་རཾ, སུ་མེ་དྷཾ ལོ་ཀ་ནཱ་ཡ་ཀཾ;
པ་གྒ་ཡ྄ཧ སུ་ག་ཏ་པ་ཏྟཾ [སུ་ག་ཏཾ པ་ཏྟཾ (སཱི.), སུ་བྷ་ཀཾ པ་ཏྟཾ (པཱི.)], ས་པྤི་ཏེ་ལཾ ཨ་པཱུ་ར་ཡིཾ [ས་པྤི་ཏེ་ལེ་ན པཱུ་ར་ཡིཾ (སཱི.), ས་པྤི་ཏེ་ལ་སྶ’པཱུ་ར་ཡིཾ (?)].
༤༨. ‘‘ད་ཏྭཱ་ན་ཧཾ བུ་དྡྷ་སེ་ཊྛེ, སུ་མེ་དྷེ ལོ་ཀ་ནཱ་ཡ་ཀེ;
ཨ་ཉྫ་ལིཾ པ་གྒ་ཧེ་ཏྭཱ་ན, བྷི་ཡྻོ [བྷཱི་ཡོ (སཱི.), བྷཱི་ཡྻོ (པཱི.)] ཧཱ་སཾ ཛ་ནེ་ས་ཧཾ.
༤༩. ‘‘ཨི་མི་ནཱ ས་པྤི་དཱ་ནེ་ན, ཙེ་ཏ་ནཱ་པ་ཎི་དྷཱི་ཧི ཙ;
དེ་ཝ་བྷཱུ་ཏོ མ་ནུ་སྶོ ཝཱ, ལ་བྷཱ་མི ཝི་པུ་ལཾ སུ་ཁཾ.
༥༠. ‘‘ཝི་ནི་པཱ་ཏཾ ཝི་ཝ་ཛྫེ་ཏྭཱ, སཾ་ས་རཱ་མི བྷ་ཝཱ་བྷ་ཝེ;
ཏ་ཏྠ ཙི་ཏྟཾ པ་ཎི་དྷི་ཏྭཱ, ལ་བྷཱ་མི ཨ་ཙ་ལཾ པ་དཾ.
༥༡. ‘‘ལཱ་བྷཱ ཏུ་ཡ྄ཧཾ སུ་ལ་དྡྷཾ ཏེ, ཡཾ མཾ ཨ་དྡ་ཀྑི བྲཱ་ཧྨ་ཎ;
མ་མ ད་སྶ་ན་མཱ་ག་མྨ, ཨ་ར་ཧ་ཏྟཾ བྷ་ཝི་སྶ་ཏི [ཨ་ར་ཧཱ ཏྭཾ བྷ་ཝི་སྶ་སི (སཱི. པཱི.), ཨ་ར་ཧ་ཏྟཾ ག་མི་སྶ་སི (སྱཱ.)].
༥༢. ‘‘ཝི་སྶ་ཏྠོ [ཝི་སྶ་ཊྛོ (སྱཱ. པཱི.), ཝི་ས་ཊྛོ (ཀ.)] ཧོ་ཧི མཱ བྷཱ་ཡི, ཨ་དྷི་ག་ནྟྭཱ མ་ཧཱ་ཡ་སཾ;
མ་མ་ཉྷི ས་པྤིཾ ད་ཏྭཱ་ན, པ་རི་མོ་ཀྑ་སི ཛཱ་ཏི་ཡཱ.
༥༣. ‘‘ཨི་མི་ནཱ ས་པྤི་དཱ་ནེ་ན, ཙེ་ཏ་ནཱ་པ་ཎི་དྷཱི་ཧི ཙ;
དེ་ཝ་བྷཱུ་ཏོ མ་ནུ་སྶོ ཝཱ, ལ་བྷ་སེ ཝི་པུ་ལཾ སུ་ཁཾ.
༥༤. ‘‘ཨི་མི་ནཱ ས་པྤི་དཱ་ནེ་ན, མེ་ཏྟ་ཙི་ཏྟ་ཝ་ཏཱ་ཡ ཙ;
ཨ་ཊྛཱ་ར་སེ ཀ་པྤ་ས་ཏེ, དེ་ཝ་ལོ་ཀེ ར་མི་སྶ་སི.
༥༥. ‘‘ཨ་ཊྛ་ཏིཾ་ས་ཏི་ཀྑ་ཏྟུ་ཉྩ, དེ་ཝ་རཱ་ཛཱ བྷ་ཝི་སྶ་སི;
པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ.
༥༦. ‘‘ཨེ་ཀ་པ་ཉྙཱ་ས་ཀྑ་ཏྟུ་ཉྩ, ཙ་ཀྐ་ཝ་ཏྟཱི བྷ་ཝི་སྶ་སི;
ཙཱ་ཏུ་ར་ནྟོ ཝི་ཛི་ཏཱ་ཝཱི, ཛ་མྦུ་མ་ཎྜ་སྶ [ཛ་མྦུ་ས་ཎྜ་སྶ (སཱི. པཱི.)] ཨི་སྶ་རོ.
༥༧. ‘‘མ་ཧཱ་ས་མུ་དྡོ་ཝ་ཀྑོ་བྷོ, དུ་དྡྷ་རོ པ་ཐ་ཝཱི ཡ་ཐཱ;
ཨེ་ཝ་མེ་ཝ ཙ ཏེ བྷོ་གཱ, ཨ་པྤ་མེ་ཡྻཱ བྷ་ཝི་སྶ་རེ.
༥༨. ‘‘ས་ཊྛི་ཀོ་ཊཱི ཧི་ར་ཉྙ་སྶ, ཙ་ཛི་ཏྭཱ [ཙ་ཏྭཱ་ན (སཱི. ཀ.), ད་ཏྭཱ་ན (སྱཱ. པཱི.)] པ་བྦ་ཛིཾ ཨ་ཧཾ;
ཀིཾ ཀུ་ས་ལཾ ག་ཝེ་ས་ནྟོ, བཱ་ཝ་རིཾ ཨུ་པ་ས་ངྐ་མིཾ.
༥༩. ‘‘ཏ་ཏྠ མ་ནྟེ ཨ་དྷཱི་ཡཱ་མི, ཚ་ལ༹་ངྒཾ ནཱ་མ ལ་ཀྑ་ཎཾ;
ཏ་མ་ནྡྷ་ཀཱ་རཾ ཝི་དྷ་མཾ, ཨུ་པྤ་ཛྫི ཏྭཾ མ་ཧཱ་མུ་ནི.
༦༠. ‘‘ཏ་ཝ ད་སྶ་ན་ཀཱ་མོ་ཧཾ, ཨཱ་ག་ཏོ་མྷི མ་ཧཱ་མུ་ནི;
ཏ་ཝ དྷ་མྨཾ སུ་ཎི་ཏྭཱ་ན, པ་ཏྟོ་མྷི ཨ་ཙ་ལཾ པ་དཾ.
༦༡. ‘‘ཏིཾ་ས་ཀ་པྤ་ས་ཧ་སྶ་མྷི, ས་པྤིཾ བུ་དྡྷ་སྶ་དཱ་ས་ཧཾ;
ཨེ་ཏྠ་ནྟ་རེ ནཱ་བྷི་ཛཱ་ནེ, ས་པྤིཾ ཝི་ཉྙཱ་པི་ཏཾ [ཝི་ཉྙཱ་པི་ཏཱ (?)] མ་ཡཱ.
༦༢. ‘‘མ་མ ས་ངྐ་པྤ་མ་ཉྙཱ་ཡ, ཨུ་པྤ་ཛྫ་ཏི ཡ་དི་ཙྪ་ཀཾ;
ཙི་ཏྟ་མ་ཉྙཱ་ཡ ནི་བྦ་ཏྟཾ, ས་བྦེ ས་ནྟ་པྤ་ཡཱ་མ་ཧཾ.
༦༣. ‘‘ཨ་ཧོ བུ་དྡྷཱ ཨ་ཧོ དྷ་མྨཱ [ཨ་ཧོ བུ་དྡྷོ ཨ་ཧོ དྷ་མྨོ (སཱི.) ཐེ་ར་གཱ. ༢༠༡ ཐེ་ར་གཱ་ཐཱ་ཡ ཏ་ད་ཊྛ་ཀ་ཐཱ་ཡ ཙ སཾ་ས་ནྡེ་ཏ་བྦཾ], ཨ་ཧོ ནོ ས་ཏྠུ ས་མྤ་དཱ;
ཐོ་ཀ་ཉྷི ས་པྤིཾ ད་ཏྭཱ་ན, ཨ་པྤ་མེ་ཡྻཾ ལ་བྷཱ་མ་ཧཾ.
༦༤. ‘‘མ་ཧཱ་ས་མུ་དྡེ ཨུ་ད་ཀཾ, ཡཱ་ཝ་ཏཱ ནེ་རུ་པ་སྶ་ཏོ;
མ་མ ས་པྤིཾ ཨུ་པཱ་དཱ་ཡ, ཀ་ལ་བྷཱ་གཾ ན ཧེ་སྶ་ཏི [ཧི་སྶ་ཏི (སྱཱ. ཀ.), ཨེ་སྶ་ཏི (སཱི.)].
༦༥. ‘‘ཡཱ་ཝ་ཏཱ ཙ་ཀྐ་ཝཱ་ལ༹་སྶ, ཀ་རི་ཡ་ནྟ་སྶ [ཀཱ་ར་ཡ་ནྟ་སྶ (སྱཱ.), ཀ་ཡི་ར་ནྟ་སྶ (པཱི.), ཨཱ་ཧ་ར་ནྟ་སྶ (ཀ.)] རཱ་སི་ཏོ;
མ་མ ནི་བྦ་ཏྟ་ཝ་ཏྠཱ་ནཾ [མ་ཡཱ ནི་ཝ་ཏྠ་ཝ་ཏྠཱ་ནཾ (པཱི.)], ཨོ་ཀཱ་སོ སོ ན ས་མྨ་ཏི.
༦༦. ‘‘པ་བྦ་ཏ་རཱ་ཛཱ ཧི་མ་ཝཱ, པ་ཝ་རོ་པི སི་ལུ་ཙྩ་ཡོ;
མ་མཱ་ནུ་ལི་ཏྟ་ག་ནྡྷ་སྶ, ཨུ་པ་ནི་དྷིཾ [ཨུ་པ་ནི་དྷཾ (སཱི. སྱཱ. ཀ.), ཨུ་པ་ནཱི་ཡཾ (པཱི.)] ན ཧེ་སྶ་ཏི.
༦༧. ‘‘ཝ་ཏྠཾ ག་ནྡྷ་ཉྩ ས་པྤི་ཉྩ, ཨ་ཉྙ་ཉྩ དི་ཊྛ་དྷ་མྨི་ཀཾ;
ཨ་ས་ངྑ་ཏ་ཉྩ ནི་བྦཱ་ནཾ, ས་པྤི་དཱ་ན་སྶི་དཾ ཕ་ལཾ.
༦༨. ‘‘ས་ཏི་པ་ཊྛཱ་ན་ས་ཡ་ནོ, ས་མཱ་དྷི་ཛྷཱ་ན་གོ་ཙ་རོ;
བོ་ཛ྄ཛྷ་ངྒ་བྷོ་ཛ་ནོ [… ཛ་ན་ནོ (སྱཱ. ཀ.)] ཨ་ཛྫ, ས་པྤི་དཱ་ན་སྶི་དཾ ཕ་ལཾ.
༦༩. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༧༠. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༧༡. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ མེ་ཏྟ་གཱུ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
མེ་ཏྟ་གུ་ཏྠེ་ར་སྶཱ་པ་དཱ་ནཾ ཏ་ཏི་ཡཾ.
༤. དྷོ་ཏ་ཀ་ཏྠེ་ར་ཨ་པ་དཱ་ནཾ
༧༢. ‘‘ག་ངྒཱ བྷཱ་གཱི་ར་ཐཱི ནཱ་མ, ཧི་མ་ཝ་ནྟཱ པ་བྷཱ་ཝི་ཏཱ [ཧི་མ་ཝ་ནྟ་པྤ་བྷཱ་ཝི་ཏཱ (སཱི.)];
ཧཾ་ས་ཝ་ཏི་ཡཱ དྭཱ་རེ་ན, ཨ་ནུ་ས་ནྡ་ཏི ཏཱ་ཝ་དེ.