༧. ཧེ་མ་ཀ་ཏྠེ་ར་ཨ་པ་དཱ་ནཾ
༡༨༣. ‘‘པ་བྦྷཱ་ར་ཀཱུ་ཊཾ ནི་སྶཱ་ཡ, ཨ་ནོ་མོ ནཱ་མ ཏཱ་པ་སོ;
ཨ་སྶ་མཾ སུ་ཀ་ཏཾ ཀ་ཏྭཱ, པ་ཎྞ་སཱ་ལེ ཝ་སཱི ཏ་དཱ.
༡༨༤. ‘‘སི་དྡྷཾ ཏ་སྶ ཏ་པོ ཀ་མྨཾ, སི་དྡྷི་པ་ཏྟོ ས་ཀེ བ་ལེ;
ས་ཀ་སཱ་མ་ཉྙ་ཝི་ཀྐ་ནྟོ, ཨཱ་ཏཱ་པཱི ནི་པ་ཀོ མུ་ནི.
༡༨༥. ‘‘ཝི་སཱ་ར་དོ ས་ས་མ་ཡེ, པ་ར་ཝཱ་དེ ཙ ཀོ་ཝི་དོ;
པ་ཊྛོ བྷཱུ་མ་ནྟ་ལི་ཀྑ་མྷི, ཨུ་པྤཱ་ཏ་མྷི ཙ ཀོ་ཝི་དོ.
༡༨༦. ‘‘ཝཱི་ཏ་སོ་ཀོ ནི་རཱ་ར་མྦྷོ, ཨ་པྤཱ་ཧཱ་རོ ཨ་ལོ་ལུ་པོ;
ལཱ་བྷཱ་ལཱ་བྷེ་ན ས་ནྟུ་ཊྛོ, ཛྷཱ་ཡཱི ཛྷཱ་ན་ར་ཏོ མུ་ནི.
༡༨༧. ‘‘པི་ཡ་ད་སྶཱི ནཱ་མ ས་མྦུ་དྡྷོ, ཨ་གྒོ ཀཱ་རུ་ཎི་ཀོ མུ་ནི;
ས་ཏྟེ ཏཱ་རེ་ཏུ་ཀཱ་མོ སོ, ཀ་རུ་ཎཱ་ཡ ཕ་རཱི ཏ་དཱ.
༡༨༨. ‘‘བོ་དྷ་ནེ་ཡྻཾ ཛ་ནཾ དི་སྭཱ, པི་ཡ་ད་སྶཱི མ་ཧཱ་མུ་ནི;
ཙ་ཀྐ་ཝཱ་ལ༹་ས་ཧ་སྶ་མྤི, ག་ནྟྭཱ ཨོ་ཝ་ད་ཏེ མུ་ནི.
༡༨༩. ‘‘མ་མུ་དྡྷ་རི་ཏུ་ཀཱ་མོ སོ, མ་མ་སྶ་མ་མུ་པཱ་ག་མི;
ན དི་ཊྛོ མེ ཛི་ནོ པུ་བྦེ, ན སུ་ཏོ་པི ཙ ཀ་སྶ་ཙི.
༡༩༠. ‘‘ཨུ་པྤཱ་ཏཱ སུ་པི་ནཱ མ་ཡ྄ཧཾ, ལ་ཀྑ་ཎཱ སུ་པྤ་ཀཱ་སི་ཏཱ;
པ་ཊྛོ བྷཱུ་མ་ནྟ་ལི་ཀྑ་མྷི, ན་ཀྑ་ཏྟ་པ་ད་ཀོ་ཝི་དོ.
༡༩༡. ‘‘སོ་ཧཾ བུ་དྡྷ་སྶ སུ་ཏྭཱ་ན, ཏ་ཏྠ ཙི་ཏྟཾ པ་སཱ་ད་ཡིཾ;
ཏི་ཊྛ་ནྟོ [བྷུ་ཉྫ་ནྟོ (སཱི. པཱི. ཀ.)] ཝཱ ནི་སི་ནྣོ ཝཱ, ས་རཱ་མི ནི་ཙྩ་ཀཱ་ལི་ཀཾ.
༡༩༢. ‘‘མ་ཡི ཨེ་ཝཾ ས་ར་ནྟ་མྷི, བྷ་ག་ཝཱ་པི ཨ་ནུ་སྶ་རི;
བུ་དྡྷཾ ཨ་ནུ་སྶ་ར་ནྟ་སྶ, པཱི་ཏི མེ ཧོ་ཏི ཏཱ་ཝ་དེ.
༡༩༣. ‘‘ཀཱ་ལ་ཉྩ པུ་ན་རཱ་ག་མྨ, ཨུ་པེ་སི མཾ མ་ཧཱ་མུ་ནི;
ས་མྤ་ཏྟེ་པི ན ཛཱ་ནཱ་མི, ཨ་ཡཾ བུ་དྡྷོ མ་ཧཱ་མུ་ནི.
༡༩༤. ‘‘ཨ་ནུ་ཀ་མྤ་ཀོ ཀཱ་རུ་ཎི་ཀོ, པི་ཡ་ད་སྶཱི མ་ཧཱ་མུ་ནི;
ས་ཉྫཱ་ནཱ་པེ་སི ཨ་ཏྟཱ་ནཾ, ‘ཨ་ཧཾ བུ་དྡྷོ ས་དེ་ཝ་ཀེ’.
༡༩༥. ‘‘ས་ཉྫཱ་ནི་ཏྭཱ་ན ས་མྦུ་དྡྷཾ, པི་ཡ་ད་སྶིཾ མ་ཧཱ་མུ་ནིཾ;
ས་ཀཾ ཙི་ཏྟཾ པ་སཱ་དེ་ཏྭཱ, ཨི་དཾ ཝ་ཙ་ན་མ་བྲ་ཝིཾ.
༡༩༦. ‘‘‘ཨ་ཉྙེ [ས་བྦེ (སྱཱ.)] པཱི་ཋེ ཙ པ་ལླ་ངྐེ, ཨཱ་ས་ནྡཱི་སུ ནི་སཱི་ད་རེ;
ཏུ་ཝ་མྤི ས་བྦ་ད་སྶཱ་ཝཱི, ནི་སཱི་ད ར་ཏ་ནཱ་ས་ནེ’.
༡༩༧. ‘‘ས་བྦ་ར་ཏ་ན་མ་ཡཾ པཱི་ཋཾ, ནི་མྨི་ནི་ཏྭཱ་ན ཏཱ་ཝ་དེ;
པི་ཡ་ད་སྶི་སྶ མུ་ནི་ནོ, ཨ་དཱ་སིཾ ཨི་དྡྷི་ནི་མྨི་ཏཾ.
༡༩༨. ‘‘ར་ཏ་ནེ ཙ ནི་སི་ནྣ་སྶ, པཱི་ཋ་ཀེ ཨི་དྡྷི་ནི་མྨི་ཏེ;
ཀུ་མྦྷ་མ་ཏྟཾ ཛ་མྦུ་ཕ་ལཾ, ཨ་དཱ་སིཾ ཏཱ་ཝ་དེ ཨ་ཧཾ.
༡༩༩. ‘‘མ་མ ཧཱ་སཾ ཛ་ནེ་ཏྭཱ་ན, པ་རི་བྷུ་ཉྫི མ་ཧཱ་མུ་ནི;
ཏ་དཱ ཙི་ཏྟཾ པ་སཱ་དེ་ཏྭཱ, ས་ཏྠཱ་རཾ ཨ་བྷི་ཝཱ་ད་ཡིཾ.
༢༠༠. ‘‘པི་ཡ་ད་སྶཱི ཏུ བྷ་ག་ཝཱ, ལོ་ཀ་ཛེ་ཊྛོ ན་རཱ་ས་བྷོ;
ར་ཏ་ནཱ་ས་ན་མཱ་སཱི་ནོ, ཨི་མཱ གཱ་ཐཱ ཨ་བྷཱ་ས་ཐ.
༢༠༡. ‘‘‘ཡོ མེ ར་ཏ་ན་མ་ཡཾ པཱི་ཋཾ, ཨ་མ་ཏ་ཉྩ ཕ་ལཾ ཨ་དཱ;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༢༠༢. ‘‘‘ས་ཏྟ་ས་ཏྟ་ཏི ཀ་པྤཱ་ནི, དེ་ཝ་ལོ་ཀེ ར་མི་སྶ་ཏི;
པ་ཉྩ་ས་ཏྟ་ཏི་ཀྑ་ཏྟུ་ཉྩ, ཙ་ཀྐ་ཝ་ཏྟཱི བྷ་ཝི་སྶ་ཏི.
༢༠༣. ‘‘‘དྭ་ཏྟིཾ་ས་ཀྑ་ཏྟུཾ དེ་ཝི་ནྡོ, དེ་ཝ་ར་ཛྫཾ ཀ་རི་སྶ་ཏི;
པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ.
༢༠༤. ‘‘‘སོ་ཎྞ་མ་ཡཾ རཱུ་པི་མ་ཡཾ, པ་ལླ་ངྐཾ སུ་ཀ་ཏཾ བ་ཧུཾ;
ལོ་ཧི་ཏ་ངྒ་མ་ཡ་ཉྩེ་ཝ, ལ་ཙྪ་ཏི ར་ཏ་ནཱ་མ་ཡཾ.
༢༠༥. ‘‘‘ཙ་ངྐ་མ་ནྟ་མྤི མ་ནུ་ཛཾ, པུ་ཉྙ་ཀ་མྨ་ས་མ་ངྒི་ནཾ;
པ་ལླ་ངྐཱ་ནི ཨ་ནེ་ཀཱ་ནི, པ་རི་ཝཱ་རེ་སྶ་རེ ཏ་དཱ.
༢༠༦. ‘‘‘ཀཱུ་ཊཱ་གཱ་རཱ ཙ པཱ་སཱ་དཱ, ས་ཡ་ན་ཉྩ མ་ཧཱ་ར་ཧཾ;
ཨི་མ་སྶ ཙི་ཏྟ་མ་ཉྙཱ་ཡ, ནི་བྦ་ཏྟི་སྶ་ནྟི ཏཱ་ཝ་དེ.
༢༠༧. ‘‘‘ས་ཊྛི ནཱ་ག་ས་ཧ་སྶཱ་ནི, ས་བྦཱ་ལ་ངྐཱ་ར་བྷཱུ་སི་ཏཱ;
སུ་ཝ་ཎྞ་ཀ་ཙྪཱ མཱ་ཏ་ངྒཱ, ཧེ་མ་ཀ་པྤ་ན་ཝཱ་ས་སཱ [ཧེ་མ་ཀ་པྤ་ནི་ཝཱ་ས་ནཱ (སཱི. སྱཱ.), ཧེ་མ་ཀ་པྤ་ནི་ཝཱ་ས་སཱ (ཀ.)].
༢༠༨. ‘‘‘ཨཱ་རཱུ་ལ༹ྷཱ གཱ་མ་ཎཱི་ཡེ་ཧི, ཏོ་མ་ར་ངྐུ་ས་པཱ་ཎི་བྷི;
ཨི་མཾ པ་རི་ཙ་རི་སྶ་ནྟི, ར་ཏྣ་པཱི་ཋ་སྶི་དཾ ཕ་ལཾ.
༢༠༩. ‘‘‘ས་ཊྛི ཨ་སྶ་ས་ཧ་སྶཱ་ནི, ས་བྦཱ་ལ་ངྐཱ་ར་བྷཱུ་སི་ཏཱ;
ཨཱ་ཛཱ་ནཱི་ཡཱ་ཝ ཛཱ་ཏི་ཡཱ, སི་ནྡྷ་ཝཱ སཱི་གྷ་ཝཱ་ཧི་ནོ.
༢༡༠. ‘‘‘ཨཱ་རཱུ་ལ༹ྷཱ གཱ་མ་ཎཱི་ཡེ་ཧི, ཨི་ལླི་ཡཱ་ཙཱ་པ་དྷཱ་རི་བྷི;
ཏེ་པི་མཾ པ་རི་ཙ་རི་སྶ་ནྟི, ར་ཏྣ་པཱི་ཋ་སྶི་དཾ ཕ་ལཾ.
༢༡༡. ‘‘‘ས་ཊྛི ར་ཐ་ས་ཧ་སྶཱ་ནི, ས་བྦཱ་ལ་ངྐཱ་ར་བྷཱུ་སི་ཏཱ;
དཱི་པཱ ཨ་ཐོ་པི ཝེ་ཡ་གྒྷཱ, ས་ནྣ་དྡྷཱ ཨུ་སྶི་ཏ་དྡྷ་ཛཱ.
༢༡༢. ‘‘‘ཨཱ་རཱུ་ལ༹ྷཱ གཱ་མ་ཎཱི་ཡེ་ཧི, ཙཱ་པ་ཧ་ཏྠེ་ཧི ཝ་མྨི་བྷི;
པ་རི་ཝཱ་རེ་སྶ་ནྟི་མཾ ནི་ཙྩཾ, ར་ཏྣ་པཱི་ཋ་སྶི་དཾ ཕ་ལཾ.
༢༡༣. ‘‘‘ས་ཊྛི དྷེ་ནུ་ས་ཧ་སྶཱ་ནི, དོ་ཧ་ཉྙཱ པུ་ངྒ་ཝཱུ་ས་བྷེ;
ཝ་ཙྪ་ཀེ ཛ་ན་ཡི་སྶ་ནྟི, ར་ཏྣ་པཱི་ཋ་སྶི་དཾ ཕ་ལཾ.
༢༡༤. ‘‘‘སོ་ལ༹་སི་ཏྠི་ས་ཧ་སྶཱ་ནི, ས་བྦཱ་ལ་ངྐཱ་ར་བྷཱུ་སི་ཏཱ;
ཝི་ཙི་ཏྟ་ཝ་ཏྠཱ་བྷ་ར་ཎཱ, ཨཱ་མུ་ཀྐ་མ་ཎི་ཀུ་ཎྜ་ལཱ.
༢༡༥. ‘‘‘ཨ་ལཱ༹་ར་པ་མྷཱ ཧ་སུ་ལཱ, སུ་ས་ཉྙཱ ཏ་ནུ་མ་ཛ྄ཛྷི་མཱ;
པ་རི་ཝཱ་རེ་སྶ་ནྟི་མཾ ནི་ཙྩཾ, ར་ཏྣ་པཱི་ཋ་སྶི་དཾ ཕ་ལཾ.
༢༡༦. ‘‘‘ཨ་ཊྛཱ་ར་སེ ཀ་པྤ་ས་ཏེ, གོ་ཏ་མོ ནཱ་མ ཙ་ཀྑུ་མཱ;
ཏ་མ་ནྡྷ་ཀཱ་རཾ ཝི་དྷ་མི་ཏྭཱ, བུ་དྡྷོ ལོ་ཀེ བྷ་ཝི་སྶ་ཏི.
༢༡༧. ‘‘‘ཏ་སྶ ད་སྶ་ན་མཱ་ག་མྨ, པ་བྦ་ཛི་སྶ་ཏི་ཀི་ཉྩ་ནོ;
ཏོ་ས་ཡི་ཏྭཱ་ན ས་ཏྠཱ་རཾ, སཱ་ས་ནེ་བྷི་ར་མི་སྶ་ཏི.
༢༡༨. ‘‘‘ཏ་སྶ དྷ་མྨཾ སུ་ཎི་ཏྭཱ་ན, ཀི་ལེ་སེ གྷཱ་ཏ་ཡི་སྶ་ཏི;
ས་བྦཱ་ས་ཝེ པ་རི་ཉྙཱ་ཡ, ནི་བྦཱ་ཡི་སྶ་ཏི་ནཱ་ས་ཝོ’.
༢༡༩. ‘‘ཝཱི་རི་ཡཾ མེ དྷུ་ར་དྷོ་ར་ཡ྄ཧཾ, ཡོ་ག་ཀྑེ་མཱ་དྷི་ཝཱ་ཧ་ནཾ;
ཨུ་ཏྟ་མ་ཏྠཾ པ་ཏྠ་ཡ་ནྟོ, སཱ་ས་ནེ ཝི་ཧ་རཱ་མ་ཧཾ.
༢༢༠. ‘‘ཨི་དཾ པ་ཙྪི་མ་ཀཾ མ་ཡ྄ཧཾ, ཙ་རི་མོ ཝ་ཏྟ་ཏེ བྷ་ཝོ;
ས་བྦཱ་ས་ཝཱ པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༢༢༡. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༢༢༢. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༢༢༣. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཧེ་མ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི;
ཧེ་མ་ཀ་ཏྠེ་ར་སྶཱ་པ་དཱ་ནཾ ས་ཏྟ་མཾ.
ས་ཏྟ་ར་ས་མཾ བྷཱ་ཎ་ཝཱ་རཾ.