༦. ན་ནྡ་ཀ་ཏྠེ་ར་ཨ་པ་དཱ་ནཾ
༡༦༡. ‘‘མི་ག་ལུ་དྡོ པུ་རེ ཨཱ་སིཾ, ཨ་ར་ཉྙེ ཀཱ་ན་ནེ ཨ་ཧཾ;
པ་ས་དཾ མི་ག་མེ་ས་ནྟོ, ས་ཡ་མྦྷུཾ ཨ་དྡ་སཾ ཨ་ཧཾ [ཛི་ནཾ (སཱི.)].
༡༦༢. ‘‘ཨ་ནུ་རུ་དྡྷོ ནཱ་མ ས་མྦུ་དྡྷོ, ས་ཡ་མྦྷཱུ ཨ་པ་རཱ་ཛི་ཏོ;
ཝི་ཝེ་ཀ་ཀཱ་མོ སོ དྷཱི་རོ, ཝ་ན་མ་ཛ྄ཛྷོ་ག་ཧཱི ཏ་དཱ.
༡༦༣. ‘‘ཙ་ཏུ་ད་ཎྜེ ག་ཧེ་ཏྭཱ་ན, ཙ་ཏུ་ཊྛཱ་ནེ ཋ་པེ་ས་ཧཾ;
མ་ཎྜ་པཾ སུ་ཀ་ཏཾ ཀ་ཏྭཱ, པ་དྨ་པུ་པྥེ་ཧི ཚཱ་ད་ཡིཾ.
༡༦༤. ‘‘མ་ཎྜ་པཾ ཚཱ་ད་ཡི་ཏྭཱ་ན, ས་ཡ་མྦྷུཾ ཨ་བྷི་ཝཱ་ད་ཡིཾ;
དྷ་ནུཾ ཏ་ཏྠེ་ཝ ནི་ཀྑི་པྤ, པ་བྦ་ཛིཾ ཨ་ན་གཱ་རི་ཡཾ.
༡༦༥. ‘‘ན་ཙི་རཾ པ་བྦ་ཛི་ཏ་སྶ [པ་བྦ་ཛི་ཏ་སྶ ཨ་ཙི་རཾ (སཱི.)], བྱཱ་དྷི མེ ཨུ་ད་པ་ཛྫ་ཐ;
པུ་བྦ་ཀ་མྨཾ ས་རི་ཏྭཱ་ན, ཏ་ཏྠ ཀཱ་ལ་ངྐ་ཏོ ཨ་ཧཾ.
༡༦༦. ‘‘པུ་བྦ་ཀ་མྨེ་ན སཾ་ཡུ་ཏྟོ, ཏུ་སི་ཏཾ ཨ་ག་མཱ་ས་ཧཾ;
ཏ་ཏྠ སོ་ཎྞ་མ་ཡཾ བྱ་མྷཾ, ནི་བྦ་ཏྟ་ཏི ཡ་དི་ཙྪ་ཀཾ.
༡༦༧. ‘‘ས་ཧ་སྶ་ཡུ་ཏྟཾ ཧ་ཡ་ཝཱ་ཧིཾ, དི་བྦ་ཡཱ་ན་མ་དྷི་ཊྛི་ཏོ;
ཨཱ་རུ་ཧི་ཏྭཱ་ན ཏཾ ཡཱ་ནཾ, ག་ཙྪཱ་མ་ཧཾ ཡ་དི་ཙྪ་ཀཾ.
༡༦༨. ‘‘ཏ་ཏོ མེ ནི་ཡྻ་མཱ་ན་སྶ, དེ་ཝ་བྷཱུ་ཏ་སྶ མེ ས་ཏོ;
ས་མ་ནྟཱ ཡོ་ཛ་ན་ས་ཏཾ, མ་ཎྜ་པོ མེ དྷ་རཱི་ཡ་ཏི.
༡༦༩. ‘‘ས་ཡ་ནེ་ཧཾ ཏུ་ཝ་ཊྚཱ་མི, ཨ་ཙྪ་ནྣེ [ཨ་ཙྩ་ནྟཾ (སཱི.), ཨ་ཙྩ་ནྟ (པཱི.)] པུ་པྥ་ས་ནྠ་ཏེ;
ཨ་ནྟ་ལི་ཀྑཱ ཙ པ་དུ་མཱ, ཝ་སྶ་ནྟེ ནི་ཙྩ་ཀཱ་ལི་ཀཾ.
༡༧༠. ‘‘མ་རཱི་ཙི་ཀེ ཕ་ནྡ་མཱ་ནེ, ཏ་པྤ་མཱ་ནེ ཙ ཨཱ་ཏ་པེ;
ན མཾ ཏཱ་པེ་ཏི ཨཱ་ཏཱ་པོ, མ་ཎྜ་པ་སྶ ཨི་དཾ ཕ་ལཾ.
༡༧༡. ‘‘དུ་གྒ་ཏིཾ ས་མ་ཏི་ཀྐ་ནྟོ, ཨ་པཱ་ཡཱ པི་ཧི་ཏཱ མ་མ;
མ་ཎྜ་པེ རུ་ཀྑ་མཱུ་ལེ ཝཱ, ས་ནྟཱ་པོ མེ ན ཝི་ཛྫ་ཏི.
༡༧༢. ‘‘མ་ཧཱི་ས་ཉྙཾ ཨ་དྷི་ཊྛཱ་ཡ, ལོ་ཎ་ཏོ་ཡཾ ཏ་རཱ་མ་ཧཾ;
ཏ་སྶ མེ སུ་ཀ་ཏཾ ཀ་མྨཾ, བུ་དྡྷ་པཱུ་ཛཱ་ཡི་དཾ ཕ་ལཾ.
༡༧༣. ‘‘ཨ་པ་ཐ་མྤི [ཨ་བྦྷ་མྷི (སྱཱ. ཀ.)] པ་ཐཾ ཀ་ཏྭཱ, ག་ཙྪཱ་མི ཨ་ནི་ལ་ཉྫ་སེ;
ཨ་ཧོ མེ སུ་ཀ་ཏཾ ཀ་མྨཾ, བུ་དྡྷ་པཱུ་ཛཱ་ཡི་དཾ ཕ་ལཾ.
༡༧༤. ‘‘པུ་བྦེ་ནི་ཝཱ་སཾ ཛཱ་ནཱ་མི, དི་བྦ་ཙ་ཀྑུ ཝི་སོ་དྷི་ཏཾ;
ཨཱ་ས་ཝཱ མེ པ་རི་ཀྑཱི་ཎཱ, བུ་དྡྷ་པཱུ་ཛཱ་ཡི་དཾ ཕ་ལཾ.
༡༧༥. ‘‘ཛ་ཧི་ཏཱ པུ་རི་མཱ ཛཱ་ཏི, བུ་དྡྷ་སྶ ཨོ་ར་སོ ཨ་ཧཾ;
དཱ་ཡཱ་དོ་མྷི ཙ ས་དྡྷ་མྨེ, བུ་དྡྷ་པཱུ་ཛཱ་ཡི་དཾ ཕ་ལཾ.
༡༧༦. ‘‘ཨཱ་རཱ་དྷི་ཏོ་མྷི སུ་ག་ཏཾ, གོ་ཏ་མཾ ས་ཀྱ་པུ་ངྒ་ཝཾ;
དྷ་མྨ་དྷ་ཛོ དྷ་མྨ་དཱ་ཡཱ་དོ [དྷ་མྨཱ་དཱ་སོ (ཀ.)], བུ་དྡྷ་པཱུ་ཛཱ་ཡི་དཾ ཕ་ལཾ.
༡༧༧. ‘‘ཨུ་པ་ཊྛི་ཏྭཱ་ན ས་མྦུ་དྡྷཾ, གོ་ཏ་མཾ ས་ཀྱ་པུ་ངྒ་ཝཾ;
པཱ་ར་ངྒ་མ་ནི་ཡཾ མ་གྒཾ, ཨ་པུ་ཙྪིཾ ལོ་ཀ་ནཱ་ཡ་ཀཾ.
༡༧༨. ‘‘ཨ་ཛ྄ཛྷི་ཊྛོ ཀ་ཐ་ཡཱི བུ་དྡྷོ, ག་མྦྷཱི་རཾ ནི་པུ་ཎཾ པ་དཾ;
ཏ་སྶཱ་ཧཾ དྷ་མྨཾ སུ་ཏྭཱ་ན, པ་ཏྟོ་མྷི ཨཱ་ས་ཝ་ཀྑ་ཡཾ.
༡༧༩. ‘‘ཨ་ཧོ མེ སུ་ཀ་ཏཾ ཀ་མྨཾ, པ་རི་མུ་ཏྟོ་མྷི ཛཱ་ཏི་ཡཱ;
ས་བྦཱ་ས་ཝ་པ་རི་ཀྑཱི་ཎོ, ན་ཏྠི དཱ་ནི པུ་ན་བྦྷ་ཝོ.
༡༨༠. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༡༨༡. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༡༨༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ན་ནྡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ན་ནྡ་ཀ་ཏྠེ་ར་སྶཱ་པ་དཱ་ནཾ ཚ་ཊྛཾ.