༤. དྷོ་ཏ་ཀ་ཏྠེ་ར་ཨ་པ་དཱ་ནཾ
༧༢. ‘‘ག་ངྒཱ བྷཱ་གཱི་ར་ཐཱི ནཱ་མ, ཧི་མ་ཝ་ནྟཱ པ་བྷཱ་ཝི་ཏཱ [ཧི་མ་ཝ་ནྟ་པྤ་བྷཱ་ཝི་ཏཱ (སཱི.)];
ཧཾ་ས་ཝ་ཏི་ཡཱ དྭཱ་རེ་ན, ཨ་ནུ་ས་ནྡ་ཏི ཏཱ་ཝ་དེ.
༧༣. ‘‘སོ་བྷི་ཏོ ནཱ་མ ཨཱ་རཱ་མོ, ག་ངྒཱ་ཀཱུ་ལེ སུ་མཱ་པི་ཏོ;
ཏ་ཏྠ པ་དུ་མུ་ཏྟ་རོ བུ་དྡྷོ, ཝ་ས་ཏེ ལོ་ཀ་ནཱ་ཡ་ཀོ.
༧༤. ‘‘ཏི་ད་སེ་ཧི ཡ་ཐཱ ཨི་ནྡོ, མ་ནུ་ཛེ་ཧི པུ་ར་ཀྑ་ཏོ;
ནི་སཱི་དི ཏ་ཏྠ བྷ་ག་ཝཱ, ཨ་ས་མྦྷཱི་ཏོ་ཝ ཀེ་ས་རཱི.
༧༥. ‘‘ན་ག་རེ ཧཾ་ས་ཝ་ཏི་ཡཱ, ཝ་སཱ་མི [ཨ་ཧོ་སིཾ (སྱཱ.)] བྲཱ་ཧྨ་ཎོ ཨ་ཧཾ;
ཚ་ལ༹་ངྒོ ནཱ་མ ནཱ་མེ་ན, ཨེ་ཝཾ་ནཱ་མོ མ་ཧཱ་མུ་ནི.
༧༦. ‘‘ཨ་ཊྛཱ་ར་ས སི་སྶ་ས་ཏཱ, པ་རི་ཝཱ་རེ་ནྟི མཾ ཏ་དཱ;
ཏེ་ཧི སི་སྶེ་ཧི ས་མི་ཏོ, ག་ངྒཱ་ཏཱི་རཾ ཨུ་པཱ་ག་མིཾ.
༧༧. ‘‘ཏ་ཏྠ་དྡ་སཱ་སིཾ ས་མ་ཎེ, ནི་ཀྐུ་ཧེ དྷོ་ཏ་པཱ་པ་ཀེ;
བྷཱ་གཱི་ར་ཐིཾ ཏ་ར་ནྟེ་ཧཾ [ཏ་ར་ནྟོ་ཧཾ (སྱཱ. པཱི.)], ཨེ་ཝཾ ཙི་ནྟེ་སི ཏཱ་ཝ་དེ.
༧༨. ‘‘སཱ་ཡཾ པཱ་ཏཾ [སཱ་ཡ་པཱ་ཏཾ (པཱི.)] ཏ་ར་ནྟཱ་མེ, བུ་དྡྷ་པུ་ཏྟཱ མ་ཧཱ་ཡ་སཱ;
ཝི་ཧེ་ས་ཡ་ནྟི ཨ་ཏྟཱ་ནཾ, ཏེ་སཾ ཨ་ཏྟཱ ཝི་ཧ་ཉྙ་ཏི.
༧༩. ‘‘ས་དེ་ཝ་ཀ་སྶ ལོ་ཀ་སྶ, བུ་དྡྷོ ཨ་གྒོ པ་ཝུ་ཙྩ་ཏི;
ན་ཏྠི མེ ད་ཀྑི་ཎེ ཀཱ་རཾ, ག་ཏི་མ་གྒ་ཝི་སོ་དྷ་ནཾ.
༨༠. ‘‘ཡཾ་ནཱུ་ན བུ་དྡྷ་སེ་ཊྛ་སྶ, སེ་ཏུཾ ག་ངྒཱ་ཡ ཀཱ་ར་ཡེ;
ཀཱ་རཱ་པེ་ཏྭཱ ཨི་མཾ ཀ་མྨཾ [སེ་ཏུཾ (སྱཱ.)], ས་ནྟ་རཱ་མི ཨི་མཾ བྷ་ཝཾ.
༨༡. ‘‘ས་ཏ་ས་ཧ་སྶཾ ད་ཏྭཱ་ན, སེ་ཏུཾ ཀཱ་རཱ་པ་ཡིཾ ཨ་ཧཾ;
ས་དྡ་ཧ་ནྟོ ཀ་ཏཾ ཀཱ་རཾ, ཝི་པུ་ལཾ མེ བྷ་ཝི་སྶ་ཏི.
༨༢. ‘‘ཀཱ་རཱ་པེ་ཏྭཱ་ན ཏཾ སེ་ཏུཾ, ཨུ་པེ་སིཾ ལོ་ཀ་ནཱ་ཡ་ཀཾ;
སི་ར་སི ཨ་ཉྫ་ལིཾ ཀ་ཏྭཱ, ཨི་མཾ ཝ་ཙ་ན་མ་བྲ་ཝིཾ.
༨༣. ‘‘‘ས་ཏ་ས་ཧ་སྶ་སྶ ཝ་ཡཾ [ཝ་ཡཾ ས་ཏ་ས་ཧ་སྶཾ་ཝ (ཀ.)], ད་ཏྭཱ [ཀ་ཏྭཱ (སཱི. པཱི.)] ཀཱ་རཱ་པི་ཏོ མ་ཡཱ;
ཏ་ཝ་ཏྠཱ་ཡ མ་ཧཱ་སེ་ཏུ, པ་ཊི་གྒ་ཎྷ མ་ཧཱ་མུ་ནེ.
༨༤. ‘‘‘པ་དུ་མུ་ཏྟ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ;
བྷི་ཀྑུ་ས་ངྒྷེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.
༨༥. ‘‘‘ཡོ མེ སེ་ཏུཾ ཨ་ཀཱ་རེ་སི, པ་ས་ནྣོ སེ་ཧི པཱ་ཎི་བྷི;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
(སེ་ཏུ་དཱ་ན་ཨཱ་ནི་སཾ་སོ)
༨༦. ‘‘‘ད་རི་ཏོ པ་བྦ་ཏ་ཏོ ཝཱ, རུ་ཀྑ་ཏོ པ་ཏི་ཏོ་པི་ཡཾ;
ཙུ་ཏོ་པི ལ་ཙྪ་ཏཱི ཋཱ་ནཾ, སེ་ཏུ་དཱ་ན་སྶི་དཾ ཕ་ལཾ.
༨༧. ‘‘‘ཝི་རཱུ་ལ༹ྷ་མཱུ་ལ་ས་ནྟཱ་ནཾ, ནི་གྲོ་དྷ་མི་ཝ མཱ་ལུ་ཏོ;
ཨ་མི་ཏྟཱ ན་པྤ་ས་ཧ་ནྟི, སེ་ཏུ་དཱ་ན་སྶི་དཾ ཕ་ལཾ.
༨༨. ‘‘‘ནཱ་སྶ ཙོ་རཱ པ་ས་ཧ་ནྟི, ནཱ་ཏི་མ་ཉྙ་ནྟི ཁ་ཏྟི་ཡཱ;
ས་བྦེ ཏ་རི་སྶ་ཏཱ་མི་ཏྟེ, སེ་ཏུ་དཱ་ན་སྶི་དཾ ཕ་ལཾ.
༨༩. ‘‘‘ཨ་བྦྷོ་ཀཱ་ས་ག་ཏཾ ས་ནྟཾ, ཀ་ཋི་ནཱ་ཏ་པ་ཏཱ་པི་ཏཾ;
པུ་ཉྙ་ཀ་མྨེ་ན སཾ་ཡུ་ཏྟཾ, ན བྷ་ཝི་སྶ་ཏི ཝེ་ད་ནཱ [ཏཱ་ཝ་དེ (ཀ.)].
༩༠. ‘‘‘དེ་ཝ་ལོ་ཀེ མ་ནུ་སྶེ ཝཱ, ཧ་ཏྠི་ཡཱ་ནཾ སུ་ནི་མྨི་ཏཾ;
ཏ་སྶ ས་ངྐ་པྤ་མ་ཉྙཱ་ཡ, ནི་བྦ་ཏྟི་སྶ་ཏི ཏཱ་ཝ་དེ.
༩༡. ‘‘‘ས་ཧ་སྶ་སྶཱ ཝཱ་ཏ་ཛ་ཝཱ, སི་ནྡྷ་ཝཱ སཱི་གྷ་ཝཱ་ཧ་ནཱ;
སཱ་ཡཾ པཱ་ཏཾ ཨུ་པེ་སྶ་ནྟི, སེ་ཏུ་དཱ་ན་སྶི་དཾ ཕ་ལཾ.
༩༢. ‘‘‘ཨཱ་ག་ནྟྭཱ་ན མ་ནུ་སྶ་ཏྟཾ, སུ་ཁི་ཏོ་ཡཾ བྷ་ཝི་སྶ་ཏི;
ཝེ་ཧཱ་སཾ [ཨི་ཧཱ་པི (སཱི. སྱཱ. པཱི.)] མ་ནུ་ཛ་སྶེ་ཝ, ཧ་ཏྠི་ཡཱ་ནཾ བྷ་ཝི་སྶ་ཏི.
༩༣. ‘‘‘ཀ་པྤ་ས་ཏ་ས་ཧ་སྶ་མྷི, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༩༤. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
ས་བྦཱ་ས་ཝེ པ་རི་ཉྙཱ་ཡ, ནི་བྦཱ་ཡི་སྶ་ཏི་ནཱ་ས་ཝོ’.
༩༥. ‘‘ཨ་ཧོ མེ སུ་ཀ་ཏཾ ཀ་མྨཾ, ཛ་ལ་ཛུ་ཏྟ་མ་ནཱ་མ་ཀེ;
ཏ་ཏྠ ཀཱ་རཾ ཀ་རི་ཏྭཱ་ན, པ་ཏྟོ་ཧཾ ཨཱ་ས་ཝ་ཀྑ་ཡཾ.
༩༦. ‘‘པ་དྷཱ་ནཾ པ་ཧི་ཏ་ཏྟོ་མྷི, ཨུ་པ་ས་ནྟོ ནི་རཱུ་པ་དྷི;
ནཱ་གོ་ཝ བ་ནྡྷ་ནཾ ཚེ་ཏྭཱ, ཝི་ཧ་རཱ་མི ཨ་ནཱ་ས་ཝོ.
༩༧. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༩༨. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༩༩. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ དྷོ་ཏ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
དྷོ་ཏ་ཀ་ཏྠེ་ར་སྶཱ་པ་དཱ་ནཾ ཙ་ཏུ་ཏྠཾ.