༥. པ་དུ་མ་ཀཱུ་ཊཱ་གཱ་རི་ཡ་ཏྠེ་ར་ཨ་པ་དཱ་ནཾ
༣༥༣. ‘‘པི་ཡ་ད་སྶཱི ནཱ་མ བྷ་ག་ཝཱ, ས་ཡ་མྦྷཱུ ལོ་ཀ་ནཱ་ཡ་ཀོ;
ཝི་ཝེ་ཀ་ཀཱ་མོ ས་མྦུ་དྡྷོ, ས་མཱ་དྷི་ཀུ་ས་ལོ མུ་ནི.
༣༥༤. ‘‘ཝ་ན་ས་ཎྜཾ ས་མོ་ག་ཡ྄ཧ, པི་ཡ་ད་སྶཱི མ་ཧཱ་མུ་ནི;
པཾ་སུ་ཀཱུ་ལཾ པ་ཏྠ་རི་ཏྭཱ, ནི་སཱི་དི པུ་རི་སུ་ཏྟ་མོ.
༣༥༥. ‘‘མི་ག་ལུ་དྡོ པུ་རེ ཨཱ་སིཾ, ཨ་ར་ཉྙེ [ཝི་པི་ནེ (སཱི.), ཨི་རི་ནེ (སྱཱ. ཀ.)] ཀཱ་ན་ནེ ཨ་ཧཾ;
པ་ས་དཾ མི་ག་མེ་ས་ནྟོ, ཨཱ་ཧི་ཎྜཱ་མི ཨ་ཧཾ ཏ་དཱ.
༣༥༦. ‘‘ཏ་ཏྠ་དྡ་སཱ་སིཾ ས་མྦུ་དྡྷཾ, ཨོ་གྷ་ཏི་ཎྞ་མ་ནཱ་ས་ཝཾ;
པུ་པྥི་ཏཾ སཱ་ལ་རཱ་ཛཾ་ཝ, ས་ཏ་རཾ་སིཾ་ཝ ཨུ་གྒ་ཏཾ.
༣༥༧. ‘‘དི་སྭཱ་ན་ཧཾ དེ་ཝ་དེ་ཝཾ, པི་ཡ་ད་སྶིཾ མ་ཧཱ་ཡ་སཾ;
ཛཱ་ཏ་སྶ་རཾ ས་མོ་ག་ཡ྄ཧ, པ་དུ་མཾ ཨཱ་ཧ་རིཾ ཏ་དཱ.
༣༥༨. ‘‘ཨཱ་ཧ་རི་ཏྭཱ་ན པ་དུ་མཾ, ས་ཏ་པ་ཏྟཾ མ་ནོ་ར་མཾ;
ཀཱུ་ཊཱ་གཱ་རཾ ཀ་རི་ཏྭཱ་ན, ཚཱ་ད་ཡིཾ པ་དུ་མེ་ན་ཧཾ.
༣༥༩. ‘‘ཨ་ནུ་ཀ་མྤ་ཀོ ཀཱ་རུ་ཎི་ཀོ, པི་ཡ་ད་སྶཱི མ་ཧཱ་མུ་ནི;
ས་ཏྟ་ར་ཏྟི་ནྡི་ཝཾ བུ་དྡྷོ, ཀཱུ་ཊཱ་གཱ་རེ ཝ་སཱི ཛི་ནོ.
༣༦༠. ‘‘པུ་རཱ་ཎཾ ཚ་ཌྜ་ཡི་ཏྭཱ་ན, ན་ཝེ་ན ཚཱ་ད་ཡིཾ ཨ་ཧཾ;
ཨ་ཉྫ་ལིཾ པ་གྒ་ཧེ་ཏྭཱ་ན, ཨ་ཊྛཱ་སིཾ ཏཱ་ཝ་དེ ཨ་ཧཾ.
༣༦༡. ‘‘ཝུ་ཊྛ་ཧི་ཏྭཱ ས་མཱ་དྷི་མྷཱ, པི་ཡ་ད་སྶཱི མ་ཧཱ་མུ་ནི;
དི་སཾ ཨ་ནུ་ཝི་ལོ་ཀེ་ནྟོ, ནི་སཱི་དི ལོ་ཀ་ནཱ་ཡ་ཀོ.
༣༦༢. ‘‘ཏ་དཱ སུ་ད་སྶ་ནོ ནཱ་མ, ཨུ་པ་ཊྛཱ་ཀོ མ་ཧི་དྡྷི་ཀོ;
ཙི་ཏྟ་མ་ཉྙཱ་ཡ བུ་དྡྷ་སྶ, པི་ཡ་ད་སྶི་སྶ ས་ཏྠུ་ནོ.
༣༦༣. ‘‘ཨ་སཱི་ཏི་ཡཱ ས་ཧ་སྶེ་ཧི, བྷི་ཀྑཱུ་ཧི པ་རི་ཝཱ་རི་ཏོ;
ཝ་ན་ནྟེ སུ་ཁ་མཱ་སཱི་ནཾ, ཨུ་པེ་སི ལོ་ཀ་ནཱ་ཡ་ཀཾ.
༣༦༤. ‘‘ཡཱ་ཝ་ཏཱ ཝ་ན་ས་ཎྜ་མྷི, ཨ་དྷི་ཝ་ཏྠཱ ཙ དེ་ཝ་ཏཱ;
བུ་དྡྷ་སྶ ཙི་ཏྟ་མ་ཉྙཱ་ཡ, ས་བྦེ ས་ནྣི་པ་ཏུཾ ཏ་དཱ.
༣༦༥. ‘‘ས་མཱ་ག་ཏེ་སུ ཡ་ཀྑེ་སུ, ཀུ་མྦྷ་ཎྜེ ས་ཧ་ར་ཀྑ་སེ;
བྷི་ཀྑུ་ས་ངྒྷེ ཙ ས་མྤ་ཏྟེ, གཱ་ཐཱ པ་བྱཱ་ཧ་རཱི [ས་བྱཱ་ཧ་རཱི (སྱཱ.), མཱ་བྱཱ་ཧ་རཱི (སཱི.)] ཛི་ནོ.
༣༦༦. ‘‘‘ཡོ མཾ ས་ཏྟཱ་ཧཾ པཱུ་ཛེ་སི, ཨཱ་ཝཱ་ས་ཉྩ ཨ་ཀཱ་སི མེ;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༣༦༧. ‘‘‘སུ་དུ་དྡ་སཾ སུ་ནི་པུ་ཎཾ, ག་མྦྷཱི་རཾ སུ་པྤ་ཀཱ་སི་ཏཾ;
ཉཱ་ཎེ་ན ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༣༦༨. ‘‘‘ཙ་ཏུ་དྡ་སཱ་ནི ཀ་པྤཱ་ནི, དེ་ཝ་ར་ཛྫཾ ཀ་རི་སྶ་ཏི;
ཀཱུ་ཊཱ་གཱ་རཾ མ་ཧ་ནྟ་སྶ [བྲ་ཧཾ ཏ་སྶ (སཱི. སྱཱ.)], པ་དྨ་པུ་པྥེ་ཧི ཚཱ་དི་ཏཾ.
༣༦༩. ‘‘‘ཨཱ་ཀཱ་སེ དྷཱ་ར་ཡི་སྶ་ཏི, པུ་པྥ་ཀ་མྨ་སྶི་དཾ [པུ་བྦ་ཀ་མྨ་སྶི་དཾ (སྱཱ.)] ཕ་ལཾ;
ཙ་ཏུ་བྦཱི་སེ [ཙ་ཏུ་དྡ་སེ (སྱཱ.)] ཀ་པྤ་ས་ཏེ, ཝོ་ཀི་ཎྞཾ སཾ་ས་རི་སྶ་ཏི.
༣༧༠. ‘‘‘ཏ་ཏྠ པུ་པྥ་མ་ཡཾ བྱ་མྷཾ, ཨཱ་ཀཱ་སེ དྷཱ་ར་ཡི་སྶ་ཏི;
ཡ་ཐཱ པ་དུ་མ་པ་ཏྟ་མྷི, ཏོ་ཡཾ ན ཨུ་པ་ལི་མྤ་ཏི.
༣༧༡. ‘‘‘ཏ་ཐེ་ཝཱི་མ་སྶ ཉཱ་ཎ་མྷི, ཀི་ལེ་སཱ ནོ་པ་ལི་མྤ་རེ;
མ་ན་སཱ ཝི་ནི་ཝ་ཊྚེ་ཏྭཱ, པ་ཉྩ ནཱི་ཝ་ར་ཎེ ཨ་ཡཾ.
༣༧༢. ‘‘‘ཙི་ཏྟཾ ཛ་ནེ་ཏྭཱ ནེ་ཀྑ་མྨེ, ཨ་གཱ་རཱ པ་བྦ་ཛི་སྶ་ཏི;
ཏ་ཏོ པུ་པྥ་མ་ཡེ བྱ་མྷེ, དྷཱ་རེ་ནྟེ [པུ་པྥ་མ་ཡཾ བྱ་མྷཾ, དྷཱ་རེ་ནྟཾ (སྱཱ. ཀ.)] ནི་ཀྑ་མི་སྶ་ཏི.
༣༧༣. ‘‘‘རུ་ཀྑ་མཱུ་ལེ ཝ་ས་ནྟ་སྶ, ནི་པ་ཀ་སྶ ས་ཏཱི་མ་ཏོ;
ཏ་ཏྠ པུ་པྥ་མ་ཡཾ བྱ་མྷཾ, མ་ཏྠ་ཀེ དྷཱ་ར་ཡི་སྶ་ཏི.
༣༧༤. ‘‘‘ཙཱི་ཝ་རཾ པི་ཎྜ་པཱ་ཏ་ཉྩ, པ་ཙྩ་ཡཾ ས་ཡ་ནཱ་ས་ནཾ;
ད་ཏྭཱ་ན བྷི་ཀྑུ་ས་ངྒྷ་སྶ, ནི་བྦཱ་ཡི་སྶ་ཏི་ནཱ་ས་ཝོ’.
༣༧༥. ‘‘ཀཱུ་ཊཱ་གཱ་རེ་ན ཙ་ར་ཏཱ [ཙ་ར་ཎཱ (སཱི. པཱི. ཀ.), ཙ་རི་ཏེ (སྱཱ.)], པ་བྦ་ཛྫཾ ཨ་བྷི་ནི་ཀྑ་མིཾ;
རུ་ཀྑ་མཱུ་ལེ ཝ་ས་ནྟ་མྤི [ཝ་ས་ནྟ་མྷི (སཱི.), ཝ་ས་ཏོ་པི (?)], ཀཱུ་ཊཱ་གཱ་རཾ དྷ་རཱི་ཡ་ཏི.
༣༧༦. ‘‘ཙཱི་ཝ་རེ པི་ཎྜ་པཱ་ཏེ ཙ, ཙེ་ཏ་ནཱ མེ ན ཝི་ཛྫ་ཏི;
པུ་ཉྙ་ཀ་མྨེ་ན སཾ་ཡུ་ཏྟོ, ལ་བྷཱ་མི པ་རི་ནི་ཊྛི་ཏཾ.
༣༧༧. ‘‘ག་ཎ་ནཱ་ཏོ ཨ་ས་ངྑེ་ཡྻཱ, ཀ་པྤ་ཀོ་ཊཱི བ་ཧཱུ མ་མ;
རི་ཏྟ་ཀཱ ཏེ ཨ་ཏི་ཀྐ་ནྟཱ, པ་མུ་ཏྟཱ ལོ་ཀ་ནཱ་ཡ་ཀཱ.
༣༧༨. ‘‘ཨ་ཊྛཱ་ར་སེ ཀ་པྤ་ས་ཏེ, པི་ཡ་ད་སྶཱི ཝི་ནཱ་ཡ་ཀོ;
ཏ་མ་ཧཾ པ་ཡི་རུ་པཱ་སི་ཏྭཱ, ཨི་མཾ ཡོ་ནིཾ ཨུ་པཱ་ག་ཏོ.
༣༧༩. ‘‘ཨི་དྷ པ་སྶཱ་མི [ཨི་དྷ་དྡ་སཱ་སིཾ (སཱི.)] ས་མྦུ་དྡྷཾ, ཨ་ནོ་མཾ ནཱ་མ ཙ་ཀྑུ་མཾ;
ཏ་མ་ཧཾ ཨུ་པ་ག་ནྟྭཱ་ན, པ་བྦ་ཛིཾ ཨ་ན་གཱ་རི་ཡཾ.
༣༨༠. ‘‘དུ་ཀྑ་སྶ་ནྟ་ཀ་རོ བུ་དྡྷོ, མ་གྒཾ མེ དེ་ས་ཡཱི ཛི་ནོ;
ཏ་སྶ དྷ་མྨཾ སུ་ཎི་ཏྭཱ་ན, པ་ཏྟོ་མྷི ཨ་ཙ་ལཾ པ་དཾ.
༣༨༡. ‘‘ཏོ་ས་ཡི་ཏྭཱ་ན ས་མྦུ་དྡྷཾ, གོ་ཏ་མཾ ས་ཀྱ་པུ་ངྒ་ཝཾ;
ས་བྦཱ་ས་ཝེ པ་རི་ཉྙཱ་ཡ, ཝི་ཧ་རཱ་མི ཨ་ནཱ་ས་ཝོ.
༣༨༢. ‘‘ཨ་ཊྛཱ་ར་སེ ཀ་པྤ་ས་ཏེ, ཡཾ བུ་དྡྷ་མ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༣༨༣. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ས་བྦཱ་ས་ཝཱ པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༣༨༤. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༣༨༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ པ་དུ་མ་ཀཱུ་ཊཱ་གཱ་རི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
པ་དུ་མ་ཀཱུ་ཊཱ་གཱ་རི་ཡ་ཏྠེ་ར་སྶཱ་པ་དཱ་ནཾ པ་ཉྩ་མཾ.