༣. ས་བྦ་ཀི་ཏྟི་ཀ་ཏྠེ་ར་ཨ་པ་དཱ་ནཾ
༣༠༤. ‘‘ཀ་ཎི་ཀཱ་རཾ་ཝ ཛ་ལི་ཏཾ [ཛོ་ཏ་ནྟཾ (སཱི.)], དཱི་པ་རུ་ཀྑཾ་ཝ ཨུ་ཛྫ་ལཾ [ཛོ་ཏི་ཏཾ (སྱཱ.)];
ཨོ་ས་དྷིཾ་ཝ ཝི་རོ་ཙ་ནྟཾ, ཝི་ཛྫུ་ཏཾ ག་ག་ནེ ཡ་ཐཱ.
༣༠༥. ‘‘ཨ་ས་མྦྷཱི་ཏཾ ཨ་ནུ་ཏྟཱ་སིཾ, མི་ག་རཱ་ཛཾ་ཝ ཀེ་ས་རིཾ;
ཉཱ་ཎཱ་ལོ་ཀཾ པ་ཀཱ་སེ་ནྟཾ, མ་དྡ་ནྟཾ ཏི་ཏྠི་ཡེ ག་ཎེ.
༣༠༦. ‘‘ཨུ་དྡྷ་ར་ནྟཾ ཨི་མཾ ལོ་ཀཾ, ཚི་དྡ་ནྟཾ ས་བྦ་སཾ་ས་ཡཾ;
ག་ཛྫ་ནྟཾ [ཨ་ས་མྦྷཱི་ཏཾ (སྱཱ.), ག་ཙྪ་ནྟཾ (ཀ.)] མི་ག་རཱ་ཛཾ་ཝ, ཨ་དྡ་སཾ ལོ་ཀ་ནཱ་ཡ་ཀཾ.
༣༠༧. ‘‘ཛ་ཊཱ་ཛི་ན་དྷ་རོ ཨཱ་སིཾ, བྲ་ཧཱ ཨུ་ཛུ པ་ཏཱ་པ་ཝཱ;
ཝཱ་ཀ་ཙཱི་རཾ ག་ཧེ་ཏྭཱ་ན, པཱ་ད་མཱུ་ལེ ཨ་པ་ཏྠ་རིཾ.
༣༠༨. ‘‘ཀཱ་ལཱ༹་ནུ་སཱ་རི་ཡཾ ག་ཡ྄ཧ, ཨ་ནུ་ལི་མྤིཾ ཏ་ཐཱ་ག་ཏཾ;
ས་མྦུ་དྡྷ་མ་ནུ་ལི་མྤེ་ཏྭཱ, ས་ནྠ་ཝིཾ ལོ་ཀ་ནཱ་ཡ་ཀཾ.
༣༠༩. ‘‘ས་མུ་དྡྷ་ར་སི་མཾ ལོ་ཀཾ, ཨོ་གྷ་ཏི་ཎྞ [ཨོ་གྷ་ཏི་ཎྞོ (སྱཱ. ཀ.)] མ་ཧཱ་མུ་ནི;
ཉཱ་ཎཱ་ལོ་ཀེ་ན ཛོ་ཏེ་སི, ནཱ་ཝ་ཊཾ [པ་ཝ་རཾ (སྱཱ.), ཝ་ཛི་ར (པཱི.)] ཉཱ་ཎ་མུ་ཏྟ་མཾ.
༣༡༠. ‘‘དྷ་མྨ་ཙ་ཀྐཾ [ཏུ་ཝཾ ཙ་ཀྐཾ (ཀ.)] པ་ཝ་ཏྟེ་སི, མ་དྡ་སེ པ་ར་ཏི་ཏྠི་ཡེ;
ཨུ་ས་བྷོ ཛི་ཏ་ས་ངྒཱ་མོ, ས་མྤ་ཀ་མྤེ་སི མེ་ད་ནིཾ.
༣༡༡. ‘‘མ་ཧཱ་ས་མུ་དྡེ ཨཱུ་མི་ཡོ, ཝེ་ལ་ནྟ་མྷི པ་བྷི་ཛྫ་རེ;
ཏ་ཐེ་ཝ ཏ་ཝ ཉཱ་ཎ་མྷི, ས་བྦ་དི་ཊྛཱི པ་བྷི་ཛྫ་རེ.
༣༡༢. ‘‘སུ་ཁུ་མ་ཙྪི་ཀ་ཛཱ་ལེ་ན, ས་ར་མྷི ས་མྤ་ཏཱ་ནི་ཏེ;
ཨ་ནྟོ་ཛཱ་ལི་ཀ་ཏཱ [ཛཱ་ལ་ག་ཏཱ (སཱི.)] པཱ་ཎཱ, པཱི་ལི༹་ཏཱ ཧོ་ནྟི ཏཱ་ཝ་དེ.
༣༡༣. ‘‘ཏ་ཐེ་ཝ ཏི་ཏྠི་ཡཱ ལོ་ཀེ, པུ་ཐུ་པཱ་ས་ཎྜ་ནི་སྶི་ཏཱ [མཱུ་ལ༹ྷཱ ས་ཙྩ་ཝི་ནི་སྶ་ཊཱ (སྱཱ.), མུ་ཊྛ་ས་ཙྩ་ཝི་ནི་སྶ་ཊཱ (ཀ.)];
ཨ་ནྟོ་ཉཱ་ཎ་ཝ་རེ ཏུ་ཡ྄ཧཾ, པ་རི་ཝ་ཏྟ་ནྟི མཱ་རི་ས.
༣༡༤. ‘‘པ་ཏི་ཊྛཱ ཝུ་ཡ྄ཧ་ཏཾ ཨོ་གྷེ, ཏྭ་ཉྷི ནཱ་ཐོ ཨ་བ་ནྡྷུ་ནཾ;
བྷ་ཡ་ཊྚི་ཏཱ་ནཾ ས་ར་ཎཾ, མུ་ཏྟི་ཏྠཱི་ནཾ པ་རཱ་ཡ་ཎཾ.
༣༡༥. ‘‘ཨེ་ཀ་ཝཱི་རོ ཨ་ས་དི་སོ, མེ་ཏྟཱ་ཀ་རུ་ཎ་ས་ཉྩ་ཡོ [ས་ཉྙུ་ཏོ (སྱཱ.)];
ཨ་ས་མོ སུ་ས་མོ ས་ནྟོ [སུ་སཱི་ལོ ཨ་ས་མོ ས་ནྟོ (སཱི.), པ་ཉྙ་ཝཱ ཡུ་ཏྟ་ཙཱ་གོ ཙ (སྱཱ.)], ཝ་སཱི ཏཱ་དཱི ཛི་ཏ་ཉྫ་ཡོ.
༣༡༦. ‘‘དྷཱི་རོ ཝི་ག་ཏ་ས་མྨོ་ཧོ, ཨ་ནེ་ཛོ ཨ་ཀ་ཐཾ་ཀ་ཐཱི;
ཏུ་སི་ཏོ [ཝུ་སི་ཏོ (སཱི.)] ཝ་ནྟ་དོ་སོ་སི, ནི་མྨ་ལོ སཾ་ཡ་ཏོ སུ་ཙི.
༣༡༧. ‘‘ས་ངྒཱ་ཏི་གོ ཧ་ཏ་མ་དོ [ག་ཏ་མ་དོ (སྱཱ.), ཏ་མ་ནུ་དོ (ཀ.)], ཏེ་ཝི་ཛྫོ ཏི་བྷ་ཝ་ནྟ་གོ;
སཱི་མཱ་ཏི་གོ དྷ་མྨ་ག་རུ, ག་ཏ་ཏྠོ ཧི་ཏ་ཝ་བྦྷུ་ཏོ [ཧི་ཏ་ཝ་པྤ་ཐོ (སཱི. སྱཱ.)].
༣༡༨. ‘‘ཏཱ་ར་ཀོ ཏྭཾ ཡ་ཐཱ ནཱ་ཝཱ, ནི་དྷཱི་ཝ་སྶཱ་ས་ཀཱ་ར་ཀོ;
ཨ་ས་མྦྷཱི་ཏོ ཡ་ཐཱ སཱི་ཧོ, ག་ཛ་རཱ་ཛཱ་ཝ ད་པྤི་ཏོ.
༣༡༩. ‘‘ཐོ་མེ་ཏྭཱ ད་ས་གཱ་ཐཱ་ཧི, པ་དུ་མུ་ཏྟ་རཾ མ་ཧཱ་ཡ་སཾ;
ཝ་ནྡི་ཏྭཱ ས་ཏྠུ་ནོ པཱ་དེ, ཏུ་ཎྷཱི ཨ་ཊྛཱ་ས་ཧཾ ཏ་དཱ.
༣༢༠. ‘‘པ་དུ་མུ་ཏྟ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ;
བྷི་ཀྑུ་ས་ངྒྷེ ཋི་ཏོ ས་ཏྠཱ, ཨི་མཱ གཱ་ཐཱ ཨ་བྷཱ་ས་ཐ.
༣༢༡. ‘‘‘ཡོ མེ སཱི་ལ་ཉྩ ཉཱ་ཎ་ཉྩ, ས་དྡྷ་མྨ་ཉྩཱ་པི ཝ་ཎྞ་ཡི [དྷ་མྨ་ཉྩཱ་པི པ་ཀི་ཏྟ་ཡི (སཱི. སྱཱ.)];
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༣༢༢. ‘‘‘ས་ཊྛི ཀ་པྤ་ས་ཧ་སྶཱ་ནི, དེ་ཝ་ལོ་ཀེ ར་མི་སྶ་ཏི;
ཨ་ཉྙེ དེ་ཝེ་བྷི་བྷ་ཝི་ཏྭཱ, ཨི་སྶ་རཾ ཀཱ་ར་ཡི་སྶ་ཏི.
༣༢༣. ‘‘‘སོ པ་ཙྪཱ པ་བྦ་ཛི་ཏྭཱ་ན, སུ་ཀྐ་མཱུ་ལེ་ན ཙོ་དི་ཏོ;
གོ་ཏ་མ་སྶ བྷ་ག་ཝ་ཏོ, སཱ་ས་ནེ པ་བྦ་ཛི་སྶ་ཏི.
༣༢༤. ‘‘‘པ་བྦ་ཛི་ཏྭཱ་ན ཀཱ་ཡེ་ན, པཱ་པ་ཀ་མྨཾ ཝི་ཝ་ཛྫི་ཡ;
ས་བྦཱ་ས་ཝེ པ་རི་ཉྙཱ་ཡ, ནི་བྦཱ་ཡི་སྶ་ཏི་ནཱ་ས་ཝོ’.
༣༢༥. ‘‘ཡ་ཐཱ་པི མེ་གྷོ ཐ་ན་ཡཾ, ཏ་པྤེ་ཏི མེ་དི་ནིཾ ཨི་མཾ;
ཏ་ཐེ་ཝ ཏྭཾ མ་ཧཱ་ཝཱི་ར, དྷ་མྨེ་ན ཏ་པྤ་ཡཱི མ་མཾ.
༣༢༦. ‘‘སཱི་ལཾ པ་ཉྙ་ཉྩ དྷ་མྨ་ཉྩ, ཐ་ཝི་ཏྭཱ ལོ་ཀ་ནཱ་ཡ་ཀཾ;
པ་ཏྟོ་མྷི པ་ར་མཾ ས་ནྟིཾ, ནི་བྦཱ་ནཾ པ་ད་མ་ཙྩུ་ཏཾ.
༣༢༧. ‘‘ཨ་ཧོ ནཱུ་ན ས བྷ་ག་ཝཱ, ཙི་རཾ ཏི་ཊྛེ་ཡྻ ཙ་ཀྑུ་མཱ;
ཨ་ཉྙཱ་ཏ་ཉྩ ཝི་ཛཱ་ནེ་ཡྻུཾ, ཕུ་སེ་ཡྻུཾ [ཨ་ཉྙཱ་ཏ་ཉྩཱ་པི ཛཱ་ནེ་ཡྻ, པ་སྶེ་ཡྻ (ཀ.)] ཨ་མ་ཏཾ པ་དཾ.
༣༢༨. ‘‘ཨ་ཡཾ མེ པ་ཙྪི་མཱ ཛཱ་ཏི, བྷ་ཝཱ ས་བྦེ ས་མཱུ་ཧ་ཏཱ;
ས་བྦཱ་ས་ཝེ པ་རི་ཉྙཱ་ཡ, ཝི་ཧ་རཱ་མི ཨ་ནཱ་ས་ཝོ.
༣༢༩. ‘‘ས་ཏ་ས་ཧ་སྶི་ཏོ ཀ་པྤེ, ཡཾ བུ་དྡྷ་མ་བྷི་ཐོ་མ་ཡིཾ
དུ་གྒ་ཏིཾ ནཱ་བྷི་ཛཱ་ནཱ་མི, ཀི་ཏྟ་ནཱ་ཡ ཨི་དཾ ཕ་ལཾ.
༣༣༠. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ས་བྦཱ་ས་ཝཱ པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༣༣༡. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༣༣༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ས་བྦ་ཀི་ཏྟི་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ས་བྦ་ཀི་ཏྟི་ཀ་ཏྠེ་ར་སྶཱ་པ་དཱ་ནཾ ཏ་ཏི་ཡཾ.