༢. སེ་ལ་ཏྠེ་ར་ཨ་པ་དཱ་ནཾ
༢༠༨. ‘‘ན་ག་རེ ཧཾ་ས་ཝ་ཏི་ཡཱ, ཝཱི་ཐི་སཱ་མཱི ཨ་ཧོ་ས་ཧཾ;
མ་མ ཉཱ་ཏཱི ས་མཱ་ནེ་ཏྭཱ, ཨི་དཾ ཝ་ཙ་ན་མ་བྲ་ཝིཾ.
༢༠༩. ‘‘‘བུ་དྡྷོ ལོ་ཀེ ས་མུ་པྤ་ནྣོ, པུ་ཉྙ་ཀྑེ་ཏྟོ ཨ་ནུ་ཏྟ་རོ [པུ་ཉྙ་ཀྑེ་ཏྟཾ ཨ་ནུ་ཏྟ་རཾ (སཱི.)];
ཨཱ་སི སོ [ཨཱ་སཱི་སོ (སཱི.), ཨཱ་དྷཱ་རོ (པཱི.)] ས་བྦ་ལོ་ཀ་སྶ, ཨཱ་ཧུ་ཏཱི་ནཾ པ་ཊི་གྒ་ཧོ.
༢༡༠. ‘‘‘ཁ་ཏྟི་ཡཱ ནེ་ག་མཱ ཙེ་ཝ, མ་ཧཱ་སཱ་ལཱ ཙ བྲཱ་ཧྨ་ཎཱ;
པ་ས་ནྣ་ཙི་ཏྟཱ སུ་མ་ནཱ, པཱུ་ག་དྷ་མྨཾ ཨ་ཀཾ་སུ ཏེ.
༢༡༡. ‘‘‘ཧ་ཏྠཱ་རོ་ཧཱ ཨ་ནཱི་ཀ་ཊྛཱ, ར་ཐི་ཀཱ པ་ཏྟི་ཀཱ་ར་ཀཱ;
པ་ས་ནྣ་ཙི་ཏྟཱ སུ་མ་ནཱ, པཱུ་ག་དྷ་མྨཾ ཨ་ཀཾ་སུ ཏེ.
༢༡༢. ‘‘‘ཨུ་གྒཱ ཙ རཱ་ཛ་པུ་ཏྟཱ ཙ, ཝེ་སི་ཡཱ་ནཱ ཙ བྲཱ་ཧྨ་ཎཱ;
པ་ས་ནྣ་ཙི་ཏྟཱ སུ་མ་ནཱ, པཱུ་ག་དྷ་མྨཾ ཨ་ཀཾ་སུ ཏེ.
༢༡༣. ‘‘‘ཨཱ་ལཱ༹་རི་ཀཱ ཀ་པྤ་ཀཱ [ཨཱ་ལཱ༹་རི་ཀཱ ཙ སཱུ་དཱ (སྱཱ.)] ཙ, ནྷཱ་པ་ཀཱ མཱ་ལ་ཀཱ་ར་ཀཱ;
པ་ས་ནྣ་ཙི་ཏྟཱ སུ་མ་ནཱ, པཱུ་ག་དྷ་མྨཾ ཨ་ཀཾ་སུ ཏེ.
༢༡༤. ‘‘‘ར་ཛ་ཀཱ པེ་ས་ཀཱ་རཱ ཙ, ཙ་མྨ་ཀཱ་རཱ ཙ ནྷཱ་པི་ཏཱ;
པ་ས་ནྣ་ཙི་ཏྟཱ སུ་མ་ནཱ, པཱུ་ག་དྷ་མྨཾ ཨ་ཀཾ་སུ ཏེ.
༢༡༥. ‘‘‘ཨུ་སུ་ཀཱ་རཱ བྷ་མ་ཀཱ་རཱ, ཙ་མྨ་ཀཱ་རཱ ཙ ཏ་ཙྪ་ཀཱ;
པ་ས་ནྣ་ཙི་ཏྟཱ སུ་མ་ནཱ, པཱུ་ག་དྷ་མྨཾ ཨ་ཀཾ་སུ ཏེ.
༢༡༦. ‘‘‘ཀ་མྨཱ་རཱ སོ་ཎྞ་ཀཱ་རཱ ཙ, ཏི་པུ་ལོ་ཧ་ཀ་རཱ ཏ་ཐཱ;
པ་ས་ནྣ་ཙི་ཏྟཱ སུ་མ་ནཱ, པཱུ་ག་དྷ་མྨཾ ཨ་ཀཾ་སུ ཏེ.
༢༡༧. ‘‘‘བྷ་ཏ་ཀཱ ཙེ་ཊ་ཀཱ ཙེ་ཝ, དཱ་ས་ཀ་མྨ་ཀ་རཱ བ་ཧཱུ;
ཡ་ཐཱ་ས་ཀེ་ན ཐཱ་མེ་ན, པཱུ་ག་དྷ་མྨཾ ཨ་ཀཾ་སུ ཏེ.
༢༡༨. ‘‘‘ཨུ་ད་ཧཱ་རཱ ཀ་ཊྛ་ཧཱ་རཱ, ཀ་སྶ་ཀཱ ཏི་ཎ་ཧཱ་ར་ཀཱ;
ཡ་ཐཱ་ས་ཀེ་ན ཐཱ་མེ་ན, པཱུ་ག་དྷ་མྨཾ ཨ་ཀཾ་སུ ཏེ.
༢༡༩. ‘‘‘པུ་པྥི་ཀཱ མཱ་ལི་ཀཱ ཙེ་ཝ, པ་ཎྞི་ཀཱ ཕ་ལ་ཧཱ་ར་ཀཱ;
ཡ་ཐཱ་ས་ཀེ་ན ཐཱ་མེ་ན, པཱུ་ག་དྷ་མྨཾ ཨ་ཀཾ་སུ ཏེ.
༢༢༠. ‘‘‘ག་ཎི་ཀཱ ཀུ་མྦྷ་དཱ་སཱི ཙ, པཱུ་ཝི་ཀཱ [སཱུ་པི་ཀཱ (ཀ.)] མ་ཙྪི་ཀཱ་པི ཙ;
ཡ་ཐཱ་ས་ཀེ་ན ཐཱ་མེ་ན, པཱུ་ག་དྷ་མྨཾ ཨ་ཀཾ་སུ ཏེ.
༢༢༡. ‘‘‘ཨེ་ཐ ས་བྦེ ས་མཱ་ག་ནྟྭཱ, ག་ཎཾ བ་ནྡྷཱ་མ ཨེ་ཀ་ཏོ;
ཨ་དྷི་ཀཱ་རཾ ཀ་རི་སྶཱ་མ, པུ་ཉྙ་ཀྑེ་ཏྟེ ཨ་ནུ་ཏྟ་རེ’.
༢༢༢. ‘‘ཏེ མེ སུ་ཏྭཱ་ན ཝ་ཙ་ནཾ, ག་ཎཾ བ་ནྡྷིཾ་སུ ཏཱ་ཝ་དེ;
ཨུ་པ་ཊྛཱ་ན་སཱ་ལཾ སུ་ཀ་ཏཾ, བྷི་ཀྑུ་ས་ངྒྷ་སྶ ཀཱ་ར་ཡུཾ.
༢༢༣. ‘‘ནི་ཊྛཱ་པེ་ཏྭཱ་ན ཏཾ སཱ་ལཾ, ཨུ་ད་གྒོ ཏུ་ཊྛ་མཱ་ན་སོ;
པ་རེ་ཏོ ཏེ་ཧི ས་བྦེ་ཧི, ས་མྦུ་དྡྷ་མུ་པ་ས་ངྐ་མིཾ.
༢༢༤. ‘‘ཨུ་པ་ས་ངྐ་མྨ ས་མྦུ་དྡྷཾ, ལོ་ཀ་ནཱ་ཐཾ ན་རཱ་ས་བྷཾ;
ཝ་ནྡི་ཏྭཱ ས་ཏྠུ་ནོ པཱ་དེ, ཨི་དཾ ཝ་ཙ་ན་མ་བྲ་ཝིཾ.
༢༢༥. ‘‘‘ཨི་མེ ཏཱི་ཎི ས་ཏཱ ཝཱི་ར, པུ་རི་སཱ ཨེ་ཀ་ཏོ ག་ཎཱ;
ཨུ་པ་ཊྛཱ་ན་སཱ་ལཾ སུ་ཀ་ཏཾ, ནི་ཡྻཱ་དེ་ནྟི [ནི་ཡྻཱ་ཏེ་ནྟི (སཱི.)] ཏུ་ཝཾ [ཏ་ཝཾ (སཱི.), ཏ་ཝ (སྱཱ.)] མུ་ནི’.
༢༢༦. ‘‘བྷི་ཀྑུ་ས་ངྒྷ་སྶ པུ་ར་ཏོ, ས་མྤ་ཊི་ཙྪ་ཏྭ ཙ་ཀྑུ་མཱ;
ཏི་ཎྞཾ ས་ཏཱ་ནཾ པུ་ར་ཏོ, ཨི་མཱ གཱ་ཐཱ ཨ་བྷཱ་ས་ཐ.
༢༢༧. ‘‘‘ཏི་ས་ཏཱ་པི ཙ ཛེ་ཊྛོ ཙ, ཨ་ནུ་ཝ་ཏྟིཾ་སུ ཨེ་ཀ་ཏོ;
ས་མྤ་ཏྟི་ཉྷི [ས་མྤ་ཏྟཱི་ཧི (སྱཱ. ཀ.)] ཀ་རི་ཏྭཱ་ན, ས་བྦེ ཨ་ནུ་བྷ་ཝི་སྶ་ཐ.
༢༢༨. ‘‘‘པ་ཙྪི་མེ བྷ་ཝེ ས་མྤ་ཏྟེ, སཱི་ཏི་བྷཱ་ཝ་མ་ནུ་ཏྟ་རཾ;
ཨ་ཛ་རཾ ཨ་མ་ཏཾ ས་ནྟཾ, ནི་བྦཱ་ནཾ ཕ་སྶ་ཡི་སྶ་ཐ’.
༢༢༩. ‘‘ཨེ་ཝཾ བུ་དྡྷོ ཝི་ཡཱ་ཀཱ་སི, ས་བྦ་ཉྙཱུ ས་མ་ཎུ་ཏྟ་རོ;
བུ་དྡྷ་སྶ ཝ་ཙ་ནཾ སུ་ཏྭཱ, སོ་མ་ན་སྶཾ པ་ཝེ་ད་ཡིཾ.
༢༣༠. ‘‘ཏིཾ་ས ཀ་པྤ་ས་ཧ་སྶཱ་ནི, དེ་ཝ་ལོ་ཀེ ར་མིཾ ཨ་ཧཾ;
དེ་ཝཱ་དྷི་པོ པ་ཉྩ་ས་ཏཾ, དེ་ཝ་ར་ཛྫ་མ་ཀཱ་ར་ཡིཾ.
༢༣༡. ‘‘ས་ཧ་སྶ་ཀྑ་ཏྟུཾ རཱ་ཛཱ ཙ, ཙ་ཀྐ་ཝ་ཏྟཱི ཨ་ཧོ་ས་ཧཾ;
དེ་ཝ་ར་ཛྫཾ ཀ་རོ་ནྟ་སྶ, མ་ཧཱ་དེ་ཝཱ ཨ་ཝ་ནྡི་སུཾ.
༢༣༢. ‘‘ཨི་དྷ མཱ་ནུ་ས་ཀེ ར་ཛྫཾ [ར་ཛྫེ (སཱི.)], པ་རི་སཱ ཧོ་ནྟི བ་ནྡྷ་ཝཱ;
པ་ཙྪི་མེ བྷ་ཝེ ས་མྤ་ཏྟེ, ཝཱ་སེ་ཊྛོ ནཱ་མ བྲཱ་ཧྨ་ཎོ.
༢༣༣. ‘‘ཨ་སཱི་ཏི་ཀོ་ཊི ནི་ཙ་ཡོ, ཏ་སྶ པུ་ཏྟོ ཨ་ཧོ་ས་ཧཾ;
སེ་ལོ ཨི་ཏི མ་མ ནཱ་མཾ, ཚ་ལ༹་ངྒེ པཱ་ར་མིཾ ག་ཏོ.
༢༣༤. ‘‘ཛ་ངྒྷཱ་ཝི་ཧཱ་རཾ ཝི་ཙ་རཾ, ས་སི་སྶེ་ཧི པུ་ར་ཀྑ་ཏོ;
ཛ་ཊཱ་བྷཱ་རི་ཀ་བྷ་རི་ཏཾ, ཀེ་ཎི་ཡཾ ནཱ་མ ཏཱ་པ་སཾ.
༢༣༥. ‘‘པ་ཊི་ཡ་ཏྟཱ་ཧུ་ཏིཾ དི་སྭཱ, ཨི་དཾ ཝ་ཙ་ན་མ་བྲ་ཝིཾ;
‘ཨཱ་ཝཱ་ཧོ ཝཱ ཝི་ཝཱ་ཧོ ཝཱ, རཱ་ཛཱ ཝཱ ཏེ ནི་མ་ནྟི་ཏོ’.
༢༣༦. ‘‘ཨཱ་ཧུ་ཏིཾ [ནཱ་ཧུ་ཏིཾ (?)] ཡི་ཊྛུ་ཀཱ་མོ་ཧཾ, བྲཱ་ཧྨ་ཎེ དེ་ཝ་ས་མྨ་ཏེ;
ན ནི་མ་ནྟེ་མི རཱ་ཛཱ་ནཾ, ཨཱ་ཧུ་ཏཱི མེ ན ཝི་ཛྫ་ཏི.
༢༣༧. ‘‘ན ཙ་ཏྠི མ་ཡ྄ཧ་མཱ་ཝཱ་ཧོ, ཝི་ཝཱ་ཧོ མེ ན ཝི་ཛྫ་ཏི;
ས་ཀྱཱ་ནཾ ན་ནྡི་ཛ་ན་ནོ, སེ་ཊྛོ ལོ་ཀེ ས་དེ་ཝ་ཀེ.
༢༣༨. ‘‘ས་བྦ་ལོ་ཀ་ཧི་ཏ་ཏྠཱ་ཡ, ས་བྦ་ས་ཏྟ་སུ་ཁཱ་ཝ་ཧོ;
སོ མེ ནི་མ་ནྟི་ཏོ ཨ་ཛྫ, ཏ་སྶེ་ཏཾ པ་ཊི་ཡཱ་ད་ནཾ.
༢༣༩. ‘‘ཏི་མྦ་རཱུ་ས་ཀ་ཝ་ཎྞཱ་བྷོ, ཨ་པྤ་མེ་ཡྻོ ཨ་ནཱུ་པ་མོ;
རཱུ་པེ་ནཱ་ས་དི་སོ བུ་དྡྷོ, སྭཱ་ཏ་ནཱ་ཡ ནི་མ་ནྟི་ཏོ.
༢༤༠. ‘‘ཨུ་ཀྐཱ་མུ་ཁ་པ་ཧ་ཊྛོ་ཝ, ཁ་དི་ར་ངྒཱ་ར་ས་ནྣི་བྷོ;
ཝི་ཛྫཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༤༡. ‘‘པ་བྦ་ཏ་གྒེ ཡ་ཐཱ ཨ་ཙྩི, པུ་ཎྞ་མཱ་ཡེ་ཝ ཙ་ནྡི་མཱ;
ན་ལ༹་གྒི་ཝ་ཎྞ་ས་ངྐཱ་སོ, སོ མེ བུ་དྡྷོ ནི་མ་ནྟི་ཏོ.
༢༤༢. ‘‘ཨ་ས་མྦྷཱི་ཏོ བྷ་ཡཱ་ཏཱི་ཏོ, བྷ་ཝ་ནྟ་ཀ་ར་ཎོ མུ་ནི;
སཱི་ཧཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༤༣. ‘‘ཀུ་ས་ལོ བུ་དྡྷ་དྷ་མྨེ་ཧི, ཨ་པ་ས་ཡ྄ཧོ པ་རེ་ཧི སོ;
ནཱ་གཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༤༤. ‘‘ས་དྡྷ་མྨཱ་ཙཱ་ར་ཀུ་ས་ལོ, བུ་དྡྷ་ནཱ་གོ ཨ་སཱ་དི་སོ;
ཨུ་ས་བྷཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༤༥. ‘‘ཨ་ན་ནྟ་ཝ་ཎྞོ ཨ་མི་ཏ་ཡ་སོ, ཝི་ཙི་ཏྟ་ས་བྦ་ལ་ཀྑ་ཎོ;
ས་ཀྐཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༤༦. ‘‘ཝ་སཱི ག་ཎཱི པ་ཏཱ་པཱི ཙ, ཏེ་ཛ་སྶཱི ཙ དུ་རཱ་ས་དོ;
བྲ་ཧྨཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༤༧. ‘‘པ་ཏྟ་དྷ་མྨོ ད་ས་བ་ལོ, བ་ལཱ་ཏི་བ་ལ་པཱ་ར་གོ;
དྷ་ར་ཎཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༤༨. ‘‘སཱི་ལ་ཝཱི་ཙི་ས་མཱ་ཀི་ཎྞོ, དྷ་མྨ་ཝི་ཉྙཱ་ཎ་ཁོ་བྷི་ཏོ;
ཨུ་ད་དྷཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༤༩. ‘‘དུ་རཱ་ས་དོ དུ་པྤ་ས་ཧོ, ཨ་ཙ་ལོ ཨུ་གྒ་ཏོ བྲ་ཧཱ;
ནེ་རཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༥༠. ‘‘ཨ་ན་ནྟ་ཉཱ་ཎོ ཨ་ས་མ་ས་མོ, ཨ་ཏུ་ལོ ཨ་གྒ་ཏཾ ག་ཏོ;
ག་ག་ནཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
པ་ནྣ་ར་ས་མཾ བྷཱ་ཎ་ཝཱ་རཾ.
༢༥༡. ‘‘པ་ཏི་ཊྛཱ བྷ་ཡ་བྷཱི་ཏཱ་ནཾ, ཏཱ་ཎོ ས་ར་ཎ་གཱ་མི་ནཾ;
ཨ་སྶཱ་ས་ཀོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༥༢. ‘‘ཨཱ་ས་ཡོ བུ་དྡྷི་མ་ནྟཱ་ནཾ, པུ་ཉྙ་ཀྑེ་ཏྟཾ སུ་ཁེ་སི་ནཾ;
ར་ཏ་ནཱ་ཀ་རོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༥༣. ‘‘ཨ་སྶཱ་ས་ཀོ ཝེ་ད་ཀ་རོ, སཱ་མ་ཉྙ་ཕ་ལ་དཱ་ཡ་ཀོ;
མེ་གྷཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༥༤. ‘‘ལོ་ཀ་ཙ་ཀྑུ མ་ཧཱ་ཏེ་ཛོ, ས་བྦ་ཏ་མ་ཝི་ནོ་ད་ནོ;
སཱུ་རི་ཡཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༥༥. ‘‘ཨཱ་ར་མྨ་ཎ་ཝི་མུ་ཏྟཱི་སུ, ས་བྷཱ་ཝ་ད་སྶ་ནོ མུ་ནི;
ཙ་ནྡཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༥༦. ‘‘བུ་དྡྷོ ས་མུ་སྶི་ཏོ ལོ་ཀེ, ལ་ཀྑ་ཎེ་ཧི ཨ་ལ་ངྐ་ཏོ;
ཨ་པྤ་མེ་ཡྻོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༥༧. ‘‘ཡ་སྶ ཉཱ་ཎཾ ཨ་པྤ་མེ་ཡྻཾ, སཱི་ལཾ ཡ་སྶ ཨ་ནཱུ་པ་མཾ;
ཝི་མུ་ཏྟི ཨ་ས་དི་སཱ ཡ་སྶ, སོ མེ བུ་དྡྷོ ནི་མ་ནྟི་ཏོ.
༢༥༨. ‘‘ཡ་སྶ དྷཱི་ཏི ཨ་ས་དི་སཱ, ཐཱ་མོ ཡ་སྶ ཨ་ཙི་ནྟི་ཡོ;
ཡ་སྶ པ་ར་ཀྐ་མོ ཛེ་ཊྛོ, སོ མེ བུ་དྡྷོ ནི་མ་ནྟི་ཏོ.
༢༥༩. ‘‘རཱ་གོ དོ་སོ ཙ མོ་ཧོ ཙ, ཝི་སཱ ས་བྦེ ས་མཱུ་ཧ་ཏཱ;
ཨ་ག་དཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༦༠. ‘‘ཀླེ་ས་བྱཱ་དྷི་བ་ཧུ་དུ་ཀྑ ས་བྦ་ཏ་མ་ཝི་ནོ་ད་ནོ [ཝི་ནོ་ད་ཀོ (སཱི. སྱཱ.)];
ཝེ་ཛྫཱུ་པ་མོ མ་ཧཱ་ཝཱི་རོ, སོ མེ བུ་དྡྷོ ནི་མ་ནྟི་ཏོ.
༢༦༡. ‘‘བུ་དྡྷོ་ཏི བྷོ ཡཾ ཝ་དེ་སི, གྷོ་སོ་པེ་སོ སུ་དུ་ལླ་བྷོ;
བུ་དྡྷོ བུ་དྡྷོ་ཏི སུ་ཏྭཱ་ན, པཱི་ཏི མེ ཨུ་ད་པ་ཛྫ་ཐ.
༢༦༢. ‘‘ཨ་བྦྷ་ནྟ་རཾ ཨ་ག་ཎྷ་ནྟཾ, པཱི་ཏི མེ བ་ཧི ནི་ཙྪ་རེ;
སོ་ཧཾ པཱི་ཏི་མ་ནོ ས་ནྟོ, ཨི་དཾ ཝ་ཙ་ན་མ་བྲ་ཝིཾ.
༢༦༣. ‘‘‘ཀ་ཧཾ ནུ ཁོ སོ བྷ་ག་ཝཱ, ལོ་ཀ་ཛེ་ཊྛོ ན་རཱ་ས་བྷོ;
ཏ་ཏྠ ག་ནྟྭཱ ན་མ་སྶི་སྶཾ, སཱ་མ་ཉྙ་ཕ་ལ་དཱ་ཡ་ཀཾ’.
༢༦༤. ‘‘‘པ་གྒ་ཡ྄ཧ ད་ཀྑི་ཎཾ བཱ་ཧུཾ, ཝེ་ད་ཛཱ་ཏོ ཀ་ཏ་ཉྫ་ལཱི;
ཨཱ་ཙི་ཀྑི མེ དྷ་མྨ་རཱ་ཛཾ, སོ་ཀ་ས་ལླ་ཝི་ནོ་ད་ནཾ.
༢༦༥. ‘‘‘ཨུ་དེ་ནྟཾ་ཝ མ་ཧཱ་མེ་གྷཾ, ནཱི་ལཾ ཨ་ཉྫ་ན་ས་ནྣི་བྷཾ;
སཱ་ག་རཾ ཝི་ཡ དི་སྶ་ནྟཾ, པ་སྶ་སེ་ཏཾ མ་ཧཱ་ཝ་ནཾ.
༢༦༦. ‘‘‘ཨེ་ཏྠ སོ ཝ་ས་ཏེ བུ་དྡྷོ, ཨ་ད་ནྟ་ད་མ་ཀོ མུ་ནི;
ཝི་ན་ཡ་ནྟོ ཙ ཝེ་ནེ་ཡྻེ, བོ་དྷེ་ནྟོ བོ་དྷི་པ་ཀྑི་ཡེ.
༢༦༧. ‘‘‘པི་པཱ་སི་ཏོ་ཝ ཨུ་ད་ཀཾ, བྷོ་ཛ་ནཾ་ཝ ཛི་གྷ་ཙྪི་ཏོ;
གཱ་ཝཱི ཡ་ཐཱ ཝ་ཙྪ་གི་དྡྷཱ, ཨེ་ཝཱ་ཧཾ ཝི་ཙི་ནིཾ ཛི་ནཾ.
༢༦༨. ‘‘‘ཨཱ་ཙཱ་ར་ཨུ་པ་ཙཱ་ར་ཉྙཱུ, དྷ་མྨཱ་ནུ་ཙྪ་ཝི་སཾ་ཝ་རཾ;
སི་ཀྑཱ་པེ་མི ས་ཀེ སི་སྶེ, ག་ཙྪ་ནྟེ ཛི་ན་ས་ནྟི་ཀཾ.
༢༦༩. ‘‘‘དུ་རཱ་ས་དཱ བྷ་ག་ཝ་ནྟོ, སཱི་ཧཱ་ཝ ཨེ་ཀ་ཙཱ་རི་ནོ;
པ་དེ པ་དཾ ནི་ཀྑི་པ་ནྟཱ, ཨཱ་ག་ཙྪེ་ཡྻཱ་ཐ མཱ་ཎ་ཝཱ.
༢༧༠. ‘‘‘ཨཱ་སཱི་ཝི་སོ ཡ་ཐཱ གྷོ་རོ, མི་ག་རཱ་ཛཱ་ཝ ཀེ་ས་རཱི;
མ་ཏྟོ་ཝ ཀུ་ཉྫ་རོ ད་ནྟཱི, ཨེ་ཝཾ བུ་དྡྷཱ དུ་རཱ་ས་དཱ.
༢༧༡. ‘‘‘ཨུ་ཀྐཱ་སི་ཏ་ཉྩ ཁི་པི་ཏཾ, ཨ་ཛ྄ཛྷུ་པེ་ཀྑི་ཡ མཱ་ཎ་ཝཱ;
པ་དེ པ་དཾ ནི་ཀྑི་པ་ནྟཱ, ཨུ་པེ་ཐ བུ་དྡྷ་ས་ནྟི་ཀཾ.
༢༧༢. ‘‘‘པ་ཊི་ས་ལླཱ་ན་ག་རུ་ཀཱ, ཨ་པྤ་ས་དྡཱ དུ་རཱ་ས་དཱ;
དུ་རཱུ་པ་ས་ངྐ་མཱ བུ་དྡྷཱ, ག་རཱུ ཧོ་ནྟི ས་དེ་ཝ་ཀེ.
༢༧༣. ‘‘‘ཡ་དཱ་ཧཾ པ་ཉྷཾ པུ་ཙྪཱ་མི, པ་ཊི་ས་མྨོ་ད་ཡཱ་མི ཝཱ;
ཨ་པྤ་ས་དྡཱ ཏ་དཱ ཧོ་ཐ, མུ་ནི་བྷཱུ་ཏཱ་ཝ ཏི་ཊྛ་ཐ.
༢༧༤. ‘‘‘ཡཾ སོ དེ་སེ་ཏི ས་མྦུ་དྡྷོ [ས་དྡྷ་མྨཾ (སཱི. སྱཱ.)], ཁེ་མཾ ནི་བྦཱ་ན་པ་ཏྟི་ཡཱ;
ཏ་མེ་ཝ་ཏྠཾ ནི་སཱ་མེ་ཐ, ས་དྡྷ་མྨ་ས་ཝ་ནཾ སུ་ཁཾ’.
༢༧༥. ‘‘ཨུ་པ་ས་ངྐ་མྨ ས་མྦུ་དྡྷཾ, ས་མྨོ་དིཾ མུ་ནི་ནཱ ཨ་ཧཾ;
ཏཾ ཀ་ཐཾ ཝཱི་ཏི་སཱ་རེ་ཏྭཱ, ལ་ཀྑ་ཎེ ཨུ་པ་དྷཱ་ར་ཡིཾ.
༢༧༦. ‘‘ལ་ཀྑ་ཎེ དྭེ ཙ ཀ་ངྑཱ་མི, པ་སྶཱ་མི ཏིཾ་ས་ལ་ཀྑ་ཎེ;
ཀོ་སོ་ཧི་ཏ་ཝ་ཏྠ་གུ་ཡ྄ཧཾ, ཨི་དྡྷི་ཡཱ ད་སྶ་ཡཱི མུ་ནི.
༢༧༧. ‘‘ཛི་ཝ྄ཧཾ ནི་ནྣཱ་མ་ཡི་ཏྭཱ་ན, ཀ་ཎྞ་སོ་ཏེ ཙ ནཱ་སི་ཀེ;
པ་ཊི་མ་སི ན་ལཱ་ཊ་ནྟཾ, ཀེ་ཝ་ལཾ ཚཱ་ད་ཡཱི ཛི་ནོ.
༢༧༨. ‘‘ཏ་སྶཱ་ཧཾ ལ་ཀྑ་ཎེ དི་སྭཱ, པ་རི་པུ་ཎྞེ ས་བྱ་ཉྫ་ནེ;
བུ་དྡྷོ་ཏི ནི་ཊྛཾ ག་ནྟྭཱ་ན, ས་ཧ སི་སྶེ་ཧི པ་བྦ་ཛིཾ.
༢༧༩. ‘‘ས་ཏེ་ཧི ཏཱི་ཧི ས་ཧི་ཏོ, པ་བྦ་ཛིཾ ཨ་ན་གཱ་རི་ཡཾ;
ཨ་དྡྷ་མཱ་སེ ཨ་ས་མྤ་ཏྟེ, ས་བྦེ པ་ཏྟཱ་མྷ ནི་བྦུ་ཏིཾ.
༢༨༠. ‘‘ཨེ་ཀ་ཏོ ཀ་མྨཾ ཀ་ཏྭཱ་ན, པུ་ཉྙ་ཀྑེ་ཏྟེ ཨ་ནུ་ཏྟ་རེ;
ཨེ་ཀ་ཏོ སཾ་ས་རི་ཏྭཱ་ན, ཨེ་ཀ་ཏོ ཝི་ནི་ཝ་ཏྟ་ཡུཾ.
༢༨༡. ‘‘གོ་པཱ་ན་སི་ཡོ ད་ཏྭཱ་ན, པཱུ་ག་དྷ་མྨེ ཝ་སིཾ ཨ་ཧཾ;
ཏེ་ན ཀ་མྨེ་ན སུ་ཀ་ཏེ་ན, ཨ་ཊྛ ཧེ་ཏཱུ ལ་བྷཱ་མ་ཧཾ.