༡༠. ཨ་ཛི་ཏ་ཏྠེ་ར་ཨ་པ་དཱ་ནཾ
༤༨༤. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨཱ་ན པཱ་ར་གཱུ;
ཨ་ཛ྄ཛྷོ་གཱ་ཧེ་ཏྭཱ ཧི་མ་ཝ་ནྟཾ, ནི་སཱི་དི ལོ་ཀ་ནཱ་ཡ་ཀོ.
༤༨༥. ‘‘ནཱ་ཧཾ ཨ་དྡ་ཀྑིཾ [པ་སྶཱ་མི (?)] ས་མྦུ་དྡྷཾ, ན་པི ས་དྡཾ སུ་ཎོ་མ་ཧཾ;
མ་མ བྷ་ཀྑཾ ག་ཝེ་ས་ནྟོ, ཨཱ་ཧི་ཎྜཱ་མི ཝ་ནེ ཨ་ཧཾ [ཏ་དཱ (སཱི.)].
༤༨༦. ‘‘ཏ་ཏྠ་དྡ་སྶཱ་སིཾ ས་མྦུ་དྡྷཾ, དྭ་ཏྟིཾ་ས་ཝ་ར་ལ་ཀྑ་ཎཾ;
དི་སྭཱ་ན ཝི་ཏྟི་མཱ་པ་ཛྫིཾ [ཙི་ཏྟ་མཱ་པ་ཛྫི (སཱི.), ཙི་ཏྟ་མཱ་པ་ཛྫིཾ (སྱཱ.)], ས་ཏྟོ ཀོ ནཱ་མ་ཡཾ བྷ་ཝེ.
༤༨༧. ‘‘ལ་ཀྑ་ཎཱ་ནི ཝི་ལོ་ཀེ་ཏྭཱ, མ་མ ཝི་ཛྫཾ ཨ་ནུ་སྶ་རིཾ;
སུ་ཏ་ཉྷི མེ་ཏཾ ཝུ་ཌྜྷཱ་ནཾ, པ་ཎྜི་ཏཱ་ནཾ སུ་བྷཱ་སི་ཏཾ.
༤༨༨. ‘‘ཏེ་སཾ ཡ་ཐཱ ཏཾ ཝ་ཙ་ནཾ, ཨ་ཡཾ བུ་དྡྷོ བྷ་ཝི་སྶ་ཏི;
ཡཾ་ནཱུ་ནཱ་ཧཾ ས་ཀྐ་རེ་ཡྻཾ, ག་ཏིཾ མེ སོ་དྷ་ཡི་སྶ་ཏི.
༤༨༩. ‘‘ཁི་པྤཾ ཨ་སྶ་མ་མཱ་ག་ནྟྭཱ, མ་དྷུ་ཏེ་ལཾ ག་ཧིཾ ཨ་ཧཾ;
ཀོ་ལ་མྦ་ཀཾ ག་ཧེ་ཏྭཱ་ན, ཨུ་པ་ག་ཙྪིཾ ཝི་ནཱ་ཡ་ཀཾ [ན་རཱ་ས་བྷཾ (སཱི.)].
༤༩༠. ‘‘ཏི་ད་ཎྜ་ཀེ ག་ཧེ་ཏྭཱ་ན, ཨ་བྦྷོ་ཀཱ་སེ ཋ་པེ་ས་ཧཾ;
པ་དཱི་པཾ པ་ཛྫ་ལི་ཏྭཱ་ན, ཨ་ཊྛ་ཀྑ་ཏྟུཾ ཨ་ཝ་ནྡ་ཧཾ.
༤༩༡. ‘‘ས་ཏྟ་ར་ཏྟི་ནྡི་ཝཾ བུ་དྡྷོ, ནི་སཱི་དི པུ་རི་སུ་ཏྟ་མོ;
ཏ་ཏོ ར་ཏྱཱ ཝི་ཝ་སཱ་ནེ, ཝུ་ཊྛཱ་སི ལོ་ཀ་ནཱ་ཡ་ཀོ.
༤༩༢. ‘‘པ་ས་ནྣ་ཙི་ཏྟོ སུ་མ་ནོ, ས་བྦ་ར་ཏྟི་ནྡི་ཝཾ ཨ་ཧཾ;
དཱི་པཾ བུ་དྡྷ་སྶ པཱ་དཱ་སིཾ, པ་ས་ནྣོ སེ་ཧི པཱ་ཎི་བྷི.
༤༩༣. ‘‘ས་བྦེ ཝ་ནཱ ག་ནྡྷ་མ་ཡཱ, པ་བྦ་ཏེ ག་ནྡྷ་མཱ་ད་ནེ;
བུ་དྡྷ་སྶ ཨཱ་ནུ་བྷཱ་ཝེ་ན, ཨཱ་ག་ཙྪུཾ བུ་དྡྷ་ས་ནྟི་ཀཾ [ཨུ་པ་ག་ཙྪུཾ ཏ་དཱ ཛི་ནཾ (སཱི.)].
༤༩༤. ‘‘ཡེ ཀེ་ཙི པུ་པྥ་ག་ནྡྷཱ་སེ, པུ་པྥི་ཏཱ དྷ་ར་ཎཱི་རུ་ཧཱ;
བུ་དྡྷ་སྶ ཨཱ་ནུ་བྷཱ་ཝེ་ན, ས་བྦེ ས་ནྣི་པ་ཏུཾ ཏ་དཱ.
༤༩༥. ‘‘ཡཱ་ཝ་ཏཱ ཧི་མ་ཝ་ནྟ་མྷི, ནཱ་གཱ ཙ ག་རུ་ལཱ༹ ཨུ་བྷོ;
དྷ་མྨ་ཉྩ སོ་ཏུ་ཀཱ་མཱ ཏེ, ཨཱ་ག་ཙྪུཾ བུ་དྡྷ་ས་ནྟི་ཀཾ.
༤༩༦. ‘‘དེ་ཝ་ལོ ནཱ་མ ས་མ་ཎོ, བུ་དྡྷ་སྶ ཨ་གྒ་སཱ་ཝ་ཀོ;
ཝ་སཱི་ས་ཏ་ས་ཧ་སྶེ་ཧི, བུ་དྡྷ་ས་ནྟི་ཀུ་པཱ་ག་མི.
༤༩༧. ‘‘པ་དུ་མུ་ཏྟ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ;
བྷི་ཀྑུ་ས་ངྒྷེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.
༤༩༨. ‘‘‘ཡོ མེ དཱི་པཾ པ་དཱི་པེ་སི, པ་ས་ནྣོ སེ་ཧི པཱ་ཎི་བྷི;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ.
༤༩༩. ‘‘‘ས་ཊྛི ཀ་པྤ་ས་ཧ་སྶཱ་ནི, དེ་ཝ་ལོ་ཀེ ར་མི་སྶ་ཏི;
ས་ཧ་སྶ་ཀྑ་ཏྟུཾ རཱ་ཛཱ ཙ, ཙ་ཀྐ་ཝ་ཏྟཱི བྷ་ཝི་སྶ་ཏི.
སོ་ལ༹་ས་མཾ བྷཱ་ཎ་ཝཱ་རཾ.
༥༠༠. ‘‘‘ཚ་ཏྟི་ས་ཀྑ་ཏྟུཾ དེ་ཝི་ནྡོ, དེ་ཝ་ར་ཛྫཾ ཀ་རི་སྶ་ཏི;
པ་ཐ་ཝི་ཡཾ ས་ཏྟ་ས་ཏཾ, ཝི་པུ་ལཾ ར་ཛྫཾ ཀ་རི་སྶ་ཏི.
༥༠༡. ‘‘‘པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ;
ཨི་མི་ནཱ དཱི་པ་དཱ་ནེ་ན, དི་བྦ་ཙ་ཀྑུ བྷ་ཝི་སྶ་ཏི.
༥༠༢. ‘‘‘ས་མ་ནྟ་ཏོ ཨ་ཊྛ་ཀོ་སཾ [ཨ་ཌྜྷ་ཀོ་སཾ (སཱི. སྱཱ.)], པ་སྶི་སྶ་ཏི ཨ་ཡཾ ས་དཱ;
དེ་ཝ་ལོ་ཀཱ ཙ་ཝ་ནྟ་སྶ, ནི་བྦ་ཏྟ་ནྟ་སྶ ཛ་ནྟུ་ནོ.
༥༠༣. ‘‘‘དི་ཝཱ ཝཱ ཡ་དི ཝཱ ར་ཏྟིཾ, པ་དཱི་པཾ དྷཱ་ར་ཡི་སྶ་ཏི;
ཛཱ་ཡ་མཱ་ན་སྶ ས་ཏྟ་སྶ, པུ་ཉྙ་ཀ་མྨ་ས་མ་ངྒི་ནོ.
༥༠༤. ‘‘‘ཡཱ་ཝ་ཏཱ ན་ག་རཾ ཨཱ་སི, ཏཱ་ཝ་ཏཱ ཛོ་ཏ་ཡི་སྶ་ཏི;
ཨུ་པ་པ་ཛྫ་ཏི ཡཾ ཡོ་ནིཾ, དེ་ཝ་ཏྟཾ ཨ་ཐ མཱ་ནུ་སཾ.
༥༠༥. ‘‘‘ཨ་སྶེ་ཝ དཱི་པ་དཱ་ན་སྶ, [ཨ་ཊྛ་དཱི་པ་ཕ་ལེ་ན ཧི; ཨུ་པ་ཊྛི་སྶ་ནྟི་མཾ ཛ་ནྟུཾ (སྱཱ.), ཨ་ཊྛ དཱི་པཱ ཕ་ལེ་ན ཧི; ན ཛ་ཧི་སྶ་ནྟི’མཾ ཛ་ནྟུཾ (?)] ཨ་ཊྛ་དཱི་པ་ཕ་ལེ་ན ཧི;
ན ཛ་ཡི་སྶ་ནྟི་མཾ ཛ་ནྟཱུ [ཨ་ཊྛ་དཱི་པ་ཕ་ལེ་ན ཧི; ཨུ་པ་ཊྛི་སྶ་ནྟི་མཾ ཛ་ནྟུཾ (སྱཱ.), ཨ་ཊྛ དཱི་པཱ ཕ་ལེ་ན ཧི; ན ཛ་ཧི་སྶ་ནྟི’མཾ ཛ་ནྟུཾ (?)], དཱི་པ་དཱ་ན་སྶི་དཾ ཕ་ལཾ.
༥༠༦. ‘‘‘ཀ་པྤ་ས་ཏ་ས་ཧ་སྶ་མྷི, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༥༠༧. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
ས་བྦཱ་ས་ཝེ པ་རི་ཉྙཱ་ཡ, ནི་བྦཱ་ཡི་སྶ་ཏི་ནཱ་ས་ཝོ.
༥༠༨. ‘‘‘ཏོ་ས་ཡི་ཏྭཱ་ན ས་མྦུ་དྡྷཾ, གོ་ཏ་མཾ ས་ཀྱ་པུ་ངྒ་ཝཾ;
ཨ་ཛི་ཏོ ནཱ་མ ནཱ་མེ་ན, ཧེ་སྶ་ཏི ས་ཏྠུ སཱ་ཝ་ཀོ’.
༥༠༩. ‘‘ས་ཊྛི ཀ་པྤ་ས་ཧ་སྶཱ་ནི, དེ་ཝ་ལོ་ཀེ ར་མིཾ ཨ་ཧཾ;
ཏ་ཏྲཱ་པི མེ དཱི་པ་ས་ཏཾ, ཛོ་ཏ་ཏེ ནི་ཙྩ་ཀཱ་ལི་ཀཾ [ས་བྦ་ཀཱ་ལི་ཀཾ (སཱི.)].
༥༡༠. ‘‘དེ་ཝ་ལོ་ཀེ མ་ནུ་སྶེ ཝཱ, ནི་དྡྷཱ་ཝ་ནྟི པ་བྷཱ མ་མ;
བུ་དྡྷ་སེ་ཊྛཾ ས་རི་ཏྭཱ་ན, བྷི་ཡྻོ ཧཱ་སཾ ཛ་ནེ་ས་ཧཾ.
༥༡༡. ‘‘ཏུ་སི་ཏཱ་ཧཾ ཙ་ཝི་ཏྭཱ་ན, ཨོ་ཀྐ་མིཾ མཱ་ཏུ་ཀུ་ཙྪི་ཡཾ;
ཛཱ་ཡ་མཱ་ན་སྶ ས་ནྟ་སྶ, ཨཱ་ལོ་ཀོ ཝི་པུ་ལོ ཨ་ཧུ.
༥༡༢. ‘‘ཨ་གཱ་རཱ ཨ་བྷི་ནི་ཀྑ་མྨ, པ་བྦ་ཛིཾ ཨ་ན་གཱ་རི་ཡཾ;
བཱ་ཝ་རིཾ ཨུ་པ་ས་ངྐ་མྨ, སི་སྶ་ཏྟཾ ཨ་ཛ྄ཛྷུ་པཱ་ག་མིཾ.
༥༡༣. ‘‘ཧི་མ་ཝ་ནྟེ ཝ་ས་ནྟོ་ཧཾ, ཨ་སྶོ་སིཾ ལོ་ཀ་ནཱ་ཡ་ཀཾ;
ཨུ་ཏྟ་མ་ཏྠཾ ག་ཝེ་ས་ནྟོ, ཨུ་པ་ག་ཙྪིཾ ཝི་ནཱ་ཡ་ཀཾ.
༥༡༤. ‘‘ད་ནྟོ བུ་དྡྷོ ད་མེ་ཏཱ་ཝཱི, ཨོ་གྷ་ཏི་ཎྞོ ནི་རཱུ་པ་དྷི;
ནི་བྦཱ་ནཾ ཀ་ཐ་ཡཱི བུ་དྡྷོ, ས་བྦ་དུ་ཀྑ་པྤ་མོ་ཙ་ནཾ.
༥༡༥. ‘‘ཏཾ མེ ཨཱ་ག་མ་ནཾ སི་དྡྷཾ, ཏོ་སི་ཏོ་ཧཾ མ་ཧཱ་མུ་ནིཾ;
ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ནཾ.
༥༡༦. ‘‘ས་ཏ་ས་ཧ་སྶི་ཏོ ཀ་པྤེ, ཡཾ དཱི་པ་མ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, དཱི་པ་དཱ་ན་སྶི་དཾ ཕ་ལཾ.
༥༡༧. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༥༡༨. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༥༡༩. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨ་ཛི་ཏོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨ་ཛི་ཏ་ཏྠེ་ར་སྶཱ་པ་དཱ་ནཾ ད་ས་མཾ.
པི་ལི་ནྡ་ཝ་ཙྪ་ཝ་གྒོ ཙ་ཏྟཱ་ལཱི་ས་མོ.
ཏ་སྶུ་དྡཱ་ནཾ –
པི་ལི་ནྡ་ཝ་ཙྪོ སེ་ལོ ཙ, ས་བྦ་ཀི་ཏྟཱི མ་དྷུཾ་ད་དོ;
ཀཱུ་ཊཱ་གཱ་རཱི བཱ་ཀུ་ལོ ཙ, གི་རི ས་ལ༹་ལ་ས་ཝ྄ཧ་ཡོ.
ས་བྦ་དོ ཨ་ཛི་ཏོ ཙེ་ཝ, གཱ་ཐཱ་ཡོ ག་ཎི་ཏཱ ཨི་ཧ;
ས་ཏཱ་ནི པ་ཉྩ གཱ་ཐཱ་ནཾ, ཝཱི་ས་ཏི ཙ ཏ་དུ་ཏྟ་རཱི་ཏི.
ཨ་ཐ ཝ་གྒུ་དྡཱ་ནཾ –
པ་དུ་མཱ་ར་ཀྑ་དོ ཙེ་ཝ, ཨུ་མཱ ག་ནྡྷོ་ད་ཀེ་ན ཙ;
ཨེ་ཀ་པ་དྨ ས་དྡ་ས་ཉྙཱི, མ་ནྡཱ་རཾ བོ་དྷི་ཝ་ནྡ་ཀོ.
ཨ་ཝ་ཊ་ཉྩ པི་ལི་ནྡི [ཨེ་ཝ་མེ་ཝ དི་སྶ་ཏི] ཙ, གཱ་ཐཱ་ཡོ ག་ཎི་ཏཱ ཨི་ཧ;
ཙ་ཏུ་ས་ཏྟ་ཏི གཱ་ཐཱ་ཡོ, ཨེ་ཀཱ་ད་ས ས་ཏཱ་ནི ཙ.
པ་དུ་མ་ཝ་གྒ་ད་ས་ཀཾ.